لجميع الأعضاء

[tota]

________________________________________
جميعنا كما تلاحظون نرثي لحال حوار .. و غيابنا يفوق حضورنا و ما خفي يعظم كلّ يوم .

نريد حواراً ليرتقي من جديد الى منتدى حيّ .

دمتم للحوار و دام لكم .

[أبوريلان]

أضم صوتى

ونناشد لإثراء الساحة بمواضيع الحوار البناء

ومشكورة توتا

[مزوني]

أضم صوتى

ونناشد لإثراء الساحة بمواضيع الحوار البناء

ومشكورة توتا



واحنا في انتظار الجميع

[ابراهيم]

التحيات الطيبات اختنا توتا ورمضان كريم


نريد حواراً ليرتقي من جديد الى منتدى حيّ .

هذا ما نريده .. وكلنا ننادى ولكن من يسمع

[ودأبكرش]

أضم صوتى

ونناشد لإثراء الساحة بمواضيع الحوار البناء

ومشكورة توتا

[ابراهيم]

يا شباب دقيقة بدل ما نناشد ونشكر وننتظر يا ريت اي واحد يدخل على الموضوع دة يقراه براااااااحة يرد براحة برضو وحبة تركيز
اغلب المواضيع يا شباب عندنا في المنتدى مستهلكة والمنتدى بقى حاجة صعبة والله يعني أغلب المواضيع جاية من منتديات تانية او من مجموعات بريدية طيب اتخيلو معاي لما يجي زائر على الموقع وشاف الموضوع المنقول أكيد بكون قابله مليون مرة لانو الشبكة فيها دشليون منتدى يعني اكتر من الهم في القلب وما معناه انا في منتدى ود مدني خلاص بكون حاصر نفسي هنا مؤكد بكون مشارك في منتديات تانية فالمسألة بتبقى صعبة لما انا القى موضوع وارد عليه في منتدي تاني اجي القاه تاني هنا في منتدانا حتى لو رديت عليه تاني بكون رد مبتذل ومجاملة ما اكتر .. لأنو اصلاً بكون مليت وقرفت من التكرار والدليل على كدة شوفو الردود على المواضيع في منتدانا دة
(ابداع ، روووووووووووعة ، يسلمووووووووووووو، وما عارف شنو)

طيب كيف تكون انت المبدع وانت الروعة وانت ما صاحب الموضوع
يعني المسألة آلية وروتينية بس وما فيها اي تعب

المنتديات كتيرة ومواضيعها اكتر لكن بي كترتها دي عندنا فرصة نتميز وننجح بالجديد ولو اي واحد فينا جرب كتب موضوع بمجهود شخصي وانا ناقش وحاور في موضوع حار بتلقى نفسك براك متلهف للردود واللي حتكون حقيقية وصادق ومرضية لنفسك واكيد حتقدر نفسك اكتر من تقديرك ليها وانت ناقل موضوع .. وتبسط زوار المنتدى وتجذبهم وتديهم دافع للتسجيل والمشاركة والرد على موضوعك بغض النظر عن باقى المواضيع.


مرات يا جماعة الواحد يجي داخل المنتدي يلاقى مواضيع من العنوان يقيف لانك بتكون عارف الموضوع منقول وحتى لو دخلت حتدخل بدون نفس لمجرد المجاملة والرد بكون ذاتو ما ليه طعم

لمتين نقعد نجامل بعض ونجيب تعب غير عشان يجاملونا عليه؟ والله اذا دخلت منتدى وشفت كل مواضيعه مكرره بتكرهه وتمله وتعرف انو جواه فارغ ..
والكلام دة كلو يا جماعة بس عشان حاجة واحدة

يا اخواني واخواتي والله ما اتعبت نفسي وقلت الكلام دة الا لشي واحد
عشان منتدانا يكون الافضل .. عشان منتدي ودمدني على الاقل نكون قدرنا مدينتنا .. والله وربنا يشهد ما قصدي اسيء لي زول عشان ماف واحد يخت في نفسو حاجة والامانة لله الكلام دة من اجلنا كلنا ..
ياخ حتى البينقل موضوع لو خلاص ما قدر ينسى فكرة النقل يغير شوية في الموضوع شوية حركة كدة وحبة تجديد

ارحمونا من التكرار يا حلوين لانو الحياة فيها من المتكررات والروتين والملل ما يكفى وبتبقى مشكلة حقيقية تدخل المنتدي عشان تغير وتعمل رفرش وتتحاور وتتفاعل تلقى نفس الروتين ونفس المتكررات ونفس الملل
فرفقاً بنا وبكم وبمدني

يا ريت تقروني صاح .. وما تفهموني غلط

تحياتي

[saly]

معقوله بس نفهمك غلط يا ابراهومه

وكلامك اعتقد انو وصل واتفهموه كويس

وتسلم

[tota]

كلامك عين العقل يا أستاذ/ ابراهيم ،،، وياريت الناس يتفهموهمو من الزاوية الصحيحة ،، وحقيقي نحنا الحنين مازال يعاودنا لهذا المنتدى ولكن !!!! يقف القلم عن الإبداع كلما يبتدع الزملاء بعض الافكار التي لا تجدى بنقاش افضل
نريد حوار
نريد حوار
نريد حوار
نريد فكر ونقاش يثري الروح الطيبة بيننا كزملاء وتبادل الافكار والسيطرة على نزوات عقولنا ،،،
دمتم ودام لنا المنتدى،،،
توتا،،،،

[خالد حمد موسى]

اتفق مع الاخ ابراهيم في ماقاله وياريت نجد اذن تسمع ما حكاه

اخونه ابراهيم مع العمل والتنفيذ من الجميع وان شاءالله نجد الناس في محلها بعد الكلااام دة

وملاحظه بسيطه واضافه فوق كلاااام اخونا ابراهومة الناس البتنقل

من المنتديات الخليجية الرجاء المساعدة بتعديل اللهجه من الخليجية

الي السودانية ونرجو الالتزااام من الجميع ومن غير زعل وان شاءالله

ايد علي ايد تجدع بعيد والحمدلله كل الناس المشاركة ماشاء الله عليها

يعني ناااس يعتمد عليهم ونسال الله التوفيق لنا ولكم جميعا....