دقستَ

[ابراهيم]

قلت لها وانا ارتل آيات القرب في مراسم الوداع ان الشوق جمر لا يهدأ وانتي ادرى بالتهابات اشواقي اذا افترقنا سويعات .. وانتي ادرى بهذا القلب التواق إليك وووو
قالت: تقترب ارواحنا كلما باعدنا المكان .. وزماني هو زمانك اينما كنت
كانت تتحدث بكل اللغات الحلوة المذاق والسهلة الانسكاب
وعينيها شهادة صدق لا يختلف فيها الفقهاء
ودمعة منهكة كانت تعاند الهدب المكحل بحزن اللحظة فطاوعها الهدب مهزوم
وتوالت الدموع ممطرة ...وحينها اطلق القطر صافرته إيذاناً بالرحيل
قلت لها: غداً سنلتقى سآتي بشوق ودفء ..
لن تنفرط عني احلامي فهي موثوقة بقلبي
كانت تبكي فودعتها بحرقة
لم تنطق بحرف واعطتني منديل حسبته للذكرى!!
ولكني ادركت غبائي وانا اقلب المنديل بحزن عندما وجدت عبارة كتوبة كادت تمسحها الدموع ..
/
\
/
\
/
\
/
\
(دقست)

[saly]

بحس حته في جواك حقتي
وبس

[كاظم]

[QUOTE=ابراهيم][b][size=3][color=blue]قلت لها وانا ارتل آيات القرب في مراسم الوداع
ابراهيم سلامات ...
كان فجينا حتة بيني وبينك عشان نقعد فيها كلامك السمح ده ... بتضيق المسافة لو سكتنا .. وبتوسع كان ناقشناهو بالراااااااااحة ..
على قدر ما فيها من كلمات دافية وحنينة على قدر ما ما عجبتني الكلمة الاخيرة اللي هي عنوان الموضوع اصلا .. ما عرفت ليه حسيتها نشاز .. يمكن لانها ما بتشبه العبارات السبقتها في الموضوع والكانت جادة وعميقة .. او يمكن لانو الكلمة استخدامها ما ادبي ولا شنو كده واخوك ووالله ما متخصص لكن هبشني الكلام وقلت المح ليك ببعض الحاجات .. على العموم كدي بنتناقش

[ابراهيم]

التحيات الطيبات اختنا سالي ...

بتمنى ليك كل السمح ..

وانشاء الله ما تشوفي شين

شكراً لمرورك الانيق

[ابراهيم]

الصراحة ادهشتني الملاحظة اخوى كاظم ... بقدر ما ادهشني حسك النقدي الوقور

انت هبشت الحتة الكنت بغالط نفسي فيها .. في البداية كنت معنونها باسم

"ولكنك اخترت درباً غير خارطتي" بمعني انو لا مكان لك عندي بعد رحيلك ونفس العنوان كان في الختام. لكن الحالة الكتبت فيها النص كانت حالة اقتحامية و"دقست" هنا انا حاسي بيها بتصور حالة الانفعال العشتها اثناء الكتابة.

و الحالة الانتقالية من الرومانسية المثالية الى كلمة "دقست" كان القصد منها رسم صورة لمقابلة الصدق بسخرية لازعة وعدم جدية وعكس نموذج لاولئك الذين يتوشحون ثوب والوفاء المقنع في دواخل بهتانية تفتقر الإرادة

اتفق معاك انو كلمة "دقست" استخدامها مختلف ومتخلف لكنه جا بس لتصوير حالة

رغم انو العنوان الاول "ولكنك اخترت درباً غير خارطتي" منسجم وانيق لكن حسيت انو "دقستَ" بتدى عمق أكتر ولا رايك شنو ...

مع مودتي وتقديري

[كاظم]

و الحالة الانتقالية من الرومانسية المثالية الى كلمة]"دقست"كان القصد منها رسم صورة لمقابلة الصدق بسخرية لازعة وعدم جدية وعكس نموذج لاولئك الذين يتوشحون ثوب والوفاء المقنع في دواخل بهتانية تفتقر الإرادة

ابراهيم سلامات ..
كدي عشان ما تشتت تركيزي .. انا متأمل جيد لو ما كنت ممتاز لكتاباتك من فترة وصدقني بحفظ منها في جهازي .. انتي قال ليك سااااااااااهلة كده تنط بي من الرومانسية المثالية لى كلمة (دقست ) ؟ .. مستوعب انا المسألة والله وعارف الحالة اللبستك لما جيت في اخر القطعة دي ..بس المشكلة انو الكلمة دي بالذات اثرت بشكل مباشر في عضم الموضوع .. طيب كدي اطلع ليك برة واوريك انا اشكالي شنو في التعامل مع النصوص .. اكيد بتسمع عقد الجلاد .. واكيد سمعت البوم فاجأني النهار .. واكيد برضو انو اغنية الطمبارة والغناي عجبتك جدا .. طيب الاغنية مع جمالها الخرافي ده انا في حتة ما قادر ابلعها فيها اصلا .. مافي نصها ولا لحنها بس في اداء عضو المجموعة (الخير) في الكلمة بتاعة (انبليت) لانو اتعامل مع الاغنية بعدم جدية وكان اداؤه هزلي بشكل مخزي .. فانا عندي فوبيا اختلال عمل فني لوجود لمحة واحدة تنشز عن اصل الفكرة .. ويمكن المسألة دي شخصية لحد بعيد وما عندها سند منطقي وباقي لي ما عندها جمهور ..
وممكن نزيد النقاش كان لقينا فرقة تانية
ابقي عافية

[ابراهيم]

استاذى كاظم تحية عطرة

فانا عندي فوبيا اختلال عمل فني لوجود لمحة واحدة تنشز عن اصل الفكرة
اكيد من اساسيات اي عمل فني وصول الفكرة بدون اختلال في اصل الفكرة ودي ملكة ابداعية نادرة.

