قرد مسافر الى مصر

[shashi]

كان صديقنا ينعم بفكر تجاري قوي .. وزات مرة طلعة في راسه فكرة انه يسافر الى كسلا يجيب قردين ثلاثة من جبال توتيل يصطادهم بنفسه .. تخمرت الفكرة في راسه اخونا سافر الى كسلا صعد الى جبال توتيل بمشقة بعد ان حمل معه كل الافكار التي تمكنه من صيد قردين صغيرين وديعين .. كلما وجد المشقة والعناء ازداد الحماس لبلوغ الهدف .. وما فيش حلاوة من غير نار .. صاحبنا في اليوم الاول بعد عناء وجري كاد يقتل نفسه فيه لم تكون النتيجة جيدة .. وذات يوم تحقق المطلوب صاحبنا قدر يصيد قرد صغير حلو حبسه في قفص لانه كان شرس جدا فقد نال صاحبنا ما نال من عض وخربشات وركلات حتى شبع .. لم يوفق بعدها في شيئ بعد ان جلس في كسلا مدة اسبوع رجع بعدها محمل بالقرد الى الخرطوم بعد رحلة طويلة من المعاناة مع القرد المشاكس الذي تسبب في كثير من القلق داخل الباص من الصياح وعانى صاحبنا ما عانى من المشاكل بسبب ذلك القرد وسمع كم ليس بالقليل من الكلمات الجارحة والتعليقات الساخرة .. لقاها من القرد ولا من صاحبه .. ما كفانا الحاصل لينا ده كمان يطلع لينا قرد المهم وصل صاحبنا بعد كم من المعاناة
جاب القرد البيت طبعا اتلمى الناس محتارين في الحاصل ده الزول ده عاقل .. الزول ده يا ربي جن ولا شنو تساؤلات واخرى كثيرة شحنت راس الخلق المهم صاحبنا غير عابئ ومصمم .. شاءت الاقدار انه اطفال الجيران واخوانه الصغار يعلبوا مع القرد وحين فجأة انفلت القرد من القفص وتعال شوف الهرج والمرج الذي حدث .. صياح الاطفال فالقرد ما قصر عض ده وخربش ذاك وانطلق يجري فوق حيط الجيران وساد الهرج والمرج الحلة كلها وصاحبنا يجري بكل قوة عايز يرجع القرد الى القفص فعلى هذه القرد انصبت كل آمله التجارية في رحلته القادمة الى مصر .. نواصل
نواصل .. نواصل

[114]

shashi
حلوه
واصل

[shashi]

مشكور اخوي 114 على مرورك على الموضوع يديك ربي الف عافية وصحة

المهم صاحبنا تعب وشاف نجوم الضحى حتى يحصل على التراخيص اللازمة لذلك القرد المشؤوم .. آخرها كانت فحص البيطري للقرد للتاكد من سلامته من الامراض ودي كانت حكاية لقى عن البيطري عامل من الجماعة اياهم ونصحه بان القرود تحب المريسة بانه اذا اراد ان يسلم من اذى القرد عليه ان يخليه سكران طينة 24 ساعة فكان ذلك حتى شعر هو بان القرد صار ظريف وحبوب .. آخر شيئ كان تصريح من السفارة لسفر القرد الى مصر ياااااااااااااه
نواصل ..
نواصل .
نواصل ..

[shashi]

تم تجهيز كل العتاد اللازم للرحة من سلسل طويل لربط القرد من وسطة قفص حديدي مخرم الماء الاكل يعني الزوادة ووجد صحبة اثنين من رفقائه التجار .. الذين فطسوا من الضحك لما عرفوا قصة القرد وطريق المعاناة الطويل الذي قطعه .. صاحبنا ركب التاكسي متجها الى محطة السكة حديد للسفر بقطر حلفا .. صاحب التاكسي شاف القرد قال ليهو ده كمان موديه وين .. ركب صاحبنا وصاحبيه قطار حلفا ودفعوا بقشيش للكمساري من اجل عيون القرد لكن الكمساري طلع راجل ولد حلال وقال ليهم اركاب الحيوانات من البشر ممنوع وعندك واحد من حلين في الحالة دي البقشيش وتخت القرد في عربة الفرامل وراء وتدفع لكمساري الفرامل بقشيش .. المهم هاك يا تعليقات من الناس على القرد وصاحبه .. المهم حلت المعضلة مع كمساري الفرامل .. تحرك القطار والامور ماشة عادية وصاحبنا يا دوب شمة الراحة من تعب القرد وبقى يلعب كتشينة مع صحبانه بعد ان وضع مستلزمات القرد من اكل وموية ومريسة مع الكمساري في الخلف ووصاه على القرد .. طبعا الكمساري عايز فايده وحا يركب ركاب من الطريق حتى يعبئ جيبه بشوية فكة تنفعه في مشوار الحياة الطويل ..
نواصل

[عشوشه]

الاخ شاشاى شوقتنى لى باقى القصه
اوع الكمسارى يكون نام بالمريسه
المهم القصه حلوة يلا واصل بى سرعه
وليك منى هديه

