المساعد الشخصي الرقمي

مشاهدة النسخة كاملة : الحلقة الثانية قبل الاخيرة حـــــــــــــب في ودقيحة



صالح ابوشوارب
16-01-2006, 07:06 AM
وذى ماقلت ليكم فى الحلقة الاولى انا وحسن كنا في سنة اولى وسطي ( خامسة اساس) مشينا ميدان بانت لاداء صلاة العيد
وبعد نهاية صلاة العيد والخطبة بدأنا نسلم ونعيد على اعمامنا وعلى الناس وعلى اصحابنا وكان منظر جميل
كان ميدان بانت جايط بالناس وهم لابسين الجلاليب البيض يتبادلون تهاني العيد والسلام . كان بعضهم واقف يسلم وبعضهم ماشي البيت بطريق مدرسة الدايات والبعض بطريق المدرسة الاهلية وآخرون بطريق سوق بانت والبيان
انا وصديقى حسن شلنا برش الصلاة وتوجهنا الى مربع 11 عن طريق مدرسة المؤتمر الوسطي وفريق الهوارة لان طريق سنكات جبرونا بين مدرسة الكورة والمدرسة الاهلية ( ب ) و ( أ ) كان مبنى حيطة والشارع غير موجود
ووصلنا بيوتنا
وقام ابوى بتحضير الخروف وقال لى جيب جردل موية خلى الخروف يشرب قبل ما نضبحو وبعد ما شرب الخروف الموية قام ابوى يضبح الخروف وانا كنت ماسك رجل الخروف الورانية وبعد ما انتهي ابوى من ضبح الخروف وسلخ الجلد قام قال لى قوم جيب الكباية الوراك ديك ( وكانت فيها موية وملح ) وقام كباها في الفشفاش . وبعدين قام نفخ الفشفاش و قطع لى قطعة من كبدة الخروف بيسموها التمرة وقال لى خد آكل دى وشيل الجلد وبيعو
شلت الجلد عشان ابيعه في السوق الكبير . وبجنب بابنا لقيت حسن واقف لى وشايل جلد خروفهم معاه
قمنا انا وحسن بسحب الجلود بالواطة من مربع 11 وحتى السوق الكبير وفي الطريق نادانا واحد وقال لينا تبيعوا الجلود يا اولاد ؟
قلنا ليه ايوه تدفع كم ؟
قال عشرين قرش للجلد !!
قلنا ليه : يفتح الله .
كملنا المشي حتى السوق وبعنا الجلد الواحد بخمسة وعشرين قرش . ورجعنا للبيوت كدارى ونحن فرحانين واتفقنا نتقابل بعد الفطور في شارع سنكات جبرونا عشان نمشى الطوطاحنية في كبرى ود قيحة
بعد الفطور غسلت الشدة ( شبط ابيض مصنوع من البلاستيك ) وجريت مارق على شارع سنكات جبرونا انتظر حسن صاحبي
واثناء انا واقف منتظر اشوف ليك بتين وصلوا طرف الشارع قصادى وقفوا جنب دكان المكوجي محمد واحدة كانت لابسة فستان معمول من قماش اسمو ( الخرطوم بالليل ) كانت آية من الجمال لونها جميل ذى الكاكاو وشعرها اسود وناعم ومسرحة ضفرتين والتانية كانت عادية ذى كل البنات لكن الاولى كانت ( ســـــم ) نتســموالله ما عارف الحصل لى شنو كان تفكيرى بس في حلاوة البت دى ولونها والفستان الجميل واصلا قبل كدة ما شفتها تمر بي هنا
وفجاءة وصل حسن صاحبى وقلت ليه بالله ياحسن شوف البت دى حلوة كيف المهم نحن نقيس ونفصل فى جمال البت والبت بهناك شفناها تتبسم وتعاين وتتكلم مع البت التانية لكن نظراتم نحونا ما وقفت
وبعد نصف ساعة وصل بص من بصات جبرونا متجه للسوق الكبير ووقف قدام البنات وقاموا يركبوا ويعاينوا لينا
وبسرعة قلت لحسن يلا نركب بسرعة وقطعنا الشارع وركبنا في آخر الكنبة والبتين ركبوا في اول الكنبة
واتحرك البص ونحن في قمة السعادة الحقيقة ما عارفين ماشين وين اصلا اتفقنا انا وحسن بعد الفطور نمشي كبرى ودقيحة للطوطاحنية والان نحن راكبين البص وما عارفين راحين وين وقبل ما نصل محطة الحجر سايق البص فتح الراديو وكان فنان بيغنى بيقول
الزهور صاحية وانت نايم
داعبت شعرك النســايم
وايقظت صوت الحمايـم
