ظاهرة غريبة [الأرشيف] - منتديات ودمدني

مشاهدة النسخة كاملة : ظاهرة غريبة

admin

25-01-2006, 03:06 AM

طبعا كل يوم من الصباح واول ما نفتح الباب (الانترنت) طوالي بندخل المنتدى .. وكنتا دائما اول قسم من اقسام المنتدي بدخلو هو المنتدي العام .. لكن لاحظت ولي فترة اني بقيت دائما بفتح اول شئ المنتدي الثقافي .. والصراحة بعندهناك الدنيا جميله ولونها بمبي .. وناس المنتدي الثقافي استحقوا بجدارة وسام التميز عن عام 2005 .. وبي قدرة قادر بقوا عصبة لا يستهان بيها ويمكن يقلبوا الحكومة عديل .. ونحن هنا نشكرهم شكرا جزيلا على اثراء ساحة منتدانا واخص بالشكر الاتي:
عمر غلام الله
كاظم
سوباوي
اميمة عشرية
لواء
ياسر فقيري
سامبا

وطبعا فارس المنتديات العائد بقوة (مع انو تبع ودمدنيات)
ودالماذون

sambaaa

25-01-2006, 04:13 AM

أخي الكريم / أدمن ..

لا أخفي عليك سراً .. فقد قرأت كلماتك مراراً وتكراراً ... تواريت خجلاً خلفها .. وأؤكد أن الفضل يرجع لكم اولاً و آخيراً على اتاحتكم الفرصة لنا لإبراز كل ما لفت انتباهكم ...

وما تبذلوه من جهد كبير في تطوير الموقع كان له الأثر الدافع على اجتهاد كل الأخوان بالمنتديات ..

وأشكر لك اخي اشادتك القيمة جداً .. التي اعتبرها شهادة كبيرة جداً نعتز بها ... وحتماً ستكون دافعاً قوياً لنا لبذل المزيد والمزيد ..

فحبنا اللامحدود لمدينتنا الجميلة .. يدفعنا جميعا ان نعمل معا من اجلها .. ودون ذلك المهج والنفوس

***************

SAMBA

SAMBA

SAMBA

SAMBA

SAMBA

SAMBA

SAMBA

صالح ابوشوارب

25-01-2006, 06:50 AM

اخونا أدمن

لك التحية وللاخوان
عمر غلام الله / كاظم / سوباوي / اميمة عشرية/لواء عشرية/ ياسر فقيري
سامبا
وللمعلومية الاخ سامبا حبا منه على المنتدى الثقافى دعاني للمنتدى الثقافي فشكرا له
ولكن اجد نفسي فى ودمدنيات ولذلك ياشباب مدنى حرورو لينا البكا قالوا البكي بيحرورهو اسيادو وخلوا الأدمن وكل المشرفين يدونا نظرة انشاء الله بعد الفطور ( لينا الله وعيشة السوق )

مزوني

25-01-2006, 07:24 AM

عمر غلام الله
كاظم
سوباوي
اميمة عشرية
لواء عشرية
ياسر فقيري
سامبا
ود المأذون

ليهم منا كل التحايا والحب والتقدير على ما يبذلوه لأجل سطوع وجه جميل لمنتدانا الغالي

وعقبال كل الأقسام انشاءالله

aborawan

25-01-2006, 09:04 AM

madaniboy

25-01-2006, 09:13 AM

يسلموو وربنا يديهم العافيه ويستاهلوووو
فاقد حنان

الامين

25-01-2006, 09:15 AM

محمد احمد

25-01-2006, 10:39 AM

أخواني وأخواتي عمر غلام الله
كاظم
سوباوي
اميمه عشرية
لواء عشرية
ياسر فقيري
سامبا
ود الماذون
رحلة لعمري شاقة ومعاناة لاشك انها طويلة ولكنها ممتعة في ثنايا الحروف والكلمة حتي حفرت اسمها علي خارطة التميز والإبداع .
لكم من التحايا فرداً فرداً ومزيداً من التآلق والابداع ياشباب.
لك التحية ايضاً أخي الأدمن لاعطائك لهولا الاخوة حقهم

كاظم

25-01-2006, 06:57 PM

الجميل جدا / ابوبكر (الادمن)
تحياتي وفائق احترامي دوما ..
اولا غزير شكري لهذا الاطراء الحميم .. وسأنصب نفسي متحدثا باسم اولئك الفتية الرائعون حقا وأضيف الى غزير شكري محبتهم وامتنانهم ورغبتهم الملحة في في تجميل وجه موقع هذه المدينة الالق .. ولا اخفيك اخي ابوبكر ان كل المنتديات تحمل ذات الطابع الجميل وكلما التجأت الى ركن من اركان هذا الموقع تجد مجموعة متفردة في نشاطها واجتهادها لتقدم الجميل من المساهمات فاسمح لي عبر زاويتك هذي ان احي كل اعضاء الموقع في اي ركن كانوا
لك التحية مجددا اخي ابوبكر ودم بخير

سوباوي

25-01-2006, 10:20 PM

المشرق .. كصباح مدينتنا .. أبوبكر الأدمن ..

