معقول الحاجات دي تحصل في بلدنا؟؟؟؟؟ [الأرشيف]

مشاهدة النسخة كاملة : معقول الحاجات دي تحصل في بلدنا؟؟؟؟؟

خالد هاشم علي

30-10-2005, 01:34 AM

احبتي الكرام...
لكم تحياتي... وكل سنة وانوا طيبين...
بثت قناة النيل الازرق يوم الجمعة برنامج عن دار المسنين والعجزة... وصدقوني كانت حلقة غريبة جداً جداً... والله شفت وسمعت فيها قصص تشيب الراس... وبقيت ابكي بدون مااشعر...
معقولة العلاقات الاسرية بقت هشة للدرجة دي ؟؟؟
لدرجة انه الاولاد يرموا ابوهم عشان واقف في طريق تقسيم الميراث... يعني يطلعوهو عاجز ومخرف ومجنون عشان يورثوهوا بالحياة...
معقولة ابوك يمرض ويتعب تقوم عشان ترتاح منه توديهو دار العجزة؟؟؟
معقولة امك لما تكبر ..ونفرض إنها اصابها مرض الشيخوخة ( الخرف) تقوم توديها دار العجزة...
معقول ياناس...؟؟؟؟؟؟؟؟؟؟؟؟؟؟؟؟؟؟؟
حتي لو انت ظروفك زي الزفت... معقولة يكون في مبرر للحاصل ده...؟؟؟؟؟؟؟؟؟؟؟؟؟؟؟؟؟
سؤال ليكم كلكم وبدون فرز....
رايكم شنو في الظاهرة الجديدة دي..؟؟؟؟؟؟؟؟؟؟؟؟؟؟؟؟؟
ظاهرة دار العجزة والمسنين في السودان والتي وصل عددها في الخرطوم بس اكثر من تسعة...
انا بشيد بالقائمين علي امور هذة الديار واشد علي ايديهم خصوصا وانهم يقدمون افضل رعاية للنزلاء.. لكني في هذا الموضوع لست بصدد مايقدم في مثل هذة الديار.. انا بصدد مايفعله الابناء بابائهم وامهاتهم...
مع العلم بان هذة الديار تقوم ايضا بايواء من فقدوا اسرهم.. يعني ماعندهم لا اولاد ولا بنات ولا اقارب...
وانا اتحدث عمن هم دون ذلك... يعني اللي عندهم اولاد وبنات واقارب ... كيف تطاوعهم نفسهم ويعملوا كده في اهلهم...؟؟؟؟؟؟؟؟؟؟
ولا يمكن دي من مظاهر الحركة والعولمة والتجديد ...؟؟؟؟؟؟؟ ان نستغني عن اباءنا وامهاتنا واجدادنا ليندثروا كما اندثرت معظم القيم والثوابت...
عذرا احبتي اذا كان كلامي غير مرتب لكن والله ده من شدة انفعالي باللي شفته في التلفزيون...

داير اسمع آرائكم...

sandra

30-10-2005, 03:49 AM

لاحول ولاقوة إلا بالله.. زمان كنا بنشوف الحاجات دي في المسلسلات ونقول الحمدلله عندنا العلاقات الأسريه حلوه.. بس الكلام ده حيخلينا نغير رأينا في العلاقات الإجتماعيه السودانيه..

أين هؤلاء من قوله تعالى ( ولاتقل لهما أف ولاتنهرهما وقل لهما قولا كريما:: واخفض لهما جناح الذل من الرحمة وقل رب ارحهما كما ربياني صغيرا) صدق الله العظيم..

