عندي سوال محيرني النبي جاوبوني بصراحه

[غفران]

المنتدي ديه اللي هو منتدي ود مدني هو خاص بودمني واهله ولا منتدي بجمع الكل سواء من ودمدني وغيره ده سوالي
بصراحه يا اخواني واخواتي انا شايفه كتير مواضيع بتنزل بزكر فيها اهل مدني يعني تلاقي الواحد او الواحده تقول ليك يا ناس اهل مدني يا جماعه والله حرام انا يمكن الوحيده في وسطكم غريبه يعني مش من مدني ولا من اهل مدني فراعوا للحته دي والشي الانا بعرفه انو المنتديات للكل لكن ما بعرف اذا كان منتدي ود مدني ديه مخصص لاهله فقط وانا بصراحه لامن سجلت في المنتدي سجلت علي اساس ديه منتدي سوداني بجمع كل اهل السودان يعني مش بالضروره يكون منتدي خاص لكن اقول ليكم بصراحه انا يمكن وقتي كله بكون في المنتدي ديه وبمشي بشوف مشاركات الناس لكن بصراحه لامن ادخل لموضوع بلاقي انو الناس تقول يا اهل مدني في الحاله دي يا جماعه اعمل شنو ارد علي اي اساس علي الموضوع وانا مش من مدني بصراحه يا جماعه الحته دي انا بضايقني شديد بحس اني غريبه في وسطكم مع انو انتو اهلي انا بعتبركم كده بالجد اهلي السودانين
بعرف انكم بتحبوني وبتحبوا مشاركاتي ومافي اي مشاركه انا قدمتها انتو ما رديته عليها علي العكس دائما بتشجعوني اني اواصل معاكم بس اعتبروني فرد من ود مدني ومن اهله ما تحسسوني غريبه في وسطكم
لاني بالجد بحبكم وبحب منتداكم
فيا اخواني واخواتي الواحد منكم لامن اجي انزل موضوع ما اخصص واقول يا اهل مدني ده منتدي بجمع الكل نعم انتو بتحبه مدني واهلها ودي بلدكم وانتو اهل
وكلامي ديه مش معناه اني ما عايزاكم تتكلموا عن مدني واهلها لا ده مش قصدي مدني الكل بحبها انا كلامي مقصود بيه انو الناس بتخصص مواضيعها لاهل مدني فقط من خلال المخاطبه يا اهل مدني
وبتمني انكم ما تزعلوا من كلامي ديه كل مافي الامر اني والله بحب مدني وبحب اهلها وعايزاكم تعتبروني فرد منكم
بصراحه اخوكم الامين من الموضوع النزله بكل شجاعه طبعا ده خلاني اتشجع انا كمان واطلع الجواي من الشي الانا مضايقه منه وفي النهايه انتو اهلي فيكم العم والاخ والاخت وانا بعتبركم كده والله فارجوكم حسسوني اني منك وفيكم

[aborawan]

الاخت غفران
مرحبا بك بين اهلك وناسك وتاكدي تماماً بمجرد تسجيلك اصبحتي منا وفينا
المنتدى للجميع شرقا غربا شمالا جنوبا وليس محصور على فئة معينة او اهل مدني فقط
يوجد في المنتدى اعضاء من كل مناطق السودان وايضا ببينا بعض الاخوان من الدول العربية والخليجية .
بعدين نمشي بعيد ليه انا زاااااااااااااااااااااتي ما من مدني :):)

اختي غفران
معروف عن اهل مدني ترابطهم وحبهم الشديد والزائد لمدينتهم وتجدينهم دائما يذكرون اسم مدينتهم على كل باب وعند كل مناسبة حتى في مواضيعهم او ردودهم لكن هذا ليس معناه اذا كنت غريب عن مدني لا تشارك

غفران من الشمال وابوروان من الشرق وفلان من الجنوب وعلتكان من الغرب :):) كلهم سجلو في المنتدى واصبحو اعضاء في منتديات ودمدني

