تسألني أنا جايي ليه [الأرشيف]

مشاهدة النسخة كاملة : تسألني أنا جايي ليه

خالد هاشم علي

17-06-2005, 11:21 AM

شفت المنلوج الرائع اللي عملوهو فرقة الهيلا هوب وكان بيحكي عن مغترب رجع البلد وخلي الإغتراب قاموا الشباب في السودان سألوهو الجابك شنو ؟؟؟؟ قام رد ليهم ردود بليغة جداً وياريت تكونوا سمعتوا الردود دي... المهم هو ذكر كل جميل عن السودان وذكرياته ومنها إنو حنً لي صوت عثمان حسين والعطبرواي وأبو السيد وأولاد الماحي....

سؤالي للحبان....

لو رجعت السودان والجماعة برضو سألوك....

يازول الجابك شنو ؟؟؟؟

حتقول ليهم شنو ؟؟؟؟

داير ردود مقنعة ليهم عشان مايفكروا في الإغتراب

ياربي حتقولو شنو ؟؟؟؟؟

ابراهيم

17-06-2005, 02:43 PM

جاي عشان ارتاح من ارهاق وتعب الغربة

جاي لامي وابو واخواني واخواتي

جاي عشان اصحابي واحبابي

جاي للبلد الانجبتني

البلد الترعرعت فيها بلد المهد

جاي عشان انسى هموم

جاي ابلل نار اشواق لهبيا ما بيرحم

والله يا خالد دة سؤال بيشعل ثقوب في الخواطر

وبهيج الشجون ...

والاجابات كتيرة اخلى مساحة الاندياح لباقى للجماعة

ليك تقديري وودي

صالح ابوشوارب

18-06-2005, 01:01 AM

الاخ العزيز خالد

أصلي كنت في غيبوبة والآن صحيت عشان كده

جيت وعايز اعيش ممكن اعيش ؟

aborawan

18-06-2005, 07:23 AM

اول حاجة حا اقولا والله ياناس انتو في نعمة كبيرة اياكم والتفريط فيها والغربة حارة زي النار وصدقوني كونا طلعنا من السودان دي كانت اكبر غلطه وآن الاوان عشان نصلح الغلطه ويادوب كده الواحد حسا بالراحة الكان كايس عليها من زمان والحمد لله

خالد هاشم علي

18-06-2005, 08:02 AM

ابراهومة..
أبوشوارب..
أبوروان..

المشكلة قبل مانجي البلد دي ولمن أخوانا وأصحابنا يقولوا لينا البلد دي مانافعة والغربة مافي ليها داعي... ماكنا بنصدق ولا دايرين نصدق.. وبنقول بالله شوف الناس ديل مادايرين لينا الراحة والخير والنورة والذي منه...
ياربي لمن نقول ليهم نفس الكلام اللي كان بتقال لينا ...

هل حيصدقونا؟؟؟

ابومرام

18-06-2005, 10:24 PM

اذا كان الغربة للبلد البعيد واليوم يمر ذي السنة نحن داير اليوم يمر وهو ساعات ولحظات واداير ارتاح شوية من الضغوط والروتين السابت واكون وسط عاطفة وحنية من ام واخوات ووووووووووو

أبوبكرحامد

19-06-2005, 01:32 PM

الغريب عن وطنوا مهما طال غيابو *********** مصيرو ارجع تانى لى أهلو وصحابو
انسا آلامو وشجونو ********** انسا حرمانو وعذابو
.................................................. .......
ياغريب الدار انها أقدار
كل مافى الكون أيامٌ ومقدارٌ له
إلا الهوى مايومه يومٌ ولامقدارهُ مقدار
" مظفر النواب "
.................................................. ......
عدنا لنسهم فى بناء الأوطان
عدنا لنمسح عنا بعض الأحزان
عدنا يدفعنا الشوق والتحنان
عدنا ليبقى كفيلنا السودان
" ود الماذون "
..................................................
إنى اخترتك ياوطنى حباً وطواعية
إنى اخترتك ياوطنى سراً وعلانية
إنى اخترتك ياوطنى فليتنكر لى زمنى
مادُمتَ ستذكرنى ياوطنى الرائع ياوطنى
ياوطنى الرائع ياوطنى
" من أناشيد مارسيل خليفة "

خالد هاشم علي

21-06-2005, 11:17 PM

الغالي أبو مرام...
مشكووور ياحبيب علي المرور...
لكن لمن تحكي ليهم عن هموم الغربة مابتحس إنك في وادي وهم في وادي تاني وماجايبين خبر لي كلامك ومن دواخلهم مامصدقين كلامك.. وبقولوا الزول ده ضارب الراحات والروقة ومادايرنا نبقي مرتاحين زيو؟؟؟؟

مافي حل غير هم بنفسهم يجربوا ويقتنعوا براهم...