ســــــــاندرا..

aborawan

30-10-2005, 08:43 AM

ابراهيم

30-10-2005, 08:56 AM

حقيقة بدت اجراس الخطر تدق لاخراج قيمنا من حدودها المعروفة لدي الجميع وفعلاً دي ظاهرة خطيرة وآثارها مفجعة الى المدى البعيد .. ما كعب يكون في منتجع للعجزة والمسنين لرعايتهم لأنو في ناس ما عندهم مأوى لكن لم يصل الحال بالناس يلجأوا لدار العجزة والمسنين للتخلص من آبائهم وامهاتهم وعشان يورثوهم كمان ..!! المسألة هنا خرجت عن الطور الديني والاجتماعي وخصوصاً في المجتمع السوداني ما معهودة فينا ظواهر زي دي وين الكلام البنرددو الفينا مشهودة نحن ونحن ونحن الكرم حقنا والشهامة حقتنا والشجاعة وغيرو وغيرو ؟؟
والله يا خالد البيحصل في السودان يمكن الظاهرة دي نقطة من بحر الحاجات الغريبة البدت تظهر في السودان مؤخراً لكن البيزعل في الموضوع إذاعة البرنامج في قناة عالمية عشان نوري الناس مصايبنا واعلامنا بس فالح في الحتة دي وبعد دة كلو يجو يقولوا ليك عاصمة الثقافة العربية ما يورو العالم ثقافتنا دي ليه يوروهم سخافتنا ..!!؟؟

اما ما يفعله الأبناء بآبائهم فليس هناك مبرر وهذا يعتبر عقوق .. قال سبحانه وتعالى:
(وقضى ربك ألا تعبدوا إلا إياه وبوالدين إحساناً إما يبلغن عندك الكبر أحدهما أو كلاهما فلا تقل لهما أف ولا تنهرهما وقل لهما قولاً كريماً) الإسراء/23 صدق الله العظيم

دة المفهوم العكسي للعولمة ودي المصيبة الكبرى لأنو أغلبية جيل اليوم تلقيهم للعولمة بفهم خاطيء ادى وسيؤدي تدريجياً الى مسح واندثار كل القيم السمحة ودي مشكلة اجتماعية يجب ان يقف عليها المجتمع موقف الجد بدءاً من الاسرة وكافة المؤسسات التربوية لاعادة النظر فيما حدث وما سيحدث مستقبلاً وإلا فالهلاك هو المصير.
لك الف شكر ابو هاشم على هذا الموضوع المهم والمثير
مع مودتي

بابكر

30-10-2005, 03:05 PM

الاخ الوفى خالد 00اولا لك الشوق الشديد

الموضوع الذى طرحته ,,فى غاية من الاهميه,, ويحتاح الى وقفه كبيره وكبيره جدا00000

فأرجو ان نسأل هؤلاء لماذا فعلوا هكذا بآبائهم؟؟؟؟؟؟؟؟

لان آبائهم لم يحسنوا تربيتهم 00ولم يغرسوا فيهم القيم والاخلاق 00لان الاب كان همه كله جمع المال واقتناء الزوجات 00فنشأ الابناء مفككين لايعرفون واجب الابن نحو ابيه (((لان فاقد الشىء لايعطيه )))

لان الآباء كانوا يعاملون آبائهم بهذه الطريقه00 فماكان من الابناء الا ان عاملوهم كما كانوا يعاملون آبائهم00((( وكما تدين تدان ))

اخوانى هذا هو ناقوس الخطر يدق لكم جميعا 00

ربوا اولادكم على الفضيله 00واغرسوا فيهم الصفات الطيبه00
ادبوهم ,,, واحسنوا ادبهم00

علموهم امور دينهم00ارعوا غرسكم تحصدوا الرياحين
ابتعدوا عن الدلع وعدم الردع 00والتوجيه عند الخطأ

اغرسوا فيهم المحبه00والحب00وعدم الانانيه

اجعلوهم اصدقائكم00

وثقوا انكم لن ولن تمروا بتجربة دار المسنين ابدا
************************************************** *