واثناء البص ما كان ماشي كنت ارفع راسي اشوف البت الكاكاوية اشعر بقلبي عايز يطير واقوم اتلخبط واعمل نفسي عايز اكلم حسن وكل مرة اسرق النظرات القى البت تعاين ما دايرا تنزل عينها المهم وسط اللخمة والكبكبة وصل الكمسارى لآخر البص عايز يحاسبنا فقمت بى سرعة اديتو خمسة قروش
وفجاءة سمعت البت الكاكاوية تقول للكمسارى
( حساب الاولاد ديل دفعتو ليك )
قام الكمسارى رجع لينا القروش
وطبعا نحن حلفنا و قلنا انا وحسن والله ما ممكن رجع ليها قروشها وشيل اربعة قروش لينا وليهم
قام الكمسارى يرجع ليها قروشها
وهنا وقفت وقالت للكمسارى بصوت عالي
(( والله لو ما رجعت ليهم قروشهم بوقع نفسي من البص))
!!!!!!!!!!!!!!!!!
في الوقت دا انا اتلخبط شديد ورجفت وعرقت وخفت البت ترمى نفسها من البص وهى خاصة راكبة جنب الباب
وهنا تدخلت واحدة من النساوين الراكبات البص وقالت للكمسارى ياولدى رجع للاولاد قروشهم وسالت البنات وهي حيرانه ( الاولاد ديل بقربو ليكم ) وهنا ردت الكاكاوية ديل اولاد جيرانا
اخدت نفسي وقلت الحمد لله المرا دى ما بتعرفنا والا كانت مصيبة
في الوقت دا البص وصل محطة البنك ( بنك باركليز دى سي أو ) ونزلت البتين وقلت لحسن يلا ننزل هنا
وبعد ما نزلنا قالت لينا الكاكاوية انتو ماشين وين ؟؟
قمت انا وحسن نعاين لى بعض وما عارفين نقول شنو !! وبى ذكاء قامت الكاكاوية قالت لينا
( انتظرونا هنا أمشي ناس اختى نجيب حاجات وبعدين نرجع سوا )
طبعا انا وحسن بمسكنة هزينا راسنا ( وشكلنا ذى توم آند جيري ) وقلنا سمح
البنات مشو بالطريق البودى سينما الخواجة ونحن واقفين فى المحطة نعاين ليهم وهم ماشين ويتلفتو حتى خشوا زقاق واختفوا
وهنا الفار لعب فى عبنا وقمنا نقول يمكن البنات ديل يكلموا لينا اهلهم ويقولوا نحن ساكينهم
فقلت لحسن يا خوى ما نجى نفرتك بلاش ناخد لينا علقة في العيد !!
حسن قال لى احسن نمشي نلعب وسط الناس ديلك بريمو وكان محل البريمو شرق البنك جنب القهوة وجنب دكان كمال جنى
ومشينا خشينا الزحمة نلعب
ولقينا واحد من اولاد الفلاتة بيقول يلا ياجماآآ العبوا لعبة الخواجة الخشى بحمار ومرق بحصان .. القرش بخمسة قروش يلا على البريمو ( وهي لعبة عبارة عن طاولة مرسوم في طرفها مستطيل مقسم الى ستة مربعات صغيرة بالبوهية ومكتوب عليها من رقم واحد حتى ستة يقوم كل لاعب بوضع قرش على المربع الذى يختاره وعندما تمتلئ المربعات بالستة قروش يقوم ود الفلاتة بتدوير قطعة من الخشب سداسية الشكل ولها راس محدودب مكتوب على كل ضلع رقم من واحد حتى ستة وتدور وتدور وتدور القطعة السداسية حتى تقع على الرقم الفائز والذى سوف ياخذ الخمسة قروش ) ولم يحالفنا الحظ وخسر كل واحد فينا عشرة قروش وخرجنا من اللعبة
قمت انا وحسن نعاين من بعيد شارع السينما وما لقينا البنات وصلوا وقلت لحسن ارح نجرب لعبة ( الملوص )[COLOR=Blue] (وهى لعبة تتكون من شريط الفانوس ومسواك يقوم صاحب اللعبة بثنى الشريط على اثنين على شكل حرف U ولفه على بعض حتى يتكون شكل قرص ويعطيك صاحب اللعبة المسواك لكي تدخله فى احد مسارات الشريط او وسطه وتعطيه قرش وسوف يسحب طرفى الشريط وانت ممسك بالمسواك فاذا كان المسواك بعد السحب داخل الشريط فانت سوف تكسب خمسة قروش واذا كان المسواك خارج الشريط فانت خسران )
ولعبنا حتى خسرنا كل قروشنا فى الملوص وبخجل قلنا لصاحب اللعبة بالله ادينا ( آخر ايدنا ) وطبعا اشفق وحنا علينا الراجل وادى كل واحد فينا قرش
قمنا قطعنا الشارع ومشينا ناحية البنك وغشينا معانا استديو عمر محجوب وكان في نيتنا نتصور صورة العيد ولكن مع الفلس اتفرجنا في الصور الملصقة في البترينة


