البنات مظلومات ولا .....................

[طير الورور]

جلست بقربه ويكاد الصمت بينهما يصبح لغةً للكلام

نظر اليها ونظرت اليه .....

فقال متبسماً : ساشتاق اليك يا روحي...

لم تجد اجابة ً ترد بها عليه سوي الصمت ...

فاردف يقول ( انا شايلك معاي ما حتغيبي عني
موجودة جواي
في مسام الروح
وفي مجاري الدم )..

سكتت ولم ترد عليه بحرفٍ واحد ... سوى نظرةٍ كانها الغيم المطير ..

فاضاف ( ماتشيلي هم .....كلها سنة واعود اليك ) ...

كانت فقط تكتفي بالنظر اليه تارة وبالنظر الي الارض تارة اخري..

حزم حقائبه وظن ان الحزن ألجم لسانها فلم تسطع الكلام...


ولكنه حين سمع نداء المضيفة بان وقت الاقلاع قد حان !!!


ادرك ساعتها انها قد اقلعت عن حياته وللابد.....


وعرف ان الصمت كان عجزاً ,,,,,


وأنها لم تجد مبرراً واحداً كي تبرر به إقلاعها عنه..........

جلس علي مقعد الطائرة وتساءل بينه وبين نفسه.....

هل كان سيحصل عليها لو انه جلس ولم يقرر الرحيل ؟؟؟؟

ابتسم في حزن جميل وهو يعلم انها اول ضريبة يدفعها في الغربة ....

ولكنها ضريبة عشرون عاماً

ولا سبيل للتاجيل

او العفو من ادارة شئون المغتربين...

فهي الضريبة التي لابد له ان يدفعها....


..


السؤال ::

- هل اخطأ حين قرر الرحيل عنها ,, لتحسين اوضاع اسرته المالية ... ؟؟؟

- هل اخطـأت بعدم انتظارها له وارتباطها بانسان اخر ربما يكون مغترباً ايضاً

عاد للبلد كي يكمل نصف دينه ؟؟ ام ان النساء مثل قطار السكة الحديد

ياخذنا جميعاً ولكن لابد من محطة النزول ....؟؟؟.

- ام هل هو الوضع الذي فرضته علينا ظروفنا الحالية في السودان ؟؟؟...

- هل وهل وهل ؟؟؟؟؟.....

[welly]

كلماتك حلوة

اخوي

طير الورور

يسلمووووووو

[طير الورور]

يديك العافية اخوي ولي لكن ....

حلاوة الكلمات جواها حنظل من الوجع الخرافي

وبجد خلونا نناقش ؟؟؟

مين السبب ؟؟؟

ومين الغلطان ؟؟؟

وماهو الحل ؟؟؟

البنات مستعجلات وما بصبرن ؟؟

ولا الاولاد هم اللي باعوا القضية وسكوا الاغتراب ؟؟

والاهل ومواقفهم منك ؟؟؟

وهل حيرضوا اهلها اذا وجلست في السودان ورزقكم ورزقها علي الله ؟؟؟

ياجماعة اسئلة كتيرة ومحيرة ؟؟؟

والاهم من كده ؟؟؟ النوع اللي وهب حياتوا لواحدة بس وما عرف غيرها واتفاجا

بانها تزوجت وهو في الغربة ,,,, وبقي ياعيني لا عارف واحدة عشان يتزوجا

ولا طالها هي نفسها وتكون مشكلتوا الكبرى الاختيار من اول وجديد ؟؟؟

انا في انتظار رايكم ؟؟؟

[أبوريلان]

الأخ / طير الورور

سلالالالالامااااااااااااااات

السبب ؟ أولاد الحرام - البيخدعوا البنات بالمظاهر الكذابة .
مين الغلطان ؟ الغلطانة البنت المسكينة البتصدق الرجل الجاهز وتبيع الخطيب المعروف لها ولأسرتها .
الحل ؟ فى القرآن ( الإستخارة ) . أو الضياع .
البنات مستعجلات ؟ نعم لأن الشباب إعتكف عن الزواج ومن يقدم على الزواج يجد أذن صاغية .
ولا الأولاد باعو القضية وسكوا الغربة ؟ الأولاد لن يبيعوا القضية لأن كل شاب لابد وأن يتزوج وفى سبيل الظروف الإقتصادية وحتى يجمع مال الزواج لابد من وجود الوسيلة والوسيلة هى الإغتراب وبيع اللحظات الحلوة مع الأهل والأصدقاء ويفاجأة بعد كل هذه التضحيات بشاكوش .
الأهل مواقفهم منك ؟ الأهل بعدما يوافقوا على مبدأ بنتهم لاتجد منهم مواقف رجولية لأنهم باعوك كما باعتك بنتهم .
وهل حيرضوا اهلها اذا وجلست في السودان ورزقكم ورزقها علي الله ؟؟؟ فى الأول ولكن هيهات أن تبدأ العاصفة بالإلحاح عليك بالسفر لتحسين وضعك المادى .

