المساعد الشخصي الرقمي

مشاهدة النسخة كاملة : سنة اولي حب في ودقيحة ( الحلقة الاولي )


صالح ابوشوارب
04-12-2005, 06:14 AM
كنت انا وصديقي حسن بندرس في سنة اولى اوسطي وفي يوم وقفة عيد الاضحي كنا جالسين في الكبري نتفرج على الدافورى في فريق ودازرق في العصرية وكانت بين فريق الهوارة وفريق ود ازرق بكرة الشراب واتفقنا انا وحسن نمشي بعد صلاة العيد السوق الكبير نبيع جلد خروف الضحية حقنا وحقهم
وبعد ما انتهي الدافورى مشينا البيت وفي الطريق لاقينا اخونا اسعد ود جيرانا وقال لينا خبر شين انو خروف ناس محمد علي اكل كيس نايلون ومات وبعد سماع هذا الخبر شلنا هم شديد وجرينا جرى وكان كل واحد فينا ماسك طرف جلابيتو في خشمو حتى وصلنا بيوتنا نتفقد الخرفان ماتكون اكلت ليها كيس نايلون ولحقت خروف ناس محمد على
والحمد لله لقيت خروفنا عايش وبياكل في القصب وجنبه جردل المويه طبعا فرحت شديد واليوم داك ما نمت وانا منتظر صلاة العيد عشان نبيع جلد خروف الضحية
كان عنقريبي مختوت جنب الخروف بيني وبينو الشرقانية وفى الليل وانا راقد مصنقع للسما اتفرج على النجوم وهى مشتته وكانت هناك تلاتة نجمات جنب بعض وقلت في نفسي ما اقوم اعد النجوم دى وفعلا بديت اعد ولمن و صلت اربعين عينى زغللت وراح على العد وبديت اعد من جديد والظاهر اثناء العد نمت
لكنى صحيت وقمت مخلوع لاني سمعت خلف الشرقانية صوت غريب فسحبت ليك الملاية واتغطيت وقلبي يضرب وعملت نايم . وبعدها الخروف قام يكورك قلت خلاص يمكن يكون دا حرامي عايز يسرق الخروف ولكن الصوت الغريب ما وقف كررر..كررر..كررر . اخوكم عمل ليكم نايم وقطعت الحركة بس قاعد اتصنط
واخيرا سمعت امى تقول ( الخروف دا ما لو ياناس عايز يوقع الشرقانية ) وانا كنت بعاين ليها بقعر عيني قامت سحبت ليك الخروف بعيد وربطتو بالحبل
الظاهر الخروف قطع الحبل وقام ينكرش في الشرقانية عشان كده انا افتكرتو حرامي
المهم الخروف ما خلاني انوم اول مايقول باع كلب الجيران ينبح . اقوم اصحى وتاني انوم حتي سمعت صوت الديك بتاع ناس نفيسة وهو طالع في الحيطة ومن شدة الصياح قام صح ليك ناس البيت كلهم
ومن بعيد سمعت امى تقول يا اولاد كل واحد فيكم يملا الجردل موية ويشيل الطشت ويخش الاووضة يستحم وبتذكر صابونة الحمام كانت صابونة اسمها صافي وكانت تستعمل للغسيل والحمام ( كانت ليها دعاية فى الراديو بتقول < صابون صابون صافي الحير اوصافي > )
المهم شلت ليك الموية ودخلت الاوضة وقعدت استحم
وفي اثناء ما بصبن راسى وادعك وشى بالليفة تقوم الصابونة تقع فى الواطة طبعا انا ماقادر افتح عينى عشان اشوف الصابونة وقعت وين
بالله اتخيلوا انا قاعد في الطشت ومادى يدى بي بره افتش الصابونة طبعا لفيت دائرة بيدى حول الطشت وانا اهبش وافتش علي الصابونة واخيرا وجدت الصابونة لكن كانت مليانة رملة المهم كملت الحمام بى رملتا واتنشفت بالملاية ولبست جلابية العيد وشلت برش الصلاة وكان صاحبي حسن منتظرني في باب الشارع ومسك معاى البرش من الطرف التاني عشان نمشى نصلي صلاة العيد في ميدان بانت واتحركنا وكنا بنقول لبيك الله هم لبيك بصوت عالي وكنا فرحانيين ومنتظرين متين يضبحوا الخروف عشان نبيع الجلد و نمشى نلعب البريمو ونطوطح في كبرى ودقيحة




