قصيده اتواعدنا..بتوقيع المبدع لواء

[saly]

إتواعدنا
إتناقشنا فى طبع البذره !!!
لما بتطلع من تحت العدم ،،،
الراكز عصبو على بداياتا ...
وكانت ( عبره )
إتفاكرنا ..... ومااااا احلاها بنات افكارِك
لما بترسل ليّا إشاره !!
وتكون افكارِك هى " المُحتاره " !!
كنت بلِمِّكْ ،،،، كنت ( بلقط ) ليك افكارى ،،
يا مُختاره ....,,,,.....
يا مُختاره فى شكل قصيدى ،،
ويا وضاحه وما لى غامضه !!!!
ما كنت بشُقْ لغيب اشجارِك !!
وكنت عشانك ،،،، بمشى ( الشجره )
وكنت بجيب افكارا ،،،
ما ( الشجره ) الكانت بذره وطلعت ..
من ( رحم ) الارض مجهول الغيب الما بنشاف
كِبرَتْ وبقت تتغنج هسه الليله
للقيمه التامه الباقيه ( مُضاف ) ،،،
إتناقشنا فى شكل ( المويه ) ،،،
وعِشق المويه البذره !!
لما تدفق فيها لروحا !!
وتبقى بتدى البذره ( بُشاره )
لما بتحرق ( عصب ) تكوينا !!
وتتأكسد زائد الـ ( o ) والـ ( H ) !!
والمُزدوج الاعظم فينا،،،
وتبقى البذره بِفعلِ تراكُم ...
وتبقى المويه ( تهجن ) فيها جنينا ،،،
وإتواعدنا !!!!
إتواعدنا نسوى ( شكوكنا ) !!
ونجرد كل ( ديون ) الفعلِ ،،،
والمفعول الثابت بينا ،،،
نحصد كل بنود العقل ....
وحاصل ضرب الشوق لـ ( مدينه ) ،،
يا الإتمدنتى ،،،،
إتمدن طبعك ،،، و ( غربل ) وجعِك !!!
إتمدن شوقك كان بلقاهو ،،
مره يتاوق ( للتفعيله ) ،،
ومره يساسق حائر فينا ،،،
اقوام ( الحضرْ ) الضربوا خيامهم !!
بطن ( الغابه ) العاصر يقينا ،،،
وإستقبلتِك ،،، يا الجيتينى !!!
شايله ابعادك ضُلّ السهله !!
وفاتحه كتابِك وشايله ( رتينه ) ،،
يا الضويتى احلام التربه بمويتِك ..
يا الغنيى بزينتِك ........ وزينا
ويا ( العدلتى ) اوراقى التائهه ،،
ويا الاديتى قليبى سكينه ،،،،
كيف احوالِك ـــــ وكيف اولادِك ،،
وكيف ( العازه ) الحلوه ،،،
وباقيه وزينه ،،،،
انا حَضرَتِكْ ....!!!!
اوكسيدِك ريدِك ...
وبختزل المعنى فى ضُلّ قصيدك ،،
وإتبخرتى على تكوينِك ،،،
وإتكونتى بِفعلِكْ وحدِك !!!
يا الجزأتى حدودنا البينا ،،،
يا الكلمتى ( المطره ) بصوتِك ...ز
ويا البثيتى ( إذاعة ) ريدِك ...
بين ( الهجر ) العرضو لحالهم ،،
وبين ( المُدُن ) النائمه وساكته ،،
وبين الجابو اكيده ( مُبينه ) !!،،
وإتبيـنتِك !!!
بحدود منقلتِكْ ،،،
رسم بيانك ( برجل ) فرحى ...
الليله بكونوا عليكى ..... علينا ،،
إتوحدتِك !!!
لونِك ريدِكْ بين العرضوا ورقصوا ،،،
وجابوا ( الغيمه ) على تلوينا ،،،
وإتبينتِك !!!
وإتناقشنا !!!
جبنا ( المُطلق ) شكل ( قرينه ) ،،
إترغـــبتِك !!!
فجرك يصحا ،،،،،
الا موانع ريدِك فصلت ...
كل إحساسى بشكل الغيرِك ،،،
وكل افكارِك كنت بدينا ،،،
إدينــتِك من الخلقِك إنتى ،،،
واحسنت لقرضِك ... ما رابيــتِك ،،،
سددته ( ديونِكْ ) من احزانى ،،،
يا الراجيانى بريدا و ( دينا ) ...
وإتشهدتِك .... لا .. لا غيرِك ،،،
وكان وحدتِك فى ( إثباتِكْ ) !!
ونفيت ( غيرتِكْ ) فى تكوينا ،،،
ويا العاصرتِكْ ،،،،
اعصرى جراحِكْ ،،،
وامسحى الدمعه القطرت ( بينه ) ،،،
ما إتواعدنا نسوى ( شكوكنا ) !!!
ونجرد كل ( ديون ) الفعلِ ،،،
والمفول الثبت بينا ،،،،
وإتواعدنا !!!!!!
اوووووعِك تنسى ،،،....،،،...،،،...،،،

