موضوع للنقاش للعذاب بنات واولاد

[بابكر]

هل تقبلين بهذا الزوج ؟

--------------------------------------------------------------------------------

--------------------------------------------------------------------------------


موضوع جدا حساس

مرحباً بأحلى شباااب و بنـااات بالمنتدى
عندي موضوع وحبيت نتناقش جميعا فيه
واتمني أن تكون إجاباتكم صريحة و واقعية
كلنا نعرف الظروف التي نمر بها في الوقت الحالي من عطاله وبطاله
ويا سعد من وجد له وظيفة ... وطبعاً أغلب الوظائف " الجديده " إن لم تكن كلها براتب لا يتجاوز الـ 300,000 .. وإن زاد وصل 500000 جنيه
فهل هذا المبلغ قادر على أن يزوج الشاب ويكمل به نصف دينه ؟؟؟
~*¤ô§ô¤*~سؤال أوجهه إلى كل فتاة تحلم بفارس أحلامها~*¤ô§ô¤*~

هل تقبلين بزوج يمتلك هذا الراتب ؟؟؟ ولايملك سواه شيئا من حطام الدنيا :d :d

[مكتول مدنى]

والله الجواب باين من عنوانه وما فى واحدة دايرة تجاوب

[فدوى الحسن]

نا حاوريكم راي بصراحة ممكن اقبل بيهو لانو القروش ما اهم حاجة في الاربتاط بالزول اهم حاجة اخلاقوا ودينوا .......

[غفران]

الرسول (ص) قال : تزوجوا فقراء يغنيكم الله انا بشوف انو المال مش كل حاجه اهم شي سعادة الانسان حتي لو عاش بالبسيط والواحده مننا بتتزوج عشان انو الزواج سنة الحياة واستقرار في نفس الوقت و في النهايه القناعه لو الواحده مننا مقتنعه بشاب معين وبتحبه بالجد ما بتتلفت لمسالة انو هو بياخد كم مثلا من مرتبه اهم شي تقيم الشخص اللي هي بتحبه مش بالضروره تقيمه بالمال لا ابدا المال ديه وسيله وليست غايه نعم هو بخدم في كل شي لكن لو ربنا ما قسم انك تكون غني او عندك مال كتير حتعمل شنو في الحاله دي حترفض انك تتزوج مثلا انا بشوف انو ده مش حل للمساله اهم شي القناعه وانا من وجهة نظري بشوف انو اهم شي عندي الشخص الانا حرتبط بيه يعني مسالة المال اخر شي ممكن افكر فيه اهم شي اني اكون سعيده ومبسوطه ودي بالدنيا وبعدين الارزاق بيد الله يا ما في ناس المال ما عارفين اودوه وين ومع ذلك عايشين في حزن شديد السعاده ما شايفه طريقهم والسعاده اخي مش بالمال اهم شي الناس تعيش مستوره لانه مهما جمعة من الاموال مصيرك ترحل وتسيبها وبتمني انو اي فتاة ما تنظر للماديات تنظر لسعادتها واستقرارها في الحياة والمال ما يكون حاجز بينها وبين سعادتها وحياتها عليها بالشخص اللي هي حترتبط بيه وتتزوجه حتي لو بكسب في الشهر شي بسيط وربنا كريم يمكن الشخص اللي حتتزوجه ديه كونه كان شخص بسيط في يوم من الايام ربنا حوفقه ويمكن يكون احسن من الشخص العنده مال وغني وزي ما قلت الارزاق بيد الله
أما مسالة البطاله دي انا بشوف انو الواحد لو فكر اعمل ليه مشروع بسيط لحاله يكون افضل انشاء ياخد من ابوه او من اقرب النس ليه وابتدئ حتي لو ما لقه شغل في المجال اللي هو عايزه اشغل نفسه باي شي انشاءلله ابيع مويه ده مش عيب لانه الشغل مهما كان مو عيب للرجل طال هو مشروع ما عيب والله لكن بصراحه في نوعيه من الشباب ما بتقتنع وبعدين فيها نوع من الافتره والتكبر الواحد يقول ليك انا ما بشتغل شغلانه زي دي وفي نفس الوقت تلاقي الشخص ديه ما عنده حق مصروفه وبعين قويه امشي اشيل مصروفه من ابوه او امه او اي حد من اهله ليه ده كل انت بامكانك تشتغل وتكسب المال بعرق جبينك مافي داعي تمد يدك للغير نعم هم اهلك بس انت مش قاصر بامكانك تشتغل اي شغلانه وتكون بيها نفسك بصراحه نحن عايشين في زمن الناس ما بتراعي فيها للمساؤليه صراحه ومش كده وبس احيانا في بعض الاشخاص بشتغلوا لكن للاسف الشي البكسبوه من شغلهم وتعبهم بضيعوه في الكلام الفارغ بضيعوه في اشياء ما ضروريه يعني ما ليها اي لازمه فبدل ما نحن نضيع المال ديه في الكلام الفارغ ليه ما نعمله في شي مفيد ممكن نعطي المحتاجين ومش كده وبس نفكر في الزواج والاستقرار وده سنة الحياة ليه ما نفكر في حته زي دي
ويا اخواتي عليكم الله فكرن في مستقبلكن والايام بتجري ومسالة ده عنده وده ما عنده دي ما مقياس للسعاده اهم شي نعيش في سعاده ونكون مبسوطين في حياتنا الزوجيه مع الاشخاص اللي ربنا حقسمهم لينا وبكرر الارزاق بيد الله اهم شي القناعه
مشكور اخي با بكرعلي الموضوع المهم والشيق جزاك الله كل خير