والي الحلقة الاخيرة انشاء الله

خالد هاشم علي
16-01-2006, 07:58 AM
الغالي صالح..
تحياتي يابتاع الكاكاو انت... لكن عليك الله بنك باركليز ده وين كان ؟؟؟
ملحوظة : بخصوص لعبة الملوص فانا ماقدرت اقرا فيها اي حاجة لانك اخترت ليك لون قاطعة من راسك.. عليك الله اكتبها تاني بي لون مختلف عشان نعرف لعبة الملوص دي ذاتها شنو..
لك التحية ( وماتعمل لي مس كول)هههههههههههههههههه
في انتظار الحلقات الاخري..

ahmed ibrahim
16-01-2006, 02:02 PM
سلام الى جميع الاخوان ...تعرف ياصالح رغم انو الواحد متغرب(بسبب الجبر) بضم الباء والجو متلج والواطه بيضاء من التلج...لكن الواحد لما قرأ القصه عرق و رجع بالجد لمربع 11 وودازرق والشارع النازل من دار الرياضه ماشى على سنكات جبرونا بين جامع ابوزيد وبيت ناس عادل البطل والدافورى والعيد وشيخ يوسف لما يجى لصلاه المغرب ونحن لسه فى قون المغربيه احسن من ميه والهدوم مكومه فى شكل قوائم المرمى والمرسال واقف ليك عشان تجى راجع البيت لم اتمالك نفسى فتجرست جرسه شديده والحمد لله الخواجات ما سمعونى والا كان نادو لى البوليس وخصوصا عندى جارتى مره عجوزه مهمتها كلها انها تشوف الداخل والمارق ومهتمه بى ما عارف لشنو كان فى زول ساكت جانى وانا مافى قبل ما اسلم عليها تقول لى الليله جاك واحد ودق الجرس وشكله كدا كدا وهو ليه ما اتصل بيك عشان مايعرف اذا كنت فى ولا مافى وتلقاها فرصه وتحاول تسال وتتونس واخوك بيكون جاى من الشغل ما شايف....كتر خيرك ياصالح ونهايه الاسبوع دا والله العظيم الشافنى فى مدنى ما كضب بعد 7 سنه ...شفت الفلم بتاعك عمل فينا شنو ودا حالتو ما تمزز

ahmed ibrahim
16-01-2006, 02:04 PM
(ما تمزز) اسف ما تم....

admin
16-01-2006, 09:42 PM
عجيب يا ابوشوارب .. من خامسة ابتدائي ما بسالك .. انتا مفروض تدخل موسوعة جينس للارقام القياسية .. لكن يا ابوشوراب البت دي عرفتا لونها كاكوية كيف والزمن داك اصلا لم يتم اكتشاف الكاكاو بعد هههههههه..
قلتا لي يا خالد هاشم ما بتعرف بنك باركليز .. جد لي داير تغش منو انتا .. انتا تلقاك الوقت داك كنتا شغال في البنك دا ذاتو.. وبعدين كان كنتا ماشي مع ابوشوارب دا الزمن داك شكلك البت دي ذاتا ما كان شفتها .. عارف لي .. لانو البت لونها كاكاوي والكتابة الماقدرتا تقراها دي مكتوبة بالكاكاوي ههههههههههه

عماد الصادق
17-01-2006, 02:33 AM
العزيز أبوشوارب ..
الله الله عليك وعلى ذكرياتك اللي رجعتنا للوراء ثلاثين سنة!!!!!
وصراحة الواحد بقى عايش على الذكريات وأيام زمان السكر...
ولنا عودة ..
وفي انتظار الحلقة الجاية..