[نيازى كشك]

واللة اخى الحبيب

قصة فيها شوية الم
اصلو الراجل تعب وتعب القرد معاهو
وانشاء اللة يصلو مصر بالسلامة

ولنا عودة

[shashi]

مشكور اخوي نيازي اسعدني مرورك .. يديك العافية اخوي
بدأت الرحلة عادية قام القطار في مواعيده اصلا اسمه اكسبرس حلفا .. المهم الماعندو قروش سطح فوق ولو عرف انه الناس اللي تحت نصها ما دافع فلوس وبتصاريح ساكت اي كلام كان طلع تصريح وريح نفسه اصلاً الحكاية روكة ساكت اندمج صاحبنا مع اصحاب سفرته الثلاثة ودورة الكتشينة والونسة .. وصاحبنا نسى القرد وتكل الامر على الكمساري ( الفرامل ) اللي ماسح ليه شنبه ببقشيش غايتو مش ولا بد .. المهم من المحطات القدام ركب شايقي بعد ان اتفق مع صاحبنا الكمساري على الثمن الدفوع مقدما ركب واهلنا الشايقية عندهم حب خاص للمريسة شم الريحة بس ما عارفها جاي من وين صاحبنا هبش هبش لما وقعت يدوا على الجركن الكمساري مشغول مع الناس سال الشايقي جيرانه يا اخوان دي حقتي منو ما لقى جواب صاحبنا جر الجركانة عليه وقد يمزمز منها ويرجعها لمكانها .. القطر وقف في محطة من المحطات صاحبنا نزل يطمئن على الوضع لقى المريسة ناقصة شوية لكن قال يمكن اتدفقت ولا حاجة المهم ادى القرد نصيبه والشايقي يعاين ما كان يظن ان المريسة حقت القرد المهم القرد انبسط وشبع ورقد دون حراك ينظر الى الناس ما سكران طيني ..
نواصل نواصل
نواصل

[shashi]

معروف عن طول رحلة القطار في ذلك الزمن الى مصر .. المهم صاحبنا وصل حلفا بالسلامة وخلاص الرحلة قربت تنتهي .. اول شيئ عمله في حلفة بقى يسال عن مكان المرسية وين والحلفاوين يعجبوك .. عصريين للطيش والزول اللي ما بيرطن زي كانه عندهم ما زول ما اشتغلوا بيه الشغلة .. لان القرد عاملة شغب شديد وعايز مريسة بصورة اسعافية عاجلة لان صاحبنا الشايقي ما قصر طبعا وهو اكتشف ذلك بعد ان اخبروه الناس اللي راكبين في الفرامل مع الكمساري بان الشايقي قام باللازم والراجل بكل ظرافة قال له انا بدفع حق المريسة اللي تجيبها من حلفا واصر وحلف .. المهم اخيرا لقوا واحد دلاهم على بيت اللمريسة والتسنينة راحوا عبوا الجراكانة عشان لسع في رحلة بالباخرة الى اسوان ورحلة تاني بالقطار القشاش الى القاهرة من اسوان .. المهم القصة فرجت ودخلوا الباخرة بسلام وما كان في مشاكل داخل الباخرة لانها فسيحة وانت تفرش وترقد في اي مكان وصاحبنا وصحبانه الثلاثة غايتو القرد ونسهم في هذه الرحلة بعد ما ينطشم بالمريسة .. غايتو رحلة كان فيها الم من النوع اللذيذ
نواصل .. نواصل

[114]

نحن زاتنا طشمنا معاك في القصة دي
في انتظارك

[مزوني]

والله يا ابو احمد الطشه طارتع بينا عدييييييييييييييييييييل
ما شلهت بينا لكن حرااااااااااااااام عليك
يا ليت لو تبقى تواصل اول بأول
http://smilies.sofrayt.com/%5E/b0/pray.gif

[ياسر مبيوع]

القرد دا لمن يصل اسوان
الجماهير حاتكون فى استقبالو
بي هتافات
سجمى القرد

[114]

وينك يا shashi خليتنا معلقين؟
اصلو القرد ده لهسي سكران بمريسة حلفا؟

[عزيز عيسى]

الظاهر شاشي دا اخد ليه كاس كاسين وهو زاااتو طشم وانقلب قرد.. ههههههههههههههه

اظهر يا شاشي وأدينا عبار خلينا نطشم مع الجماعة ونشوف حكاية القرد دا مع المصريين.

أنا غايتو حأتخيل في ذهني بأنه المصريين حيطلبوا منه جواز سفر القرد..