[الامين]

شكرا اخوانا ... بابكر ...والاخت الكريمة غفران...............

اثارتكم للموضوع ده وصراحتكم ...والشجاعة الحلوة اللقيتها ولمستها من خلال كلام الاخت غفران خلتني اتكلم معاكم في الموضوع وبصراحة تامة .

بالطبع ...مشكلة الزواج ...... ( وللاسف كلمة زواج ماهي في حد زاتها مشكلة زي مالناس بقت تقول) الزواج حل وليس مشكلة لكن المشكلة في اقبال المجتمع وتناولهم للزواج هو المشكلة ..

خلوني أسال سؤال صغير : نحن عارفين انونحن في السودان بقينا بتاعين تقليد ودي حقيقة ياجماعة لانو الواحدفينا لما يجي يعمل حاجة اول شئ بخاف من الناس ينتقدوا ...فتلاقي الواحد يقول ليك الناس تقول شنو .... البنات والاولاد والصغار و الكبار واولياء الامور وربات البيوت ..المجتمع كلو بيقلد....عشان كدة يقول ليك انا ماحاقدر اعمل كدة لانو الناس ماحاترحمني ..الناس تقول شنو ... الناس عملوا عشان كدة انا لازم مااكسر التقليد ..مااعمل حاجة جديدة الناس تنتقدني بيها ....

مشكلة التقليد دي هي الفاقمت مشاكل تانية واثرت على قضية الزواج المن المفترض اصلا تكون ماقضية ولا مشكلة .. لانو بصراحة ياجماعة لما الولد يكون عايزيتزوج وببساطة يجي لاهلوويقول انا ياخوانا عايز بنت فلان ...تلقى ناس بيتو واقاربو يضحكوا يقولوا ليهو(هو انتا قايل الزواج ده ساااااااااااهل كدة) ويسخروا منوا ومايلقى تشجيع ,,, ولما يكون دموا حار شوية ومابسكت عن حاجة هو عايزيعملها ...في اللحظة دي بيظهروا ناس جديدين بيحاولوا يكسروا مجاديفو بكلام عقلاني ( على حد التعبير ) مثلا :( طب كويس يافلان . انتا عايزتعرس فلانة ..اها عندك كم .البيت وين ...تعال نحسبها دي بكدة ...ودي بكدة وبعدنقاش طويييييييل .الموضوع في النهاية يحسم لصالح الجانب العقلاني وهنا تظهر مشكلة تانية ..مشكلة الحسابات الحقيقة هي معقدة ..