يعنى يا طير الورور مهما تعمل أو تناقش فهذا هو الحال فى السودان ، الجاهز يكسب .

أوع تكون مغترب !!!!
لازم تكون جالس فى السودان وعندك أخ مغترب عشان يرسل ليك كل حاجة تطلبها العروس أو حماتك .

وطبعا كلامك دا بنطبق على كثير من الشباب .

ولو لا إختلاف الآراء لبارت السلع . دا رأى خاص ولكل رأيه الخاص فى الموضوع .

[مزوني]

والله انا شخصيا أئيد كلام أبو ريلان قلبا وقالبا
وهو دا الحاصل فعلا
يعني حتة المثل واضح
" كل ما تربي كتكوت *** يكبر ويفوت "
يعني ديل الصغار فما بالك لما تحب لي واحده كبيرة أو معاك في الجامعة؟
طبعا في مفارقات وما كل البنات زي بعض
لكن الخير يعم والشر يخص ودا حال الغالبية العظمى من بنات حواء
الولد داير يغترب عشان يصلح حالو وحال أسرتو
والبنت السودانية صارت مستعجلة للعرس وحالة الله غالب عليها
والسبب غي دا كلو السودااااااااااااااااااااان واقتصاد البلد
والمسألة طلعت من يد الولد ومن يد البنت
وما نظلم البنات ساااااااااااااااااااااااااااااااااي
لأن في بعضهم بالجد كدا مثاااااااااااااااااااااااال للصبر والأخلاص
لكن بجي الولد ويبيع القضية زي الكان ماف حاجة بيناتهم
والله غالب على امره
وربنا يديك الصحة والعافية
أخوي طير الوروود

[عزيز عيسى]

الاخ عاصم،

الزمن اختلف والحياة اصبحت شاقة وتكاليفها غالية وحتى العمر اصبح قصير في السودان والاسر محمولة والصبر انعدم والبنات محتاجات للعرس، يعني اللي بيتقدم لي أهلها وهو جاهز بيدوهو وماعندهم وقت انهم ينتظروا ويعلقوا مصير زواج البنت بالخطيب لحدي ما يكون نفسه ويجيهم راجع بعد خمسة ستة سنوات أو أكثر ويمكن يغير رأيه ودا كله جائز يحصل. فلذلك يجب أن نعذرهم.
ونصيحة للشباب كون نفسك اولا وبعد دا امشي اتوكل واخطب وبنات الحلال موجودات كثير ولا تنتظر اكثر من سنة واتزوج والا ضاعت عليك العروس وتفضل تعيش في تأوهات وحسرات.

ولكم ودي،

عزيز

[طير الورور]

الاخ عزيز

كلام منطقي يا عزيز ولكن السؤال مازال موجودا ؟؟؟

فلنعمل بما قلت ويكون الشخص نفسه اولا وبعد كده بنات الحلال راقدات علي

قولك ......

لكن يا عزيز

هل ترضى لنفسك الزواج التقليدي ؟؟

يعني انت في الغربة وليك سنين ما نزلت السودان ؟؟ وما عارف عن البنات اي

حاجة ؟؟ الخليتم صغار كبرو واللي في سنك واقل منك بشوية كلهم اتزوجوا

وعندهم اولاد .... ؟؟

هل نخضع للامر الواقع ونتزوج من اللاتي يختارهن اهلنا ؟؟؟

وهل نرضى بان نتزوج واحدة درسناها لفترة شهر واحد فقط ؟؟ هي فترة

الاجازة ( الاجازة شهرين شهر وفيات ومجاملات وفيض من الحنين للاهل والشهر

التاني للحاجات دي ) ....

وهل الزواج انها تكون بت ناس وزات خلق ودين ولا في مكملات تانية مهمة ليك

وليها ...؟؟؟

واذا افترضنا انك حسمت امرك واستخرت وقررت انك تخطب او تتزوج واحدة

بعينها هل فترة الشهر بتديها الثقة انها تقرر انك انت شريك حياتها ولا برضو

حيكون اختيارها مثلك ...

وهل ستعتمد انت وهي علي ان يكون زواجكما مثل البطيخة المقفولة ......

