المساعد الشخصي الرقمي

مشاهدة النسخة كاملة : السلام عليكم عضو جديد ومشاركة للمغتربين قصيدة يمة رسلى عفوكى


alklaklah
04-07-2005, 02:00 AM
السلام عليكم عضو جديد وداير اديكم قصيدة تخفف للمغتربين اللم الغربة لكن عندى طلب بسيط اول عليكم الله البقدر على ما يقصر.(انا داير غنية بت البلد كاملة ومرتبة والقصيدة للشاعر الشايقى السر عثمان الطيب وبتحكى عن وحدة دايرة ود البلد التربال وابوها داير ليها الموظف ود الخرطوم).
وهاكم يا يمة رسلى لى عفوكى
شوفى الزمن يا يمه
ساقنى بعيد خلاص
دردرنى
واتغربت
واتبهدلت
ورينى الخلاص
ساقنى القدر منك بعيد
لآذايا كأس
***
يا يمه
يا فيض الحنان الما كمل
يا يمه
يا بدرى البشع دايماً يهل
يا يمه
يا نور الصباح وكتين يطل
واشرى يا (زينوبه) ولدك
فى دروب الشوق كتل
محروم من الحب والمحنه
وراك همل
***
يا يمه
يا بحر المودة وكت يفيض
يا يمه
يا شعلة أمل زادت وميض
يا يمه
يا عنقود كلام منظوم قريض
يا يمه
يا نغماً حس بالشوق يرن
وافكارى فيهو .. بيرتعن
دمعاتى شانو .. بينزلن
***
واتذكرك يا يمه
فى الدغش النسايمو يهبهبن
قايمى الصباح متكفلتى
شايلى الحليلى على المراح
والساعة ديك يادبو ديكنا بدا الصياح
والطير ضغارو يغردن .جبتى اللبن بانشراح
***
واتذكرك يا يمه
ساعة الهجير صالاكى نار الدواكى
عُستيلنا الفطير
رشيتى قلتى اكلوهو ...خير
واتذكرك يا يمه
يا بسمة الطفل الغرير
وكت الخلوق ترقد تنوم
واسهر براى أرعى النجوم
والشوق يرف جنحيهو
بى فوق لى ..يحوم
,اهتف باسمك فى الخيال
طيفك كمان بي فوقى جال
واتمنى لو لحظات يدوم
لكنى فجأة القاهوو.. زال
***
واتذكرك يا يمه
ساعة الناس يجونا من البلد
ناعم ترابا على جسيماتن رقد
ريحة التمر فوق الهدوم
لون الخدار خانس لّبد
والشوق أوارو بيشتعل
كان ظنى فيهو يكون خمد
***
واتذكرك يا يمه
والناس قالو قايمين البلد
رصو الهديمات ..عدلوا
ركبوا اللوارى .. وقبلوا
خلونى وحدى بلا أنيس
كيف انفرادى ..اتحملوا
شالوا السلام من عندى ليك
وان شاء الله عندك يوصلوا
***
يا يمه
ساعة يوصلوا
ويقولوا ليك ..شفناه فى بلد الامان
مبسوط ورايق فى امان
أنبسطى يا نبع الحنان
وانا حالى يشهدبو الزمان
يا يمه رسلى لى عفوك
ينجينى من جور الزمان
يا يمه
رسلى لى عفوك
ينجينى من جور الزمان
welly
04-07-2005, 08:09 PM
مشكور يا ود الكلاكلة
بس الغربة والله صعبة
شديد وربنا اصبرنا عليها

يسلموووووووووووووووووووو
aborawan
04-07-2005, 08:29 PM
تشكرات يا ود الكلاكله ويديك الفين عافية ومرحب بيك وسط اخوانك ومنور المنتدى




وبلا خبر طق الخبر مالى البلد
قالو العريس قام بالأحد
الحلى جاطت والحريم يتهامسن جاى الولد
كوم من بنات للبير ورد
يتحدثن جاى الولد
يا بختها وا شوقنا نحن الليلى جمر الشوق وقد

القصيدة المطلوبة فتشتا ليها بس للاسف ما لميت فيها والله ولا زال البحث جارياً حبيبي
114
04-07-2005, 11:05 PM
مرحبا بك عضوا فعالا في منتدانا
ومرحبا بكل الكلاكلات
وشكرا لك على القصيدة التي أثرت فينا تأثيراً بليغا عندما تغنى بها ود الجباره في السبعينات، وكنا وقتها مغتربين لأجل العلم، وطريي العود، يعني صغار وأول مره نفارق البلد ونفارق الأهل، عشان كده كنا بنبكي بمجرد أن نسمعها..
كاظم
05-07-2005, 02:08 AM
تحياتي يا ود الكلاكلة عبرك الي امي والي كل امهات العالم
وليك اجمل التحايا وانت داخل علينا دخلة ما بتخلي الزول يصر ليك
واصل
الزبير محمد عبدالفضيل
05-07-2005, 03:15 AM
مرحبا بك عضوا فعالا في منتدانا
ومرحبا بكل الكلاكلات
وشكرا لك على القصيدة التي أثرت فينا تأثيراً بليغا عندما تغنى بها ود الجباره في السبعينات، وكنا وقتها مغتربين لأجل العلم، وطريي العود، يعني صغار وأول مره نفارق البلد ونفارق الأهل، عشان كده كنا بنبكي بمجرد أن نسمعها..

ويديك الف عااااااااااااااااااااااااااااااااااااااااااااااااا ااااااافيه
alklaklah
07-07-2005, 02:41 AM
السلام عليكم اشكر كل الاخوة الذين مروا على الموضوع وترقبوا المزيد المفيد انشاء الله
نيازى كشك
08-07-2005, 07:54 AM
كاتب الرسالة الأصلية welly
مشكور يا ود الكلاكلة
بس الغربة والله صعبة
شديد وربنا اصبرنا عليها

يسلموووووووووووووووووووو