المساعد الشخصي الرقمي

مشاهدة النسخة كاملة : اضــــــــــــــــــاءات ( البوبار بين النســاء والرجــــــــــال )


صالح ابوشوارب
19-05-2005, 02:18 AM
الاخوان الاعزاء

تحية مباركة

اضاءات هذا الاسبوع عن البوبار او الفشخره او شوفوني

هل البوبار والفشخره صفة تلازم النساء فقط ؟

ام كذلك للرجال نصيب من ذلك ؟

هل البوبار مرض او تغطية لمرض ؟

هل البوبار ليه لزوم او عند اللزوم ؟

هل بوبار الرجال يختلف عن بوبار النساء ؟

ممكن مثال للبوبار للنساء والرجال ؟

وبعافيتكم
نيازى كشك
19-05-2005, 11:14 AM
واللة انا انت حيرتنى عديل كدة

هههههههههههههههههها
ههههههههههههههههههههههههها
قمر الزمان
19-05-2005, 11:32 AM
السلام عليكم ..
اولا لك التحية العم صالح ابو شوارب
بس حبيت اقول انو البوبار والله ما عند النسوان بس ،،،
حتى الرجال عندهم المرض دا .. وبالذات المغتربين < ماكلهم > يجو يتفلهمو زى الكانهم ما عاشو في السودان قبل او شافوه .. وانا شايفة انو مافي اي لزوم للفشخرة والبوبار والناس لو اتصرفت بي طبيعتها والله يكون احسن ..

تحياتى ..
ابراهيم
19-05-2005, 02:55 PM
لك التحية ابوشوارب والف شكر على اضاءاتك التي اضفت للبورد رونق


البوبار والفشخرة كان للنساء ولكن مع مرور الزمن ورداءته بداء يتسرب الى معشر الرجال وبقو الاتنين في الهوى سوى

هل البوبار مرض او تغطية لمرض ؟ البوبار في الغالب تغطية لمرض وهو نقص يعانيه المتبوبر او المتفشخر .. وهو نوع من الدهشة .. التي تنتاب المتبوبر في تحوله من وضع ما الى وضع جديد أحسن .. انا غايتو شايف ما ليه اي لزوم بحساب انو القناعة كنز لا يفني .. ولا عندو اي لزوم برضو ،

بوبار النسوان بختلف اكيد من بوبار الرجال

بوبار النسوان كتير بتلقاه بالذات في المناسبات سواء كان في بيوت الاعراس ووبالذات في بيوت العزاء تجد البوبار في الثياب والذهب وحتى في البكى بتلقى المتبوبرين بكاهم مختلف مناديل ورق معطرة وشي عبارات عجيبة ياي خالص وانا حزينة جداً وووو..الخ.

أما عند الرجال الفشخرة بتلقاها برضو في اماكن كتيرة بالذات في المواصلات لا والله ما تدفع وتلقى الورقة ام عشرين فوق رقم وجود الخمسمية جنيه...

دي امثلة بسيطة

تحياتي الاخ صالح

ممكن مثال للبوبار للنساء والرجال ؟
ضياء الدين احمد
19-05-2005, 09:08 PM
بوبار النسوان قد يظهر اكثر شئ في المناسابات وبالذات لمان الكاميرا تكون لافه في البتزح التوب من نحرها عشان الكردان اظهر وفي البترفع في ايدينها عشان الغويشات لكن والله بوبار الرجال شين والذ شئ في واحد جارنا خلينا نسميهو (ج) وكانت في وفاة في الفريق وطبعا شئ معروف انو الناس بتجي بصوانيها بتاعت الغداء اها نحنا قاعدين قام جاء عمنا ج قال لينا امشو بيتي جيبو الصينيه قمنا نحنا اتنين بس نسمعو ليك قدام الناس وبصوت عالي لا لا امشو اربعه الصينيه تقيله وصينية ج مابشيلوها نفرين اها شفت بوبار الرجال شين كيف يا ابوشوارب
هناد
20-05-2005, 07:27 AM
كاتب الرسالة الأصلية قمر الزمان
السلام عليكم ..
اولا لك التحية العم صالح ابو شوارب
بس حبيت اقول انو البوبار والله ما عند النسوان بس ،،،
حتى الرجال عندهم المرض دا .. وبالذات المغتربين < ماكلهم > يجو يتفلهمو زى الكانهم ما عاشو في السودان قبل او شافوه .. وانا شايفة انو مافي اي لزوم للفشخرة والبوبار والناس لو اتصرفت بي طبيعتها والله يكون احسن ..