تحياتي اختي وانتي مكسب حقيقي للمنتدياات دمتي

تلوووووووووووووووووووووووبت:-
غايتو البركة في الامين ده خلاك تفضفضي وتطلعي الجواك بس طلباً وليس امراً المرة الجاية لو في اى حاجاة ضايقتك تتكلمي بيها طوالي من غير ما احد يشجعك :):):)

[saly]

الاخت العزيزه غفران

انا من المتابعات لمواضيعك الجميله وعجبني قلمك وما تكتبيه

وبعدين يابت

من اول ما سجلت معانا اعتبرناك كاخت لينا طوالي

بغض النظر عن مكانك خارج مدني او داخلها

وزي ما زكر ابوروان هو ما مقتصر علي اولاد او بنات مدني بس

بل تجدينا بنرحب ترحيب حاااااار بكل من يدخل عضو جديد وصدقيني ما قاعدين نعاين هو اصلا جاي من اي مكان

وما تشيلي في خاطرك كتير

وديل اذا كتبو يا ناس مدني اخديها ليها طوالي بدون تكلفه لانك بقيتي من مدني مننا وفينا

زعلك اكيد بهمنا

ولك العتبي

[مكتول مدنى]

اختى غفران انتى مع انك مامن مدنى الحنينة لكن حبك لينا وللمنتدى ولى مدنى ودة الاهم خلاك منها ومن اولادها واعرفى ان مدنى العظيمة ام رؤؤم وما بتبخل على اى زووول زانتى خلاص بقيتى مننا وفينا وملاحظتك ان المنتدى دة بدخلوه ناس مدنى كتير دة لان نحنا بنحب المدينة دى وبنعشق مدنى عشق مامحدود ومحل يتم ذكر الاسم الخالد ودمدنى تلاقينا فى النص وتانى مرحب بيك ومدنى بترحب بيك وبتحبك اكتر من ما بتحبيها ونحن كلنا اخوانك واخواتك واعمامك بنحيك زى ما بتحبينا وبنرتاح لمواضيعك وبنتابعها بشغف فاق حد الوصف مرحب بيك مرة تالتة وبكل اولاد مدنى اللى ما من بطنها وخلاص بقوا اولاده ودفعوا الضريبة زيك بالظبط وضريبة انك تكونى من مدنى تدفيعها حب لى مدنى ولاولاد مدنى وانتى خلاص دفعتيها واقول ليك كلام انا كمان ما عشت فى مدنى لكن الحمدلله انا من مواليد ست المدنى مدنى الجميلة يعنى انا منها وفيها وامكن بحبها اكتر من اولادة العاشوا فيها لكن ان شاءالله تتحقق امنيتى واسكن مدنى واتم باقى العمر هناك

[غفران]

اخي ابو روان شكرا ليك علي الترحيب الحلو وردك الصريح وانشاءلله اخي بعمل بنصيحتك

اختي سالي واخي مكتول مدني مشكورين ربنا اخليكم لي يا رب انشاءلله

[bakri]

اختى غفران انا زاتى ما من مدنى لكن بحب مدنى وبحب اهل مدنى

ونحن فى المنتدى عبارة عن اسرة واحدة يعنى مااظن فى فرق

بين زول من مدنى او خارج مدنى

[أبوريلان]

الأخت غفران

عوافى

إنتى مجرد إشتراكك فى منتدى مدنى أصبحتى منها وكل من يشترك معنا أصبح مننا وفينا ولا نرضى فيه كما لا نرضى فى مدنى ، وهذا الإحساس يحسه كل من سكن مدنى وكان قريب لأن مدنى بطبعها تحضن البعيد قبل القريب .

[سوار الياسمين]

عزيزتي المبدعة دوما غفران

انتي بمجرد تسجيلك في المنتدى اصبحتي ركناً من اركان هذا المنتدى الرائع

دوما بمشاركاتك الجميلة وما تزعلي يا عسل اسه ده بديك نص بيتنا عشان تبقي مننا وفينا

وعلى فكرة ياغفران من احد الأسباب الخلتني اسجل في المنتدى وبدون مبالغة


مشاركاتك الرائعة

تحياااااااتي يا بت مدني

[سوباوي]

غفران .. بنت بقامة أكثر من مدينة .. أدخلين بسلامً آمنه ... يا بت ما بين بهارك وجتة الشارع نهارك محتشد ...