صالح ابوشوارب
17-01-2006, 08:02 AM
الاخ الغالى ابو هاشم
تحياتي لك وللدكتــورة

بعد تعب شديد خرجت الحلقة الثانية والله يا ابوهاشم العين زغللت من الكتابة والمسح ... اما بخصوص اختيارى اســـم الكاكاو حتى لا اجرح من تحمل الاسم الحقيقى ...اما بنك باركليز وين ؟ ذى ما قال ليك الآدمن تعال ارضع ... اما انا ما من ناس مس كول فالرصيد كافي والحمد لله ولذلك فى الليل حاضرب ليك !
شكرا عيوني[COLOR=Red]

صالح ابوشوارب
17-01-2006, 08:04 AM
الاخ العزيز احمد ابراهيم
ياسلام عليك .. والله وانا اقرأ تعقيبك رجعت بى لى ودازرق .. وانا ماشي الى صديقى عصام جكسا ودخلنا الصالون ونتفرج في صور الامير نقدالله .. وذكرتنى جامع ابوزيد والمؤذن عبدالنبي مشجع نادى النيل .... لكن وصية في الزمة يا ابو حميد العجوزة جارتك دى تنفع مع واحد اخونا وهو خالد هاشم عشان انت ترتاح وهى ذاتا ترتاح وتلقى ليها صدر حنين ..فارجوك ادخل واسطة وشكرا ... ماتنسي تدفع قولة خير

صالح ابوشوارب
17-01-2006, 08:07 AM
العزيز الغالى بكرى
كنت سعيد وانا ارى توقيعك في هذه القصة من قصص الذكريات والتى كل ماسمح الوقت سوف احاول كتابتها . منها فكي من 114 يدرس معانا في الصباح / لواء شرطة يجلد( الياء بالضمة ) في طابورالمدرسة الاهلية ب
/ لقيط القطن في التجارب / الاغتراب في قرية ود الشافعي / القراحة في عيادة القبة / الاضراب والاعتصام امام مكتب مفتش التعليم في المرحلة الوسطي /
اما بخصوص الكاكاو يابكرى هل تعرف اذا مشيت السوق الصغير وجلست فى القهوة اولا تصفق ويجيك الجرسون وتقول ليه عندك شنو تعرف حيقول ليك شنو
عندنا
شاى سادة // شاى باللبن // فرنساوى ( قهوة بالحليب ) //كاكاو سادة // كاكاو باللبن // جنزبيل سادة // جنزبيل باللبن // حلبة سادة // حلبة باللبن // جبنة ( قهوة ) // ليمون بارد // حليب بارد
فالكاكاو كان موجود وياريت لو مشيت دكان ابو شمس
المهم شكرا للطلة وانتظر الحلقة الاخيرة

صالح ابوشوارب
17-01-2006, 08:09 AM
شكرا عزيزنا عماد
دائما انت مشرفنا .. وطبعا ياعماد الذكريات صادقة وجميلة لكن بالله اكتب لينا ذكرياتك وانت ماشى من مدني لسنار بالقطار ..ورينا الفرحة وانت مارق راسك من الشباك والقطر بيهدن وتسمع بائع الشاى والبيض المسلوق
تحياتي عمدة