( ده بالنسبة للشاب )

تعالوا نشوف الشابة : وهي تتحدث مع امها في حوار صغير
ياامي انا بعرسوا ...
الام : يابتي تعرسي منو الفقران ده
البنت : يا( ماما) أو( ياامي ) الزول ده ود ناس وكويس والله ماعندو مشكلة
الام : يابتي هوي انا دايرة مصلحتك ... ودايرك تتهني بس لكن مالبشكل ده ... ده لو عرستيهو بملاك فقر.,,,,انتي ماشفتي "ندى "بت ناس الدهشوري عرست كيف...اجش انا مادايرة ليك السمح الزيو.,,يايمة لكن ..ديك يالمقدرة جاب ليها وجاب ليها (ويستمر حديث بين الفتاة وامها وغالبا ماتتخلله نماذج عن دهب وشنطة وتياب وملابس و12 12 او 20 20 والفنان والعشا .,,,,, ) ممايجعل الفتاة تتبرمج وتتحول الى فتاة تريد ان تصبح ( أفضل من ندى ) .

الكلام كتيييييييييييييييير في الموضوع ده . بس للاسف ........ ماحاينتهي

واسف لو جرحتا زول ......من غير قصد

( مرة فكرتا بعمل جمعية في مدني وبديت جادي وسميتها ( رباط الطهر والعفاف ) حتى الاخوان اتحمسو معاي ولدرجة اذاعة ولاية الجزيرة عملت معاي لقاء بخصوص الموضوع )
فشل الموضوع في اول فكرة زواج لاول شاب معانا ...

ام البت نبذتنا

[مكتول مدنى]

والله يا غفران كلامك عين العقل وتزوجو فقراء يغنيكم الله وبعدين الواحدة مفروض قبل كل شئ تفتش السترة لانها اهم من الدنيا و ما فيها

[الزبير محمد عبدالفضيل]

تزوجوووووووووووووا فقارء يغنيكم الله من فضله وطبعا اهم شيء يكون الزوج ذات دين وخلق اما المال ليس هو الشيء المهم للسعاده

[معتز محمد طه]

السلام عليكم ورحمه الله تعالي وبركاته موضوعك جميل جدا
لكن نحن نختنع بهذا الموضوع وايضا البنات لكن ايش البقنع اهل البنت واهلنا نحن
هذا يحتاج الي نقاش وتفاهم بين الاسر في هذا الموضوع
معتز محمدطه
taha_mutaz@hotmail.com

[أبوبكرحامد]

حبيبنا بابكر ............ سلام وتحية
والله جابنى الدرب واستنيتك فى دكان ود الصول بس باين عليك مشغول ، الموضوع جميل وياريت كل العزابة يدلوا بدلوهم ، أما نحن فننتظر اسهامات العزابة عشان نستفيد إمكن الواحد افكر اسويها تانى ، عموماً لكم التحايا العطرة .

[بابكر]

الاحباب الاوفياء
الاستاذ ود المأذون
لكم الحب
شكرا على التفاعل والمشاركه

[التيمان]

والله غفران ردت ليك ياعالم.


وتسلمو ع الموضوع الشيق والله

[تكنك مان]

ما عارف فدوى دي جاده ولا بتهزر

[فدوى الحسن]

والله انا جادة في كلامي ياخ تكنك مان
حسب قول الرسول صلى الله عليه وسلم خذوهم فقراء يغنيكم الله...
وفي النهاية كونوا الناس تكون سعيدة مع بعض اهم من القروش لانها ما تدوم وممكن تصحى يوم وتلقاها مافي...

:) :d

__________________

[سواااح]

القناعة كنز لا يفني
انها كلمات لم تاتي من فراغ
ولم توجد عبثا
فلناخذ الحياة بمعناها البسيط ..
وسنري ماذا ستعطينا ..

مشكور بابكر ..

[حسام]

والله انا كنت ماشي بهناء وتاوقت فوق المنتدي لقيت في كلام كبير
عشان كده جيتكم بالباب اهاااااااااااا
مشاءالله عيني عليكم باردة
كلكم بجاي والله عامرين
كدي يا مان نشوف الكلام الماخمج
بعرف مكان ( قرية) كلهم حالفين اليمن مافي بنت من
قريتم مهرها اكون اكثر من (3000) الف جنية وليهم زمن
لكن تعال بهنا وشوف الطفشنا من البنات البتقول ليك عايزة 12 شبط و12 و12
والمال ما اقل من 5,000000 علي الطلاق رقم المليون ذي سبحت الفكي اها
وتلغي الشباب عاطلين والبنات قاعدات الكلام دا بجي
تعرفوا انا ما بقول ليكم كل الاهل بفكروا بالمفهوم دا بس النسبة الاكبر بقت تفكر باسلوب المال
وحقيقة دي مشكلة بعانو منها كل الشباب والشابات وخاصة في الفترة الجامعية والله الكلام محتاج لي قعدة طويلة
لكن راجع ليكم والله ميت جوع