انا في رائى انو مشكلتنا احنا الشباب ساهلة لانو دراسة المراة تعتمد عندنا

علي اشياء محددة وواضحة واهتمامنا بس علي البنت نفسها دون النظر للجوانب

الاخري التي ليس لها يد فيها لكن عند البنت الاشياء المطلوبة في الرجل كثيرة

ومتشابكة ويتدخل فيها الاسرة والاهل وخلافه .....


لكن الحل موجود ....

وكل يوم تزداد ثقتي بالله في ان يكون الحل هو قوله تعالي ( الطيبون للطيبات )

اللهم اجعلنا من الطيبين وارزقنا الطيبات امين يار ب العالمين

.

[الزبير محمد عبدالفضيل]

اخي اشكرك جزيل الشكر علي طرح هذا الموضوع



والي الاماااااااااااااااااااااااااام

[الزمن المريح]

لك التحية اخى ،، و صراحة البنات مظلومات ،، لا اوافق عليه على الاطلاق ،،
و الله مظلومين نحن ،،

و الواحد بخاف عديل كدة من خفة البنات ،، و هن من يعطون الفرصة لكل ،،

بعدين الزمن اختلف فى كل شى الاّ فى طلبات ام العروس ،، و جيب لينا ،،

ثانيا ،، الواحد بس يمد راسه يقولولك ما دايرين اى حاجة و بعد كدة عينك ما تشوف حتى النور .............

و الله يكون فى عونك يا طيور الورور
و بالله كمل لينا ،،،

مع خالص الود

[عزيز عيسى]

الاخ عاصم،

عجبني كلامك السمح دا.


كاتب الرسالة الأصلية طير الورور

لكن يا عزيز

هل ترضى لنفسك الزواج التقليدي ؟؟

يعني انت في الغربة وليك سنين ما نزلت السودان ؟؟ وما عارف عن البنات اي

حاجة ؟؟ الخليتم صغار كبرو واللي في سنك واقل منك بشوية كلهم اتزوجوا

وعندهم اولاد .... ؟؟

هل نخضع للامر الواقع ونتزوج من اللاتي يختارهن اهلنا ؟؟؟

وهل نرضى بان نتزوج واحدة درسناها لفترة شهر واحد فقط ؟؟ هي فترة

الاجازة ( الاجازة شهرين شهر وفيات ومجاملات وفيض من الحنين للاهل والشهر

التاني للحاجات دي ) ....

وهل الزواج انها تكون بت ناس وزات خلق ودين ولا في مكملات تانية مهمة ليك

وليها ...؟؟؟

زي ما قلت أنا امكن طولت من البلد شوية لكن انت أسأل واحدة من امهاتنا أو حبوباتنا عن الزواج التقليدي وشوف ردهن. صدقني يقولن ليك الواحدة زمان جابوا ليها في عرسها (بترينة) ولا الداهية اللى اسمها شنو دي أي اتذكرتها (السحارة)، طبعا البترينة دولاب العدة والسحارة دولاب الملابس ويقولن ليك العروسة كانت تفرح شديد لما يجيبوا ليها الحاجتين ديل وتكون مبسوطة وسعيدة في زواجها. لكن تعال شوف لي بنات الزمن الهلا هلا ديل الواحدة من البداية تقوم تدى العريس العين الحمرا وتشترط علي المسكين انو لازم اهم حاجة في الشيلة بتاعتها يكون فيها الجوال علشان تتونس بيه مع صحباتها وتديها آخر اخبار الشمارات (يا حليل الجارات زمان لمن بتكلمن بفوق الحطية) دا غير طلبات الدهب والعربية والبيت المؤسس من كلو.


واذا افترضنا انك حسمت امرك واستخرت وقررت انك تخطب او تتزوج واحدة

بعينها هل فترة الشهر بتديها الثقة انها تقرر انك انت شريك حياتها ولا برضو

حيكون اختيارها مثلك ...

وهل ستعتمد انت وهي علي ان يكون زواجكما مثل البطيخة المقفولة ......

انا في رائى انو مشكلتنا احنا الشباب ساهلة لانو دراسة المراة تعتمد عندنا

علي اشياء محددة وواضحة واهتمامنا بس علي البنت نفسها دون النظر للجوانب

الاخري التي ليس لها يد فيها لكن عند البنت الاشياء المطلوبة في الرجل كثيرة

ومتشابكة ويتدخل فيها الاسرة والاهل وخلافه .....


