مربع 11 ام سنط وبالعكس

[صالح ابوشوارب]

هذه قصة حقيقية حصلت لي وأنا في سنة أولى وسطي وكان يوم عيد الفطر ونويت الذهاب من مربع 11 إلى أم سنط حتى اقدم تهاني العيد لصديقي محمد وعائلته وكان معاي عشرة قروش ودقيت الكداري من اخر المحطة حتي السوق ومن السوق ركبت بصات ام سنط بخمسة قروش وباقي لي خمسة قروش للرجعة والباقي حيكون كداري ووصلت أم سنط وقضينا يوم جميل بالجناين
وفي العصرية عندما نويت الرجوع لمدني قالت لي ام صديقي (محمد ) بالله شيل جدك عبدالله معاك ووديه البيت (( وطبعا هو ضرير الله يرحمه )) طبعا منزل جدكم عبدالله في مربع ((11)) وسلمتني ستة قروش للمواصلات خمسة قروش من ام سنط الي السوق وقرش واحد من السوق الي مربع ((11 ))
طبعا انا ماعندي قرش اركب بيه من السوق لمربع (11) المهم ركبنا بص ام سنط ودفعت العشرة قروش لي ولجدكم عبدالله والان باقي قرش واحد حق جدكم لمربع (11 )
المهم وصلنا السوق ومشينا حتي وصلنا موقف جبرونا وانتظرت حتي طلع الباص المليان والباص البعده ركبت جدكم قدام وقلت لجدي عبدالله انا راكب ورا
ومشيت للكمساري واديتو القرش الباقي وقلت ليه عمك الراكب قدام تنزلوا محطة الاشراف وخلي بالك ماتفوتو المحطة
و أخوكم عض جلابية العيد وهاك ياجري وكل مرة استريح اتلفت أشوف البص حتى وصلت محطة الأشراف وقعدت انتظر الباص جنب بيت ناس ( فاطنه بت جبرالله الحلبيه ) آخد نفسي وبعد ما وصل البص فتحت الباب لجدي عبدالله كأني كنت راكب معاه ووصلته الي البيت الله يرحمه
أيام ما أحلاها

[امير عبدالباقي]

والله ياخوي صالح بالغته اصلو مالقيت زول بتعرفو من الراكبين البص ناس مدني سباقين للخير معروفين ؛ لو كلمت الكمساري ساي كان شالك مجاني لكن جد مشوار بعيد والله روحك طلعت لكن فعلا من الزكريات الجميله فعلا
ودشوارب ليه ماشتركته في المارسونات كان جبتلينا ميداليه علي الاقل رفعت بيها راس الجزيره

[aborawan]

يا عمنا الظاهر عليك تفتحية شديد قلتا احسن تتقي شر الكمساري عشان ما يكورك ليك باعلي حسو ويسمع البص كلو كبببببببببببير كده وما عندك قروووش :D:D

وعلى قولة ابوالنسب امير كان تشترك لينا في دورة التضامن الاسلامي في سباق ال1000 متر وتطلع لينا بالميدالية الذهبية في العدو السريع :):)

ايام ويا احلاها من ايام غايتو احنا جينا على الدنيا واتمتعنا بالايام الجميلة دي بالحكاوي ( قصص الحبوبات ) نسال الله للجيل القادم من بعدنا انو يعيش ايام جلو وجميلة لانو احنا خلاص بعد كده القطر فاتنا :):)

دعواتي عمي العزيز صالح ومتعك الله بالصحة والعافية وحفظك الله من كل شر وابقاك

[نيازى كشك]

ههههههههههههههههها
اخى صلاح
انت كان تتعنكش فى ورة الباص بدل الجرى
لاكن الزكريات ما احلها
وما اجملها
تشكر اخى صلاح

[ضياء الدين احمد]

ههههههههههههههههههههه هسع يابوشوارب لو قالو ليك اجري عشره امتار بتفتر يا حليل زمن الصبينه لكن والله الزكريات جميله وقبل فتره كنت في رحله ومسكوني ليك ناس نجيب شندقاوي واحد من اولاد عثمان محمد نور وهاك ياذكريات عن مربع 11 والاسر وعلاقات القربى بيناتم وطبعا انا غايبه عني حاجات كتيره لاني ماعشت في المربع فارجو يا اخونا ابو شوارب ان تتحفنا دائما بالذكريات

