المساعد الشخصي الرقمي

مشاهدة النسخة كاملة : الزول ده شكلو كده مغترب



خالد هاشم علي
17-06-2005, 11:33 AM
قبل كم يوم كده كنت بتفرج مع المدام في سهرة علي قناة النيل الأزرق وكانت عبارة عن حفلة والسهرة بعنوان ( طرب الليالي)..
المهم ونحن بنتفرج ونعلق علي السهرة والناس الفيها فجأة ظهرت صورة واحد كده ومعاهو زوجتة.. الظاهر الراجل عريس جدييييييييييييييييد لنج... قامت المدام قالت لي ..: والله الزول ده شكلو مغترب !!!!!!!!!!!!!!

قلت ليها ليه قلت كده؟؟؟؟
وهل المغتربين عندهم شكل مميز؟؟؟
وبالمناسبة الراجل كان لأبس أقل من عادي!!!!! يبقي أكيد الحكاية ماحكاية وجاهة ونظافة ولمعة ونورة... والشباب في السودان بيلبسوا أحسن من بره بي كتير وخصوصاً البنات...
قعدت أسال في نفسي ياربي الوليه دي ليه قالت كدة ؟؟؟

بعد شوية مقدمة البرنامج جابت المكرفون عشان تتعرف علي الراجل.. وفعلاً الراجل طلع مغترب...
قمت أصريت شديد علي الولية..
ليه إنت قلت الراجل ده مغترب ؟؟؟
وكيف عرفتي إنو مغترب؟؟؟


قالت لي بكل بساطة :

المغترب تلقاهو منطط عيونو ومذهلل كده زي المخلوع....


رأيكم شنو في الكلام ده ؟؟؟
وهل نحن لمن ننزل السودان بكون شكلنا ظاهر؟؟؟ ومنططين عيونا ومخلوعين ؟؟؟؟




سؤال للنقاش

غنيلي ياكروان
17-06-2005, 10:23 PM
هههههههههههه:D :p :D :p المغتربين ديل ما ضاربين الضلله انتا ناسي ولا شنو وفي الما اتعود على السودان يعني الليهو كم سنه ما نزل السودان يعني سنه سنتين ثلاثه خمسه سبعه ما تستغرب انا لي 8 سنه من السودان ما نزلت يعني تلقى الواحد مستغرب شايف الناس غريبه عليهو وده شي طبيعي والنوع الثاني الضارب الضلله :D :p ده تلقى صحتو كويسه وتحس بي النضارة في وجهو ومن النضارة تشوف عيونو منططه:D ;) :p ولا رايك شنو
:D

ضياء الدين احمد
17-06-2005, 11:05 PM
والله انت يا خالد تجيب في المحن
انا غايتو زمان قبل ما اغترب كنت بشوف المغتربين البجو السودان دمهم تقيل والواحد تسالو سؤال ارد ليك علي حسب سؤالك يعني ما بسترسل معاك في الكلام لكن الحين عرفت اني كنت ظالمهم بس انشاء الله الواحد انستر في اجازتو من البرعمه والتطهم وتقالة الدم وكلمة خبز وسياره لأنو الشفوت قاعدين ومترصدين اي حركة او كلمه لكن بتبقى للغربه فائده كبيره واهم شئ انو في مشاكل زمان الواحد كان بشوفها كبيره لكن هسع بنشوفها كلام فارغ وغير كده بتحس بانو مداركك اتوسعت وانو عودك قوى
ختاما ياود هاشم اتمنى اشوفك في السودان وانت قاعد جنب ناس محمد موسى مبرعم ومدهول وهم اضحكوا عليك
وســــــــــــــــــــــــــــــــــــــــــــــــ ـــــــــــــــــــــــلام

خالد هاشم علي
18-06-2005, 12:46 AM
الغالي غنيلي ياكروان...
مشكور علي المرور... لكن صدقني ياحبيب لمن ترجع السودان حتنطط عيونك وترفع حواجبينك وما حتفهم أي حاجة في أي حاجة لأنك طولت مانزلت والله يعينك من لسان الناس ... حيقولو إتغيرت وبقيت مازي زمان...



الله لينا نحن المغتربين...
وجع في الغربة....



وضهب في السودان...

خالد هاشم علي
18-06-2005, 12:54 AM
الغالي ضياء وداعة...العريس

برضه نحن كنا بنقول عاين المغترب الوهم ده ... بالله شوفو فاكيها في روحه كيفن... العجب لمن المغترب يقول ليك كلمة خليجية زي سيارة والحين وإيش... يالطيف...
المشكلة ياحبيبنا الواحد يمشي مابعرف التغيير في الناس ولا في نفسه.... وتلقي روحك إنت في وادي والناس في وادي... ومهما تحاول تنصهر وترجع زي زمان برضه ماحتقدر...
وأعمل حسابك شديد من الشفوت ... لأنهم لابتين ليك ودايرين فرصة.