الحلقة الثانية الاسبوع القادم


ابو منار
ابو المهتــدي
04-12-2005, 10:15 AM
بسم الله الرحمن الرحيم
الله يعطيك العافية اخي ابو شوارب 0 ويطول في عمرك بي كدة تستحق نوط الزمالة بجدارة طال ماكنت بتستحم بصابونة صافي
ام قرش 0 وطش الغسيل 0 ضبعا الجلابية بي لياقة ومسطرة 0 والجزمة باتا 0 ولا شدة 0 الايام تمر تبقي تلك الرياحين الحلوة
لك تحياتي
خالد هاشم علي
04-12-2005, 10:27 PM
لغالي ابو شوارب...
قمة الروعة كعادتك دئما...
تجعلنا نتلهف لسماع المزيد المزيد عن الذكريات الحلوة والزمن الجميل...


في انتظارك..
بس..




ماتطول الغيبة
أبوريلان
04-12-2005, 11:12 PM
والله يا أبو شوارب خطير مررررررررررررررررررررره .
صالح ابوشوارب
04-12-2005, 11:13 PM
اخي العزيز ابو المهتدى

شكرا لك وانت تتذوق الذكريات

وبالمناسبة الشبط كان شدة بيضاء

كل ما يتغبر بالتراب على الحنفية على طول

غسلة سريعة

ــــــــــــــــ

ابو منار
صالح ابوشوارب
04-12-2005, 11:20 PM
هلا وغلا ابو هاشم

الذكريات حلوة وجميلة

لكن بالله انت من ناس صابونة نادية ولا صافي

ــــــــــــــ

ابو منار
صالح ابوشوارب
04-12-2005, 11:30 PM
الاخ العزيز ابو ريلان

شكرا للتعليق

ولكن الخطورة في الحلقة القادمة


امسك خشمك عليك !!!

ـــــــــــــــــــــ

ابو منار
عزيز عيسى
05-12-2005, 12:41 PM
ومن بعيد سمعت امى تقول يا اولاد كل واحد فيكم يملا الجردل موية ويشيل الطشت ويخش الاووضة يستحم وبتذكر صابونة الحمام كانت صابونة اسمها صافي وكانت تستعمل للغسيل والحمام ( كانت ليها دعاية فى الراديو بتقول < صابون صابون صافي الحير اوصافي > )





الحلقة الثانية الاسبوع القادم


والله يا صالح أنا لي زمن بتابع في المنتدى وأفتش من هنا الى هناك علشان أقرأ ذكرياتك..
واليوم أنا سعيد جدا بأني أجد واحدة من الذكريات خرجت الى النور..

لكن ما تقول لي ذكريات في غاية الروعة.. وما شاء الله ماشي تمام.. وسردك للاحداث جميل ومعبر جدا..

انت كنت بتستحم بصابون صافي.. ما قالوا زمان صابون اللايف بوي متواجد بكثرة وريحتو قوية شديد وبتقعد اليوم كلو علي الجلد..
يعني لما تستحم بصابونة لايف بوي ما بتحتاج تاني انك تتعطر بريحة.. واليوم لو كان في صابون لايف بوي بريحتو القوية الزمان ديك..
كان الناس استغنت عن حاجة اسمها (قدر ظروفك)..

واصل وتجدتنا منتظرينك بفارق من الصبر.. لكن حكاية (الحلقة الثانية الاسبوع القادم) دي ذكرتنا بالمسلسل الأجنبي زمان.. مش حرام تشرنا اسبوع بحالو وتجينا راجع.. ارجو تعدلها ليوم أو يومين..

ولك مني كل الود،

عزيز
صالح ابوشوارب
05-12-2005, 10:28 PM
الاخ العزيز عزوز

مني ليك اجمل هدية

هي هدية الذكريات والله سعدت جدا

بمداخلتك وخلتني اذكر اكتر

و خليت المدة اسبوع عشان نشوف تاثير الذكريات على الاصدقاء

وشكرا لرسالتك الخاصة وهي ذكرتني الطرشى والعجور بالشطة والليمون


ابو منار
شبندر
12-12-2005, 01:16 AM
الأخ صالح أبو شارب التحية ليك لهذا السرد التاريخي
على فكره الأسبوع القادم بدأ من امس
صالح ابوشوارب
12-12-2005, 08:42 AM
]الاخ شبندر [/SIZE]

