المساعد الشخصي الرقمي

مشاهدة النسخة كاملة : التفاصيل



كاظم
22-12-2005, 04:31 PM
قابلني متجهما كعادته .. وباغتني أيضا كعادته :
(شفت الناس دي بقت كيف ؟ يوسف العربي بتاع الدكان تصدق طلبت منو سيجارة سلف رفض لي وصرصر لي تقول مشروعهم الزراعي الجا فازي منو ده هدمتي انا .. ياخي دي بشرية دي ).. ثم اطلق عبارته الشهيرة (دنيا بنت كلب ) .. وتمتمت انا بحيث لم يفهم هل انا معه ام مع يوسف العربي .. هذا هو (عطا المنان) مدير الابتدائي اولاد .. وجهزت نفسي لحوار لن اشارك فيه لا سلبا ولا ايجابا .. واتاني الانقاذ كاملا غير منقوص بتوقف حافلة الخط الوحيدة امامنا والتي اعرف مكان (تشميعي ) فيها جيدا ..هنا كل يعرف مكانه ...تفاصيل لم تتغير منذ زمن بعيد .. فبعد قليل سأنزل لانني الاقرب الي باب الحافلة لاساعد( بت شلعي) على رفع خضارها القليل الذي تفترشه لبيعه في السوق والذي لم يزد ايضا من زمن بعيد .. هنا لاشئ يزيد سوى المعاناة ..
(عوض السمح) سينزل في المحطة القادمة فهو لن يصل الى السوق رغم انه احرص خلق الله على ايجاد مقعد له داخل الحافلة .. عوض لن تجد كبير عناء في ايجاده داخل الحافلة سيدلك عليه عطره الواحد هذا اذا جاز ان نسمي مزيل العرق (كوبرا) عطرا .. عوض يصحو باكرا وياخذ حماما حتى لو كانت تثلج بالخارج ثم يرتدي ملابسه واظن انه يصرف وقتا لا بأس به امام المراّة ثم يقطع مسافة طويلة راجلا حيث منزل (اّدم طمبل باي) سواق الحافلة وياخذ عوض مقعده قبل ان يستيقظ ادم من نومه حتى .. عوض سينزل في المحطة القادمة فهو لن يذهب الى اي مكان .. سينزل لانه يحجز هذا المقعد ل(عواطف الممرضة) ... هاهي الحافلة تتوقف وهاهي عواطف تستعد للركوب وهاهو عوض ينزل في سلام كوني غريب .. وهاهي فرصتي لاقتناص نظره الى ابتسامته الغريبة .. ابتسامة عوض تكمن غرابتها في انه يمكن ان تسميها ابتسامة (مجازا) فعوض يستخدم معظم اجزاء جسده تقريبا في هذه اللحظة .. سينهض بسرعة .. سيميل رأسه ناحية اليمين قليلا وبزاوية حادة وبسرعة ايضا .. سيقوس ظهره قليلا في حركة تشبه تقوس ظهور (القطط) ... يداه في تلك اللحظة سيحشرهما في جيوب بنطاله رغم حوجته الماسة للاستناد عليهما ليتسرب من بين المقاعد المتلاصقة .. واغرب الحركات على الاطلاق هي حركة اذنيه فبالرغم من صعوبة تحريك الاذنين (خلقيا ) بالنسبة للبشر الا ان اذني عوض ترقدان الى الخلف في حركة خفيفة في تلك اللحظة مما يصدر اليك احساسا بانه