كلمة "دقست" علاقتها بمضمون القصة وادواتها من زمان ومكان وشخصية شفتها مناسبة واقول ليك حاجة اساساً انا بستحقر الكلمة دي عشان كدة اخترتها هي اصلاً بتتقال للانسان المخدوع وانا حاولت ارسم بيها شخصية قائل الكلمة ولقيتها منسجمة معاها تماماً يمكن ما متفقة مع الجو النفسي العام للقصة لكن صراحة ما لقيت كلمة اعمق من كدة دى واحدة والحاجة التانية اني حاولت اتمرد واجيب شي جديد رؤية جديدة ممكن تكون صح وممكن لا ..

دي طبعاً اول محاولة لي في اتجاه القصة القصيرة وبعتبرها محاولة ناجحة بعد مداخلاتك فزيدنا من نورك لنتألق شكراً لتوجيهاتك وجهودك وللحوار دوماً بقية.

[كاظم]

ابراهيم مساك الله بالخير ...
ما بناقشك في فكرة الموضوع كتير لانها ملك حر طبعا .. اتجاهك في انو تكتب في مجال القصة القصيرة مسألة غاية في الجمال واظن بتنجح يمكن لانو التعامل مع المفردة عندك بالجد تعامل جيد والمدهش في المسألة برضو غزارة الكتابة عندك بعيد عن الخلل والتكرار ودي نادرا ما تلقاها متوفرة في زول .. ابراهيم انت موهوب والله وده راي قارئ عادي يعني ما زول متخصص لكني مقتنع انو مرات راي القارئ بكون اكتر فايدة من راي الناقد المتخصص وانا سامع تحت تحت كده انو الناقد دايما بكون فشل في المجال البنقد فيهو كان نقد في الشعر ولا القصة ولا غيرو من فنون الادب
مبرراتك لاستخدام الكلمة انت اكتر احساس بيها مننا .. محاولتك لطرح شكل جديد مغامرة لكن يا ابراهيم المطمئن في المسألة انو انت ما عندك حاجة تخاف عليها لانو حسب قولك انو انت في البداية .. جرب ونحن بنلبد ليك في شارع اليف اسمو الاستمتاع بانتاج الرايعين وكان جيت شاقي بيهو بنوقفك ونناقشك
مع خالص الود

[التيمان]

يسلموووووووووووووووووووووو

[ابراهيم]

حقيقة كلامك شجعني واداني دافع للكتابة بروح جديدة .. كتير الواحد بكون في حاجات جواه لكن نادر ما يلقى ناس يدوه دافع الانسياب بلا خطوط حمراء امام الروح والعقل وبث روح حرية الكتابة.
فشكراً كثيراً لإضاءاتك اخي كاظم..


مع مودتي

[ابو قناية]

شكرا لك ابراهيم
اكتب لك في هذة المرة بسبب المداخلة الحلوة والنقد الراقي من الاخ كاظم وكما قال هو ان القصةجميلة وممتعة واخذ عليك استخدام كلمة دقست ...وهي كلمة سوقية وليست بالادبية... ولكني انا لي تعليق ارجو ان يتسع لة صدر كل الا عضاء... ان كثير من الكلمات السوقية اصبحت الان تستخدم علي نطاق واسع من شرايح المجتمع.. وانت تقول انك استخدمتها لما لها من مدلول لا تعبر عنه كلمة سواها في مثل هذا الموقف ... وهذا ما لايقدر احد علي منعك منه لانك صاحب الاحساس والموقف
علي اي حال انت الذي تختار ما تكتب ونحن نختار ما نقرأ
ولي عودة

[ابراهيم]

تحياتي يا أحلى تيمان ...
المكان بيكم منور ..
ابقو لذيذين ورايقين ..
وادونا معاكم حبة

[راسكال]

اخونا ابراهيم والله وبصراحه انا من الناس البتهوى الشعر والخواطر والنثر

وبشكرك علي الكلام الحميل دا

ونشوفك تانى

[ابراهيم]

تحياتي الحبيب ابوقناية ...
شكراً لرفعك البوست بعد أن أكل عليه الدهر وشرب في الأرشيف
كما اشكرك لهذه المداخلة الراقية ..
ولي عودة

[ابراهيم]

الزول الرزين والحبيب.. راسكال
تحياتي واشواقي لابعد حدود أو بلا حدود
والاجمل الحوار الآسر في سعادة بين جيتك توقيعك هنا
حبك للكلام الجميل نابع من حتة شفافة جواك
وابقى طيب