الزمن المريح

23-06-2005, 05:15 AM

لك التحية اخ خالد هاشم

و الله كما قلت الناس ديل ما بقتنعوا بالحاصل هنا شنو ،،
علشان كدة تقول ليهم زهجنا من الراحات و الحياة المنعمة قلنا نجى نغامر معاكم هنا ،،،

التيمان

25-06-2005, 11:23 AM

جاي عشان ارتاح من ارهاق وتعب الغربة

جاي لامي وابو واخواني واخواتي

جاي عشان اصحابي واحبابي

جاي للبلد الانجبتني

البلد الترعرعت فيها بلد المهد

اجاى اعرس وراجع انتو تربو وانحنا نجى نختف
ههههههههههههههههههههههه

عزيز عيسى

01-07-2005, 06:43 AM

أبوهاشم،

أنحنا الحناكيش ديل لو ربنا رفع القدم ومشينا نزور السودان تفتكر حأقول ليهم شنو؟.. بقول ليهم أنا جاي اشوف خلقتكم.. هههههه

لا والله بقول ليهم:

أنا جاي اشوفكم لأني طولت ومشتاق

أنا جاي اتونس معاكم اقعد اصنقر في الواطة
أنا جاي اشم ريحة المنقة في البساتين والجوافة
و اشم ريحة البرسيم والجزر في الجروف والحواشة
أنا جاي العب بالتراب و اتكتح بالكتاحة
واتمرمط في الطين وادردق في البساطة
أنا جاي اشرب موية النيل العذبة الباردة

أنا جاي ادافر واتشعبط في اللواري و البصات
نفسي اركب عجلات برنسات دفار ورقشات
واتسلى بالفول المدمس والترمس وكبكبي الحاجات
وجاي العب شدت وسكج بكج وغمدت لبدت
وشليل والرمة والحراسة والفات الفات
وجاي استتمتع بطعم ملاح الخدره والكسرة البايتات
وسندوتشات الفول بالجبنة وزيت السمسم المظبط بالسلطات
بتقولوا لينا انتو حناكيش وبتاعين راحات
ارجعوا لغربتكم فايتكم كثير حاجات
بس اصبروا علينا شوية حنتعلم ونبقى تفتيحات
ننسى ألم الغربة والبعاد وننعم معاكم بالخيرات

عزيز

نيازى كشك

01-07-2005, 10:39 AM

ان بالنسبة الى
بقول ليهم
انا جاى اعمل مشاريع ضخمة وراجع طوالى

عشان احصل القروش المجدعة فى الشوارع

والعاوز يسافر يبعت اوراقة عشان اقدمة لية
فى الشركات والمؤسسات

اميمه عشريه

21-07-2005, 02:59 PM

لو قلت ليكم انا جايه ليه ما حتصدقوني ,,,,
اقول ليكم خلوني ما اقول لانكم ما حتصدقوني ,,,,,,,,,,,!!!!!!!!!

بابكر

03-08-2005, 09:38 AM

زعموا سلوتك ليتهم نسبوا الى الممكنا فالمرء قد ينسى المسى المفترى والمحسنا ومرارة الفقر المزل بلا ولذات الغنى والخمر والحسناء والوتر المرنح بالغناء
لكنه مهما سلا هيهات يسلو الموطنا

]

الوفي

08-08-2005, 07:39 AM

بشــــــــــــــــــــــــــــــــكركم جميعا يا اخوانا ويشكر صاحب الموضوع ولاني توصلت إلى شي رغم الغربه الصعبه مازالت القلوب ترجع في كل لحظة لأصلها ومقرها وجدتكم وطنييـــــــــــــــــــــــــن جد
وده شي مشرف
واها كلنا مغتربين وعرفنا مرارة الغربه وعرفنا بالتالي حلاوة الوطن وعرفنا انه قلوبنا مقتنعه بيكم انتوا يديكم العافيه اخواني
اخوكم العابر الوفي

saly

09-10-2005, 08:52 PM

من قلب الجزيرة

11-10-2005, 07:35 AM

بقول ليهم لو عايزين تعرفوا الجابني شنو
امشوا انتو هناك ...
بتعرفوا الزول كيف بيشتهي شاي الصباح مع الاهل ودخلة الجيران ..
وكيف بيشتاق لي كلمة موالفة من ناسا عزاز
بيشتاق يتنسم من هوا الله سااااااااااااااكت ..
كيف الناس تصابحك برغم قساوة الظروف بابتسامة تزيل الهموم وتخفف الام السنين ..

وبعد تعلق روحى
بروح الاسى..
واحتياجات الهوى ..
فى جميع الموانى ..
واحتجاز الهوى
فى جميع الموانى
تنفست صوتك حين
اطلّ الصباح دفيئــاً
وردد اغنية الشمس
حين تحاصر صمت
هذا النعاس الصديق
تنفست صوتك كأنى ..
ارى اصدقائى بعينيك
يحيون حيناً ...
وحيناً اراهم يبكون
بحثاً عن المستحيل
الذى لا يجئ..

التيمان

13-10-2005, 12:21 PM

ماتخلونا نبكى يا

المنار

15-10-2005, 03:43 AM

جاي عشان اعيش وسط اهلي وسط الناس الحلوة
جاي من شان حياة مافي لازيف لا نفاق
جاي من شان انعم بي نومة من غير تنغيصة
جاي من شان نصيبي ارجع وطني الغالي
جدودنا زمان وصونا علي الوطن علي التراب لغالي الماليهو ثمن
مناااااااااااااااار

salah

10-11-2005, 10:43 PM

اقول لهم
بلاد قد الفناها علي كل حالة
وقد يؤلف الشئ الذي ليس بالحسن
وتستعذب الارض التي لا هواء بها
ولا ماؤها عذب ولكنها وطـــــــن

Mr Lonely

15-11-2005, 10:40 PM