يتحفز وبشكل ماكر .. وااخر مرحلة من كل ذلك هي تحريك عضو الابتسام الاساسي في المسألة (فمه) والذي ينفرج بشكل غريب الى الجانب الايسر فيما لايشبه الابتسام على الاطلاق .. ابتسامة (عوض السمح) شحيحة للغاية ايضا فهو يبتسم مرة واحدة في اليوم .. اذن فهو يبتسم فقط ست مرات في الاسبوع .. فسنثتثني يوم الجمعة لانه يوم العطلة و(عواطف ) الكائن الوحيد الذي يمتلك شفرة هذه الابتسامة المجازية ..وعواطف لن تذهب الى المستشفي يوم الجمعة فهو عطلة .
(عوض السمح) اسمه عوض الله الشاذلي و(السمح) هذه اطلقها عليها الذين عاصروا شبابه من ابناء هذا المكان والذين ذهب معظمهم الان ... (عوض السمح) فاق الستين بقليل وان بدا اصغر من ذلك .. حدثني والدي (عليه رحمة الله) حينما سألته مرة عنه ان عوض هذا كانما نبت من الارض او خر من السماء .. فهم لايذكرون تحديدا متى سكن هنا لقد اكتشفوا فجاة انه يسكن بمنزل (الطاهر خضر) الذي هجر هذا المكان منذ زمن بعيد هو واسرته وباع منزله ذاك والذي يبدو انه باعه لعوض .. والدي اكد لي تماما انهم لم يروا عربة تنقل عفشا الى هذا المنزل ولم يسمع حتى جاره الملاصق عن حركة تنم عن انتقال ساكن جديد .. (عوض السمح) ظهر فجأة في اجتماع لجنة المسجد السنوي و لم ينتبه احد الى وجوده الا في نهاية الاجتماع حيث انتبهنا الى جلوسه بقرب عمك (شيخ مالك ) امام المسجد وهما منهمكان في حديث طويل وهامس نهض بعده (شيخ مالك) وخاطبنا قائلا :
- (يا اخوانا بعد السلام على الحبيب المصطفي دايركم ترحبو معاي باخوكم عوض الله الشاذلي وهو حيجاورنا هنا في بيت الطاهر خضر الله يطراهو بالخير ..وسائلين ربنا انو يلقانا اهل ونلقاهو اخو اخوان ..)
وحينما اتم شيخ مالك كلامه انتظرنا كلنا ان ينهض عوض ليتحدث لنا قليلا عن نفسه ولكنه اكتفى بالسلام وخرج . سألت والدي عن الحديث الذي اتلقطه احيانا عن الحادثة التي شغلت الناس هنا في زمان مضى والتي بطلها كان عوض السمح وهل هي حقيقية ام مجرد اسطورة كباقي التي تسيطر على عقول نساء ورجال هذه البقعة ؟ والدي نظر الي مليا وأجابني إجابة لم تكن كافية لاشباع فضولي حول شخصية (عوض السمح) .. ولما الححت عليه .. اخبرني بانه لا يدري ولكن يقال ان ( ود الكبجل ) كان هو الذي رأى ما تسمعه الان .
مضوي حامد أو ( ود الكبجل ) كنت متا كدا أنني سأجد صعوبة كبيرة في استنطاقه ولكن فضولي أصبح كالجرب الذي يأكلني من كل مكان فقررت استنطاقه مهما كلفني ذلك ...