عزيز عيسى
17-01-2006, 09:40 AM
لكن يا صالح ما جبت لي أبو الشهيق من كثرة الضحك وأنا أقرأ في مذكراتك..
ذكرتنا بميدان بانت والمشي الكداري لغاية السوق الكبير..
غايتو أنا زمان كنت بصحى الفجر علشان أحجز جلد خروف العيد.. لكن كنت ببيعو بـ 75 قرشا صاغ..
(3 طرادات حمر)..
والقروش كلها كنا بنكملها في دخول السينما الخواجة والسينما الوطنية والطوطحانيات .. وللحناكيش (المرجاحات)..
والبريمو والكرتلة كنا بنلعبها بالدس.. لأنو أخوانا الكبار لو شافونا بيجلدونا ويقلعوا قروشنا..
هنالك احتمالين في كونكم تبيعوا الجلد بـ 25 قرش.. يا أنت وصحبك حسن اتغشيتوا وطلعتوا خسرانين..
أو احتمال الفترة الزمنية كانت بتختلف..
بريمو..وملوص.. (قمرتيه رقم 1).. طيب يا صالح ما لعبتوا (الكرتلة)..
تتذكر بتاعين البريمو تلقاهم دائما بنادوا الزبائن.. العيد سعيد.. والبخت جديد.. يلا علينا جاي..

لي عودة مرة أخرى في الحلقة الاخيرة.. ونشوف البنات ديل حيسوا فيكم شنوا؟
أنا غايتو متوقع انكم أخذتوا خاذوق وأدوكم علقة ساخنة.

وبالله ما تتأخر علينا كثير علشان متابعين من زمن..

أسعدتنا.. الله يسعد أيامك.. ويمتعك بالصحة والعافية..

صالح ابوشوارب
18-01-2006, 08:33 AM
الاخ العزيز ابو عيسى

والله مشتاقين وكل سنة وانت طيب
وبعدين يافردة خروفكم دا جامبو ولا شنو الجلدو ب 75 قرش ولا عايز تصغر في نفسك ههههههه يا بتاع الكرتلة ابو ميه
والله يا عزيز الكرتلة دى خسرتا فيها خسارة مرة في راديو ومرة كان في ديك ههههههههه
حبيبنا عزو والله انا بكون سعيد بمداخلتك لانك دفعة وبتفهمني وشكرا

ahmed ibrahim
19-01-2006, 03:37 AM
الاخ صالح السلام عليكم...والله العظيم انا جاهز ...بس بعد ما انا اعرس نجى نشوف موضوع قوله خير دى شنو..لكن خايفين من الكمندان على هاشم ...وانا ماشى على مدنى ان شاء الله

عزيز عيسى
19-01-2006, 05:24 AM
والله يا عزيز الكرتلة دى خسرتا فيها خسارة مرة في راديو ومرة كان في ديك ههههههههه


شرقتني من الضحك المره دي.

والشوق ليك اكثر..

يا صالح أنا شايف الشباب خالد هاشم وأبوبكر بيسألوا عن موقع بنك باركليز..
حسب ما أتذكر.. موقع بنك باركليز كان في الكورنر اليسار في نفس الصف بتاع استديو عمر محجوب.. في السوق الكبير..
وفي بداية الشارع المتجه الى بانت.. وبعد تأمين البنوك في زمن النميري تم تغيير اسمه الى بنك الخرطوم..
ولو انت واقف أمام بنك باركليز (بنك الخرطوم) ممكن تشاهد فندق الخواض من الناحية اليمين.
يا جماعة أنا طولت من البلد شوية والملامح والمعالم القديمة اللي كنا بنعرفها تغيرت كثير كما لاحظت في آخر مره زرت فيها مدني..
أنا عايزك انت يا صالح والدفعة عماد الصادق واخوانا ودالمأذون وبابكر وأبوالمهتدي تؤكدوا كلامي حول موقع بنك باركليز دا صاح ولا أنا بهضرب؟
وبعدين ما تشرح لي خالد هاشم لعبة ملوص.. وطره وكتابه.. وخم الولد.. لأنه عندو نية يلعبها..هههههه

ودي.