[صالح ابوشوارب]

الاخ امير

لك الود والاحترامات

والله يا امير ما عارف اتصرفت كده ليه

لكن ممكن عزة نفس او ما عايز أوري زول ماعندي قرش

لكن بخصوص اشتراكي بالمارسون عشان ارفع راس الجزيرة

(( علي قول خدوري )) انا قادر ارفع راسي ههههههه

وشكرا

[صالح ابوشوارب]

عزيزي ابو روان

لك الشكر لتعبك معانا وفي امانة سوف تصلك

واما بخصوص الكمساري فانت صادق

وبعدين يا ابو روان انت من جيل الداردمة ولا جيل آيسكريم

وشكرا لدعواتك الصادقة وربنا يتم ليك علي خير

وايه قصة ابو النسب انت حولت سكة القطر ولا ايه

--------------------------------
ابو شوارب

[صالح ابوشوارب]

الاخ نيازي

شكرا لمرورك لمربع 11

وزمان ما في زحمة ولا عنكشة

-----------------------------
ابو شوارب والبخت ضارب

[صالح ابوشوارب]

الاخ ضياء

انا سألتك سؤال واكرره

كيف اخونا حسن وداعة واخباره بالله بالبريد الشخصي

ويا حليل ايام زمان وسوف احكي ليك قصص كلما رقنا

وشكرا ليك ومبروك البرونز

-------------------------------------------------------
ابو شوارب والبخت ضارب

[rasheed]

والله يا أبو شوارب أنا نفسي من القصة ساااااااي أنقطع خليك أنت جاري من الموقف لحدي الأشراف ،، ما شاء الله عليك زقله بس ،، بعدين عندي سؤالين حلوات للذكريات الحلوة ديه أولاً الباص باص عباس ولا شنو ،، وطبعاً عارف حكاوي باص عباس ،، بعدين محطة الأشراف دي مش بين الحجر والزاوية اللي جنب بيت ناس أستاذ حبيب ،، الله يرحمه اللي هي مدارس الأهلية ، ومنها تخش على فريق الحلبة وناس غاندي الريح (جرجير) وناس قرضة ولا كيف أن شاء الله الذاكرة ما تكون خانتني ومتذكر كويس ،، ولك الشكر على هذه اللمحة الجميلة من ذكريات مدني زمان ،، والله يديك العافية وطولة العمر آميييين يا رب ،، الرشيد ركس

[صالح ابوشوارب]

الاخ الرشيد

لك حبي وتقديري لتفاعلك

اولا النفس بيقوم اذا دخل الكبر !!!! يارشيد كنا بنقرا قصة

ارسين لوبين تحت الضل بنفس واحد (( شباب يارشيد ))

اما محطة الاشراف فعلا انت متذكرا وهي بالظبط مابين

محطة ودقيحة ومحطة آخر الشارع ( وكنا زمان نسميها محطة الحلبة )

والباص فعلا بص عباس الهرة

___________________
ابو شوارب والبخت ضارب

[الزمن المريح]

الله يخليك يا استاذ صالح

و الله جريتك دية تكون اجمل جرية ،، و لى فى وحدة ثانية فى المظاهرات

طبعا و بالمناسبة ممكن تحدد لينا مربع 11
فقط للمعرفة لاننى افتكر انه من يمين شارع سنكات جبرونا و انت ماش حتى شفخانة ابوزيد و لى غلطان

[عزيز عيسى]

]

[عزيز عيسى]