التيمان
28-12-2005, 03:14 PM
ارجوا المواصله



ويدوم

كاظم
01-01-2006, 06:45 AM
التيمان تحياتي دائما ..
وسأواصل عما قريب
خالص الود

saly
26-01-2006, 01:53 AM
يازعيم
أين أنت أيها المدهش؟أيها الواقف على حد الوجع لتوزع لتوزع الصدق محاولا تغيير ملامح زمن مبهور فيه الإنسان بالفراغ،،حقا طال الإنتظار مابين حروفك وشفافية إحساسك المنسال فى تمازج مترف يرسم صدق مقال:ماأروع الإبداع حين يخرج من بين الدموع..

رجاءً لاتطيل الغياب..

مهيرة
26-01-2006, 06:22 AM
كاظم

أرجو أن تواصل لنا الزمن الجميل
في لوحة التفاصيل

يالروعة السرد والخيال والواقع

نحن في انتظارك

كاظم
26-01-2006, 06:20 PM
سالي .. جميل الامنيات ...
والله يا سالي تعليقاتك تخلي الواحد يقرا موضوعو الف مرة قبل ما يودي الماوس على (اعتمد الموضوع) .. عارفة ... الناس البقرو بي مزاج رايق زيك كده بدخلو الواحد في حيص بيص يا اما تبقى قدر روقتهم دي يا اما احسن ليك تلقط من هنا وهنا وتجي تلصق وتكتب (منقول )
على العموم سعادتي بوجودك اكبر من حدود الخوف والقلق من ضعف ما اكتب
كوني بخير دائما وابقى قريبة

كاظم
26-01-2006, 06:24 PM
الاخت مهيرة تحياتي وجميل الاحترام ..
اولا الشكر اجمله لمداخلتك الرقيقة وتشجيعك ..
(التفاصيل ) سأبدأ في نشر بقيتها قريبا ان شاء الله
كوني بخير دائما وتقبلي عاطر ودي

صباح
03-04-2007, 08:20 PM
الاخ كاظم

صباح الخير اول شي ,, وشدني سردك الجميل جدا للقصه ,, وبقيت اتخيل روحي واقفه شماعه في

البص ده ومتابعه الاحداث معاك ,, بس وين الباقي والحصل شنو بعد داك مع عوض السمح....؟؟؟

ارجو المواصله..

سواااح
03-04-2007, 09:28 PM
الزعيم . . كاظم

دوما لك تميزك في الكتابة
سواء كانت نصوص شعرية
او كانت قصة قصيرة , ولكن
.. هنا .. انت تتركنا في البداية
وتترك معنا الشوق في انتظار بقية السرد
فمتي تمن علينا وتكمل بقية التفاصيل ؟؟

دمـــــــــــــــــــــــــت ،،

كاظم
03-04-2007, 11:53 PM
الاخت صباح ...
شكرا جميلا لهذا الحضور .. واجمل لمعايشة ما اكتب .. ولظرف ما ابتعدت عن هذه السوح غزيرة الجمال وها انا ذا اعود لمواصلة ما انقطع ..
كوني بخير وبالجوار

كاظم
03-04-2007, 11:54 PM
هاك يا سواح ...

كاظم
03-04-2007, 11:58 PM
********
كاتلني الغزال الفوق قليبي محكّر
قلل منام عيني قلبن مزاجي وعكّر
شايقني اللهيج الزي نقيع السكر
ياخلاي فتر قولولي كيف اتدبر
اممممممممممممممممممممممممممممم احح ....