لكن ياضياء بيني وبينك كده...
الزهللة حاصلة عندنا نحن المغتربين ديل....
المشكلة بتاعين السوق ولا محطات البنزين ولا بتاعين التاكسي أول مايعرفو إنك مغترب يفتكروك دقوسة وماناقش أي حاجة ويحاولوا يتشطروا عليك.... حتقول لي كيف عرفوا إنك مغترب؟؟؟ ح أقول ليك من الزهللة ونطيط العيون.

aborawan
18-06-2005, 07:19 AM
المغترب بقى ظاااااااااااااااااااااااااااااااااااهر في السودان وما بتتعب كتير عشان تعرف اذا كان الشخص ده مغترب او لا لا

كدي هسه عليك الله كان لاقيت ليك كمية من الجكس ماشين في الشارع اندهاشك من المنظر القدامك ده ماشاء الله بنات سمحات وماشات من غير نقاب ولا عباية ( الخلعة دي براها كفيلة بانها تكشف انك مغترب ) وحصلت لي في اجازتي الفاتت :D:D

غايتو مافينا نقول غير ( لكم الله ايها المغتربون المخلعون )

خالد هاشم علي
18-06-2005, 07:51 AM
ماده المجننا ذاته ياأبوروان... الخلعة والإذبهلال

ابومرام
19-06-2005, 04:50 AM
ابو هشام حبابك والله قدر ما اقول خلاص اتصبرت تجي انت تاني وتفتح علينا الهم دا انت عارف دا الشي الوحيد العامل لي هم وقلق ماخايف من شي الا الزهلله دي ماعارفين الاجازة الواحديقضيها يفهم الناس وتفهموا ولا يعرس فيها ولا ولا ولا ولا ولا ولا وربنا يكون في عونا وعون اخوانا كتيييييييييييييييييرين زي ما قالت اخونا ابوروان اول الحاجة البتخلعك حتقول بالله شوف ديل ماشات ساااااااااااااااي من غير نغاب وشوف دا ك وشوف ديك وشوف وشوف وتلقى حكايتك منتهيه خلاص والمشكلة في السيارة والخبز - قول - ابشر وحاجات تانية حاميني - وربنا يكون في العون 00

عماد الصادق
19-06-2005, 08:00 AM
الأخ خالد .. دايماً مواضيعك في الصميم .. وتفتح الشهية للنقة والشمارات..

تعرف .. حقيقي زمان قبل ما نغترب .. كنا بنعرف المغترب من وسط ميه
وصدقت المدام في نطيط العيون ..والذهللة ..

ورغم إنو الواحد ما قاعد يغيب من السودان لكن في كل إجازة الواحد في كل لمة لازم يعمل حسابو .. في كلامو في قعدتو .. يعني الواحد لو انتبه انو خالف رجله .. بسرعة ينزلها ويتلم ..!!

مرة في واحد اتصل على في الجوال .. وعامل فيها ظريف .. ومرطب ..
قفات الخط .. وقلت اتصل عليهو الراجل صاحب ماهية ..!!!

أنقرو تاني اشتغل بي .. وااله حتى رسلت ليهو رسالة اعتذار ..
برضو ما اشتغل بي شغله ..

وتلقاهو يقول في سره .. شوف الوهم ده .. عامل فيها مغترب ..؟؟

وصراحة في السودان الواحد يحتار في الناس .. فاكينها على الآخر
وشغالين بمقولة أصرف ما في الجيب يأتيك ما في الغيب ..

ونحن الواحد يشتري ليهو كيلو لحم يقعد يضّرب فيهو بيساوي كم ريال ..

ودمتم .. ولكم التحية

أبوبكرحامد
19-06-2005, 01:18 PM
تشكر ياأبوهاشم ونشكر الدكتورة التفتيحة على نظرتها الثاقبة ، أنا بفتكر انو المغترب بكون مذهول من يوم عودته للسودان وحتى انتهاء الإجازة للفوارق الكبيرة بين السودان ودول المهجر والفارق بين المغتربين والمقيمين بالسودان تجده فى اغنية كابلى " زمان الناس هداوة بال وانت زمانك الترحال " ، كانت لى مآخذ على المغتربين حينما يتحدثون عن السيارة والدوار واليوم ، لكن أعتقد أن هذه الكلمات تصدر فى الغالب بحسن نية ، لهم الله المغتربين غربة عن الوطن واغتراب وجدانى حين عودتهم نسأله تعالى أن يردنا سالمين غانمين ولاأذيع سراً لو قلت لكم أن هاجس العودة النهائية للسودان يلازمنى حالياً وربما اتخذت هذا القرار فى الأيام القادمة.