سلامات

بخصوص الحلقة الثانية فعلا مواعيدا فات

ولكن الظاهر الفلم الهندى دا ما جاب دخل

خمسة فقط قطعوا التذاكر اما اكثر من

اربعين شخص دخلوا ملح والفلم بتاعنا دا

مكلف ولذلك قررت تغيير موقع العرض

بدلا من السينما الوطنية حيكون في الراسائل

الخاااااااااااااااااااااااااااااااااااااااااااصة

للقاطعين التذاكر فقط

انتظرونا
عزيز عيسى
12-12-2005, 11:24 AM
والله يا صالح أنا زيك نفس الشيء.. وحاسي بنفس الشعور اللى بتحس بيه.. الواحد فينا يتعب وينحت في مخه علشان ينزل شيء ويسعد الاخوان.. ويتوقع عدد كبير من الاعضاء يدلي برأيه عن الموضوع يسعدك بمداخلته ويشجعك على مواصلة الكتابة.. لكن يحصل العكس ويخيب ظنك.. أنا غايتو بتألم دائما من الناحية دي.. وبتصيبني خيبة أمل..
شاركت بمواضيع في منتديات أخرى.. صدقني خلال فترة أقل من عشرة دقائق علي انزال الموضوع دخل أكثر من خمسة أشخاص أدلوا برأيهم وأثنوا علي الموضوع.. كلام الناس هو اللي بيشجع الواحد علي الكتابة ويخليهو انو يبدع أكثر وأكثر.. والراس مليان ذكريات وعايزين نفضفض.. لكن هنا في منتدانا ما عارف الناس كسالة ليه؟؟.. الواحد تلقاهو بيقرأ في الموضوع لكن ما يدخل حتى يقول ليك السلام عليكم!!!

نقول شنو بس.. الله غالب..

عزيز
التيمان
17-12-2005, 12:46 AM
ايديكم العافيه



\

يا اعمامنا ويخليكم لينا
مصباحيه
01-01-2006, 11:27 PM
شنو يا ابو منار انت مواليد سنة كم بالظبط حيرتنى عديل
خالد هاشم علي
04-01-2006, 11:49 PM
غايتو يانهلة حيدر ابو منار ده قديييييييييييييييييييييييم ومن الناس الطلعوا في التلفزيون ساعة رفع العلم السوداني... مش بتجي لقطة فيها ناس بصفقوا كده؟؟؟ الواقف في النص ولابس بنطلون وقميص ده ياهو ابو منار ذاتو وكان عمره وقتها حوالي 25 سنة كده.

ابو شوارب...
طيب يافردة نحن ذنبنا شنو ياخي تحرمنا من الحلقة التانية؟؟؟
علي فكرة كلامك سليم مية مية وكمان برضو كلام عزيز عيسي لانه حصل لي نفس الموقف وبديت اكتب عن ذكريات مسلسلة عن اجازتي في السودان ...كتبت الحلقة الاولي ومالقيت حاجة تشجعني عشان اكمل الباقي...لكن انا بطلب منك تواصل الكتابة عشان كمان انا أتشجع بيك ذاتو واواصل كتابة موضوعي..
في انتظارك ياحبيب..
مصباحيه
05-01-2006, 02:16 AM
انا برضو بايدك وبطلب من عمنا ابو منار مواصلة الحلقة الثانيه لانو الشمار كتلنى
ولو عندنا خاطر عندك واصل وحتلقنا طوالى ناطين ليك فى حلقك
صالح ابوشوارب
05-01-2006, 02:34 AM
والله يا نهلة عشان خاطرك وخاطر

الاخوان سوف اكمل القصة وشكرا للتشجيع وطبعا هى قصة

حقيقية حدثت فى شارع سنكات جبرونا انتظرونا


اما انت يا خالد لك يوم
غفران
05-01-2006, 06:44 AM
ماشاءالله عليك يا عمي صالح ابو شوارب ذاكرتك ميه الميه ربنا اطول لينا في عمرك انشاءالله ياربي
sambaaa
07-01-2006, 04:14 AM
تسلم عم صالح ....

ربنا يديك طولة العمر وتتزكر كمان .. وكمان ..

ولكنني لا اخفي عليك المي الشديد كل ما الواحد يعيد شريط زكرياتو .. بالذات ايام الطفولة ...

واي واحد من ابناء مدني بالتأكيد بتكون زكرياته مطابقة تماما لزكراك ...