شعرت ببعض الارتياح وبسهولة إنجاز مشروعي في استنطاق (ود الكبجل) وما أورثني هذا الارتياح أن (ودالكبجل) اليوم في مزاج لا بأس به فهاهو (يدوبي) بصوته الذي ان ذكرني بشئ فإنما يذكرني بفحيح ثعبان منه إلى صوت بشري ورغم اجتهاد ود الكبجل الواضح في محاولات تجويد صوته ورفعه ومحاولاته الأكثر جدية في توضيح حروف أبياته إلا أن ذلك لم يجد نفعا فيما يبدو فصوته خرج كالفحيح و لسانه به ثقل واضح جعل حرف (الراء) كأنما ينطقه ودالكبجل وفمه ملئ بالماء هذا الثقل في لسان ود الكبجل ليس إشكالا خلقيا ولكنه بفعل (العرقي) الذي يبدو انه انتقل من رأسه إلي بقية أجزاء جسده فوضح ذلك من خلال ثقل لسانه ورجلاه اللتان يبدو انهما تعبتا من حمل جسده الضئيل فاتكأ مجبورا على ما أظن في مكان صالح لكل شئ إلا الاتكاء.
- مضوي كيف حالك؟
بادرته بهذه التحية فرفع الي عينان نصف مفتوحتان وحمراوان بشكل مَرضي ورد:
(حبابك الف الافندي ود الافندي .. اممممممممممممممممممم احح .. ) هكذا رد علي ودالكبجل وهكذا يرد دائما فهو يسمعك كلمة أو كلمتين ثم يدخل هذا المقطع الذي يخص الدوبيت عقب كل جملة. ظننت للحظة أن الرجل سيواصل في (دوبيته) ولكنه صمت ونظر الي بهدوء أربكني ثم قال :
- عارف يا الافندي .. الدنيا دي عجيبة كلو كلو قدر ما تردح فيها في النهاية ما تتلايم ليك الا على شبر دحين هسة عاين خلق الله ديل تلقى العندو ليهو قرش قرشين منفوش ويقدل وهو ما جايب خبر وهو ركو على عضة بعوضة.
- صحيح .. أمنت على حديثه وان لم يفارقني ذلك الارتباك اللحظي الذي سربته اليّ عينا ودالكبجل .. ودالكبجل لا تستطيع أن تصفه إذا طلب منك ذلك فهو نحيل مثل معظم سكان هذا المكان ولونه يبدو انه زال بعامل الزمن أو محته الأيام فلا تستطيع ان تصفه بلون معين ربما كان يملك لونا مثله وباقي الخلق ولكنه تلاشى الآن على العموم إن كان هناك ما يميز ودالكبجل فهي مشيته التي اشتهر بها وهي اقرب إلى الخبيب منها إلى المشي ويمكنك ان تستدل عليه من وقع خطواته على الأرض فهو يضرب الأرض بشدة إثناء حثيثه المتعجل .. ودالكبجل جاوز الأربعين بقليل ولكن يمكنك تصنيفه في خانة كهول هذا المكان فالسعي اليومي ما بين هذا المكان و(الكمبو ) و(عرقي العيش) الذي تتفنن (كنتوشة ) في تركيبه قد أفقدت هذا الرجل ما يقارب العقدين من سني عمره .. ودالكبجل من مواليد هذا المكان فمنذ ان بدأت في تمييز الكائنات الحية بأسمائها وصفاتها وجدت هذا الرجل أمام عيني كنا صغارا وكان هو يفوقنا عمرا بالطبع وكان يرعى مواشي هذا المكان فلقب بودالكبجل (الراعي) وانمحي هذا اللقب الآن بعد ان ترك مهنته تلك والتي امتهنها على ما أظن لتوفير ما يعوله وأمه (السعدية) التي رحلت قبل سنوات خلت ولحقت ب(حامد ودالكبجل ) والد مضوي الذي سبقها ومضوي لم يزل صغيرا . مضوي ودالكبجل وحيد والديه فوالداه لم ينجبا غيره وتعبت حاجة (السعدية) أيما تعب في تربيته وكانت تعمل (عليها رحمة الله) في بيع الطواقي التي تشتغلها بنفسها وتبيعها لسكان المناطق المجاورة الذين كانوا يأتون للسوق المجاور يومان في الأسبوع (الأحد) و(والأربعاء) وكانت هذه المهنة تكفيها شر الحاجة وعنت السؤال لتربية صغيرها واستمرت على ذلك حتى هدها المرض وأقعدها وحامد لم يشتد عوده بعد ولكنه بادل والدته وفاءا بوفاء فاتجه إلى رعي المواشي حتى يكفل لها وله حياة وان لم تتجاوز خانة انها حياة ليس الا ولكنها بمقياس الراهن المعاش كانت افضل ما يكون .. على العموم رحلت السعدية واكتشف ود الكبجل طريقا إلى (عرقي كنتوشة) ولا زال يمتح من هذه الحياة وفق ما اكتشف.
- والله اازول قاصدك في غرض اكان عندك وكت يعني .
هكذا حاولت فتح مداخل للولوج إلى عالم ودالكبجل وانا في تمام اليقين انه الوقت المناسب لذلك . فاجاني ودالكبجل مرة أخرى ولكن هذه المرة بضحكة طويلة وساخرة صبرت انا حتى نهايتها ونهاية (بصقة) كبيرة عانى فيها ودالكبجل ايما معاناة كي لا تخرج في شكل استفراغ يؤدي بطبيعة الحال إلى خروج ما انفق ودالكبجل نهاره كله لادخاله في جوفه .. واعتدل بطريقة ازداد معها اعوجاج اتكاءته تلك ثم اجابني :
ودالكبجل اااالفندي زمنو في ايدو .. عندي هسة وبعدين وبعد البعدين .. لا عندي لوريا مستف ماشي الغرب لا حواشة فاتها السقي .. انوم وقت ما انعس واصحى وكت ما تفك من راسي ده ..
لا أدري أي احساس انتابني وانا استمع لكلماته تلك .. ااحسده على تسامحه مع كل تفاصيله هذي وعلى امتلاكه لناصية حياة يوجهها كيف شاء ام امتعض لكون هذا الرجل وصل حدا من اللامبالاة جعل منه كائنا له كتلة ويشغل حيزا من الفراغ لا أكثر ولا أقل .