امير عبدالباقي
19-06-2005, 08:10 PM
ودهاشم اخوي
معزره علي التاخير بظرف السفر الي المدينه
لكن جد موضوع جميل والاندهاش والزغلله حاصله وزي ماقلتو حكايه شوف دي من غير نقاب وكلمه شوف دي زاته والمقارنات دي البتخلي الواحد زي الاهبل وسط الناس والمغترب حساستو الزايده في انو يعمل حسابو مايغلط دي هي البدوديه في داهيه وتخلي الناس تاخد باله لانو بكون حريص لشعور الناس يقولو عليه متعالي عليهم والله حيره شديده
الله يكون في العون

خالد هاشم علي
19-06-2005, 09:45 PM
ابو مرام...
تعرف ياحبيب أحسن حاجة ليك تعمل نفسك مشغول بالعرس ... لأنو العريس حتي لو كان قاعد في السودان بكون مذهلل...
أها لقيت ليك حل في الإجازة دي...
الإجازة الجاية حتعمل شنو؟؟؟

خليك جاهز لي نطيط العيون.. وبالله شوفوا الوهم ده تلقاهو مغترب...


الله لينا..

خالد هاشم علي
19-06-2005, 09:53 PM
عماد الصادق....
والله العظيم دي مشكلة كبيرة شديد..
تعرف أنا لمن نزلت الإجازة كنت حريص إني أكون مع الشباب في الطلعة والنزلة وكل حاجة.. لكن برضو كنت بحس إنهم في وادي وأنا في وادي تاني...
وإنهم كاشين مني كده وماقادرين ياخدوا راحتهم...
طيب ياجماعة نحن نطير وين...
غربة بره وجوة...

الله المستعان

الدبلوماسي
19-06-2005, 09:58 PM
هههههههههههه ..... والله معاها حق .. الواحد فينا لمن ينزل السودان بعد غيبة من سنه إلى أربعه سنوات بيكون مشتاق وداير يتفرج على أكبر عدد ممكن من الحاجات الجميلة التى أضاع فرصة شوفتها ومن شوق وحنين إلى الوطن الغالي .
أدعو الله أن يجمعنا جميعاً في أرض الوطن الغالي والله والله والله مشتاق للسودان وتراب السودان واهل السودان .................................................. .....
قلبت علينا المواجع ..... الله يدك الف عافية يا أخ خالد .

أخوك
ابويوسف

خالد هاشم علي
21-06-2005, 09:02 AM
الغالي أبوبكر حامد
العريس...
أها أول ماقرب العرس تقول داير ترجع السودان نهائي... قلنا ليك نحن السابقون وأنتم اللاحقون.. وقلنا ليك التعليمات الجديدة حتجيك وحتمشي عليها بالنص .. والظاهر عليها قالت ليك ترجع السودان...

التيمان
24-06-2005, 02:35 PM
ىاود هاشم
حاتجى وتعاين وتشبع من المعاينه وبتكون مهجوم ومخلوع بتلقى
التكاسى فيها مكيفات وتتهجم وتترجم وتسمع الاغانى الغربيه ناس نلى والجماعه المعاو الناس كانت مابتعرف غير جاكسون

114
07-07-2005, 02:39 AM
اول ما بدا الاغتراب كان الناس بتعرف المغترب من الشنطة الدبلماسية، واللبس الما موجود في السودان آنذاك، وببعض الكلمات زي السيارة ووخر يا ورع، ودا الحين، الى آخر هذ الكلمات التي يقولها البعض بسبب التعود ويقولها البعض الآخر لينبه الى نفسه بأنه مغترب (يا بنات)، وكمان ببعض التصرفات الغريبة (مثل ذاك الذي يخرج زجاجة العطر ويبخ بها السيجارة قبل ان يشعلها، بحجة أن يغير من ريحة السيجارة العفنه دي) وبرضو زي الرص القروش في الواطه وختا طوبه فوق كل جنيه، ثم مشى فوق الطوب ليثبت ان الفلوس لا قيمة لها وانها تحت رجله، الى آخره من التصرفات الغربية والغبية في نفس الوقت..

ثم اصبح المغترب يعرف- بعد سنوات السودان العجاف التي حلت بالبلاد وجوعت العباد- اصبح المغترب يعرف بخدوده الممتلئة، وجسده الريان ودلائل النعمة (التي كان يفتقدها القاعدين في السودان)..

ثم صار يعرف- بعد أن انتعش السودان وبقوا الناس لابسين كويس وماكلين كويس، والجضوم اتلاحقت- بقى المغترب يتعرف بنطيط العيون والزهلله- زي ما قال اخونا خالد..