أنا بتفق معاك في الحتة دي والخطيبات اللى يختاروهن الاهل ناس كثير ما بيرضى بيها، لكن ممكن الاهل يدلوك على بنات الحلال وين وانت تختار بنفسك لأنه فترة شهر كامل اعتقد انها كافية بأن تختار الخطيبة المناسبة وترمي شباكك عليها وتبدأ تربي، لكن من المعروف انو المغتربين دائما عينهم طايره يقعدوا يفتشوا في الجكس كلو علشان يختاروا اجمل البنات وكلما تلاقيه واحدة بيفتكرها انها اجمل من الاولى، ولو كان ليهم مراد يختاروهن كلهن.


لكن الحل موجود ....

وكل يوم تزداد ثقتي بالله في ان يكون الحل هو قوله تعالي ( الطيبون للطيبات )

اللهم اجعلنا من الطيبين وارزقنا الطيبات امين يار ب العالمين

زي ما قلت ليك انت بس كيف تستخر بالله والباقي هين. وانشاء الله تلقى بت الحلال اللى كايس ليها وتعرسها. لكن ما تنسى تعزمنا على العرس. وما شاء الله اعمامك في المنتدى كثار ممكن برضو تعزمهم يوم العقد.

.

[ابراهيم]

الأخ العزيز ............ عاصم

سلام من القلب


ربما أخطأ الاختيار ولكنه لم يخطيء حين قرر الرحيل .. لأنها هي جزء من دوافع الرحيل .. فاذا وجد الحب الوفاء وتوفرت الثقة والصمود امام الظروف القاهرة .. لا اظن ان المسافات تباعد بين القلوب .. واسفي على الفهم الدخيل (out of sight, out of mind) .. يعني كان سافرت دقست ..

في رايي ليس هناك وضع اقتصادي ولا ظروف تفرض على الناس التنازل عن شريك الحياة .. فقط هي مسألة قناعات .. فاالناس لو ختو الكورة في الواطة وقالوا (عشة صغيرة كفاية علينا) ما اظن يكون في معاناة ...

حقيقة اغلب النساء في هذا الزمان معادلة صعبة يندر ان تجد من تصبر عليك والدليل على ذلك ارتفاع معدل الشواكيش والسندانات المهاجرة والتي خرجت برة الشبكة في روايات أخرى ..

ولا نملك ان نسأل الله ان يهدينا الى ما فيه الخير

موضوع جميل وهادف ... والشكر لكل من ادلى بدلوه

ولكم تحياتي

[عشوشه]

الاخ طير الورور
الموضوع جميل وفيه كميات من علامات الاستفهام المحتاجه اجابات شافيه وناجعه
المهم الملاحظ تحاملكم على البانت لانو الردوا كلهم رجال
كل من يقرر الرحيل عليه فى البدايه بناء اثاث متين للعلاقه يعنى تقدر تصمد فى كل الظروف انا بشوف هنا الخلل فى الطرفين .
هل اخطات بارتباطها بشخص اخر كل له وجه نظره فى الموضوع يعنى البنت فى الزمن العلينا ده اصبحت مظلومه يعنى ناس البيت ما برحموا المجتمع ما برحم ليه قاعده لحدى اسى ؟ ده اول سؤال اذا قالت انها مرتبطه تعال شوف النقه ح تنظرى كم سنه القدرك اولادهم فى المدرسه والويل لها لو جاء عريس ورفضت تمارس عليها كل الضغوط من الجميع الاهل والجيران حتى الصاحبات لازم توافقى ده عريس لقطه فرصه لاتعوض جاهز وما محتاج ينتظر ولا يجهجك وييييييك كميه من الاسباب الكلها مقنعه
بعد داك تجى دموع الام نفسى افرح قبل ما اموت وكلام من النوع ده اذا جينا نظرنا لى نظره المجتمع للبنت الى هى المكفروض تكون فى حمى راجل واى اسره نفسها ترتاح من حمل البنات اليوم قبل بكره ناهيك من انها تنظر سنين لما يكون نفسوا
الموضوع ما استعجال ولا شفقه الموضوع انو ده حل ساهل وجاهز
هل تفتكر انها تكون سعيده لما تضحى بى حلمها ؟؟؟؟؟
اذا اقتعنت بيك اكيد ح ترضى تعيش معاك على الحلوة والمره بس انت فكر اقنها فى الاول
ده ما دفاع عن بنات جنسى بس ده الحاصل ياشباب

[shashi]