الشكر كل الشكر لي حبيبنا الغالي بابكر

وراجع ليكم انتو يالرديتووووووووووووووووووووووووووووووو

[رضاب]

للاخ بابكر التحايا الطيبات
لوكنت بملك كنوز الدنيا ولفيت اسواق العالم عشان اشترى انسان تفتكر ممكن انجح؟
القروش ,البيت .العربية ,الدهب كلها من السهل الحصول عليها لانه دربها الصبر( وبالمناسبة الحاجات دى ماطموح ) وثمنها القروش لكن ياسيدى بكم نشترى الحب ومن وين ومنو العنده القدرة ينقش على دواخلنا النور ويحولنا لطاقة حب ؟
ده الانسان الممكن تقبل بيه الانثى وتسعى ليه دون تنازل ودن كبرياء .
تعرفى الكلام هنا متعب لكن ليك الود

[ابراهيم]

عمنا بابكر ..
كل الشكر وانت تلمس موضوع اجتماعي حساس للغاية
فالموضوع ذو شجون وعميق لذا

سأعود لاحقاً

[أشرف السر]

هل تقبلين بهذا الزوج ؟

--------------------------------------------------------------------------------

--------------------------------------------------------------------------------


موضوع جدا حساس

مرحباً بأحلى شباااب و بنـااات بالمنتدى
عندي موضوع وحبيت نتناقش جميعا فيه
واتمني أن تكون إجاباتكم صريحة و واقعية
كلنا نعرف الظروف التي نمر بها في الوقت الحالي من عطاله وبطاله
ويا سعد من وجد له وظيفة ... وطبعاً أغلب الوظائف " الجديده " إن لم تكن كلها براتب لا يتجاوز الـ 300,000 .. وإن زاد وصل 500000 جنيه
فهل هذا المبلغ قادر على أن يزوج الشاب ويكمل به نصف دينه ؟؟؟
~*¤ô§ô¤*~سؤال أوجهه إلى كل فتاة تحلم بفارس أحلامها~*¤ô§ô¤*~



هل تقبلين بزوج يمتلك هذا الراتب ؟؟؟ ولايملك سواه شيئا من حطام الدنيا :d :d



الأخ بابكر

أشكر لك طرحك الجيد لهذا الموضوع

ولتكن نظرتنا للموضوع من زاوية واقعية

الاجابة عن سؤالك هي (نعم) كبيرة.. الكثير من بناتنا لا يرفضن هذا الحال.. تجد للبنت وللولد الكثير من الاحلام والطموحات والدوافع الرومانسيه التي تجعل التخلي عن الكثير من الماديات شيئا بسيطاً



وربما يبارك اهل الطرفين هذا الارتباط
ولكن
عندما تدخل لكن هنا تسقط الكثير من الشعارات الرومانسية المهومة
عندما نأتي للجد وإجراءات ما قبل الزواج يكلف هذا - المسكين- ما لا يطيق ويدخل في مديونية وحالة من الندم الخفى على اقدامه على هذه الخطوة

يعني باللسان الوضع مقبول.. ولكن بالمطالبات و وواقع الأمر فهو ملزم بكل شيء

ملزم من قبل المجتمع
ملزم من قبل أهل العروس
وملزم أمام ضميره

هذا هو الواقع اخوتي واخواتي
فخلوا الكورة واطه وابتعدوا عن الرومانسية التي اضرت بالكثيرين ممن اعرف

[الجندي المجهول]

والله الموضوع حلو ورايكم فيهو احلي وتحية خاصة للاخوات فدوي الحسن وغفران ونتمني من الجميع ان يحذو حذوهما بالذات في عدم التقيد بالمظاهر الخداعة التي تنتهي في يوم وليلة واديك مثال بسيط ممكن يكون عندك 7000000 سبعة مليون وتجيب بيها ترباس وممكن بي اقل من مليون تجيب ود نجيض يهجج الحفلة والناس تنبسط وبيت مال وعيال يعني العاوز يتبوبر ممكن والعاوز يوفر لي زمن ما معروف برضو ممكن وصاحب العقل يميز وياريت الشي دا يبقي ساهل لانو بالجد والله والله نفسي اعرس والله خلاص كرهت حياة العزوبية والعذابة وكرهته الغسيل والمكوة دااااااااااااااااااير اعرس بالله بارو الموضوع دا لمان تحصلوا مرحلة المجان وانا والله اكون شاكر ليكم بلا حدود بااااااااااااااااااي