الزبير محمد عبدالفضيل
21-01-2006, 03:44 AM
والله ياصالح فعلا ادخلت الشوق والحنيين في انفسنا بهذه الذكريات الحلوه وخاصه ذكريات العيد يعني رسمت خرطه حلوه وجميله تحمل كل معاني الماضي وايام الصبا

ياسر فقيري
21-01-2006, 09:29 AM
أستاذي الرائع أبو شوارب لك التجلة .. وفي حضرة جلالك يطيب الجلوس

صالح ابوشوارب
21-01-2006, 10:14 AM
الاخ
احمد ابراهيم
ربنا يوصلك بالسلامة
وشكرا حبيبا للتواصل

صالح ابوشوارب
21-01-2006, 10:19 AM
العزيز عزيز

والله كنت سعيد بالمحادثة
وبخصوص البنك انت صاح
اما رقم الموبايل هو
00966505686060

صالح ابوشوارب
21-01-2006, 10:22 AM
شكرا سفيرنا الغالي
وانت دائما ما بتفوتك
اى حاجة عن مدني
فالف شكرا

أبوبكرحامد
21-01-2006, 11:21 PM
ياسلام ياشواربو يارهيب ياخى انت اعدت لينا ذكريات غاية فى الروعة ربنا اسعدك ونورينا الكثير المثير الخطر ولى عودة.

عماد الصادق
22-01-2006, 02:18 AM
أبوشوارب.. ذكرياتك الشائقة جابت لينا أستاذنا أبوبكر.. ليهو شوق...عساه بخير..
بخصوص موقع بنك باركليز كلامك صاح وأظن أن فندق الخواض ما زال لكن استديو عمر محجوب تحول من هناك.. وبعدين أستاذنا ودالماذون ما أظن يتذكر بنك باركليز.. صاح يا استاذ .. قبل يومين كنت بتونس مع خالد هاشم .. والراجل طلع دفعة وقال لبس الكاكي في مرحلة المتوسط لكن شايفو مااتذكر ستوديو عمرمحجوب وخلاني أشك في لبسه للكاكي..
طبعا ذكريات القطر .. والمحطات الكبيرة بركات والحاج عبدالله والسندات (المحطات الصغيرة)
زي ود النو والعقدة .. وحلاوة قصب .. ومحطة مدني والسنترال والسيجاير النيوبورت..
ومدني والحلواني الكبير .. وكان فيهو كنافة وزبادي رهيبات والعجب البقاشة والسرندبل !!
كتيرين ما حيعرفو السرندبل دي؟؟
وصحي ياعزيز خروفكم ده مستورد .. ما كان في جلد بالمبلغ الخرافي ده .. 3 طرادات .. كتيرة..
تخيل كيف يكون شعورك وأنت تملك جرادة في العيد..!!

أبوبكرحامد
22-01-2006, 11:50 PM
مشكور عمدتنا ود الصادق وانا ابادلكم شوقاً بشوق وحباً بحب , وهاقد عدنا بعد زوال العوارض التى حالت دون التواصل عبر الموقع ، وبالأمس فتحت الموقع ولاأذيع سراً إن ادعيت أن مشاركة الأخ أبوشوارب كانت قوة دفع للمشاركة والتداخل لما يمتاز به أبو شوارب من حسن البيان والصدق وتلكم العاطفة الجياشة التى تميز كتاباته ومنه نتعلم قيم الوفاء والإخلاص .
نرجع لى عماد الصادق ياخى بلاش من حكاية أستاذنا لأنونحن فى الحسبة وليداتكم ، بعدين هنالك الأشرار الذين يفسرونها على اعتبار أنك كنت أحد تلامذتى فى مرحلة دراسية ما , بعدين ياعمدة السرندبل دى انا بتذكرا رهاب رهاب بس البقاشة دى ماسمعت عنها قبل كده صراحة أما السجاير النيوبورت والله أنا ماشفتو إلا فى أمريكا وهو السجاير المفضل للأمريكان السود " راجع عزيز عيسى عن المعلومة " ، أما بنك باركليز أعتقد هو بنك الخرطوم فى محطة الابوشى وقدام منهم شوية فندق الخواض ومدرسة بولاد لتعليم قيادة السيارات " شفتو كيفن مدنى كانت متطورة "

أبوبكرحامد
22-01-2006, 11:55 PM
تصويب:
ورد بالمداخلة ذكر لمحطة البوشى وكتبت الأبوشى , وهومما لايخفى على فطنة القارىء , فقط خشينا اتهامنا بالحنكشة.

sambaaa
23-01-2006, 06:18 AM
والله ياصالح فعلا ادخلت الشوق والحنيين في انفسنا بهذه الذكريات الحلوه وخاصه ذكريات العيد يعني رسمت خرطه حلوه وجميله تحمل كل معاني الماضي وايام الصبا

