الحقوني سرييييييييييع صحي انحنا شعب كسلالالالالالالالالان ؟؟

[اميمه عشريه]

يا جماعه معليش اسمحوا لي المره دي اكتب بالدارجي لانه الموضوع العايزه اكتب فيهو ده حارقني شدييييييييييييد مورم لي فشفاشي وغايظني بشكل ما عادي
الموضوع هو كالاتي //
انه انحنا الناس كلها بقت تتهمنا بالكسل الكســــــــــــل
الواااااااااحد ده انحنا ناس كسلانيييييييييييين عديل كده
والنكات الكانوا نجوم الشباك فيها الصعايده هسه دخلنا
الالفيه دي وبقت النكات تطلق في كسل السودانيين الحقوني
سريع وواحدفيكم يقنعني بعكس النظريه دي لانه انا هنا دلوقت
خسرت كل صداقاتي مع الجنسيات الاخري بسبب هذا الموضوع لاني
بصراحه بدور الكاسوري طوالي وبتعامل بعنف شديد لمن الاقي
زول يتهمنا بالكسل وانو انحنا من الشعوب التي احتلت
المراكز الاولى في حب النوم وقالوا البصحا بدري في السودان
بيقوم بحكمنا وبعمل فيها رئيس وقالوا في واحد سوداني ما
عرف انه اتشل الا بعد خمسه يوم وواحد تاني قالوا ليهو غير
اللمبه حرقت قال لاخوه ارفعني طيب فوق عشان اغيرا لمن رفعه
قال ليهو ما تلفني انت من تحت وهو ماسك اللمبه اتخيلوا ما
قادر يلفا وواحد وولده اتشاكلوا في فتحان الباب كل واحد
يقول للتاني افتح الباب لامك يا ولد لالالا يا ابوي قوم
انت افتح الباب لمرتك يا ابوي قال الابو طيب اهي طلقانه
قوم دي هسه امك انت افتح ليها الباب احييييييييي انا يا جماعه صحي
بس انحنا امه كسوله بالشكل ده كدي تعالوا نتناقش في الحته دي ليه بطلقوا علينا الصفه دي ياخي الحقوني قوام
قبال ما نفسي يقوم اكتر من كده ,,
وفشفاشي البديل يتفقع كمان ..!!

[ابراهيم]

اختنا اميمة ما تزعلي نفسك

الكسل دة متواجد بكميات متوفرة في السودان

واقرب مثال : عندك يوم السبت حيكون اجازة رسمية لكل المؤسسات احتفالاً بالسلام واجتماع الفرقاء .. المناسبة جميلة لكن كمان ما قدر دة .. مع بداية سودان جديد مفروض يكون في درش وعصر عشان نحصل الناس الفاتو كدى اقعدي براااااااااحة كدة واحسبي شوفي السودان متأخر قدر كيف .. مع انو الشعب السوداني اكتر شعب مطلع والمثقفاتية والمنظراتية في السودان ما اكثرهم ... لكن كلنا (حشاش بي دقنو) كان ما كسلانين نحن من الاستغلال لغاية حسي كم سنة هل في انجاز واضح يتحسب لينا ... ضيعناها كلها في عطلات واحتفالات رسمية او شعبية والبذخ والاسراف فيها ما يديك الدرب
دة غير حاجات كتيرة تانية والكلام فيها كتييييير

لو عايننا لي دول كانت متأخرة عننا بمراحل بنشعر بحتة الكسل دي , نحن السودانيين ما بنقدر الزمن يعني فارقين زمن.

الكلام بحرق وانا شخصياً ما بتقبل كلام زي دة من الاجانب لكن بيناتنا المفروض نعترف ونشوف ...

