بخرة الفكي كانت تودينا في خبر كان

[صالح ابوشوارب]

--

الاخ ود المأذون وشلة كونكان ستة خاصة والاخوان بالمنتدي عامة
اليكم قصتي مع البخرة

كنت اشكو من قصور كلوى ( ربنا يحميكم ) وذهبنا انا والاولاد
اجازة لمدني والجماعة شبكوني انت عندك عين ولازم تمشي لشيخ
المهم ودوني لشيخ ( شرق مدني ) وبعد ما سلمنا على الشيخ قال لى
اسمك منو ؟
وعرفتو بي اسمي . قام فتح الكتاب بعد ان حسب حروف اسمي
وقال لي انت مصاب بالعين ولا زم نعمل ليك بخرة
وجاب بطانية تستعمل في مثل هذه الحالة وجاب مبخر وعمل فيه
بخرة ( ورقة مكتوب عليها كتابات فقط ) وقال للجماعة الجايين
معاي
ختو البطانية وامسكوها كويس
الجماعة طبعا جاهزين ( نسيبي وعديلي وشلة كبيرة )
الشيخ دخل المبخر بتحت البطانية وقال ( للعصابة )
شدوا لي تحت
والبخرة اشتغلت والنفس انقطع وقمت افتش تحت البطانية عن خرم اتنفس بيه ( وصاحبك الشيخ سامعه يقول اخرج اخرج )

اخرج وين جاك الموت يا ابو شوارب .
واخيرا وجدت لي خرم الحمدلله .
وختيت فردة نخرتي قدام الخرم المهم مقلبت ليك الشيخ ولقيت لي طريقة للمخارجة ----- والبخرة انتهت وشكرت الله من هذه الذنقة
بالله تخيلوا اخوكم مزنوق ومادي نخرتوا للخرم ههههههههههههه

المهم الشيخ شعر بانه انهزم لاني ما عملت اي حركة كان منتظرني .. اقول ليه خرجت خرجت ياشيخ
الشيخ في قرارة نفسه زعلان وقال للجماعة
الظاهر العين دي قوية نقوم نديهو بخرة تانية
وقام الشيخ جاب البخرة وانا بعاين ليه وقام
حشاها بكمية كبيرة من الحبة السوداء ولفاها بسرعة وقال لجماعتي
ختو البطانية
وطبعا اخوكم عارف المخارجة -- واشتغلت البخرة --
واخوكم يفتش في الخرم -- لكن المرة دي كان الدخان كثييييييييييف
والقحة اشتدت
واخوكم الخرم ما كفاهو وخلاص شفت الموت وصاحبك الفكي الفايق شغال
( اخرج اخرج اخرج )
والنفس انقطع وبدأت اتذكر الموت
والحياة حلوة والصلاة وكيف المخارجة من الموقف السخيف دا
وجماعتي شادين البطانية بقوة لي تحت وانا ماقادر اقوم لي فوق ( بالله عليكم الجابني شنو وخلاني في الورطة دي )
كان المرض احسن من الموت
واخيرا
استسلمت للامر الواقع وكوركتا باعلي صوتي ( خرجت خرجت )
والفكي بتاعكم ما كفاهو ( خرجت ) قام يستعرض عضلاتو و يسأل
انت من وين
( بالله دا اقول ليه شنو )
والموقف حرج والنفس مقطوع قمت قلت ليه بسرعة ( عايز اتخارج )
انا من السعودية من السعوديااااااااااااااااا
قام قال
اوع اشوفك في الزول دا تاني
قلت ليه خلاص توبة توبة ( طبعا في سري عارفين بقول ليه شنو )
الفكي قال للجماعــة
خلاص فكوهو
طبعا جماعتي فرحانين خلاص طلعت العين ( وهم ما عارفين طلعو عيني )
طبعا كان يوم رهيب ولا عين ولا بطيخه
اخوكم بعد ستة شهور عندما رجعت للرياض اصبت بالفشل
الكلوى وحماكم الله وربنا مايوريكم الفكي ولا المرض
وسلامتكم

[عزيز عيسى]

اخوي صالح الغالي،

التحايا والاشواق لشخصكم العزيز،

يا سلام عليك يا ود ابوشوارب.. والله العظم من قصتك أنا ضحكت ضحك زمن ما ضحكت زيه لامن دموعي جرن وما قدرت اتمالك نفسي من شدة الضحك وأنا مواصل في قصتك مع البخرة.