يدخلني البرد الآن من كل مسامي باتجاه معاكس تماما لوظيفتها .. وأنت توشحنا

بوسامك الجميل هذا .. وبالقلب أوسمة كبيرة يزينها ود خالص أهدي أولها لك أيها

الأدمن المهموم بهذا الصرح العظيم وأهدي بقيتها لكل منتديات وأقسام منتديات

ودمدني وكيف لا وهم أبناء تلك المليحة المرسومة في شارع حياة الناس علم ..

تديهم الفرح الأكيد ..تسقيهم الموية الوريد .. نلقاها وسط الأمنيات .. أجمل عناوين

للمطر ..وأحلى الخطوط في قوس قزح .. وأقوى المقاطع في النشيد ...

** ** ** **
العميق في كل أشيائه كاظم ...

كعهدنا بك أنيق المعشر .. شفيف الحديث .. أجزل الود لك وأنت تنوب عنا في إسداء

الشكر لهذا الأدمن الجميل وكل أهل المنتدى الرائعين .. وأنا هنا لأشكرك .. وأحكي

للأدمن والمتداخلين عما أصابني من برد بحفاوتهم العالية هذه فهل لك من كلمات

تدثرني ...

** ** ** **

الأحباء المتداخلون .. صالح أبو شوارب .. مزوني .. أبوروان .. فاقد حنان .. الأمين

محمد أحمد .. وكل الذين سيتداخلون لاحقاً ..

يروى عن عبد الله بن عمر كان أكثر التصاقاً وحباً للرسول صلى الله عليه وسلم

وكان أكثر أخوانه شبه بوالده بن الخطاب .. إلا أن الأول أسمر لونه والأخير أبيض

لونه مشرب بالحمرة .. واشتهر عبد الله بن عمر بأنه رجل كثير السلام والمطايبة

ويطايب كل من تقع عليه عينه وكان عندما يدخل المدينة المنورة يحي كل من

يقابله ..وهو حاملا أحذيته تحت أبطه فلما سئل عن ذلك قال : أخشى أن يقع الحافر

على الحافر .. قاصداً أنه يخشى أن تقع خطاه على خطى النبي الكريم ..

وهنا أقول أنا ويزداد اللون سمرة بلهيب حفاوتكم هذه ..أحبتي أننا نأتي إلى المنتدى

لنحييِّ ونطايب الجميع .. حاملين تحت أبطنا ما نود المشاركة به لنتلمس له قبل

الخطو موضعه حتى لا يقع حافرنا على إبداع الآخرين ..

لكم معتق الحب والود أيها

القبيلة الرائعة ...

مرحق تحياتي،،،

خالد هاشم علي

25-01-2006, 11:38 PM

عمر غلام الله
كاظم
سوباوي
اميمة عشرية
لواء عشرية
ياسر فقيري
سامبا
ود المأذون

هؤلاء رائعون وحقاً انهم رائعون وكل اعضاء المنتدى رائعون وحقاً انهم رائعون وانت ايضا يا بكري رائع لاعطائك لهؤلاء الرائعون حقهم دمتم ودامت الروعة معكم
لكم التحية جميعا وربنا يوفقكم...
لكن ياصالح ابو شوارب عليك الله شفت جنس الكلام الكبار كبار البكتبوهو ناس المنتدي الثقافي ديل... يمين شي تفهموا وشي تقعد تلولح في راسك سااااااااااااااي. لكن برضه المابنفهمو بنحسوا لانهم مننا وفينا وجمعتنا محبوبتنا الغاليةودمدني... لكن عليك الله ياسوباوي براحة علينا وبالجد شوقتونا نبقي من رواد المنتدي الثقافي ومن هسة آآدي دخلة... وكمان سرقت لي كم تعبير كده منك ياسوباوي عشان اكتب رسالة للولية ام هاشم بس انشاء الله ناس ابو روان مايقوموا بالواجب ويكلموها ويقولوا ليها ابو هاشم سارق التعبير من سوباوي وكاظم.
لكم التحية مرة تانية وربنا يوفقكم بس زي مازرناكم وعملنا البيت بيتنا ( المنتدي الثقافي) فنحن منتظرين زيارتكم لينا في (ودمدنيات) وباقي المنتديات.

