بيني وبينك

[ابراهيم]

بريدك قدر الفكرة
واكتر
اصل الفكرة .. عمل انساني
حب ماليني إليك وحنين
ونبع حنان متدفق منك
ولاقِي مكانو رصيف وجدانِي

بريدك وأسألى نجم الليل
وأسألي طيفك
كيفن بَفرح يوم يلقاني
وحتى الطيف ... بشتاق طلاتو
يجيب أخبارك يوم يغشاني

يوم من عز النوم صحاني
لقيت ومعاه نجمات الليل راجياني
قعدت معاهم واتونسنا
كلام ريحاني
عنك وعني .. وعن احلامنا
وعن يوم بكرة
عن اطفالنا اللسا بنزرع فيهم ريدة قشيبة
ومشتاقين تتحقق أماني

بس اتذكري
فرق الزمن البيني وبينك
زاد اشواقي .. وخلد حبك
وقفل ابواب الزمن التاني

وبُعد الحتة
أنا في عالم وانتي ف تاني
قرّب بينّا
وخلَى مداد الريد يتدفق وجد خرافي
وبقت الفجوة جزيرة العشق الاخضر وزاهر
هِيِّ مكاني
وزمنك عايش بيه أزماني

يا يوم بكرة اريتك تسرع
زيد عجلاتك واسرع تاني
وما تستني الزمن القاسي أناني
يسرق منك لحظة ندية
ويسلب منك حلم بنيتو سنين في ثواني

وحاتك يا يوم بكرة تقَدِر
إني بريده
شوقها خلاص
بي نارو كواني


(تلش)

[saly]

تعرف يا تلش
عاوزه اقول ليك كلام كنت عاوزه ارسلو ليك في رساله خاصه
بس اليوم بقول علني عشان يوفيك حقك

انا جد معجبه بفكرك و كتابتاك وردودك العقلانيه وكلامك ما اقول الدارجي بس كلام مفهوم يدخل العقل و نحبو يعني ما كلام منقول او مصطنع مرات ممكن تنقل كلام بس كل البتنقلو كلام ما عادي ده كلام جذاب وحلو واشعار جد بتدي في الصميم وجد بتحسسها من زول مرهف وبيعرف هو بيكتب في شنو

وحتي مشاراكاتك انا حبيتها ومرات بيغلبني الرد عليها لانو حسيت كلامك رائع وجد مهما اكتب ما يوفيك حقك

الكلام كتير العاوزه اقولو
بس بكتفي بده لعل و عسي ارجع اكمل مره تانيه

ودمت للمنتدي زخرا

ببارك ليك اشرافك علي الارشيف ويلا نكت ليك كل المواضيع الحلوه البتساتاهل فعلا يقروها


تحياتي
سالي

[سوباوي]

المدهش دوماً إبراهيم ...

ندي هذا النص .. أنيق كم الشوق بداخله .. شفيف حوار الطيف وكم الفرح المالي

نجومك ..

ليس الآن لي قدرة التعليق ولا تعليق على ما قرأت

ليس بوسعي الآن سوى أن أقول لك في محاولة خجولة أمامك :

حلق .. حلق .. حلق ..

أقصى مدارات المتاح ...

حلق .. حلق ..

أقصى ما أمكنه التهويم الجناح ...

حلق .. حلق .. لا تبالي بالرياح ...

حلق .. حلق ..

ضد أقواس الرماح ...

تحياتي،،،

[كاظم]

ابراهيم صاحبي .. تاخد ليك صنة وتجينا بالعجب ...
سعيد انا بهذا العمل سعادتي بمطلع قصيدة هربت من ذاكرتي سنين عددا ووجدتها
وسعيد انا بهذا الجمال الذي يسكن كل ما تكتب ودائما ساترك لك الباب مواربا لتدخل وقتما تشاء
وكن دائما بخير

[عمار بيلي]

الشفيف إبراهيم
يا صديق ..
إعترف ان الغربه فعلت بك ما ارادت واحياناً اكثر
ما اردت انت ..
إعترف ان البعد عما تشتهي يصنع مواد دسمه
وإن لم تكن ليست لك ..