يتبع

سوباوي
04-04-2007, 08:29 PM
الحميم .. كاظم ..

أيناك .. يا رجل .. ملئ الآن أنا بالفرح ما شاء للقلب أن يحتمل حين أراك يا كاظم

هنا تضع إحساسك بين أيادينا

لك ألف شوق وشوق .. يا صاحبي للدنيا مشاغلها ولك العذر .. لكن لا بد انك تباصر

لينا من زمنك ولو قدر طلتك السمحة دي .. وهنا يا كاظم أنا لا أعلق على التفاصيل

لأن الفرحة عمتني فقط عندما رأيتك حضور هنا فجئتك على سبيل التحية والمحبة

والود وكل شيء جميل تركه شخصك الراقي بالنفس .. يا صديقي رجاء لا تختفي ..

سأعود الآن لقراءة التفاصيل ثم نواصل ..

مؤكد مودتي وكن كما أنت جميل دوماً،،،

ياسرالشيخ
04-04-2007, 10:00 PM
ياسيد القلم الراكبو الجن قلمك .. وكلنا والله (عوض السمح ) من اين اتينا ...؟ والى اين سننتهى ؟؟؟
واجمل ما فى الامر النهاية الغير تقليدية و اسلوب السرد الذى يجبرك على المواصلة .. لتتفاجأ بنهاية غير متوقعة .. مبروك .. وصلت

كاظم
05-04-2007, 06:09 AM
عارف يا سوباوي قدر ما تبرطع في الدنيا دي طول وعرض وقدر ما تمد رجلينك للمسافة وتقول ليها : (اكلي لما تشبعي ).. وقدر ما تلاقي من وجوه وناس وكائنات حية بتجيك لحظة كده تقعد فيها بمزاج معفن جدا وتقول : كدي انحسب رصيدي من الناس.. تقوم تتوجع في حتة كده ما معروفة في الروح وتقول لنفسك : بالله ده كل رصيدي ؟ وشوية شوية تبدا تروق ومزاجك (المعفن) يبقي على احلى لما تقعد تتأمل في رصيدك الما راضي بيهو ده من الناس .. تلاقي انو الناس ديل كونهم دقو وتد في جووووووووة روحك وقعدو ده معناهو انو خشو ليك بالزقاق الفوقاني .. الزقاق الفوقاني ده عندك ما بخشوهو الا العرفو يغشو حراسو .. حراسو بتغشو بطريقة واحدة .. بالجمال .. الجمال ما ممكن تدعيهو .. يبقو هم ما مدعين جمال .. هم جميلين وجدا كمان ..
والله اسوباوي انت اكتر واحد غش حراس الزقاق الفوقاني ..
هنيئا لك بكل هذا الجمال ...
اين انت يا رجل .. مشتاقون والله

كاظم
05-04-2007, 06:14 AM
الحميم ياسر الشيخ ..
اصطدتك يا رجل .. ببساطة ... نصبت لك فخا من الحروف .. فمثلك لا سبيل لاصطياده الا عبر فخ من الحروف ..
معجب جدا بقلمك والله .. وسعادتي الان لا تضاهيها سعادة وانت تشرفني بهذا الحضور البهي ..
شكرا لهذا الاطراء الحميم .. ولنا لقاء في مساحات اخر ..
كن بعافية وبالجوار

salah
05-04-2007, 07:55 AM
كاظم ( الرجاع ) مافي علاقة بين ( تفاصيلك ) وتفاصيل البت الفاتت عكس اتجاهي لكنها متحكرة جوة ( تفاصيلك ) كنها تسكن جيرانا في الحي الانا ما سكنتو . يعني بأختصار رجعتني لي بلد تبعد ( الآن ) عقد من الزمن . الواحد بيفرح لما يلاقي ناس بترجعك ليك بعد ما طلعوك منك بالغربة والغصب الناس البمشو جمبك في خط متوازي من غير ما يلاقوك .

