المساعد الشخصي الرقمي

مشاهدة النسخة كاملة : شجرة المنتدي....حلمنتيش..


Jamal Elmahi
17-05-2005, 12:28 PM
شجرة المنتدي..

انها شجرة لا طويله و لا قصيره خضراء فاقع لونها تسر الناظرين...
تغطي ظلالها الدول العربيه..اوربا..امريكا...استراليا و الارجنتين..
اعضاؤها سيماهم في وجوههم تفهماً وانسجاماً كاندماج الهيدروجين مع الاكسجين..
او قل كانسجام المركوب و الطاقية الحمراء مع السروال ابوتكه والعراقي البوبلين...
همبريبها منعش..في إزالة الدبرسة والصداع اسرع من البنادول والاسبرين.....
وفي ترويح هموم الغربة وعذاباتها كما لمريض السكري الانسولين...
او قل كما للدوكة الطايوق وللعربة البنزين...
ناس ماشيين و ناس جايين وناس علي العناقريب متكئين....
ركن ضمنه..ركن وست وناس الكنكان للكشتينه راصيين...
عواميد وصواني الفطور عصائد و تقليه وناس الراحات فول وساردين...
الجبنه جنزبيل ريحة قلوتا تجيب الضهبان من الفلبين...
الاخوات كاللؤلؤ المنظوم او كالقوارير متراصّين...
عشوشه ..قمر الزمان..اللمسه الساحره..السنيوره و ياسمين...
المشرفين بجلاليب بيضا مكويه تحت الشجره دوام لافين...
وناس مولانا في ركن قصي يفتوننا في إمور الدين...
إنه تمازج رائع يعكس مجتمعنا فهل به نستهين؟؟؟؟؟؟


جمال الماحي
امينو
17-05-2005, 12:36 PM
الله عليك يا جمال الماحي كفيييت و وفيييت والله الكلام فعلا معبر عن منتدانا العزيز وعن شجرتو القاعدين نستظل بيها و ما اظن انو في مستهين ...
اللمسة الساحرة
17-05-2005, 01:49 PM
الاخ جمال مشاالله عليك وعيني عليك باردة قمة في الروعة لكن ،،،
وماقصرت كفيت ووفيت في حق شجرة المنتدى
عشوشه
18-05-2005, 01:11 AM
الاخ جمال الماحى وكل المغربين
ان شاءالله المنتدى دايما يكون الضل الى تلجاوا ليه فى عز هجير الغربه
ويبقى ليكم منار وضوا يزيل العتمه


بلادك حلوه ارجع ليها ديار الغربه ما بنرحم
Jamal Elmahi
18-05-2005, 10:11 AM
الحبايب الغاليين..
أمينو..
اللمسه الساحره..
عشوشه..

مرحبتين حبابكم واليوم السعيد في ضل شجرتنا جابكم..
إتفضلوا لي جوّه وتعالوا انضموا لي احبابكم...
نورتوا الشجره يا الغالين و عزيز تيرابكم...

جمال
فادي الماحي
18-05-2005, 10:36 AM
الاخ جمال
تحياتي الكتيره ليك والاهل
والله طيله انا في الغربه ما اتذكرت البلد وحنيت ليه الا وانا بقرأ مواضيعك الرائعه
وكمان في حاجه
لم ادخل المنتدي واشوف اسمك فوق ونحن نكون في وقت واحد والله اقرب انادي ليك لاني شاعر بوجودك قريب شديد مني
ولك التحيه وللمنتدي
Jamal Elmahi
18-05-2005, 12:06 PM
الغالي فادي

نشكر معاليك بشده...وهذا بعض مما عندكم....
وبالمناسبه دي حنفرز عيشتنا من الفريق داك ونعمل ليك جامع في فريقنا ويبقي زيتنا في بيتنا...
نبقيك انت الامام ونورالدائم الماذون وعلي بركة الله...والما عاجبو خور علي ياما قريب...

جمال
ابراهيم
18-05-2005, 03:18 PM
جمال يا فارس الكلمة السمحة

جمال اللوحة .. والابداع البديهي التلقائي .. الاسلوب الفرايحي والقشيب

لك التحية وانت تلقى هذه الدرر التي وتنثر هذا الفرح

وشجرتك رمت فينا ظلالها يا جيمي

واصل

تحيــــــــــاتي
قمر الزمان
19-05-2005, 04:58 AM
الرائع الاخ جمال الماحى
التحية لك ولشجرة المنتدى العامر ..
ما اروع تلك الكلمات التى خططها وهى تعبر عن منتدانا الرائع
يديك الف عافية والى الامام دوما ..
سواااح
06-04-2007, 06:40 AM
استاذ جمال ..

اولا حمدا لله علي سلامتك

وثانيا اثني علي ما كتبته

من ان المنتدي اصبح الملاذ

للجميع وهم خارج الوطن

فلك الشكر ...

دمـــــــــــــــــــــت ،،
مدناوية
06-04-2007, 07:38 AM
ما أروع ماكتبت أخونا جمال الماحي،،،


وربنا يديم المعروف،،،
نزار حسن محمد
06-04-2007, 02:05 PM
عمو ..عمو ..جمال جاء ههى..ههى ..ههى.. ياعمو بالله ماتحرمنا منك ...مع خالص الحب
ابنك المشتاق نيزو جكس:D
Madanawi
06-04-2007, 10:24 PM
حبيبنا ود الماحي،

اولا:

نقول حمداً لله على سلامة الوصول،

ثانيا:

بقول دي كلها كم يوم في البلد وتطلع الدرر دي كلها..

ثالتا:

الشجرة لازم نرويها ونهتم بيها طالما انها تعطي دون ان تنتظر المقابل من اي فرد..