[حسام]

التحية ليك يا سالي
وكل عام انتي بالف خير في كل المناسبات الجميلة المضت
كلمات مثيرة تحمل كل المعاني السامية ومضمون جميل ورائع
ولي قدام

[مزوني]

طالما نثر الحبر على الورق

طالما وجدت من يسطرها على أحلى من طبق

طالما أزاحت عن صاحبها الهم والأرق

سوف أكون ممتننا لك من الغسق الى الغسق

وحاجه روعه منك يا سالي

وربنا ما يحرمنا من ابداعاتك يا غاليه

[114]

سالي
التحايا لك وانت تتحفينا بتحف اللواء الرائعة
بس ده يوغوشنا شويه، ليه اللواء ما سجل دخول براهو وطل علينا بطلعتو البهية؟ عشان نقول ليهو رسل لينا القصيدة دي باسمك الصريح لمحراب الآداب والفنون في واجهة موقع ود مدني عشان الصفحة دي بتتنشر منها معظم القصائد للمواقع التانية، وكمان بيفتحوها ناس تلفزيون السودان.
من هنا أزجي التحايا للمبدع الرائع اللواء، وما تبخل علينا بشوفتك، وفي انتظار قصائدك في محراب الآداب والفنون..
شكرا ليك مرة اخرى يا سالي وربنا ما يحرمنا منك
عمر حسن غلام الله

[مهيرة]

لونِك ريدِكْ بين العرضوا ورقصوا ،،،
وجابوا ( الغيمه ) على تلوينا ،،،
وإتبينتِك !!!د
سالي :

واصلي في الابداع

[saly]

سالي
التحايا لك وانت تتحفينا بتحف اللواء الرائعة
بس ده يوغوشنا شويه، ليه اللواء ما سجل دخول براهو وطل علينا بطلعتو البهية؟ عشان نقول ليهو رسل لينا القصيدة دي باسمك الصريح لمحراب الآداب والفنون في واجهة موقع ود مدني عشان الصفحة دي بتتنشر منها معظم القصائد للمواقع التانية، وكمان بيفتحوها ناس تلفزيون السودان.
من هنا أزجي التحايا للمبدع الرائع اللواء، وما تبخل علينا بشوفتك، وفي انتظار قصائدك في محراب الآداب والفنون..
شكرا ليك مرة اخرى يا سالي وربنا ما يحرمنا منك
عمر حسن غلام الله

الاخ 114
تحياتي الناضرات
الاخ لواء حاليا انا شخصيا بفتقدو وبفتقد كل جميل لديه
ولكن لظروف خاصه جدا خارجه عن ارادته يحتجب عنا هذه الايام في المنتدي
بس سوف ياتي قريبا باذن الله

[saly]

حسا م
مزوني
مهيره
طبعا القصيده ما حقتي
بس شاكره تواجدكم هنا