الاخ صالح أبوشوارب،
يا راجل يا طيب،
والله قصتك جميلة جدا واهي دي المروة ايام زمان.. وبرضو كويس الحكاية فيها رياضة وتضحية..
ذكرتني زمان لما كنا طلبة.. كنا بنجي نقيف عند البوابة ونأشر لعربات مشروع الجزيرة علشان يوصلونا مارنجان.. تتذكر الطريقة اسمها شنو؟؟.. كنا بنسميها (يا عم) يعنى البيقيف في المحل داك بيكون ما عنده قروش (معلم الله)..
من الطرائف الظريفة اذكر عم رفيده من بركات كان يوم سايق ليه لاندروفر وما كان معاه أي زول.. قمنا أشرنا ليه وبنصيح يا عم ياعم ياعم علشان يوصلنا.. الظاهر عمك كان اليوم داك كابسه معاه شويه.. قام مشى وقف بعيد وقمنا جرينا حصلناه واحدين وضعوا رجلينهم في الصدام الخلفى وقربوا يركبوا وراء اللاندروفر.. بعد شويه عمك قام قال لينا اقيفوا اقيفوا.. طبعا وقفنا ما ركبنا.. قام قال اسمعوا انتو بتكوركوا لى يا عم يا عم.. وروني أنا عم منو فيكم؟؟.. طبعا سكتنا وكان كل واحد يتلفت يعاين للثاني وما قدرنا نرد عليه.. بعد شويه قام دور عربيته وفات.. طبعا ما شال ليه ولا واحد..

مع خالص ودي،،

عزيز

[صالح ابوشوارب]

.
الاخ الزمن المريح

شكرا ليك اسف للتاخير

فعلا مربع 11 يبدا من بداية المدرسة الاهلية أ

وشارع سنكات وجامع ابو زيد والله اعلم

[صالح ابوشوارب]

.
الاخ العزيز عزيز

اسمك دا بيذكرني بي واحد في السوق الجديد

سوف احكي ليك بيه في وقت مناسب

والله يا عزيز ذكرتني بي كلمات كانت في وقتنا

وهي ( ياعم ) اذا عايز تصل اي مكان

( معلم الله ) اذا دخلت مطعم واكلت يعني بعد ما تاكل تقول معلم الله

خلاص الموضوع انتهي ( لكن الان عينك ما تشوف الا النور )

فردتك ابو شوارب

[أبوبكرحامد]

تعرف ياأبوشوارب القصة حلوة ومؤثرة بس أنا لفت انتباهى جانب مهم وهو هذا الإخلاص والإصرار على زيارة صديقك فى العيد غصباً للظروف والحال الحرن ، كما أن فيها الكثير من الكبرياء وعزة النفس لعدم توافر المال وعدم الرغبة فى أخذ المبلغ من أى شخص آخر ، ياسلام ياشوارب عليك وعلى الزمن الجميل اللى راح وزى ماقال المغنى " هيهات يعود الكان وللا .
ود الماذون

[salah]

كنت واخي الذي يصغرني نعد العدة لاستقبال سيد المائدةـــ الفول ــ عندما لم نكن نملك غيره في ذلك اليوم آن طرق الباب ابن خالتي القادم من مدينة أخري ــ طبعا ماكان فاطر ــ لم نكن نملك الا ان ادعينا انا وأخي اننا ـ صائميين ـ ذلك اليوم حيث ان العزيز الفول لم يكن يكفي لثلاثتنا .
لك التحية ابو الشوارب ــ اسم علي مسمي ــ وانت تعيد لي هذا الزمن الذي تحكي عنه البلابل في ــشوق للشينة لو صعبة ــ او كما قالوا... فما اروعكم ابناء بلدي عندما اقارن هذا الموقف بآخر في هولنده عندما يظل المصاب ملقي علي الارض ولاأحد يمد له يد العون وان كان ظمآنا فقط... فالارض بكم زرع أخضر
ولك الود وكل كل الاحترام

[عمك تنقو]

الله الله
علي الأيام الجميلة

وياسلام عندما ذكرت المرحلة الوسطي
ومنها استشفيت أنك عشت في العصر الذهبي
برغم ضيق ذات اليد ولكن الحياة كانت حلوة والاعتماد علي النفس بدون حنكشة اليومين ديل 00 والشي العملتو يا أبوشراب يدل علي الأصالة والشهامة وحسن التصرف والتعفف

وعشت هذه اللوحة الحقيقية بشغف وأنا أتصور جريتك وانت تتلفت

صدقني فيلمك ده في سينما الخواجة ما دخلناهو زمان

خطير يا أبو شراب !