سوباوي

25-01-2006, 11:59 PM

الراقي .. خالد هاشم ..

تحياتي من هنا لاعندك .. وأنت يا زول جميل وضاحك ومجلسك بيكون بنكهة فرح

خاص .. صدقني إن قلت لك إن ردك أسعدتني بشكل خرافي .. وأعجبتني طريقة

حوارك مع العم صالح أبو شوارب .. وبقيت أضحك من أعماق أعماقي إلى أن لفته

نظر جيراني في المكاتب المقابلة لمكتبي فما كان مني إلا أن رفعت سماعة التلفون

وواصلت أضحك فيها وكأني أضحك مع أحدهم على الطرف الآخر .. وإلا كان سيشيع

في الشركة أن سوباوي "جنه" آخر عمرو وكمان في آخر يوم خميس من الشهر

وهم أصلهم عندهم فيني رأي .. وبعداك ياأبو هاشم استغفرته وقلت ربنا يجازيك خيراً

أما عن أم هشام فلها مني معطر التحايا ولك ماشئت مما نكتب ولهاشم مرحق الود

وباغة ورد على يمينه وطوق ياسمين ... ولنا زيارة لود مدنيات ..

ويا زول أبقى قريب ومتعافي وضاحك دهرك ...

admin

26-01-2006, 02:06 AM

والله معاك حق يا سوباوي فقسم ودمدنيات ملئ بالحنين والحب .. والعواجيز طبعا .. لكن مهما بحثت في الانترنت ومنتدياتها الكثيرة والمتوفرة لن تجد قسم كقسم ودمدنيات .. انا حقيقي لما ادخل هناك بحس بي نفسي في مدني .. فاجمل القصص والحكاوي والمدخلات لصالح ابوشوراب وعزيز عيسي وعمنا الغائب بابكر .. وتحس بالم ومعاناة اهلنا بقراءة مواضيع عمنا ابوالمهتدي ومدخلاته التى تلمس في دواخلنا العميق من الاحسايس وتحسسنا بالتقصير فيما نعمل اتجاه مدينتنا.. ودمدنيات هي ابوبكر حامد ودالماذون فارس المنتدى وابراهيم تلش فاكهته .. ودمدنيات مهيرة وعشوشة والغائب عمك تنقو الذي في عهدهم اصبحت الصحف السيارة تنشر ما يكتب في ودمدنيات ..ودمدنيات الكشكول والدكان .. ودمدنيات الرشيد و الزمن المريح وقمر الزمان وغيرهم كثير

والجدير بالذكر ان خالد هاشم مشرفنا على المنتدي الرياضي يقوم بمحاولات سياسية كبيرة وضغوطات اجتماعية وعائلية وتعبئة عامة من اجل العودة مرة اخرى لودمدنيات .. ولكن عليكم الله بعد ما مسك هو ومزوني المنتدي الرياضي موش اتحرك شوية .. اقنعوا معاي اصبر شوية بهناك مانحنا الحنين كلنا كاتلنا لي ودمدنيات

admin

26-01-2006, 02:32 AM

بسم الله الرحمن الرحيم

أخي أدمن .....

انما هم ابناء مدينة ودمدني ... رائعون بعمق ماتحمل الروعة من بريق أخاذ ... احساس راق وانامل تتحسس الأدب وتتلمس مواقع الابداع فيه ...

كل من ذكرت .... لهم التحية
" لكن دحين .. مانسيتني .. عليك الله ... مع انو انا رديت ردين في المنتدى الثقافي .... " لكن مامشكلة كونك مدحت الشباب ديل كأنني أحسست فخرا بشكر...

والف شكر ليك وماتفهمونا غلط
أخوكم الصغيروووون شديد .. والجديد معاكم .. حفيد ودمدني السني .... الامين