[نزار حسن محمد]

الاخ بابكر... سلامات ومشكور على هذا الموضوع المهم للكل..... العزاب اولاد وبنات ازيكم اولا ثانيا انا داير اعطيكم تجربتى واى واحد عنده سؤال انا جاهز .. طيب انا تزوجت بمبلغ 100 دولار فقط واعيش اجمل حياه اسريه مع ام عيالى .والداير يعرف كيف او عنده اى ستفسار يتفضل يسال مع تمنياتى ليكم ببيت الحلال

[مصباحيه]

موضوع جميل وشيق ومهم جدا انا مع غفران ومقتنعه تماما بالفكره دى واغلب البنات الزمن ده دى فكرتن ولكن فى بعض الامهات بفكروا بطرق تانيه يعنى مثلا الواحده تقول لبتها (العيشه الشفتها انا ما عايزاها ليك وكده عايزه ليك العيشه السمحه )وبعض الامهات بكون قصدهم يس سترة الحال -والباقى على الله لانو ربنا مابضيع زول مادام هو بيسعى وغيرها وغيرها اختلاف فى الافكار ووجهات النظر اختلاف حتى فى مفهومن للشباب ده مثلا ولد تمام حتى اهلوا بشكروه ودا معذب امه تفتكرى حيحترمك انتى وحتعيشى مطمئنه .لكن كدى عاينو معاى الزمن ده فى بنات مفهومن انو لازم العريس يكون غنى حتى لوكان قدر ابوها المهم انها تسكن فى عماره ويكون عندها البخدمها انا معاك الراحه اى زول بدورها لكن بالموجود او بالاصح بالمعقول انا ما عارفه الشى العايزه اصل ليه وصلتوا ليه من كلامى ده ولا لسه

[عزيز عيسى]

الأخ بابكر والأخوة والأخوات المتداخلون،

السلام عليكم ورحمة الله وبركاته،

الموضوع جميل وذو أبعاد..
وعلى الرغم من أنني عديت المرحلة هذه بسلام والحمدلله..
وأن الموضوع بخص الشباب خاصة العزاب..
إلا أنني أقول للشباب: أعقلها وتوكل على الله وكل شيء بتسهل..
وعلى الشابات غير المتزوجات أقول لهن:
القناعة كنز لايفنى.. المال ليس كل شيء ولكن الحب هو الذي سيبقى بين الزوجين..
ولا بد أن يكون هنالك تفاهم بين الزوجين في تدبير أمورهم المالية حتى تسير الأمور على مايرام.

تذكرت نكته حكاها لي واحد صحبي: قال في واحد متزوج في السودان وعنده كذا طفل..
وراتبه 3000 جنيه في الشهر وعايش مبسوط..
سألوه إنت متزوج وعندك أطفال بس كيف عايشين بمرتب 3000 جنيه في الشهر..
قال ليهم: أنا حاوي.
http://www.asmilies.com/smiliespic/3dsmilies/36_1_51[1].gif (http://www.asmilies.com)

[حسام]

هوي يا ناس صاحب الموضوع تنسوة والبجي بالحيطة اتاوق اقول بابكر والبنية دي
ادخلو بالباب وشوفو منو الكتب الموضوع دا



الله دا كلام شنو دا


هووووووووووووووووووووووووووووووووووووووووووووووووو ووووووووووووووووووووووووووووووووووووووي


اعملوا حسابكم والله عشان انا كنت مافى

انا جيتكم يا التيمااااااااااااااااااااااااااااااااااااااااااااا ااااااااااااااااااااااان شنو الحكاية ما فيها حقوق بث
نزعل ولاشنو يا اخوانا




بجيكم حســــــــــــــــــــــــــــــــــــــــــــــــ ــــــــــي

[خالد أحمد الصول]

