ما تكجني

[ابو نواس]

ما تكجني ..
وما تملي قلبي فقر معاك
شتت خلاص ..ياخ حلني
قديت عواطفي هواي نزل
وبرشته جد..
لسع مصر بالسيره ذاتة تقدني
مالك معاي ..؟ كرهتني
اديني آخرك وانقلع
نزلني من دفار حياتك وفكني
بي جازك انت تقوم تمش
وبي جازي يا الجهجهتني
كسرتة عضم الحظ معاك
قلقتا بي واتعبتني
انا من أشوفك ..تنتحر
جواي راحة البال تموت
كل الهموم تقعد تجوط
وأحساسي تسمع ليهو صوت
ساقية جحا الفيها انت ربطني
ما تفكني
مش قلتا ليك قبال كده
الليلة الا نحدده
جريت وجيت طالب السماح
فاكر خلاص دقستني
فترة سماحك انتهت
شوف ليك رصيد
اشحن بطاقتك من جديد
وما تفتكر اني الوحيد
العندو تحويل الرصيد
حولتا ليك ..من رنة قمتا حرمتني
شرطه عيني معاك عديل
خربشتني وعضعضتني
هوي يا هدي..
ما تجيني تاني ولا كده
وما تقولي جايبا ليك خبر
لا عندي اصحاب لا عدا
وما عندي ناس بتهمني
عارف الخبر لمن يجي
ننداح وننسي المبتدا
المكنه بس موديل قديم
مفروض تصينه تجددّه
فتّحنا في الزمن المدقق بالحنك
وتاني ما بتقدر تقول حنكتني
ما تملي قلبي فقر معاك
سيبني وخلاص ياخ حلني

[ابراهيم]

ياخ والله يا ابو نواس بالغت

يعني ابدعت وبدعت ..

إلا بس عندي سؤال واحد بس

انت زعلان كدة مالك؟

اختلفت مع ثريا ولا شنو؟

لكن والله كان الزعل بسوى كدة خليك كدة على طول

انا غايتو متربع ليك هنا ومنتظرك

[ابو الزعيم]

لك التحية ابو نواس يا رائع ....
اتحفتنا بهذا الكلام العجيب اللذيذ ...
نحن في انتظار المزيد .... وما تطول الغيبة
لك مني كل الود

[ابو نواس]

والله يا براهيم ..اختلفته لكن المنظراتيه قالو اختلاف الراي لايفسد لي مريسة ثريا قضية

ابو الزعيم يا حبيب عجيب انت وبسكويت ..كان علي الغيبه ما بالايد ومن الليلة ح اعمل ليك وجع وش

[aborawan]

لك التحية ابو نواس يا رائع ....
اتحفتنا بهذا الكلام العجيب اللذيذ ...
نحن في انتظار المزيد .... وما تطول الغيبة
لك مني كل الود

[114]

عجييييييييييييييييييييييييييييييب يا ابو نواس
رهييييييييييييييييييييييييييييب يا باشا الحلمنتيش
روعة جد
راجنك فاتحين خشومنا للجديد
هات المزيد