صالح ابوشوارب
24-01-2006, 12:01 AM
الاخ العزيز ود الماذون

والله فقدناك والبلد من غيرك خلا يا بكور وحمدا لله على سلامة الظهور .. وشكرا للمداخلة الجميلة التى اسعدتنى وهى دافع قوى للاستمرار . .اما جدنا العمدة فعلا جاب ليه حاجات من وين ماعارف ( السجاير النيوبورت ) يمكن يقصد السجاير البحارى اما سيارات بولاد لتعليم السيارات فكانت موريس فشكرا للتواصل وربنا يفرجها عليك وعلينا

صالح ابوشوارب
24-01-2006, 12:04 AM
الاخ عماد الصادق

شكرا يا حبيبنا وانت تقدم لنا الدعم ( وتنكت ) معانا الذكريات لكن قصة السجاير النيوبورت دى عايزة مراجعة ذى الكاكي بتاع ابو هاشم فشكرا ياعمدة [COLOR=Blue]

صالح ابوشوارب
24-01-2006, 12:06 AM
الاخ سامبا

شكرا للمداخلة وانشاء الله ربنا يقدرنا نتذكر ونسعد الناس

waheeb
24-01-2006, 11:17 AM
الاخ العزيز صالح ابو شوارب..
الاخوه الكرام..
اولا كل سنه وانتم طيبين وربنا يحقق امانيكم واديكم الفي بالكم ان شاء الله..
اطلنا غيابنا عنكم ولكم كنتم في البال في كل الايام الماضيه .. الحمد لله عدنا بعد اجازه ممتعه قضيناها وسط الاهل والاحباب..
اخي صالح والله ابدعت اتاريك ما هين والله كلام,, حب من سنه خامسه وكمان ومن اول نظره.. لكن الكاكاو ما عندك..والله انا ما قايلك من زمن الخرطوم بالليل ..والبنك القلتو دا انا اول مره اسمع بيه منك ...
شكرا ليك علي السرد الجميل .. لكن ما وريتنا البنات رجعن معاكم ولا رجعتوا عوضكم عجاجه هههههههههههههه.

عماد الصادق
24-01-2006, 10:05 PM
أبو شوارب
بحاري شنو!!.. ياخي الناس العجايز ديل مافي واحد يحلني!! ويتذكر النيوبورت
وزي ما قال ودالمأذون هو فعلا أمريكي .. ونكهته نعناع زي المور
والنيوبورت ده ما كان تلقاهو إلا في بقالة السنترال وبس..
لكن المور كان ممكنت تلقاهو في بقالة أبوشمس
الوقت داك غايتو كان علبة البنسون والروثمان (10 حبة) بــ 15 قرش
والشامبيون بــ 12 قرش .. أما أبوقندول الحبة بتعريفة..

عزيز عيسى
25-01-2006, 08:49 AM
الاخ العزيز ابو عيسى

والله مشتاقين وكل سنة وانت طيب
وبعدين يافردة خروفكم دا جامبو ولا شنو الجلدو ب 75 قرش ولا عايز تصغر في نفسك ههههههه يا بتاع الكرتلة ابو ميه
والله يا عزيز الكرتلة دى خسرتا فيها خسارة مرة في راديو ومرة كان في ديك ههههههههه
حبيبنا عزو والله انا بكون سعيد بمداخلتك لانك دفعة وبتفهمني وشكرا

الغالي صالح،

انت عارف زمان ما كان في جامبو ولايحزنون.. لكن سعر جلد الخروف بي 25 قرش دي ما حضرتها..
أما موضوع الكرتلة.. مره لاقانا واحد ماسك ليه (عتوت) منزلو في الكرتلة وحايم بيهو في الفريق..
الظاهر عليه كان مفلس وراح لطش العتوت من فريق تاني..
وعلشان ما يعرفو سيد (العتوت) وتثبت عليه السرقة قام مشي بعيد ونزلو في الكرتلة..
وبعد دا كلو قبضوا.. بس ما عارف الناس اللي حجزت بالاسم في الكرتلة رجعوا ليهم قروشهم كيف؟
غايتو عليهم العوض..