لكن يا صالح بالغت تخت نفسك في محل الجان وتقوم تقول للشيخ انت من السعودية.. هو فعلا الواحد لما يتزنق بيعمل المستحيل علشان يقدر يخارج نفسه.

اسعدتنا بقصتك الرائعة.

أسأل الله أن يشفيك ويمتعك بالصحة والعافية.. ويبعد عنكم كل سوء.

مع خالص حبي وتقديري،

عزيز

[خالد هاشم علي]

والله ياصالح قطعت مصاريني بي قصتك وماقادر أتمالك نفسي.... خلاااااص

[امينو]

التحايا العاطرة لك اخي صالح
والله قصتك مبالغة والله مرقك ساي المرة دي عملتا فيها جني واها المرة جاية البحلك شنو من شيخ الشرق الماكن ولك كل الامنيات بالشفاء العاجل والتمتع بالصحة والعافية والعمر المديد.

[امير عبدالباقي]

ود البوشوارب
جازيتك علي الله مارميتيني من الكرسي من الضحك انت عارف انا لو منك كان امقلبو ليك واقول ليه لما يقول ليك انتي منو اقول ليه اسم السيخ نفسو كان تشوفو يعمل شنو

[صالح ابوشوارب]

الفردة عـــــــزيز

والاخ العزيز خا لــــد

والاخ العزيز امــــــــــينو

والاخ العزيز ابو ريـــــــــــان

لكم الشكر وربنا ما يوريكم شينة

ويمتعكم بالصحة والعافيــــــــــــــــــة

وما يوديكم الفكي ابو نافــــــــــــــــــــورة

[ضياء الدين احمد]

هههههههههههههههههههه
عليك الله يا ابوشوارب وصف لينا مكان الشيخ ده وين مغروضين فيهو شديد
عندي واحد في بالي عاوز انتهي منو!!!!!!!!

[aborawan]

هههههههههههههههههههه
والله يا عمنا غالبني اكتب وعيوني اتملن بالدموع من كتر الضحك هههههههههه
طبعا اخوك ليه ذكري حارة مع العين والسحر لي درجة انو ناس البيت حضرو قماش الكفن لكن الفضل لله ثم ايمان الشيخ وانكتب لي عمر جديد


غايتو ربنا يكفينا شر المشعوذين والدجالين الكتور في الزمن ده نسال الله السلامة

[صالح ابوشوارب]

الاخ ضياء الدين

تحية ليك

بخصوص الزول المقروض فيه اذا كانت بت جيب لي وطواط ناشف

و بعدين اوريك تعمل شنو ( طبعا اذا فيها حب )

اصلوا ناس كونكان ستة عينوني فكي المنتدي

وحأعمل ليك فيهم عملية قردية

---------------------------------------------------

الاخ ابو روان

شكرا للمتابعة وانا سعيد في ادخال الضحكة في المنتدي وخاصة

ود مدنيات

وربنا يحميك من الدجالين

[القناص فوزي]

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههه والله ماضحكت مثل هذا الضحك إلى أن أهلي ظنوا بأنني قد جننت وأشرت لهم على قرآة موضوعك في المحمول ...............
جزاك الله عنا كل خير
وأسأل الله العظيم رب العرش العظيم أن يشفيك من مرضك وأسأل الله العظيم رب العرش العظيم أن يشفيك من مرضك
وأسأل الله العظيم رب العرش العظيم أن يشفيك من مرضك وأسأل الله العظيم رب العرش العظيم أن يشفيك من مرضك
وأسأل الله العظيم رب العرش العظيم أن يشفيك من مرضك وأسأل الله العظيم رب العرش العظيم أن يشفيك من مرضك
وأسأل الله العظيم رب العرش العظيم أن يشفيك من مرضك
وأتمنى لك حياةً سعيدة

[أبوبكرحامد]

ربك ستر ولطف ياأبوشوارب ، بس عجبتنى جرستك وكواريكك .