عبيد خالد صديق

02-11-2005, 03:04 PM

هذه من علامات اخر الزمان جعلنا الله واياكم من البارين بابائهم

وعافى الله مجتمعنا من مثل هذه الظواهر البشعة

مشكور اخي خالد

خالد هاشم علي

08-11-2005, 07:56 AM

الاخت ساندرا...
تحياتي لك ولكل الاخوة واسف علي تاخري في التعقيب وذلك لانشغالي في الفترة الماضية وكل سنة وانت وجميع الاخوة بالف خير وصحة وعافية ويمن وبركة...
وصدقيني كل اللي حكيتو ليكم كان حقيقة وحقيقة مرة من واقع اصبحنا نعيشه في السودان بعد ان كنا نشاهده في المسلسلات..
اتمني ان يكون شهر رمضان والعيد المبارك فرصة لهؤلاء الاشخاص ليعيدوا التفكير ويرجعوا الي صوابهم ويضموا اهلهم لحضنهم وان يستغفروا الله وان يطلبوا من ذويهم السمااااااااااااااااااااح. يااااااااااااااااااااااااارب

خالد هاشم علي

08-11-2005, 08:07 AM

الغالي ابوروان.......
سلام وشوق شديد ياحبيب.. وكل سنة وانت بالف خير ...
والله يامحمد انا كمان ماكنت مصدق القدامي ... ياربي ده شنو ده؟؟؟؟؟؟؟ وبقيت ماقادر امسك نفسي... وقلبي قال لي امشي السودان واقعد مع ابواتنا وامهاتنا ديل واسمع قصتهم بي هدوء وآخد منهم عناوين اولادهم واشيل عكاز كبييييييييييير مضبب واقع في اولادهم ضرب صاح لغاية ماراسهم يجي...
لكن في رايك كده ناس زي ديل ينفع فيهم الضرب؟؟؟ ديل ماينفع فيهم الا الشنق والله...
وحمدت ربنا شديييد يامحمد انه آخر كلمة سمعتها من ابوي عليه رحمة الله كانت ( عافي منك ورضيان عليك الي يوم القيامة)... وكنت بتمني من ربنا انو الايام ترجع بي لي ورا عشان اضم ابوي في حضني وابكي ابكي ابكي... علي اي هفوة صدرت مني حتي ولو كانت في طفولتي....
والله لو عرف هؤلاء نعمة الام والاب لما فعلوا هذا....

يااااااااااااااااااااااااااااااارب رحماك والطف بي عبيدك

خالد هاشم علي

08-11-2005, 08:16 AM

اخي وصديقي الغالي ابراهيم...
لك التحية وكل سنة وانت بالف خير وعافية...
مشكور علي التعقيب الرائع كعهدي بك دائما، وزي ماقلت حاجات كتير اتغيرت ومفاهيم كتير اتغيرت لكن ياابراهيم ان يتغير الانتماء للوالد والوالدة وتضعف الاواصر والعلاقات لهذة الدرجة فهذا كثييييييييييييييييييييييييييييير.
دعواتنا وابتهالاتنا للمولي عز وجل ان يهدي هؤلاء الي سواء السبيل....
ويادوب ياابراهيم صدقت المثل البقول ( قلبي علي جناي... وقلب جناي علي حجر).