ولك ودي،

عزيز

عزيز عيسى
25-01-2006, 09:04 AM
طبعا ذكريات القطر .. والمحطات الكبيرة بركات والحاج عبدالله والسندات (المحطات الصغيرة)
زي ود النو والعقدة .. وحلاوة قصب .. ومحطة مدني والسنترال والسيجاير النيوبورت..
ومدني والحلواني الكبير .. وكان فيهو كنافة وزبادي رهيبات والعجب البقاشة والسرندبل !!
كتيرين ما حيعرفو السرندبل دي؟؟
وصحي ياعزيز خروفكم ده مستورد .. ما كان في جلد بالمبلغ الخرافي ده .. 3 طرادات .. كتيرة..
تخيل كيف يكون شعورك وأنت تملك جرادة في العيد..!!


عمدتنا الغالي،

واحد في الاثنين .. اما انت كنت واقف في محطة السكة حديد وفجأة شاهدت ليك واحد خواجة كان راكب القطر وبدخن في سجائر نيوبورت..
أو كنت راكب القطر وبالك في سنار وشفت ليك واحد بيدخن في أبونخلة لكن السندة بتاعة ود الحداد خلتك تشوف السجارة نيوبورت..
أنا ما بدخن لكن ما بتذكر كان في سجاير اسمو نيوبورت.. بعرف البرنجي والبحاري والروثمان والبنسون..
وأبو نخلة دا ياتو فيهم.. والصندوق كان فيهو 10 سجارات ولا كلامي دا ما صاح؟..
وكنت بسمع من كثير من المدخنين بيقولوا السجائر المحلي أحسن بكثير من المستورد..


الوقت داك غايتو كان علبة البنسون والروثمان (10 حبة) بــ 15 قرش
والشامبيون بــ 12 قرش .. أما أبوقندول الحبة بتعريفة..
أول مره أسمع حبة سجارة بي تعريفة.. دا كلام ناس خبرة في التدخين ..

وخروفنا فعلا كان مستورد.. من كبرى مزارع الجزيرة الخضراء.. يعني ماكل برسيم تمام..
لكن زمن الجلد بي طرادة دي ما حضرتها..

ولك كل الود،

عزيز

أبوبكرحامد
25-01-2006, 08:40 PM
أنا ما بدخن لكن ما بتذكر كان في سجاير اسمو نيوبورت.. بعرف البرنجي والبحاري والروثمان والبنسون..
.................................................. ...................

والله ياعزيز طلعت كيشة فعلاً ياخى معقولة ترتيب السجاير اكون البرنجى فى الأول والبينسون فى الآخر ، ياخى زمان العندو علبة برنجى بيكون خجلان إطلعا قدام الناس لأنو كان مشهور بى " سجاير المشاطات " ، أما البينسون فكان ولازال سيد الموقف وهو نوعين : واحد مكتوب عليهو صنع خصيصاً للسودان ، أما المستورد فكان اسمو أبوصلعة وهو غير مرغوب إلا فى حالة الإضطرار .

ahmed ibrahim
07-04-2006, 11:06 AM
الاخ صالح
السلام عليكم ليك ولى كل الاخوه الافاضل بالمنتدى اولا احب اقول ليك انو انت جنيت على جنايه كبيره تعرف ياصالح لميت هدومى وطوالى على المطار والله التذكره قطعتها من الكاونتر بتاع الخطوط فى المطار وطوالى على مدنىوبعد 12 ساعه مباشره كنت فى البيت اها اصبحنا الصباح وبعد الخروف والشيات بدت الاقتراحات من نوع ان شاء الله جاى تعرس .....والله نحن ما عندنا صبى قعد لمتل عمرك دا...وانت شكلك كدى عرست ليك نصرانيه...وانت ما دايرنى اشوف جناك...واخوك الاصغر منك هدا وليداتو قدامو..المهم يازول فى النهايه عملوا لى اجتماع شبه مغلق والعمم ما تديك الدرب والله مامر اسبوع الا واخوك متجول فى شارع النيل مع التوب الاحمر وابتسامات ناس التاكسى اللى انت عارفه ديك ومبروك ياعريس... وان شاء الله سايق العروس معاك...المهم يازول انا هسع جيت الغربه تانى لكن حالى بيعرفوا كل من دخل الفلم دا...كتر خيرك على المعروف دا يعنى بقت لى رجعه وعرسه وربنا يستر