[صالح ابوشوارب]

الاخ العزيز / ابو بكر

شكرا جزيلا ياستاذ يا اصيل

دائما ألاحظ في تعقيبك علي المواضيع بانك تقرا من داخل السطور

وشكر ا لك يا استاذ ابو بكر

[صالح ابوشوارب]

شكر ليك الاخ صلاح

والله انت واخوك ذكرتوني بالاية الكريمه التي تقول
ويؤثرون على انفسهم ولو كان بهم خصاصة ومن يوق شح نفسه فأولئك هم المفلحون» صدق الله العظيم

ومعنى الإيثار : وهو ان يفضل الإنسان غيره على نفسه وقت الحاجة والإضطرار بأعطائه ما لا يملك سواه من طعام أو ماء أو غيرهما

---------------------

ابو شوارب

[صالح ابوشوارب]

الاخ تنغو

تحياتي لك

طبعا انت حاضر العصر الذهبي وتعرف حلاوته

ولكن بخصوص الجرية كنت خايف البص يصل قبلي وجدى موسي يتبهدل

وهو امانة ولو اني كنت في سن صغيرة لكن كنا قدرها ونص

وسعدت بمرورك وتعقيبك

[sambaaa]

يا عمنا ابومنار ..

والله بعد كبدة الإبل الجداوية ديك مفروض هسه تعيد المشوار ده تاني ..
هههههه
بس المرة دي الخط يتغير من البطحاء لحي السفارات
ربنا يمتعك بالصحة والعااااااااافية ..:)

[نزار حسن محمد]

الاخ الفاضل ابو شوارب... لك الود والحب والله يابوشوارب... وانا بقراء فى البوست كنت فى غاية السعاده لانه بذكرنا بالايام الجميله والاصاله السودانيه .. وياحليل ايام زمان ... ولو بايدى كنت طوعت المحال !! هكذا كان السودان وكان اهل الجزيره .. اخوى ابوشوارب عندى سؤال اسم ابوشوارب ده عنده علاقه بى ناس ابو شوارب الكانوا فى فريق الموظفين ببركات ولا اسم على اسم... لك ودى وتحياتى اخوك ود حسن

[صالح ابوشوارب]

الاخوان سامبا ونزار
شكرا لكم وانتم تعيشون معنا في الذكريات الجميلة التى عشناها وانشاء الله سوف نواصل كل فترة
اما علاقتى بناس ابوشوارب بحى الموظفين ببركات فتشابه اسماء وشكرا

[طارق سنهوري]

سلام صلاح
القصة جميلة جداً لكن ماوريتنه جريت بى وين خشية بستديو ساعة وحى الموظفين ولا شارع المستشفى
ولو شارع المستشفى الله عانك فى اليوم ده.

ويا شباب مربع 11 من زاوية شيخ شاطوط حتى الناصية بتاعة مدرسة الاهلية (أ) تمام هل يخفا القمر هااااااااااااااااااااا

سنهورى

[صالح ابوشوارب]

شكرا الابن طارق سنهورى للزيارة
ولكن جريتى كانت من الموقف مرورا بداخل السوق الكبير ومتابعا لشارع سنكات جبرونا .. بمعنى الشارع البمر بيه بص سنكات جبرونا

[معتز حمدتو]

سلامات ابو شوارب
بتخيل في منظرك وانت في الزمن الجميل وتجسد لمعاني الشهامة وعزة النفس .
تذكرة موفق وانا مره جاي من ام سنط قبل عامين من الان وطبعا ياحاج ام سنط بقت حاجة ثانية اضاءة وكده فطلعت من نسابتي زعله ذي الساعة 10 مساءا وحاتك لما طلعت من جخانين ام سنط لحدي ما وصلت شارع سنار لو ما عزة نفسي كنت عاوز ارجع وما حصلت حد اسلم علي وكان يوم تحفه .
لكن ما بكذب عليك لو جريت ذي جريتك كان تلقاني في المقابر .
تحياتي لام سنط ( السناطه الهمباته ) ذي ما بقول ولدي محمد .