تعجبني عافية الحرف لديك تأسرني المعاني المحجبة فأقرأها ثم أعيد البصر كرتين ..

أختي غفران مدني دي أم السودان وبنوزعها علينا أنصبة ميراث للذكر فيها مثل حظ الأنثيين ... يحضرني الآن

صوت مقدمة إذاعة مونتكارلو .. حينما يقول راديو مونتكارلو حدوده العالم .. وهنا منتدى ود مدني حدوده العالم ..

هل تسمحي لنا بمكان ما في خاطرك الذي يغطيه حب أهل هذه المدينة .. فالأعضاء هم المنتدى والمنتدى هو مدني

وأنت أحد أروع أعضائه إذن أنتي تحتلين مساحة تحسدي عليها ...

لك الود غفران وكوني كما أنتي عميقة الخطو رحيبة الحديث فائحة رزانة حرفك ملئ أرجاء المنتدى ...

تحياتي،،،

[واصل]

مساء الخير ياغفران ... الشى البتقولى فيه دا حقيقة مدنى مدنى مدنى دى طبع اهلا بحبوا مدنى لانو انت ماعشتى فيها بس انتى ماتتضايقى وحبنا انك تتعرفى باهل ودمدنى مادام المنتدى اسمه ( ود مدنى ) وصبرا جميلا والله المستعان

[غفران]

اخواني bakri - myrelan سوباوي-واصل
اختي سوار الياسمين
مشكورين والله وده برضو عشمي فيكم
ربنا اخليكم لي يا رب

[sambaaa]

width="350" height="200"

[خالد هاشم علي]

الغالية بتنا غفران... أول حاجة البركة في الأمين اللي فكة عقدة لسانك وخلاك تسألي...هههههههههههه بس ياريت ياغفران ماتختي حاجة في قلبك يعني لو في اي حاجة ضايقتك طوالي قوليها واتكلمي بيها وانشاء الله حنلقي ليها الحل... قريت ردود الناس عليك وماعندي شي ازيدو لانهم وفوا وكفوا بس عجبني رد سوار الياسمين ( قالت ليك هسة تعالي اديك نص بيتنا ) ياسلام عليك ياسوار الياسيمن ... وازيد عليها واقول ليك نحن من اول يوم سجلتي فيهو معانا في المنتدي سكناكي جوة قلوبنا ياغالية... وبالمناسبة يشهد الله انو دي مكانة كل عضو في المنتدي عندي...كلكم مكانكم القلب ياحلوين...تسلمي ياغالية ... و الله يقتل البزعلك...هههههههههههههه

[rasheed]

والله رد سوار الياسمين قرب يخليني أقول أنا ما من مدني شفتي كيف يا بتنا ،، وقالت سجلت في المنتدى عشان كتاباتك وكمان تسجل ليك نص البيت ،، في روعة أكتر من كده ،، وقبل اليوم قريت رد الإستاذ ود المأذون لواحد بتكلم عن المنتدى وقال ليه يأخي ما دام انت سجلت في المنتدى وما من مدنى تبقى أفضل مننا في المنتدى لأننا نحن بطبيعة الجغرافيا والسكنى أعضاء لكن أنت عضويتك أفضل مننا ،، وأنت بالطبع أفضل بكتير مننا ويا ريت تدوم المحبة بين ناس المنتدى على هذا الشكل الجميل وشكراً ليك غفران وعلى مواضيعك الجميلة التي هي حقيقة إضافة فعالة في منتداك هذا والتي أنت أريجه وشذاه وكثيرات من بنات جنسك ،، ليك التحية على هذه اللفتة البارعة والصراحة التي تريحينا كثيراً عند تناولها وفهم الجانب الآخر لذلك وبدون تعصب ،، وسلام

[أبوبكرحامد]

أروع مافى مدنى أنه لامكان فيها لقبلية أو تعصب ، ولاأكون مبالغاً إن ادعيت أننى لاأعرف قبائل الكثيرين من الجيران ولم أكن مهتماً فى يوم من الأيام ببحث هذا الأمر ، فمدنى هى مزيج سودانى فريد ، ولذلك لانهتم فى منتدانا هذا بإنتماء الأعضاء الجغرافى بقدر اهتمامنا بالإنتماء الوجدانى لوطننا الغالى السودان ، ولك العتبى ونطمح منك فى الغفران الذى هو لك اسمٌ وشيمة.