والامين .. هههههه .. اها كدا مبسوط

الصراحة انا في ناس كثير ما قلتهم ولا بقدر اقولهم .. لانو في ناس متفردين بتلقاهم في كل قسم من اقسام المنتدى بل واحيانا في كل موضوع .. في ناس عندنا ثوابت منذ عهد بعيد .. تجدهم كانهم يعيشون معك في البيت الواحد .. فعلا كاخوانك واخواتك اواعمامك واخوالك .. اساسين لا معني لمنتديات ودمدني كلها بدونهم .. ابوروان وحمدتو وسالي .. ياسر(مايرلان) ومزوني ونيازي وصدقي وفي ناس انا لما اشوفهم بركبني العصبي وكان الكيبورد حقى بصلهم كان شبكتهم اسكيب اسكيب .. بعتبرهم بالضبط زي اولادي في البيت مزعجين شديد وشقيين .. لكن كمان البيت من غيرهم ما ببقى وما بنستحمل عدم وجود موضوع يومي ليهم .. احيانا كثيرة ما بدخل مواضيعهم اصلا .. لكن كان ما لقيتهم ردوا او اضافو موضوع بقلق عليهم وهم علي سبيل المثال التيمـــــــــــــــــان وفاقد حنان وروبي وباقي ناس منتدي الالعاب بعندهناك ديلك ههههههههههههههه

التيمان

29-01-2006, 04:39 AM

تسلمو يارايعين الى الامام

وربنا يوفقكم لما فيه فعل الخير

التيمان

29-01-2006, 04:45 AM

وفي ناس انا لما اشوفهم بركبني العصبي وكان الكيبورد حقى بصلهم كان شبكتهم اسكيب اسكيب .. بعتبرهم بالضبط زي اولادي في البيت مزعجين شديد وشقيين .. لكن كمان البيت من غيرهم ما ببقى وما بنستحمل عدم وجود موضوع يومي ليهم .. احيانا كثيرة ما بدخل مواضيعهم اصلا .. لكن كان ما لقيتهم ردوا او اضافو موضوع بقلق عليهم وهم علي سبيل المثال التيمـــــــــــــــــان وفاقد حنان وروبي وباقي ناس منتدي الالعاب بعندهناك ديلك ههههههههههههههه

انت تعبان مننا تعب شديد

انا زاتى دخولى بقى الا اكون عندى بحث ولا حاجه

وتانى لا الاجازه

وانا جاى وحا اتعبكم تعب شديد

والله الا تطيرو

هههههههههههههههههههههههههههه

لاعدمناك يا ادمن

والله انا بحبك لله فى لله

يلا نتلاقى مره تانيه

التيمان

29-01-2006, 04:47 AM

زى مابقولو تعب المكوجى

ههههههههههه

الـــدباغ

29-01-2006, 06:24 AM

عمر غلام الله

كاظم

سوباوي

اميمة عشرية

لواء عشرية

ياسر فقيري

سامبا

لكم التحيه عقبال الأقسام الأخرى
*******************

خالد هاشم علي

30-01-2006, 08:15 AM

[QUOTE=admin

والجدير بالذكر ان خالد هاشم مشرفنا على المنتدي الرياضي يقوم بمحاولات سياسية كبيرة وضغوطات اجتماعية وعائلية وتعبئة عامة من اجل العودة مرة اخرى لودمدنيات .. ولكن عليكم الله بعد ما مسك هو ومزوني المنتدي الرياضي موش اتحرك شوية .. اقنعوا معاي اصبر شوية بهناك مانحنا الحنين كلنا كاتلنا لي ودمدنيات[/QUOTE]
ههههههههههههههههههههه حلوة منك ياآدمن يعني داير تعمل لي جبهة ضغط وكدا... لكن والله غالي والطلب رخيص بس حقيقة انا اتجرست ودخلت واسطات عشان اتنقل من المنتدي الرياضي لانو غلبني عدييييييييل كده وكل الاعباء قايم بيها اخي الرائع مزوني فله مني الف الف تحية ... طالما انو المصلحة العامة تقتضي وجودي في المنتدي الرياضي فمليووووووون مرحب فنحن جنود نخدم المنتديات في اي موقع وحتي بدون مناصب وربنا يقدرنا علي المهمة بس ياريت همتكم معانا عشان نقدر نضيف اضافات حقيقية للمنتدي الرياضي وعشان مايكون مختص بالاخبار فقط.. يعني نحركه كمان وكمان بالمشاركات واللقاءات وكل مايتعلق بالرياضة... ودي بمثابة دعوة لكل الشباب انكم كلكم تكونوا معانا مشرفين علي المنتديات وكلكم اعضاء عشان نقدر نوصل بالمنتديات كلها لاعلي المراتب... بس برضه حبي لي منتدي ودمدنيات حيكون اساااااااااااااااااااااااااسي وكل مرة كده بأخد لي زوغة واجيهو بي اشواقي... وتسلم ياآدمن يارائع

ياسر فقيري

30-01-2006, 10:58 AM

الأستاذ الغالي أبو بكر .. الناس على دين ملوكهم ..
وأنت الملك فينا فتتبعنا خطاك .. ونأمل أن نكون قد سرنا فعلاً على هداك