[صالح ابوشوارب]

شكرا الاخ معتز للمداخله وآسف للتأخير ولكن اخرت ردى عليك حتى تكون ( خماره ) للموضوع

وشكرا
ابو منــــــار

[الفارس البنفسجي]

والله يا أبو الشوارب قصة تحفة ومليانة بساطة ورقة واحترام للناس الكبار بالرغم من أنها مضحكة جداً وانت بقرا فيها بتخيل شارع جبرونا القديم الكلو حجار .... وبصراحة ذكرتي القصص اللي بحكوها لي عن جدي والمشاوير اللي كان بمشيها بي رجليهو وعمرو ما ركب عربية.
لكن بالمناسبة يا أبوالشوارب انت سبقت العربية دي كيف ؟ والكلام دا بعد باص عباس في سنكات جبرونا ولا قبلو؟ والله لو كانت البكاسي ظهرت في الوقت داك ، كان تعبت تعب ... ولو جريت زي الأرنب ما كان بتحصل عمك عبد الله دا.
تسلم على القصة الرائعة كروعتك وسلمت لنا من كل شر ... وان شاء تكون آخر جرية

[مرتضى يوسف العركي]

استاذي ابو شوارب
المشهد برمته امامي فمن المؤكد ان الموقف هو الموقف القديم جوار الطلمبة ومقابل العيادات الخارجية للمستشفى وهو اقرب من الموقف الحالي باتجاه الغرب ولو عملت خارطة طريق لتلك الجرية وبعد ما شمرت ليها اكيد اخترقت السوق الكبير بالشارع جنوب استديو الساعة حاليا مرورا بمنزل الشيخ عبد العال ومن ثم لطريق سنكات من جهة بنك الخرطوم مرورا بمحطات الكنيسة ودازرق محطة الحجر اما خور ابشنب وود قيحه .
على كل الجرية دي ياخوي موسى جودة ما جارها في زمانو او حال انو تكون ركبت جدنا بص عم عباس الذي يقوم النسوة بتوريق الخضرة فيه كسبا للزمن علما باننا نركبه بدوون ثمن وعمل غلبه مع العم عباس .
كم احن لتلك الدروب وبيوتات الفريق تنتصب الكنيسة وزقاق الفيوماب وعمك علي طة صبير وابو الروس ومدرسة البندر والشانزليزية ومحمد سيد الطعمية والريح الماحي د .حمدين وود ازرق الابتدائية وعمك العمدة والجعلتية وال نقد عثمان وال بادي وال الشافعي والشيخ شاطوط كم نحتاج لمحايته قبل الامتحان فهي اسهل من الاستذكار حينها وكثيرون القابهم اكثر من اسماؤهم احباء تحضرني شخوصهم وتروح اسماؤهم ما بين مصافح متريث واخر على عجل من امره حتى ود قيحه وفيما اعتقد ان نهاية الجريه ونهاية هذا الاسترسال امل ان يكون حدسي مقارب ولك التحية .

اخوك مرتضى العركي
الرياض

[صالح ابوشوارب]

لكن بالمناسبة يا أبوالشوارب انت سبقت العربية دي كيف ؟ والكلام دا بعد باص عباس في سنكات جبرونا ولا قبلو؟ والله لو كانت البكاسي ظهرت في الوقت داك ، كان تعبت تعب ... ولو جريت زي الأرنب ما كان بتحصل عمك عبد الله دا.
تسلم على القصة الرائعة كروعتك وسلمت لنا من كل شر ... وان شاء تكون آخر جرية


شكرا الفارس البنفسجي ولو اني احب ان اسميك (الفارس الازرق) على المداخلة والتعليق فانت منذ التحقت بالمنتدى ونرى بصماتك واضحه .. اما البص فكان بص عمك عباس والحمد لله ما كانت في بكاسي كان بالفيسبا ما حصلته

[صالح ابوشوارب]