خالد هاشم علي

08-11-2005, 08:42 AM

عمنا الغالي ابو نزار...
تحية وسلام وكل سنة وانت وافراد الاسرة الكريمة بالف خير وعافية...
مشكور كتير علي التعقيب ... واسعدتني مشاركتك لانك اب واكيد حتكون فجعت بما فعله هؤلاء بآبائهم ...واتفق معك في كل ماقلته ياعم بابكر... لكن...
الا يستحق الاباء الاحترام والتقدير حتي لو كان بعيدا عنا وتزوج مرات عديدة؟؟ الا يكفي انه سبب وجودي في هذة الحياة ؟؟؟ الا يشفع له ذلك؟؟؟.
ساحكي لك هذة القصة التي حدثت لي ...
كنت والاسرة نقيم في مشروع الجزيرة بحكم عمل الوالد وقد كنا نقوم بتربية الحيوانات من ابقار واغنام وضان وخلافه...
انا عن نفسي كنت استمتع جدا بتربية الكلاب... وكان عندي مجموعة مكونة من كلب وكلبة وكم جرو ... شاءت الاقدار ان توفي الكلب الكبير .... ونشا الصغار مع امهم... بعد فترة كبر الصغار وشبوا وخلاص بقوا كبار..
في مرة من المرات قامت بين الكلاب مشكلة كبيرة ونزاع رهيب مابتذكر اسبابه لكن المهم كانت حاجة رهيبة... قامت امهم بالتدخل بينهم واصيبت بجراح عميقة ماتت علي اثرها بعد يومين..
صدق او لا تصدق ياعم بابكر....
امتنع اولادها عن الاكل والشرب حتي ماتوا جميعا...

شوف بالله... الكلاب زعلت لانها كانت السبب في موت امهم....

وشوف عمايل البني آدمين في آبائهم؟؟؟

خالد هاشم علي

08-11-2005, 08:46 AM

اخي عبيد...
كل سنة وانت طيب...
وصدقت ... دي علامات آخر الزمان...
يارب تقدرنا نرد ولو جزء بسيط من دين آبائنا علينا يارب...

أبوبكرحامد

08-11-2005, 04:22 PM

الزول أب ضميراً حى وصاحى ......... الرائع أبو هاشم ..... لك التحايا والوداد
والله ده زمناً كعب البيخلى الأولاد يودوا والدينهم لدار المسنين وغايتو الكلام فى الموضوع ده أشبه بالتزلج على الجليد لأنو ماعندنا ومااتعودنا عليهو ........... والله يكضب الشينة

خالد هاشم علي

08-11-2005, 10:08 PM

الغالي ود المأذون....
سلام وشوق شديد... سلام واكون سعيد...
كل سنة وانت طيب وربنا يحقق الاماني، والله نورت البوست بي طلتك البهية يارائع..
والله ياابوبكر كل ماذكر اصبح واقع نعيشه في السودان وقد وصل عدد بيوت المسنين في العاصمة بس ( 9) بيوت كما ذكرت في بداية الموضوع، واخشي مااخشاه ان نفاجأ بعدد من هذة الديار في بلدنا الحبيبة مدني واخشي من تفشي هذة الظاهرة لتشمل كل السودان...
الله يكضب الشينة...

أبوريلان

08-11-2005, 10:30 PM

الغالي خالد سلام عليك

يازوووول انتا متأكد انك كنتا فاتح قناة النيل الازرق ولا الصيام أثر عليك خلاك تشوف قناة بلو الاوربية زي قناة النيل الازرق

طبعا وانا بتابع في كلامك ده ما قدرت اتخيل او اتوقع انو حاجة زي دي تحصل في السودان وزي ما قالت الاخت روان زمان الواحد بشوف في اجهزة الاعلام فلان رما ابوهو في دار العجزة فلان ضرب ابوهو وحاجات غريبة كده لايمكن نتصورها وكنا وقتها بنقول الحمد لله انو حاجات زي دي في السودان ما عندنا لكن من كلامك يبدو اننا راجعين وراء شديد وحا نبدا من مكان ما وقفو الناس والله المستعان
هذه من علامات اخر الزمان جعلنا الله واياكم من البارين بابائهم وعافى الله مجتمعنا من مثل هذه الظواهر البشعة

الأخ خالد هاشم على

سلالالالاماااااات

كل عام وأنت بألف خير وصحة والأولاد بخير

الشوق ليك أبعاد

الكلام الذكرتو يشيب الرأس لو قلت فعلا سمعته فى قناة سودانية وحاصل بالفعل فى السودان ، لكن الواحد لا يستغرب مثل هذه الأفعال أن تأتى للسودان لأن السودان أصبح يأوى الكثير من الأجناس ومن عاشر قوما أربعين يوما صار منهم ، لكن هل من رأيتهم سودانيين 100% ؟ أنا شخصيا زى ماذكروا السبقونى بالرد ما مصدق الكلام دا وإنشاء الله تكون بتحلم يا خالد هاشم ولو بقى حقيقة على السودان السلام وعلى قيمنا السمحة السلام ، وأحسن الواحد يسكت وما يتكلم ويتفاخر بسودانيته تانى مرة .