تحياتى ..
بوتشى
20-05-2005, 07:36 AM
اديك العافيه الاخ صلاح
اولا لك التحية العم صالح ابو شوارب
بس حبيت اقول انو البوبار والله ما عند النسوان بس ،،،
حتى الرجال عندهم المرض دا .. وبالذات المغتربين < ماكلهم > يجو يتفلهمو زى الكانهم ما عاشو في السودان قبل او شافوه .. وانا شايفة انو مافي اي لزوم للفشخرة والبوبار والناس لو اتصرفت بي طبيعتها والله يكون احسن ..والله انا شايف البوبار مرض خطير وعاوز علاج
ابوفادي
21-05-2005, 04:13 AM
والله وللاسف الصفه دي بقت (شبه) ملازمة الكل بطرقه مباشره او غير مباشره
وربنا يحمينا من فتن الدنيا
صالح ابوشوارب
21-05-2005, 09:15 AM
.
الأخوان الأعزاء
نيازي
قمر الزمان
ابراهيم
ضياء الدين
هناد
بوتشي
ابو فادي

شكرا للمشاركة وإبداء الرأي وأنا كنت سعيد لأنكم أضفتم لي معلومات

جديدة وربنا يحميكم من البوبار (( للمعلومية للنساء خاتم يسمي البوبار )

مع تحياتي في إضاءات جديدة
أبوبكرحامد
22-05-2005, 12:51 AM
حبيبنا أبو شوارب .......كما عهدناك موضوعاتك غير نمطية وفيها الكثير من الإبتكار ومهضومة " ده بوبار على الطريقة اللبنانية " ، مافى شك البوبار مرض يعترى الرجال والنساء على حدٍ سواء وهو عدم اقتناع بما قسم الخالق وهو محاولة لإيجاد معيار غير موضوعى للتمايز بين أفراد المجتمع ، مرة كنت ماشى فى الحرطوم فى شارع البرلمان سمعت ليك واحد بابورى نمرة واحد قال العربية البولو ح اشتريها للبنات انا زعلت قلت ليهو دى عربية ولا بلوزة " حقد البوليتاريا " ، بوبار النسوان فى واحدة فى ابوظبى فشخارة على جهل بتتكلم مع نسوان قالت ليهن نحن العمارة الساكننها فيها سيركوريتى " تقصد سيكيورتى " بس الجهل مصيبة ، ولنا عودة.
ضياء الدين احمد
22-05-2005, 04:31 AM
قالوا يا ابوشوارب والعهده علي الراوي انو سألوا دكتور عوض دكّام الله ارحمه عن مغتربين ابوظبي قال ليهم رجالهم كضابين ونسوانهم بوبارات وشفعهم قليلين أدب اها رايك شنو؟
الزمن المريح
22-05-2005, 07:07 AM
ما احلاك اخونا ابوشنب
البوبار ،، والثلاجة و التلفزيون فى بيت الاجار ،،، مثل معاصر ،، قبل عهد العولمة ،،

البوبار او حب المظاهر صفة كان يتميز بها النساء اما الان ،، فقد سبق الرجال و خصوصا الشباب النساء و الحبوبات ،، فيها ،،

الاول : انا بعمل ليك نص كول ،،
الثانى : لو ما عندك رصيد شايل موبايل ليه ،، و دية ما اسمها نص كول اسمها اسكور ،،،

و الاثنين يريدوا ،،مس كول (miss call)
ودأبكرش
22-05-2005, 08:50 AM
الاخ صالح

البوبار عقده نفسانيه


تنشأ من الطفولة عند الانسان


عند المرأه والرجل


من تكبر استكبر على الكريم



وعافانا الله
سواااح
15-08-2010, 02:41 AM
الغريب ..

حتي رمضان اصبح موسم بوبار ....

لك كل التحايا عم صالح

ومتعك الله بالصحة والعافية
مدنيّة
15-08-2010, 03:04 AM
عمو صالح وكل ما مر بهذا البوست
رمضان كريم عليكم تصوموا وتفطروا علي الف خير يارب


-------------
شكرا سواح
الجابرابى
15-08-2010, 04:31 AM
البوبار ليس مختصر على النساء ولكن هناك رجال ا لبوبار عندهم اكثر من النساء