استاذي ابو شوارب
المشهد برمته امامي فمن المؤكد ان الموقف هو الموقف القديم جوار الطلمبة ومقابل العيادات الخارجية للمستشفى وهو اقرب من الموقف الحالي باتجاه الغرب ولو عملت خارطة طريق لتلك الجرية وبعد ما شمرت ليها اكيد اخترقت السوق الكبير بالشارع جنوب استديو الساعة حاليا مرورا بمنزل الشيخ عبد العال ومن ثم لطريق سنكات من جهة بنك الخرطوم مرورا بمحطات الكنيسة ودازرق محطة الحجر اما خور ابشنب وود قيحه .
على كل الجرية دي ياخوي موسى جودة ما جارها في زمانو او حال انو تكون ركبت جدنا بص عم عباس الذي يقوم النسوة بتوريق الخضرة فيه كسبا للزمن علما باننا نركبه بدوون ثمن وعمل غلبه مع العم عباس .
كم احن لتلك الدروب وبيوتات الفريق تنتصب الكنيسة وزقاق الفيوماب وعمك علي طة صبير وابو الروس ومدرسة البندر والشانزليزية ومحمد سيد الطعمية والريح الماحي د .حمدين وود ازرق الابتدائية وعمك العمدة والجعلتية وال نقد عثمان وال بادي وال الشافعي والشيخ شاطوط كم نحتاج لمحايته قبل الامتحان فهي اسهل من الاستذكار حينها وكثيرون القابهم اكثر من اسماؤهم احباء تحضرني شخوصهم وتروح اسماؤهم ما بين مصافح متريث واخر على عجل من امره حتى ود قيحه وفيما اعتقد ان نهاية الجريه ونهاية هذا الاسترسال امل ان يكون حدسي مقارب ولك التحية .

اخوك مرتضى العركي
الرياض


فعلا يا مرتضي كأنك معاى وانا جاري واسمعك تقول لى عندما وصلنا بنك بنك باركليز دى سي أو ( وقف شوية ياخي . دا عمك عباس من الموقف مااتحرك )
شكرا مرتضي وانت تحلق مع الذكريات في الزمن الجميل

متاوقه

طبعا بكرى رسل لي خريطة الاستراحة ومشينا. والاولاد فرحانين ليهم زمن ما طلعوا .. ولكن للاسف وصلنا حتى اللفه الموجوده بالكروكي ورجعنا عدة مرات حتى طاردتنا النجده الموجوده بالقرب من اللفه .. وللاسف لايوجد بالكروكى تلفون وتلفون بكرى مقفول المهم قعدنا نلف من قهوة ابو هيثم حتى الصينية وبالعكس حتى الثانية وبدون عشا وقلت في نفسي بالله لوكنت في مدني كنت مشيت بوفيه المحطه ههههههههه وعلى العموم كانت رحلة . شفنا فيها صواني كبيره وشوارع باسم سلطان قابوس والامير جابر

[مرتضى يوسف العركي]

استاذنا صالح ابو شوارب
السلام
اولا نأسف لكم وللاسرة الكريمة لمشوار العصاري اقصد المشوار الليلي في البرد القارص الذي يطرينا مشوار العصارى ورعشة الورد البراري وبدون بلوم في فرعو غنا يطرينا يالحبان أهلنا فشتان مابين هذا وذاك لكم والاسرة الكريمة العتبى ولا يمنعني رد هذا المشوار بزيارتكم ومعي الاسرة بس بدون مطاردة شرطة الدوريات وعلى فكرة صاحبك ايضا بكري العالم ببواطن الرياض تاه هو الاخر ووصل بعد جهد جهيد على أي حال جوالي 0501464578
وطالما الامر جري في جري سواء خلف بص عباس او استراحات الرياض لما لا نستريح على توثيقكم لاولئك النفر الكريم من رجالات مدني الاوفياء وتلك الطرق والدروبات والمسميات التي اندثرت بفعل المسميات الجديدة لبنك باركليس والمدارس والطرقات حتى غدت المدينة غريبة من قديمها في الوقت الذي يحرص فيه العالم على الاحتفاء بموروثاته التي لها قيمة تراكمية يعتقها الزمن ويضفي عليها قيمة مضافة ...
حدسي يقول بان لك الكثير لجيل هذه المدينة فهلا تكرمتم
لك الود والاحترام
اخوكم
مرتضى يوسف العركي

ـــــــــــــــــــــــــــــــــــــ
كلمة طيبة كغيث أصاب أرضا طيبة فأنبتت كلأ وعشبا كثيرا