ويا عشوشة.. دى صورة القرد اللي نزلتيها دي؟

[shashi]

في البداية أبدي اسفي الشديد للغياب الطويل للشباب المتابعين والقارئين وكان الغياب لظروف قاهرة
اقول لكم جميعا اول رمضان كريم وكل عام وانتم بخير وتقبل الله طاعتكم صيامكم وقيامكم وجعلكم من عتقاء الشهر المبارك من النار آمين
المهم وصل صاحبنا الى اسوان بعد طول عنا الرحلة كانت طويلة امتدت لاسبوع اول شيئ اعترض سبيل صاحبنا هو التفكير في ايجاد مريسة للقرد حتى يكون في حالة من اللا وعي الدائم وما يفقد ظرافته طبعا اخوانا الصعايدة بيحبو المريسة ويسموها ( البوظة ) نزل صاحبنا في اسوان وكان خلال هذه الرحلة قد تعرف الى طباخ نوبي والنوبيين هم النصف الآخر من الحلفاويين الذين ضمتهم خطوط العرض والطول الى مصر والراجل بقى صاحبه وساله عن ايجاد مريسة لان الرحلة خلاص كادت ان تثمر قال له انت تقصد البوظة ودله على كيف يحصل عليها المهم سارت الامور طبيعية الا انهم طلبوا منه ان يجيب شهادة من البيطري انه هذه القرد خالي من الامراض الغريبة وكان في ذلك الزمان قد ظهر المرض الفتاك القاتل ايبولا طلبوا منه بالتحديد فحص القرد من خلوه من هذا المرض سارت الامور طبيعية وتحصل على جركن صغير مريسة وبدأ تعليق المصريين فقد كان صاحبنا اسود البشرة سواد ابو لمعة الاطفال يسالوه الساعة كم وهم عندهم ساعة عايزين صاحبنا يتكلم حتى يشوفوه حا يتكلم باي لغة من اهم النكات طبعا صابنا شايل القرد وحايم وسط الناس واخلاقه في نخرته سأله احد المصريين أن جاي من وين قال ليه بنرفزة انا جاي من جهنم المصري قال ليه نع باين عليك لانك محروق هههههههههههه
المهم انت اذا ما عاشرت المصريين ما بتعرف انهم شعب يحب النكتة وخفة الدم وخفة الحركة يقولوا الرزق يحب الخفية مثل مصري وانت اذا ما عرفت طباعهم بتتعب لانهم بيشاغلوك وينكتوا عليك وتنكت عليهم والامور تمشي كده المهم صاحبنا شبع تعليق ومشاغلات .. الله الله الله قرد سايق قرد ... الله الله قرد وغوريلا .. وصل صاحبنا العتبة محل سوق الطيور والحيوانات الغربية لقى هناك زبون لقطة عايز يشتري القرد بـ 500جنيه كثيرة جدا طبعا وتعادل مرتب وزير ويا لها من لحظة كان القرد هادي ظريف وديع فجأة ولسوء الحظ رجع وحش كاسر وبدون اي مقدمات السبب انه السكرة فكت كان فاكيه بره القفص ورابطه من نصه بجنزير هنا ساد الهرج والمرج السوق لان القرد عمل عمايلوه وبراحة بدون سابق انزر انسحب الزبون من المنطقة وقال يا فكيك .. فضل صاحبنا عايز يحل المشكلة دي كيف من وين يجيب المريسة هنا في القاهرة .. راح حلها حل كامل اصبح يشرب القرد ويكي ابو كديس .. المهم لقى زبون اخر ولد حلال راعي سيرك ومحتاج لقرد للعروض المهم مساومات وهاء ولاء بيع القرد بـ300 جنيه صاحبنا اتبسط شديد بس المشكلة القرد تعلق به شديد لانه الموضوع بقى عشرة عمر وليس سهلا المهم سلم القفص للراجل والقرد يلاحظ له وبدأ يعمل حركات صاحبنا انسحب براحة انسحاب تكتيكي وفو فك انبسط طبعا بعد التعب والمعاناة الشديدة .. صاحبنا راحل لصحبانه وقضوا ليلة هادئة ودخلوا السوق للتبضع ورحلة العودية
انتهت القصة .. يلا في امان الله
مع تحياتي السائح .. بس اوعكم واحد يروح يجرب الحكاية دي

[محمد احمد]

شن رائكم مندخلوهم موسوعة دينيس للارقام القياسييه

[114]

رمضان كريم للجميع
شكرا يا شاشي
امتعتنا بالقصة

[shashi]

مشكورين اخوتي الاعزاء محمد احمد و 114 على مروركم وتعليقكم على قصة صاحبنا محمد صالح ونضاله المرير وعزيمته القوية وفي النهاية تحقق ما يصبوا اليه من هدف رويت القصة من باب التسلية والنكتة ومن باب اظهار تحديد الهدف والسعي لتحقيقه مهما كانت الصعوبات .. وصح المثل الصابرات جوابر .. وحتى يصفو الذهب لا بد من حرقه بالنار .. والسعي لتحقيق الهدف يحتاج الى عزيمة وتصميم ..
مع تحياتي ابو احمد

[التيمان]

روعه منك
ويسلمووووووووووووووووو

[shashi]

رمضان كريم وابلغك الله العيد يا تيمان وجعلك من العائدين ازمنة عديدة واياماً مديدة
لك تحياتي وشكري على مرورك وتعليقك يديك ربي الف عافية وصحة
مع تحياتي ابو احمد