كن هكذا رجاiiiiiiiiiiiiiiiiii ع وابقي طيب

كاظم
06-04-2007, 03:18 AM
صديق الصمت الجميل .. صلاح ..
ليك اجمل مافي الناس .. وينك يا راجل .. ولا انا الويني ؟ غايتو مسألة الغياب دي خليها بيني وبينك او بينا والغياب .. مافرقت ..
تحياتي الناضرة ايضا للتي فاتت (عكس اتجاهك) يمكن يا حميم الزولة دي شافت الانت ما شفتو .. اقلاها بتكون شافتك تكابس في الحروف عشان ترجع .. مكابسة الرجوع دي ذاتها بتخوف الناس الواقفين ما فاتو وبتخليهم يمشو عكس اتجاهك ..
الرجوع ليك ........ ههههههههههههههههههههههه .. والله يا صلاح مفردتك تسر القلب .. تفتكر لو الواحد زيك كده بتوصيهو بشنو ؟
ابقي قريب يا حبيب وبنتلاقي

salah
06-04-2007, 10:27 AM
( [ ضاري علي الناس البهمك تكون في نظرهم جميل ] ) . لم اغب عن المنتدي اطلاعا ولكني غبت تعليقا ولكن عندما ينصب مثلك فخ التفاصيل يكون اصطياد الفرائس سهلا ميسورا ، ومن المخذي ان نغادر هكذا دون ان نقول جميل وجميل خالص ما كتبت وتكتب . وتحياتي لآخرين يعرفون اني احيهم جدا ولك وواصل ، نطلع . ]

salwa
06-04-2007, 08:18 PM
كاظم

مبدع ويكفى انها تقرأ منذ كتتابتها وحتى الان

اي انها ابداع باق ومن يقراها لن يتوقف عندها وكفى

بل سنبحث عن كل ما يكتب كاظم

دمت بود وربنا يكرمك وما تحرمنا

sandra
07-04-2007, 12:52 AM
الرائع المبدع كاظم..
لك التحية والإعجاب بقدر روعة قصتك وغرابة شخصياتها وتفاصيلها...

ننتظر منك المزيد..
ودمت ودام قلمك لهذا المنتدلى...

ســــــــــــــــــــــــــــاندرا..

مرتضى يوسف العركي
07-04-2007, 05:41 AM
الاخ /كاظم
التحية والاعجاب لهذه التحفة وياريت تواصل مباريك مباريك في هذا الابداع والطرق ب

الغموض والشخصياتوالفضول والوصف العميق sort of playing
كم نستمتع بذلك ارجو المواصلة .تسلم

ــــــــــــــــــــــــــــــــــــــ
كلمة طيبة كغيث أصاب ارضا طيبة فانبتت كلأ وعشبا كثيرا

كاظم
07-04-2007, 06:24 AM
ابوصلاح .. مساء الخير ..
طيب يا صلاح والناس الفي نظرك انت جميلين ما حتضاري عليهم ولا شنو ؟ .. وديل كمان الاكتر .. لكن دايما يا صلاح تلقاهم بعيدين ما عارف القصة شنو .. وتبقي الفاجعة اكبر لما تقرب متهم وتحبهم ويمشو يخلوك ..
تحياتي للعارفين انت قدر كيف بتحبهم وانا ذاتي حاحبهم معاك
كن بخير يا صلاح وما تنقطع

كاظم
07-04-2007, 06:29 AM
الاخت سلوى .. تقبلي اولا مزيد ودي .. وثانيا غزير امتناني لصبرك على متابعة التفاصيل ...
هذا الاطراء الجميل اكبر من مقدراتي الهشة .. وهذه الكلمات الطاعمة في وجهها الاخر الزام شديد القسوة بتجويد ما اكتب ..
شكرا لحضورك هنا .. وكوني بالجوار

سواااح
07-04-2007, 07:06 AM
كاظم ..