[التيمان]

اناشيخ يا ابو شوارب عندى علاج
ههههههههههههههههههههههههههههههههههههههههههه

[114]

ابو شوارب
لي زمن ما ضحكت زي الضحك ده، وانا قاعد في المكتب براي كنت خايف يجي زول يلقاني افتفت بالضحك،
وانا قايل نفسي براي الضحكت، لكن لما قريت تعليقات الجماعة عرفت انك كتلت ناس كتار بالضحك، الله يجازيك يا ابو شوارب، والله تنفع كاتب سيناريو افلام كوميدية،
وانا عرفت ليك الفكي دي، وانا ذاتي مشيت ليهو، وكان المودني ليهو قايلنو بيعمل لي البخرة السوبر دي، لكن اكتفى بأنو اداني بخيرات صغيرونات عشان اتبخرن ومويه اشربها، يعني الله فكاني من الغمته الغمتوك بيها دي

والف سلامة ليك، وربنا يشفيك ويعافيك ويعافي كل مسلم ويشفيه، وانا سمعت انو الصمغ العربي بيعالج من الفشل الكلوي،
اللهم اشفي ابو شوارب، واشفى كل مرضانا ومرضى المسلمين، آمين، آمين

[صالح ابوشوارب]

الاخ عمر لك شكري وتقديري وخاصة الدعاء الذى افرحني

وابشرك الحمدلله انا عملت زراعة الكلية والحمدلله نجحت

والله اضحكتني البخرة السيوبر فعلا سيوبر

وربنا يجعل ايامك سرور في سرور

[114]

الأخ ابو شوارب

حمداً لله على السلامة، وبركه العملت زراعة الكلى، وربنا يديم عليك نعمة العافيه، عليك وعلى كل من تحب، وعلى المسلمين, آمين، آمين..

[التيمان]

الأخ ابو شوارب

حمداً لله على السلامة، وبركه العملت زراعة الكلى، وربنا يديم عليك نعمة العافيه، عليك وعلى كل من تحب، وعلى المسلمين, آمين، آمين..

[خالد هاشم علي]

الاحبة الكرام...
لكم التحية والاشواق وكل سنة وانتوا طيبين...
معليش ياحبايب انا قمت افتش وانكت في المنتدي للحاجات الحلوة القديمة ولقيت قصة صالح ابو شوارب مع بخرة الفكي...والله مع اني قريت القصة دي عشرين مرة الا انو في كل مرة بقراها بقعد اضحك فيها من جوة قلبي..
عشان كده بقول للشباب ياريت لو يكون مستوي كتاباتنا زي كده.. يعني حاجات ماتزهج وماتمل منها مهما طال الزمن...
الله يديك العافية ياصالح وتسلم من كل بلا...
تحياتي لأفراد الأسرة الكريمة...

[saly]

ههههههههههههههههههههههههههههههههههههههههه
والله الجنبي قالو لي مالك بتضحكي براك هههههههه قالو البت دي جنت ولا شنو
جد والله روياتك للقصه ممتعه و تخلي الواحد يضحك من جوه

وزكرتني بواحده بعرفها عاوزه ليها عريس والناس شابكنها برضو عين عين
اها البت دي كل مره تدمدم و تتبخر عشان العين تفك وتعرس
لمن ناس البيت و الشفع حفظو مواعيد البخرات
مما يشمو الريحه
يقول خلاص فلانه طلقتها البخره وطبعا عندها مواعيد معينه بعد المغرب قبل الظهر وكده
والعجب المحايه يقعد يقرا ليك وهاك يا تف تف تف في المويه دي ما بعرف بشربوها كيف
والغربيه ليوم الليله بتبخر والعريس ما وصل
لحدي ما جاها نمش و كلف في وشها من كترت قريب و خت المبخر في وشها
بقيت تفتش في الكريمات اسه

المهم حمد الله علي سلامتك وما تشوف شر

[صالح ابوشوارب]

بتنا العزيزة سالي
كل عام وانت بخير
اولا ــ سلامتك من الجنون وربنا يسلمك من كل شر
ثانيا ــ كان زمان اذا شفت ليك زول طولت ماشفته تقول ليه بنهره وفرحة (ســـــــنة ) فاقول ليك ( ســــــنة )
ثالثا ــ بالله عليك انت اصلو ما بخروك ولو من بخرات شيخ محمد ود شاطوط ؟؟
ثالثا ــ ايه رايك معرفتك الدايره عريس نطلعا ليك في كرتلة ..اذا ما عرفت الكرتلة استعيني بالاخ عزيز عيسى من امريكا ... بمناسبة الكرتلة اذا واحد من الاصدقاء زوجته وضعت وجابو ليه بت شينة كنا بنقول ليه ( الله يكون في عونك دى الا تطلعا في الكرتله )

والسلام ما تطولى الغيبة

[sambaaa]

والله ياصالح قطعت مصاريني بي قصتك وماقادر أتمالك نفسي.... خلاااااص

[saly]