وما معروف باكر يتعرف بشنو؟ يا ربي بشحوب لونو، وكرفيس وشو، وعضامو الكاسياهن جلدو، وهدومو الـ (آوت أوف ديت)، وفقره المدقع... :mad:

اميمه عشريه
07-07-2005, 02:00 PM
في مقوله بقت منتشره شديد في الشارع السوداني الواحد لمن يشوف ليهو مغترب جديد جاي البلد بطلقوا عليهو ( والله الزول ده زي صحن الشيه لو برد ما بتاكل ههه) يعني الحق اخبت سريع قبال الزول ده ما يقوم يعمل فيها مفتح ويعرف حركات نص الكوم البعملوها الاهل في التجريد من كل شي من اعلي الراس حتى اخمص القدمين الله يكون في العون وبيني وبينكم كتار مغتربين عاملين فيها اف اف ار (f.f r) فاكيها في روحو
بالغوا مشششش

خالد هاشم علي
08-07-2005, 08:52 AM
اخي ابو يوسف
يحياتي ومشكور علي المرور وتسلم علي التعليق
وزي ملقلت كلنا شوق للسودان وللعودة ولقاء الأحبة عسي ولعل انو مانزهلل ولا عيونا تتنطط.
تسلم وانشاء ربنا يجمعنا واياكم بارضنا الحبيبة السودان

خالد هاشم علي
08-07-2005, 08:57 AM
حبيبنا امير
تسلم ياحبيب علي التعقيب وانا بتفق معاك تماما انو الواحد فينا بكون حريص انو مايغلط ويصدر منو تصرف كده ولا كده سواء بعبارة او فعل.
لكن المشكلة ياامير نحن لمن كنا موجودين في السودان كنا بنلاحظ للمغترب لو اخد راحتو ولو مااخدها.. يعني في الحالتين ووب.
الله يعينا ويستر علينا

خالد هاشم علي
08-07-2005, 09:02 AM
اخي عمر غلام الله
لك التحية والود
وينك ياحبيب تظهر يوم وتختفي عشرة... ولي الشرف ان احظي بمشاركاتك وتعقيبك علي الموضوع..
صدقت في كل كلامك وخوفنا مما ذكرت..
ربنا مايجيب اليوم داك.. ويرجعنا بي سلامتنا لي اهلنا الطيبين ونقعد ننطط عيونا معاهم كم شهر كده وبعد داك نتعود ونستني (المغتربين الدقوسات الموهومين) لمن يجوا الاجازة ونقول عليهم ( بالله عاين الوهم ده .. تلقاهو مغترب )

الله المستعان غربة وطن وغربة نفوس..
الله يعينا ويصبرنا

خالد هاشم علي
08-07-2005, 09:10 AM
الرائعة اميمة عشرية...
مرة شفت لي كاركاتير فيهو جماعة مقدمين ليهم مغترب في المطار.. الراجل راجع غربته بعد نهاية الاجازة.. المهم هو واقف بعد نقطة التفتيش بي ملابسو الداخلية وبي الناحية التانية من التفتيش الجماعة المقدمنوا... واحد فيهم شايل بنطلونه والتاني شايل قميصه وواحد شايل الساعة وآخر شايل الجزمة... وخلوا ليك الراجل قاعد ميح...
وواحد منهم رافع ليهو يدو وبقول ليهو.. : اها يافلان ماتنقطع. وفلان بيرد عليهم في سره : ماانقطع ؟؟ هو انا تاني بجي؟؟
وعجبتني شديد حكاية FFR دي ( فاكيها في روحو).. والله حلوة شديد.. وزظي ماقلت في بعض الأخوة المغتربين مزودين الحكاية حبتين. وجايبين لينا الكلام.
مشكورة كتير علي المشاركة والتعقيب..

ملحوظة:
سلام خاص لأخي محمد مامون عشرية وبلغيه اشواقي
ودمتي

ابراهيم
08-07-2005, 03:55 PM
كدي هسه عليك الله كان لاقيت ليك كمية من الجكس ماشين في الشارع اندهاشك من المنظر القدامك ده ماشاء الله بنات سمحات وماشات من غير نقاب ولا عباية ( الخلعة دي براها كفيلة بانها تكشف انك مغترب ) وحصلت لي في اجازتي الفاتت




بعد اذنك يا خالد ممكن اشارك في البرنامج

حرقني كلام ابو روان دة والله


يا حمادة يا خوي خلعتك دي ما خلعة غربة

:D :D :D

ويا اختنا اميمة زي ما قال خالد

FFR دي قوية ... وجدييييدة اها جنس المصطلحات دي البتخلينا نتخلع

التيمان
15-07-2005, 12:12 AM
بعد اذنك يا خالد ممكن اشارك في البرنامج
FFR دي قوية ... وجدييييدة اها جنس المصطلحات دي البتخلينا نتخلع [/B][/QUOTE]


والله تسمع مصطلحات جديده وراندوك تكون زى الا طرش فى الزفه