تحياتي

[naz_imam]

الاخت العزيزة اميمه

لك خالص التحايا ورغم الزعل الشديد الانت فيه ولكنها وبكل أسف هذه الحقيقة المرة التى لانريد الإعتراف بها، فحقا الكسل هى سمة من سمات شعبنا اما إذا اردنا ان نسوف الامور فسنقول اننا بطيئن بعض الشى ولا نستطيع مجارات ايقاع الزمن السريع إين نحن من بقية العالم الذى بداء بعدنا بالتاكيد بعيدين كل البعد منهم فالسودانى لايعمل بجد وإجتهاد إلا خارج السودان هذا هو الواقع والذى يجب أن تتقبليها وتتعاملى معها برحابة صدر

نزار

[الزمن المريح]

الاخت اميمة ،، لك الف تحية على فتح هذه النافذه على هذا الموضوع ،،

اولا نحن ليست بشعب كسلان ،، و خصوصا اذا كان هذا الكلام من اهل الخليج بالتحديد الخليجيين ، اما اذا كان من اليابانين ففعلا نحن بالنسبة لهم كسلانين جدا ،،

اما موضوع ان السودانى كسلان فهى مسألة فى التربية ،، التى يعتمد فيها السودانى دوما على اهله و معارفه و مشاركتهم له فى كل كبيرة و صغيرة و هذه يعتبرها الكثير من الشعوب امر غير طبيعى ،، يعنى ان تستضيف احد معارفك فى منزلك و تكرمه و تحاول قدر الامكان ان تريحه و تلبى له طلباته هذه لا توجد فى اى جنسية اخرى و الاخرون يعتبرونها كسل ،،، حيث ان كل فرد عليه الاعتماد على نفسه و لا حرج ،،

هل رايتى خليجى يكنس الطريق او يعمل فى الاعمال الشاقة بناء ،، طلبة او حتى زراعة ،، سبحان الله ،، و الله يخلى ليهم البنغالة و الهنود و البتان ،،،

و لى عودة

[عبدون]

انا غايتو بقوليك اننا ماكسلانين ولا حاجه لانو القالوا الكلام دا ماشافوا حاجه في البلد دي والله الناس بقت تعمل بايدها وكرعيها في اي مكان في السودان وبرضو دا مامكفي يعني الزول الزول شغال اليم كل ومافي فايده
في مجال عملي انا شخصيا شغالين مع خواجات وخليناهم اعرفو ان البلد دي فيها امكانيات بشريه ماساهله وشغالين معاهم طول اليوم ومافي واحد بس كسلان بالعكس منافسه ما عاديه بناتنا

[التيمان]

انحنا كسلان جدا الفى مجله ماجد

لكن بنقوم وبنثور وبنغضب وبنبقى انشط ناس


ومشكوووووووووووووره

كان لقينا زيك اتنين كان البلد اتصلحت

[عبدالمجيد عشريه]

والله يا اميمه يا اختي الشعب السوداني هو ما اظن كسلان للدرجه البوصفوها الناس دي بس شويه كده اتكالي......وبحب الراحات انا اظن انو الدلع الكتير.. وطريقة التربيه من انحنا صغار لعبت دور كبير في شويه اتكالنا علي الغير وانحنا كبار ....لكن والله طيبين ياخي وعلي الرغم من السلبيات الكتيره العندهم الا انهم مهزبين شديد والكتير بل الغالبيه بتعرف الاصول .....ودي مفقوده عند نظيرهم... العرب التانيين .....ديك... انسيني منهم بس انسيني

[ماليزي]

تحيه طيبه يا اميمه
وباصراحه الشعب السودانى كسلان لا ابعد الحدود
مثلا لو سالتى اى سودانى عن البرتامج اليومى بتاعوح تلقيهو
1. صحية من النوم الساعة 12
2.اسوكة وفطرة الساعة 2
3.جلسة فى التلفزيون لحادى الساعة 5 مشية الدافورى واقرب عمود تكلتا فيه بعدين مشينا النادى وجيت الساعة 1.2.3........ ولو كان فى حفله فى الفريق ما خلاص الموضوع محسوم(دا اسمو شنو)
ام البنات الوحدى تصحا الساعة 10 وتقعد فى التلفزيون اليوم كله

بس ما الكل