طبعا البت السودانية كل مره طلبها في فارس الاحلام يتناقص قليلا قليلا ... كان فارس الاحلام بجيب الصندلية و الريحة نيه و نسيبتو قالت شوية ... ثم جاب تلاته قدور برضوا قالت النسيبة شوية ... بعد داك بقي زي سمسم القضارف .. الفين جنيه من أمو ما بجيبنو ... ثم صار اللبن أبوي لي بي ... و يا أبشراء أنا ما بفسر و إنت ما تقصر ... الي أن صارت تدخلوا الصالون و تشربوا الليمون .. و كما تصافحو بالقانون .... ثم يا أبوشراء إنشاء الله راجل مرة .... و الحكاية لما سخنت شديد البت ضربت الجرسه و إتنازلت من كل حقوقها .. و بقت عينها طايره كمان ... راجل المرة حلو حلا ... يعني الحكاية بقت إشتها و صار فارس الاحلام إذا كان متزوج بإثنين ما مشكلة .. مرتو الاولي رضيانه .. و التانية عامله زعلانة ..... و بعدين لو نسوانو ثلاثة ... أنت مرتو و أنا حبيبتو ... و لو بتو بتقرا في الجامعة ما فرقت .. طالما عندو عربية .. لانو ركبني عربتو .. و عرفني بي بتو ..... ((د. عمر السيد بدر قال إنتو البت دي عرفت راجل المرة حلو كيف .. البت دي ضاقتو)) و الله يابت الحلال لو عارفة راجل المرة .. تجري منو 50 ميل ... زول زي الحاوي ما عارف البسوي فيهو ده شنو .. حق العيش .. حق اللبن .. حق الخضار .. اللحمة كملت ... في المدرسة قالو لينا جيبو 15 الف جنية .. عايزين حق الامتحانات ... البت في مستشفي الاطفال ... طبعا راجل المرة بكون شكلو زي الزول الرقيق شديد مع البنات .. عارفين ليه .. لانوا قلبو مقطوع من البيت من جنس أي أنثي .. عشان كدة بيجي من البيت بي حاضر ... إنشاء الله ... نعم ... أي ... كلامك صاح ... و البنوت قايلين دي رقة لكن الحكاية هرشة
((مكره أخاك لا بطل))

[هيثم بابكر]

الأخوة والأخوات الأعزاء طرح لموضوع يهمنا جميعا وللأسف قريتو متأخر بس حصل خير ، وشوفو شدة الموضوع مامهم انطرح من شهر فبراير الماضي والى الآن الناس بترد عليه ، عارفين ياشباب المشكلة وين تسأل البنات يقولو ليك ماعندنا اي مانع وعاوزين السترة باي حال وتسأل الشباب برضو يقولو ليك عاوزين نتزوج باي طريقة ، طيب منو البفرض انو زواجنا يكون بنفس التقليدية والشروط المعروفة للجميع واللتي هي السبب في عنوسة وبوران الشباب والشابات ، اعتقد انو المشكلة هي الأهل هم البضعو الشروط سوا اهل الفتاة او الشاب هم البضعو العراقيل ويتمسكو بالتقليدية ، شنو يعني شيلة وشنو يعني دهب وقيديومة وعيزومة وتقاليد وعادات عجيبة وفريدة ، خلت الشباب يعزفو نهائيا عن الزواج وخلت البنات أعمارهم تفوت 37 واربعين من غير زواج ، ياشباب هذه دعوة للتحرر من عادات وتقاليد الأباء والأجداد تعالو نفرض ثقافتنا الجديدة في مفهوم الزواج لأن الموضوع يهمنا فقط .

[نوار مصطفى]

هو صررررراحة موضوع صريح بس شوف الناس في السودان صراحة بس عاوزة السترة وما اكتر والفلوس ما كل شي المهم السترة في الحياة اما في برة السودان قرررررررررررروشك اول ماعندك ما يلزمك المووووضووع حلوووو وعجيب شويتين

[وليد عمر سعيد]

مدني يا اجمل خبر
ياحبايبنا هسي المشكلة بقت مافي القروش لانو مع كترتم يا يقبلو يايبووووورو المشكلة يا اخوانا في البنت السودانية نفسها في لبسها مع احترامي للمحافظين لكن البنشوفو الليلة في البنت السودانية المشكلة اعتقد بقت اكبر من قروش وكدا.اكرر ماكل البنات.والله يهديهم