لكن جنس شحتفه هي ؟

يا زول ما تكمل باقي التفاصيل

ما تطول الغيبة ..

دمـــــــــــــــــــت ،،

كاظم
07-04-2007, 07:16 AM
الاخت العزيزة ساندرا ..
تحياتي دائما .. وعميق شكري لاطلالتك الجميلة هنا ..
وهذه دعوة ان تتابعي معي هذه التفاصيل
كوني بالجوار

كاظم
07-04-2007, 07:18 AM
الحلامابي .. تحياتي يا جميل ..
هذه الدقة في مطالعتك للتفاصيل تربكني .. ادعو الله مخلصا ان اكون بقامة هذا الترقب لانتظار ما تبقى من التفاصيل ..
كن بعافية وابقي قريب

كاظم
07-04-2007, 07:21 AM
صاحبي سواح .. كيفك يا زول ..
والله الشحتفة انا ذاتي كاتلاني عشان اتخلص من التفاصيل دي .. لكن برضو الواحد عايز يرحب بضيوفو فبين ده وداك شكلك حتشحتف شويتين تاني ..
على العموم ابقي قريب

salah
07-04-2007, 10:58 AM
هم ديل يا كاظم البهمك في نظرهم تكون جميل .
كان احتفاؤها بنفسها كأنثي يزهلني ، لم تبتعد عندما اقتربت ،؛؛؛؛؛؛؛ لا توغل هذا النصل اكثر من هكذا ،،،فيما بعد كنت استعيدها في رائحة ( زيت الشعر ) الذي كانت تستعمله ،،،


لا تلهنا عن التفاصيل يمكن نتلاقي في الحلة الانا ما سكنتها

كاظم
08-04-2007, 06:53 AM
انه صباح ماطر وبارد .. الفصول المطيرة في هذه البلاد تصيبني بغثيان سخيف .. غثيان اتمني معه استفراغ كل ما يمت الي هذه البلاد بصلة .. سأستفرغ اولا هذا الطقس .. ثم هذا الاسمنت الذي يحيط بي من كل جانب ويبعث في نفسي احساس السجين .. ساستفرغ هذه الوجوه الزجاجية وتلك الابتسامات الباهتة والتي بقليل من النركيز ستكتشف انها مدرجة في بنود قوانين هذه البلاد .. مهلا .. ساستفرغ ايضا هذه الشوارع النظيفة حد العبط فهي لا تحس والشوارع هناك في وطني تحس وتحييك وقتما مررت عليها وتقودك بيسر الى حيث ثلة من الرفاق ينتظرونك انت .. انت فقط .
ستسأل نفسك في مثل هذا الصباح الباهت من صباحات غربتك التي باغتتك بالانتشار بطول روحك وعرضها ترى لمن تشتاق هناك ؟ ستجاوب حتما .. اشتاق لوطني .. حسنا .. لمن ستشتاق في وطنك هذا ؟ ستجاوب .. لا انا اشتاق لوطني فحسب دونما تحديد لاشخاص بعينهم هناك .. حسنا .. هذه ارض وتلك ارض فما الذي يميز هذي عن الاخرى ؟ ستجاوب تلك لي فيها ذكريات وهذي لا .. حسنا اذن انت تشتاق الى ذكرياتك ؟ ستجيب .. لا انا اشتاق لوطني فانا احبه هو وليس ذكرياتي .. حسنا .. لماذا تركته اذن ؟ تركته لاننا نترك اوطاننا احيانا .. سيصعب عليك القول انه هو الذي تركك لانك تحبه وسيصعب عليك القول أنك ما تمنيت ان تتركه ابدا ورغم ذلك ها انت ذا بعيد كل البعد عنه ..

samah
08-04-2007, 09:17 PM
دمت كاظم بكل عافيه المطر وعوض السمح
لقد ابدعت في التفاصيل بل تفاصيل التفاصيل
وانا اشتاق الي وطني كن بالف خير ايها المبدع