يا عم صالح
جيتك راجعه تاني
وقريت كلامك من الاول
لانو بجد سردك ليهو رهيب
ومع اني قريتو قبل كده لكن لسه بضحك ههههههههههههه

بس بسال الكرتله شنو
وعزيز عيسي ده الم فيهو وين عشان اسالو
شايفاهو برضو منقطع عن المنتدي الايام دي
ما قاعده اقرا ليهو شي

[الزبير محمد عبدالفضيل]

هههههههههههههههههههههههههه صراحه يا أبو شوارب دي قصه جميله وطبعا انته عملته في الفكي ده مقلب

ربنا يمتعك بالصحه والعافيه وماتشوف شر

[سواااح]

حلوة كانت انك من السعودية
والاحلي ما عارفين انو طلعت عينك

اخي امنياتي ان يواليك الله بالصحة
ونساله لك عاجل الشفاء

[فوزيه]

الاخ ابوشوارب

الله يجازيك كان قطعت مصاريني من الضحك

طولت والله ما ضحكت كده في زمن الوش بقي كلو مكشر يا ساتر يا لطيف

انشاء الله احسن صحتك بقت كويسه طمنا عليك

[صالح ابوشوارب]

شكرا يا شباب عمرى
السفير
سواح
سالى
وفوزية الجديدة
انشاء الله ما تتبخرو بالبخره

[اسامة]

اسال الله الكريم رب العرش العظيم ان يشفيك اخى ابوشوارب .ونفس موقفك ده مر على نفس الصوره والتفاصيل. الله لايعيدو على مسلم.
وشكرا

[صالح ابوشوارب]

اسال الله الكريم رب العرش العظيم ان يشفيك اخى ابوشوارب .ونفس موقفك ده مر على نفس الصوره والتفاصيل. الله لايعيدو على مسلم.
وشكرا

شكرا اسامة وانشاء الله ما تشوف شر

[ابوشوتال]

الله يديك العافية

عمنا ابوشوارب انا قريت القصة اخيرا

وضحكت لمن مصاريني وجعني

لكن اتصرفت صاح

لو دا انا كان اكلتها ساي لا خرم ولاشي

ومن المرةالاولي بقول خرجت عشان ما يعزبوني

وانشاء الله ما تشوف شر

[انيس التوم]

الخال الرائع صالح ابوشوارب مصدق كلامك لاني انا شخصيا كنت ذاهب الي صديق في زيارة وشاهدته اخت صديق تتالم وتتعصب بعد داك الجماعه قالوا يودوها للشيخ مشينا يازول وانا حاضر الكلام ده كان الساعه 9 مساء بعد صلاة العشاء الزمن داك المهم ياخال الشيخ جاء وسلم علينا وكنا مجموعه من الشباب الشيخ طبعا حضر البخرات بتاعته وجاب المخبر وعينك ما تشوف الا النور فجاء البنت اتكلمت بكلام غريب وبصوت غليظ وبداء الشيخ يسال اخرج ما بخرج والشيخ بقول جب السوط يازول حوار كان جامد المهم في النهاية سمعنا صوت خلاص بخرج وكانت الدهشه بطلع كيف وبمشي وين كلنا طبعا خوفنا الزول الطالع يتلب في واحد فينا وكانت بالجد ليله عجيبه

[صلاح ودالطاهر]

قنا نرفع الموضوع الجميل ده لعمكم ابو شوارب

[صلاح الشيخ إبراهيم]

دي يا اب شوارب بسموها زنقت كديس في طابونة .. وخليني من شيوخ فتح الكتاب والعين وهلم جرا .. حلوة هلم جرا بتاعت الصادق المهدى دى .. . ديل شيوخ دجاجلة ونصابين

[الزبير محمد عبدالفضيل]

هههههههههههاي مصيبتك مصيبه يا ابو شوارب الوداك شنو للفكي يعني كان

وداك في خبر كانا قصه حلوه تستاهل اخراج فلم باسم ( أبوشوارب والفكي)

[عاطف عولي]

الي جنات الخلد حكيمنا أبو شوارب

[محمد النصيح]

ربنا يديم عليك الصحة والعافية انشاء الله

[abomazeen]

ألف رحمة الله عليك عمنا أبوشوارب

كنت رجل خفيف الظل ... ومواقفكم تشهد

[telecom]

اللهم اغفر له وارحمه واعف عنه
تغمدك الله بواسع رحمته عمنا الغالى ابوشوارب