لك كل الشكر على الموضوع المأثر

لا حولة ولا قوة إلا بالله !!!!!!

سبحان الله

خالد هاشم علي

10-11-2005, 12:22 AM

الغالي ابو ريلان...
لك التحية ولافراد الاسرة الكريمة وكل سنة وانتوا طيبين...
والله ياياسر القناة سودانية وهي قناة النيل الازرق.. والذين تمت استضافتهم سودانيين 100% وكمان من انحاء السودان المختلفة.. يعني من الشمال والجنوب والشرق والوسط ( الجزيرة) والخرطوم والغرب... يعني كانت تشكيلة متنوعة من كل انحاء السودان... وقد قمت بتسجيل مقاطع متفرقة من تلك الحلقة علي شريط فيديو ، الا انني لم استطع اكمال التسجيل لاني والله اصبحت لا اقوي علي تحمل مااراه ومااسمعه...

الناس ديل ماسمعوا :-
(ابوي يافارس الحوبة... ابوي ذخر السنين لينا....)

ولا ما سمعوا :-

(امي الله يسلمك يديك لي طول العمر وفي الدنيا يوم مايألمك)...

الله المستعان...

أبوريلان

10-11-2005, 12:58 AM

الأخ خالد هاشم

لك التحايا والأشواق

والله كلام غريب كونو يحصل فى السودان وزى ماقلت الظاهر عليهم ماسمعو بـ (ابوي يافارس الحوبة... ابوي ذخر السنين لينا....) (امي الله يسلمك يديك لي طول العمر وفي الدنيا يوم مايألمك)...

ولا نملك إلا أن نقول حسبنا الله ونعم الوكيل

Mr Lonely

10-11-2005, 01:11 AM

والله رغرب شى انو الكلام ده يكون عندنا في السودان
غايتو اسأل الله العفو والعافيه والله يكون في عون الجميع
وجعلنا الله واياكم من البارين لوالدينا
مشكور اخوي خالد
لا حوله ولا قوه الا بالله

خالد هاشم علي

11-11-2005, 11:38 PM

اخي الفاضل Mr Lonely ...

لك التحية ومشكور علي المرور ...
والله كلنا فجعنا بما رأيناه عن السودان في تلك الحلقة التي بثت في قناة النيل الازرق... نسال الله ان يستر علي عبيده...

مشكور مرة تانية...

elsmoual

14-11-2005, 10:06 PM

بسم الله الرحمن الرحيم

الاخ الكريم ابو هاشم والمشاركون الافاضل

كل شئ متوقع الان فى وضع اصبح نموذج الاتصال للفرد فيه مبنى على العشوائية

كل ابن فى السودان الا من رحم ربى فى هذا الزمان يخضع الى اثر الظروف فى تكوينه التربوى والنفسى ... و لنا جميعا ان نتخيل كل وكم الاسقاطات الممكنة فى غياب البرنامج التربوى الواضح وبعدين نضيف اثر الشارع والبيئة المختلف تماما الان قطعا سنقتنع ان ما يحدث يجب ان يكون متوقع خاصة فى ظل الظروف الاقتصادية الموجودة فى البلد الان

لا يفسر كلامى هذا باعتراف بما يحدث انما لا بد من معرفة السؤال عشان نجاوب ول ما كدى يا اخوان