كاظم
09-04-2007, 05:24 AM
كان احتفاؤها بنفسها كأنثي يزهلني ، لم تبتعد عندما اقتربت ،؛؛؛؛؛؛؛ لا توغل هذا النصل اكثر من هكذا ،،،فيما بعد كنت استعيدها في رائحة ( زيت الشعر ) الذي كانت تستعمله ،،،

والله يا صلاح حيرتني معاك .. يا ابوالشباب الكلام البتكتبو ده سمح لما يخليك تتكرفس جوة احساس كده ما تعرفو ..
زينت التفاصيل يا اخر رجل جميل
كن بعافية

كاظم
09-04-2007, 05:29 AM
الرايقة سماح .. تحياتي ابدا ..
وكعافية المطر وعنفوان الغيم كانت هذه الطلة المليحة والناعمة لك ..
شكرا على هذه الكلمات الطاعمة ..
وكوني دائما بالجوار

مرتضى يوسف العركي
09-04-2007, 09:11 PM
ايها الكاظم الراقي
واصل فقامتك تستدعينا انحناء ومتابعة انا مستمتع بصورة غير عادية .تحياتي
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــ
كلمة طيبة كغيث أصاب أرضا طيبة فأنبتت كلأ وعشبا كثيرا

كاظم
13-04-2007, 08:01 AM
الجميل الحلامابي ..
ولك في تواضعك الجم هذا مزيد الاحترام .. واتمنى ان اكون بقامة هذا التركيز الذي تتابع به هذه التفاصيل ..
كن بعافية والف الف خير

خالد أحمد الصول
17-04-2007, 01:27 AM
أخي كاظم
أعرف هذا الاحساس جدا .. ذلك الخدر اللذيذ ... أعرف أنه عندما يسري في جسمي .. أكون يغظانا منغمسا في تفاصيل شفيفه تسري في الروح مسري النسيم ... عبد القادر عمر جاب الرغيف يبيعو تحت الشجرة القداميه .. الناس كلهم بشتتو منوا و يمشو يشتروا من ججي .. أصلو زول وناس و كان قروشك ما تامات بقول ليك ما في مشكلة يا زول بجن .. برغم أن رغيفة باير إلا أنه ظل يواظب علي عرضه في الشجرة القداميه ... يتخير الواجهه و يحدق في وجه كل من يمر أمامه و يشتري من ججي ... في اليوم الثالث كان ينادي علي رغيفة .. الرغيف ده عاوز ليهو يا شوربة يا لبن حار ... و لم تشفع له توسلاته التي يطلقها في تعابير وجهه من إستجداء الناس .. هذا السائل و الذي يمشي بصعوبه كبيره مر بجانبي فتناقصت الريالات التي أحملها ...
أحبك أخي كاظم فقد أرجعتنا للكورة بعد الاعتزال و تيبس الركب

سواااح
17-04-2007, 07:23 AM
صاحبي سواح .. كيفك يا زول ..
والله الشحتفة انا ذاتي كاتلاني عشان اتخلص من التفاصيل دي .. لكن برضو الواحد عايز يرحب بضيوفو فبين ده وداك شكلك حتشحتف شويتين تاني ..
على العموم ابقي قريب



صديقي .. كاظم ..

امنياتي ان تكون في وافر الصحة
والشحتفة يا زول ما طولت خلااااااص
يعني ارحمنا شوية .. الا اذا كان الدنيا
بي عناك عندكم ثلوج لانها عندنا نااااااار
الرجاء لا تطيل الغياب
فنحن في انتظار بقية التفاصيل ...

دمـــــــــــــــــــت ،،

محمد الجزولى
17-04-2010, 10:52 AM
هكذا هو كاظم
قلم له لونيه لا يجيدها الا هو
يوغل فى التفاصيل حتى انك تخال الا سبيل للخروج
ولكنه ياخذك رويدا رويدا الى اقصى درجات الامتاع
لك الود اطنان عزيزى كاظم بقدر ما امتعت ابصارنا وعقولنا