انا من مواليد مدني حي الثورة ... حي جبرونا ... حي البان .. ودكنان .. حي التلفزيون ...

زكرت الاحياء دي مع بعض لأنها مرابطة واسرتها واحدة كما تعلمنا منذ الصغر ...

اما الآن وبكل حسرة والم فرقت بيننا المدن الاجنبية وباعدت بيننا المسافات ...

واصبحت الايام الجميلة .... زكريات خالدة .... نفخر بها ونحن ليها

ويا ليتها تعووووووود ...:rolleyes:
sambaaa
07-01-2006, 04:17 AM
ملحووووظة :


عم صالح ...

انا قاطع تزكرة ....

ما تنساني من الجزء التاني ......


SAMBA ،،،،،،
ahmed ibrahim
07-01-2006, 07:58 AM
السلام عليكم جميعا
الاخ صالح كتر خيرك على المجهود وعلى الطلاق من ما سمعنا بالعرض اشترينا القصب ووقفنا فى الصف من الساعه خمسه
صالح ابوشوارب
07-01-2006, 10:32 AM
غفران - شكرا ليك ولدعائك الجمـــــــيل آمييييين

وربنا يطول عمرك ويديك الفي مـــــرادك آمييييين
صالح ابوشوارب
07-01-2006, 10:37 AM
سامبا

اولا شكرا لك ولتفاعلك مع ذكريتنا

وشكرا لتشجيعـك والتذكرة مدفوعة

ليك ولاحمد ابراهيم
صالح ابوشوارب
07-01-2006, 10:43 AM
حبيبنا احمد ابراهيم

اولا مرجوعة في مسماها

وخلي لي من القصب ما تكملو

واحرسني في الصف الاول

بس اوع من الكنبة المكسورة
ahmed ibrahim
08-01-2006, 02:59 PM
[b]حبيبنا صالح السلام عليكم
اها يازول رجعناها لكن المشكله فى القصب...وليد قرض والصاروخ اعمل ليهم شنو؟؟ بعدين الفلم دا ما ح يبتدئ تانى بعد الاستراحه دى ولا شنو؟؟ على فكره الجماعه بدأوا يكسروا فى قزاز البيبسى والله يستر
sambaaa
13-01-2006, 03:58 PM
نحن منتظرررررررررررررين الجزء التاني يا عمنا ......... وينك انت ؟؟؟؟؟؟؟؟؟
sambaaa
13-01-2006, 04:00 PM
كل سنة وانتو طيبين
ياسر فقيري
15-01-2006, 02:29 AM
أستاذي الرائع أبو شوارب .. أمدك بالصحة والعافية وأنت تضمخ أركان المنتديات بعبق ذكرياتك الجميلة .. لا حرمنا الله منك ..
الظاهر إني جيت متأخر شوية بس الحمد لله حصلت التذاكر وأشتريت لي مكبر عشان أقدر استمتع بهذا السجال بين الحاضر والماضي ..
الرائع أبو شوارب .. أتمنى أن تواصل هذه الرائعة سنة أولى حب في ود قيحة في ذات المكان لنستمتع بها .. مع فائق إحترامي وشكري لك ..
صالح ابوشوارب
15-01-2006, 06:46 AM
الاخ سامبا
كل عام وانت بخير
انشاء الله هذا الاسبوع سوف تشاهد
الحلقة الثانية والاخيرة
بس الصبر
صالح ابوشوارب
15-01-2006, 06:51 AM
الاخ العزيز ياسر
كل عام وانت بخير
وين الغيبة انشاء الله خير
وشكرا ليك وعمك العريس حايس
والي الحلقة الاخيرة قريبا
أبوبكرحامد
23-01-2006, 08:49 PM
الرائع بنكهة مدنى ........... أبوشوارب
آسفين على التأخير بس ظروف قاهرة الله لاعادا تانى .
حقيقى استمتعنا جداً بحديث الذكريات , بس كلمة الشرقانية دى حقيقى ماعرفتها , وعارف بعض الناس ممكن تستنكر هذا التجاهل بس أنا بقول الصراحة لأنى عاوز أعرف معناها.
أما بخصوص قلة المداخلات فأتفق معك ومع ماذهب إليه عمو عزيز من ان هنالك احجام عن المشاركات وخصوصاً المشاركات الجادة وماعارف هل نتخلى عن المنتديات ونحولها لمدينة ملاهى وألعاب .
عموماً آمل أن تصبر صبر أولى العزم لأنك صاحب قضية وسيد وجعة وزى ماقال كابلى:
إنت فينا كبير ... وريدنا ليك كتير
مع مودتى
ود الماذون
صالح ابوشوارب
23-01-2006, 11:56 PM
الاخ الغالي ابوبكر