[عمك تنقو]

يا بتي نحن بنحب المدينة المنورة
أهل مدني يلحقوك ويفزعوك بدعائهم للخلقنا كلنا

يا أخواني كايس لي أبو المهتدي دحين شفتو وين

[غفران]

اخواني سامبا و rshaeedوابوبكر حامد وعمك تنقو والله مهما قلت ما بقدر اعبر ليكم عن مدي شكري واحترامي لكم انتو فعلا اخوان اعزاء ربنا اخليكم لي انشاءلله
اخي عمك تنقو بشكرك علي الدعاء وانشاءلله انا كمان يوم امشي الحرم وادعي ليك ربنا اوفقك عشان دعاك الحلو ده اديك الصحه والعافيه يا رب
ومره تانيه بشكركم اخواني انشاءلله ما اعدمكم

[ياسر فقيري]

أختي غفران .. الإنتماء إحساس .. فنحن نحسك واحدة منا .. أطردي إحساس الغربة وسط أهلك .. فإنت من يوم ما سجلت اتحكرت وسطنا وجبتي بنبرك وقعدتي في ضل شجرتنا وأنصهرت ملامحك وقسماتك فينا ..

[الامين]

بسم الله الرحمن الرحيم

الاخت العزيزة غفران :

ألا رزقنا الله بالغفران وانعم علينا وعليك برحمته وجوده والاحسان

أختي /
حقا ... سوداننا وطن أصيل .... رغما عن كل القواسي ... رغما عن كل شئ .. يبقى السودان هو الاب الاسمر الكريم الذي يربطنا حبا وودا وعشقا بلا حصر للاماكن .. فروعة وطننا والحق يقال تكمن في روعة اهله حينما يجتمعون وحينما يتضامنون في ود واخاء ومحبة ....هنا .. وهناك

هكذا عرفنا العالم ...... أهل حب ورباط .. أهل مكرمة ونجدة
هكذا علق علينا أهل عروبتنا ..... حينما قالوا .... انهم يعرفون كيف يحبون بعضهم .....
وهكذا ضربنا أروع مثال حي على قوة علاقتنا ببعضنا ...

أعطانا الله القلوب الطيبة .. فله الحمد على كرم عطائه وجوده وسخائه فيما اعطى
ورزقنا حب وتقبل الاخر .. فضربنا أروع الامثلة في بلاد المهجر اينما حلت ِسفارة السوداني ...

فهل ..... لديك أدنى شك ...................... في أن مدني هي الجزء الاصيل وفلذة الكبد ....

انها وطنك ................. والله انها .... وطنك ......
كفاك أنك تحملين تأشيرة الدخول اليها ....................... وهي ( طيبة القلب ونبل المقاصد وروعة الحضور )

عايزة ياتو تصريح تاني ......................

جوازك Already دخل قلوبنا

[الامين]

بسم الله الرحمن الرحيم

المواطنة : غفران .............