هنلك تفاصيل التفاصيل فى ما يتعلق باولويات الانسان ومعتقده عن نفسه والاخرين والدنيا جميعا وفى ما يخص قيمه وطريقة تفكيره واتخاذه للقرارات ( برامجه العقلية العليا ) ودوافعه ومواقعه الادراكية وما الى ذلك من تكوين نفسى اصلا لم يكن هنالك رؤية لاعداده وفوق كل هذا وذاك ايمانياته وهنا يطفو على السطح سلام التسليم وليست القتاعة حيث يعمل الاول على مستوى السلوك لذلك تجد القول يتناقض مع الفعل لانه غير مستند الى عمق فكرى او حتى شعورى

بقى ان نقول لكل مشكلة حل

الزمن المريح

15-11-2005, 01:20 AM

خالد هاشم علي

02-12-2005, 03:27 AM

احبتي الكرام
السمؤل ...
الزمن المريح..
مشكورين علي المرور وعلي التعقيب..
واتمني يااخي سمؤل ان تحل هذه المعضلة مع صعوبتها لانها معضلة في الاخلاق وفي الانتماء لمن نحب...

مرة اخري اعادت قناة النيل الازرق الحلقة التي تحدثت عنها في هذا البوست يوم الاربعاء الماضي وللمرة الثانية احسست بالدنيا تدور بي وانا أشاهدها.
الادهي والامر ان الحلقة استضافت امرأة في العقد السبعين من العمر لتحكي قصتها.. وبالفعل حكت القصة وكانت والله تدمي القلوب... فهي نزيلة الدار منذ شهور .. ولديها من الابناء ولد وبنت وقد توفي الولد منذ سبعة سنوات..
بنتها الوحيدة اتت بها للدار بتمثيلية مقيتة... رتبت لكل شيْ واتصلت بالشرطة لتاخذ امها وذهبت معها للمستشقي لاجراء الكشف الطبي وكانها لا تعلم شيء .. وكانها مجني عليها مثل امها وليست هي الجاني..
تركتها بالمستشفي لتكمل معها الاجراءات وعادت البنت لبيتها..
المصيبة ان الحاجة الكبيرة لا تدري ان الذي بلغ عنها واحضر لها الشرطة هي ابنتها الوحيدة وترفض التسليم بذلك حتي عندما قالت لها مقدمة البرنامج ان الشرطة لا تأخذ الناس من بيوتهم بدون سبب رفضت تلك الام مجرد التفكير بأن يكون لإبنتها يد في ذلك.
هل ياتري السبب في طمع هذة البنت هو البيت التمليك الذي تملكه امها وترفض بيعه؟؟؟؟
ام هل ياتري اتفقت مع احد الشباب علي الزواج واشترط عليها الاخير ان تتخلص من امها وترميها في دار العجزة والمسنين؟؟
في كل الحالتين هي الخسرانه..
واسأل الله لها بالهداية وان تعود لرشدها وتهرع لامها وتأخذها في حضنها وتقول ليها:

امي الله يسلمك يديك لي طول العمر وفي الدنيا يوم مايألمك

bakri

03-12-2005, 10:50 PM

لاحوله ولاقوة الا با الله
الواحد ما كان بتوقع والله السودان اصل للمرحله دى

مشكوووووووووور

حسن على

09-12-2005, 01:46 AM

لاحوله ولاقوة الا با الله
الواحد ما كان بتوقع والله السودان اصل للمرحله دى

مشكووووووو

ود مارنجان

10-12-2005, 10:21 AM

لاحوله ولاقوة الا با الله
هل انت متأكد بانك ما كنت فى حلم ما اصدق بان يصل الناس بالسودان الى هذه الدرجة وهذا كنا لما نراه بالمسلسلات نتعجب من هذه الاعمال .
قال سبحانه وتعالى
(وقضى ربك ألا تعبدوا إلا إياه وبالوالدين إحساناً إما يبلغن عندك الكبر أحدهما أو كلاهما فلا تقل لهما أف ولا تنهرهما وقل لهما قولاً كريماً) صدق الله العظيم