***
أعترف انا انها كما الحلم هذه الكلمات .

[ابو الزعيم]

ابراهومة ...
بس اتذكر
فرق الزمن البيني وبينك
زاد اشواقي .. وخلد حبك
وقفل ابواب الزمن التاني

لك الود ... والتحية

[ابراهيم]

اختي سالي .. اخجلتيني بهذا الإطراء ..
حاولت ارد كم مرة بس احترت اقول ليك شنو وانتي ما خليتي حاجة
حقيقة كلامك رغم انو اكتر من حقي بس بيبقى تاج فوق راسي وشرف بعتز بيه
ما عندي حاجة اقولها لأنو كلامي ماتت حروفو بين سطورك
شكراً سالي لهذا العطر الذي انسكب على هذا البوست بتعبيرك وعبيرك
لكي ودي واحترامي

[ابراهيم]

الغالي .. الراقي ... سوباوي

هكذا دوماً

يكون الجمال حين حضورك بلا حدود

والدهشة تملؤني اثر هذا الغوص الرزين في حروف

وملامح القصيدة ما أجملك سوباوي

وانت تزرع الدهشة والمتعة معاً

فلنحلق معاً بالاشواق
للنجوم .. للفرح

دمت خيراً

[ابراهيم]

الأنيق .... كاظم
فضلاً أن تترك الباب موارباً ربما صرت يوماً
شاعراً او كاتباً ... ربما..!!؟؟
فإنني أتحسس ما ما وراء الباب...
أحسها الآن تلك الهاربة .. عوداً حميداً لها
انت وجدت قصيدتك وانا وجدت هويتي بعد قراءتك حروفي
لك من الود رحيقه

[ابراهيم]

العزيز
رفيقي ... بيلي
أعترف انها لك بأنها فعلت ما ارادت هي
أما ما اردته انا فقد كان إشتهاء لا زلت انتظره
اشكر لك الكلمات والتي ساتوشح بها على مر الايام
تشف عنها الكثير في نفسي

مودتي لك

[ابراهيم]

العزيز الغالي ... ابو الزعيم ..


بس اتذكر
فرق الزمن البيني وبينك
زاد اشواقي .. وخلد حبك
وقفل ابواب الزمن التاني

كمان اتذكر
إنو حضورك فتح ابواب البهجة
الأنضر
وبقت الفجة الما بين حرفك
وروعة جيتك
راحة شوقنا ..
الفرح الاكبر

شكراً ابو الزعيم لهذا الذوق الاريحي

[Mr Lonely]

بريدك قدر الفكرة
واكتر
اصل الفكرة .. عمل انساني
حب ماليني إليك وحنين
ونبع حنان متدفق منك
ولاقِي مكانو رصيف وجدانِي
********************************
يسلموووووووووو
لك الشكر

[aborawan]

يا يوم بكرة اريتك تسرع
زيد عجلاتك واسرع تاني
وما تستني الزمن القاسي أناني
يسرق منك لحظة ندية
ويسلب منك حلم بنيتو سنين في ثواني

وحاتك يا يوم بكرة تقَدِر
إني بريده
شوقها خلاص
بي نارو كواني

هيمة انتا عارف انا قريت كلامك ده اكتر من 45 مرة بالجد حاجة كده لا تمل تجد فيها من الروعة ما يشدك لقرائتها اكثر من مرة

مودتي

[ابراهيم]

Mr. Lonely
firstly , you are not lonely cuz u r in ur home with ur family
and much of love
so u can fly here with happiness
fly like a bird and passing a high clouds far away
to the wouderful world which live here
thanks alot brother for this great visit

[ابراهيم]

هيمة انتا عارف انا قريت كلامك ده اكتر من 45 مرة بالجد حاجة كده لا تمل تجد فيها من الروعة ما يشدك لقرائتها اكثر من مرة

والروعة الأكتر يا حمادة لما تجي تلقى زول معطر بوستك بي حضورو
ليك 45 الف امنية جميلة يا حمادة واختارهم زي ما انت عايز
توقيعك ليه طعم خاص يا ابو النسب وابقى ما تغيب
تحياتي