شكرا لله الذى ازاح عنك كل الموانع و اقول ليك حمدا لله على رجوعك لينا بالسلامة اما الشرقانية فهى حواجز من القش توضع داخل البيوت التى تسكنها اكثر من عائلة فتعمل ليها منطقة خاصة بها يعني ( بارتشن ) يابكور وللعموم فهى توجد فى الغرف المؤجرة ويقوم المؤجر بعمل راكوبة وحواجز امام غرفته يعنى تخص الطبقة الفقيرة
روبش
24-01-2006, 11:31 PM
اخي .. ابوشوارب
لك التحية ... القصة جد شدتنا
لكن انا متوقع الجزار بتاعكم يكون عنده ارتباط في كذا مكان تاني ويستعجل ويقوم ( يقد ) الجلد في كم حته
وبعد داك اتخيل شكلك حايكون كيف ... ولا ما نسبق الحوادث
عزيز عيسى
25-01-2006, 08:21 AM
الرائع بنكهة مدنى ........... أبوشوارب
آسفين على التأخير بس ظروف قاهرة الله لاعادا تانى .
حقيقى استمتعنا جداً بحديث الذكريات , بس كلمة الشرقانية دى حقيقى ماعرفتها , وعارف بعض الناس ممكن تستنكر هذا التجاهل بس أنا بقول الصراحة لأنى عاوز أعرف معناها.
أما بخصوص قلة المداخلات فأتفق معك ومع ماذهب إليه عمو عزيز من ان هنالك احجام عن المشاركات وخصوصاً المشاركات الجادة وماعارف هل نتخلى عن المنتديات ونحولها لمدينة ملاهى وألعاب .
عموماً آمل أن تصبر صبر أولى العزم لأنك صاحب قضية وسيد وجعة وزى ماقال كابلى:
إنت فينا كبير ... وريدنا ليك كتير
مع مودتى
ود الماذون

أخيرا ود المأذون ظهر.. دا يوم الفرح والسعد اللي جابك..
والله يا ابوبكر انت وابراهيم ليكم نكهة خاصة.. والحمدلله شدة وزالت..
يلا خلونا نرجع الايام الحلوة ونسعد بلقائكم.
ودي واحدة من الزهور تلقاها مفروشة أمامك في الطريق.
http://www.w6w.net/album/35/w6w2005041323002264935c98a.gif

لك كل الود،

عزيز
عزيز عيسى
25-01-2006, 08:24 AM
اما الشرقانية فهى حواجز من القش توضع داخل البيوت التى تسكنها اكثر من عائلة فتعمل ليها منطقة خاصة بها يعني ( بارتشن )

طيب يا صالح عرفنا الشرقانية والكشاشة معناها شنو؟
عجبتني كلمة (بارتشن).. منتهى البلاغة وحد التشبيه. هههههه.

تسلم لينا يا أبومنار

عزيز
أبوبكرحامد
25-01-2006, 08:28 PM
العجوز المشاغب عزيز عيسى ................
ياسلام عليك يازول ياأصيل وانشاء الله المنتديات عامرة على الدوام بى أروع ناس وأحلا كلام .......... ويللا لى قدام.
صلاح ودالطاهر
06-06-2007, 05:24 AM
الموضوع ده عجبني قلت كدي ننكته من تحت
معتز حمدتو
16-06-2007, 08:46 AM
عمنا العزيز ابو الشوارب
جميل كالعاده في الوصف تعرف حسيت نفسي يوم العيد بنفس المكان واختلاف الزمان .
وانا كمان في انتظار الجزء الثاني ذي العريس سامبا الفنان .
ولك الود كميات ابو شوارب
صلاح ودالطاهر
18-06-2007, 10:40 PM
اه يا ابوشوارب منتظرين الجديد
صالح ابوشوارب
20-06-2007, 07:51 AM
الاخوان صلاح ومعتز
شكرا لكم
لكن
انتو قايلين في المنتدى في ناس بتعرف كبري ودقيحة وميدان بانت وبا شميل ومكرم مانسي
متحمسين لقصص مدني
انسو
غيداء نورالدين
20-06-2007, 09:03 AM
الاخ صالح لكن خطيرة شديد تسلم على القصة الراائعة
HaSsOoN
20-06-2007, 12:41 PM
ياسلام عليك ياابوشوارب بالجد متعتنا بالقصص الحلوه دي...والذكريات والقصص الزي دي ليها مذاق وطعم خاص يوم الواحد يحكيها ويتذكر بيها ايام زماان....يديك الف عافيه ياعمنا ومواصلين معاك وكتر لينا من الحاجات الحلوه دي
صالح ابوشوارب
21-06-2007, 07:20 AM
الاخت غيداء
والاخ حسون
لكم التحية وشكرا للمرور وسوف نجتهد باستخراج بعد الذكريات اذا مد الله في الآجال
ابو ماجـــــــــد
حي المدنيين
27-06-2007, 11:42 PM
بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته

مشكوووووووووور
مشكوووووووووووووووور
مشكوووووووووووووووووووووور
©§¤°يسلموو°¤§©¤ــ¤©§¤°حلوو°¤§©
©§¤°يسلموو°¤§©¤ـــــــــــــ¤©§¤°حلوو°¤§©
©§¤°يسلموو°¤§©¤ـــــــــــــــــــــ¤©§¤°حلووو و°¤§ ©
©§¤°يسلموو°¤§©¤ـــــــــــــــــــــــــــــــ ــ¤© §¤°حلوووو°¤§©
©§¤°يسلموو°¤§©¤ـــــــــــــــــــــــــــــــ ــــ ــــــــ ¤©§¤°حلوووو°¤§©
©§¤°يسلموو°¤§©¤ـــــــــــــــــــــــــــــــ ــــ ـــــــــــــــــــــ¤©§¤°حلوووو°¤§©
©§¤°يسلموو°¤§©¤ـــــــــــــــــــــــــــــــ ــــ ـــــــــــــــــــــــــــــــــ¤©§¤°حلوووو° ¤§©
©§¤°يسلموو°¤§©¤ـــــــــــــــــــــــــــــــ ــــ ــــــــــــــــــــــــــــــــــــــــــ¤©§ ¤°حلو ووو°¤§©
©§¤°يسلموو°¤§©¤ـــــــــــــــــــــــــــــــ ــــ ـــــــــــــــــــــــــــــــــــــــــ¤©§¤ °حلو ووو°¤§©
©§¤°يسلموو°¤§©¤ـــــــــــــــــــــــــــــــ ــــ ـــــــــــــــــــــــــــــــــــــــــــ¤© §¤°حل و ووو°¤§©
©§¤°يسلموو°¤§©¤ـــــــــــــــــــــــــــــــ ــــ ــــــــــــــــــــــــــــــــــــــــــــ¤ ©§¤°ح لو ووو°¤§©
©§¤°يسلموو°¤§©¤ـــــــــــــــــــــــــــــــ ــــ ــــــــــــــــــــــــــــــــــــــــــ¤©§ ¤°حلو ووو°¤§©
©§¤°يسلموو°¤§©¤ـــــــــــــــــــــــــــــــ ــــ ـــــــــــــــــــــــــــــــــــــــــ¤©§¤ °حلو ووو°¤§©
©§¤°يسلموو°¤§©¤ـــــــــــــــــــــــــــــــ ــــ ـــــــــــــــــــــــــــــــــ¤©§¤°حلوووو° ¤§©
©§¤°يسلموو°¤§©¤ـــــــــــــــــــــــــــــــ ــــ ـــــــــــــــــــــ¤©§¤°حلوووو°¤§©
©§¤°يسلموو°¤§©¤ـــــــــــــــــــــــــــــــ ــــ ــــــــ ¤©§¤°حلوووو°¤§©
©§¤°يسلموو°¤§©¤ـــــــــــــــــــــــــــــــ ــ¤© §¤°حلوووو°¤§©
©§¤°يسلموو°¤§©¤ـــــــــــــــــــــ¤©§¤°حلووو و°¤§ ©
©§¤°يسلموو°¤§©¤ـــــــــــــ¤©§¤°حلوو°¤§©
©§¤°يسلموو°¤§©¤ــ¤©§¤°حلوو°¤§©
مشكوووووووووووووووووووووور
مشكوووووووووووووووور
مشكووووووووووور

كويس الخروف ماخلص الشرقانيه وكا وصلك انت واكلك هههههه
محمد الفاضل
02-07-2007, 10:58 PM
عمنا قلبت علينا المواجع خاصه العشير