الاخ طير الورور والله موضوعك جد يجرح المشاعر بعمق وهذه معضلات ازلية في العلاقات الانسانية .. فالانسان بطبعه كان اجتماعي يألف ويولف ويندمج في نسق اجتماعي قد يكون النظام المكانيزمي للعلاقات فيه بسيط او معقد حسب وضعية المجتمع .. كانت العلاقة في الاجيال السابقة بين المرأة والرجل محسومة بفعل نظم المجتمع في ذلك الحين .. كانت البنت لابن عمها او في اطارها الاسري الضيق جد وما الكلمة القديمة ( غطي كدحك ) الا افراز ذلك النظام الاسري الصارم .. كانت الكثير من الزيجات تفشل بسبب عدم الموائمة بين الطرفين او عدم وجود التجاذب الكافي للحفاظ على بناء عش الزوجية في مؤمن حصين ضد رياح المشكلات العارضة العادية .. تغير الزمن ولف ودار ونحن امام الجيل الجديد .. الناس ( رجل ومرأة ) ينقسموا لنوعين صادق وذو مبادئ او كاذب حيث لا مبادئ .. تلعب هذه القاعدة دور مهم في بناء العلاقة حتى في علاقات الصداقات العادية سواء بين الرجل والرجل او بين الجنسين .. فمن اي النوعين انا او هي علي الاجابة يتوقف المصير المحتوم للعلاقة .. فاذا كنت انت من النوع الاول ثتثبت على البنت حتى وان قامت عليك رياح كاترينا هي وبس مهما طالت الخطبة مها مر الزمن في المسألة مسألة صدق ومبدأ .. اما اذا كنت من النوع الآخر فسينكسر العود مع اقل نسمة ريح وحا تبيع بت الناس في اقرب لفة وتعتبر المسالة قضاء وقت ولا حول ولا قوة الا بالله .. يوجد من البنات النوع الاول من الناس تثبت عليك وتقاوم كامل مجتمعها من اجل وتناضل لانها تحبك بصدق وهي صامدة عليك رغم كل المغريات التي حولها ويا ليتك تكون مثلها رجل في محلة ولا تطلع رجل مخادع كذاب حينها يصبح الجرح غائر جدا وتكون هذه التجربة كارثة في بعض الاحيان .. ومن البنات النوع الآخر من الناس وهم كثر وصادفنا في حياتنا الكثير وتجد البعض منهم معروفات ومشهورات بالعب بالمشاعر والضحك على من يجدن تحت رحمتهن، وفي النهاية تبيعك في اللفة في اقرب فرصة وتقتنص الجاهز المقرش ويا حب البنات للفلوس والرجل المرتاح هنا المجال عندهن غير قابل للتضحية يعني الاغنية بتاعت المرحوم سيد خليفة راحت في ستين دهية ( ابن عشك يا قماري قشة قشة )
ولنا خواطر في حينها باذن الله
مع تحياتي ابو احمد

[مصباحيه]

الاخ طير الورود انا طبعاً حاجوبك قبل ما اقراء اى رد لانو الكلام استفزانى شديد كان ممكن اقراء اراء الاخوان والاخوات وبعدين اوريك الحاصل ولكن لم استطع عايزه اسال سؤال هل فى زول مات من الجوع ليه الواحد يخلى اهلوا وناسوا واصحابوا ويغترب مرات بكون ده الحل معاك ولكن هل البنت حره فى الاختيار ما تقول لية ده القرن الواحد وعشرين ولا انو البنات اتعلمن ولا غيروا راى الاهل هو هو وكلمة الاب هى هى يعنى هى تسوى شنو لو جاها عريس جاهز ما فيه اى يعيب تفتكر تقدر تقول لاهلها ما عايزاه علشان مستنيه فلان ده ما بحصل وحتى لو حصل نادر وتكون النتيجه انو اهلها ما يسمعوها تانى فى حاجات كتيره او يحرموها من المرقه واشياء اخرى انا معاك انو فى حضاره الناس اتعلمت وانتهى عهد الجاهلية ولكن للاسف الواقع المعاش ماهو كده يعنى مثلاً اديك مثال بسيط تدى زول حاجه يعملها ليك من بعيد يقول دى ساهله اسهل منها مافى ولكن عند تنفيز العمل لا يستطيع عايزه اصل لحقيقه وهى الكلام البنكتب او البنقال لا يمد للواقع المعاش باى صله وكده فكر فى الكلام ده وحتعرف انو البنات مرات بكونوا مقلوبين على امرهم طيب قول انا مثلاً استنيت وهو إغترب وجانى بعد سنتين ومعاه زوجه وطفل هل رايكم انتو كأولاد بكون نفس الشى ولا لييييييييييييييييييييييييييييييييييييييييييييييييي يييييييييييييييييييييييييييييييييييييييييييه