( فانتازيا ارتجالية )

( يسر مدينة الاحلام مدني أن ترحب بقدومك اليها وتتمنى لك اقامة طيبة في ربوعها وهي هنا اذ تتشرف بحضوركم اذ تدعوكم لحضور حفل استقبالها الاول والذي اعد على شرفكم )

المكان : اي بيت تحبيهو في مدني ....
الزمان : لحظة دخولك مدني لغاية ماتزهجي مننا )

شكرا جزيلا
اسرة واعضاء حكومة جمهورية مدني العاشقة

[معتز محمد طه]

السلام عليكم ورحمه تعالي وبركاته
لقد قرات ماكتب احد الاعضاء عن هل المنتدي لجميع ولا لاهل مدني اعتقد ان الذين صمموا المنتدي لم يكن في فكرهم جعل هذا المنتدي لاهل ودمدني حتي تكون هنالك استفاده لجميع وانا متاكد وانا ليس من مدينه ودمدني ولا اقول هذا الكلام حتي اشارك بل حتي الواحد يستطيع ان يستفيد من المنتدي وان يقدم هو لمنتدي
فالمنتدي لجميع
حتي يستفيد الكل بخبرات الاخرين واذا اراد اي زول معلومه يجدها ببسطانه من اي مدني
مدينه ودمدني صغيره وتفتقد الي الكثير من الكتاب والمهندسين والمهره في شتي المجالات لذلك انا متاكد سوف يحتاجون الي ناس من الخارج وانا واثق من هذا الكلام لاني كنت يوم من الايام طالب فيها
انا خريج كمبيوتر والله انا متاكد مافي حد درس كمبيوتر موجود في مدني ولا استفاد شي الا بعد طلع واستفاد من الاخرين
لذلك ارجو ان لايفهم الناس المنتدي خاص
تحياتي

[الزبير محمد عبدالفضيل]

الاخت العزيزه غفران

انا من المتابعات لمواضيعك الجميله وعجبني قلمك وما تكتبيه

وبعدين يابت

من اول ما سجلت معانا اعتبرناك كاخت لينا طوالي

بغض النظر عن مكانك خارج مدني او داخلها

وزي ما زكر ابوروان هو ما مقتصر علي اولاد او بنات مدني بس

بل تجدينا بنرحب ترحيب حاااااار بكل من يدخل عضو جديد وصدقيني ما قاعدين نعاين هو اصلا جاي من اي مكان

[غفران]

اخواني
ياسر - الامين- معتز - السفير
اشكرم جزيل الشكر اخواني والله كلامكم ده بالدنيا عندي انتو فعلا اخواني ربنا اخليكم لي
اخي الامين مشكور علي الدعوه وتزكر انت اول واحد حزورك في مدني الحبيبه بس عايزه منك ترحيب حار طبعا بعدين شرف لي اني ازور مدني واهلها الطيبين

[الامين]

بسم الله الرحمن الرحيم
والصلاة والسلام على رسو ل الله الكريم

اختى غفران :

تحياتي واحتراماتي ....

أولا : حضورك شرف لينا ونزولك مدني هو نزول مشتاق الى مدينته الحبيبة ولا انتي نسيتي انك من مدني ....
ثانيا: والله لقد فتحت علي باب من أ بواب حزني الكامن في صدري .. بعد ان حاولت مرارا ان أخفيه ..... ياليتني أكون في أحضان مدينتي الحبيبة ... فأنا الان بعيد عنها ... وياريت لو الظروف تسمح بالزيارة ........

على العموم ... شكرا ليك واكيد زيارتك للاهل هناك .... ستكون اروع بالتأكيد وانا متأكد انو حاتلاقي اهل مدني كلها بيرحبوا بيك .

وشكرا على اختيارك لشخصنا الضعيف لللزيارة

( وزي ماقاعد ادعو ليك .... عليك الله ادعي لي ...)

[غفران]

اخي خالد هاشم انا اسفه جدا يمكن تكون ملاحظ اني ما رديت عليك بس ده مش القصد اني ما ارد رغم اني شفت الانت كتبته والله بشكرك من قلبي واعزرني اخي انت فعلا اخ عزيز واسفه مر تانيه ومشكور ااخي وعلي فكره وصيتك ما بنساها يعني لو في حاجه ضايقتني اقولها علي طول من غير حد افك عقدة لساني تشكر اخي ربنا اخليك لي يا رب انشاءلله

[سواااح]

الرائعة غفران ...
تحية اجلال لهامتك العالية ..
دائما اقول .. المنتديات مساحة للتواصل والعطاء حتي تدوم المحبة الصادقة والإلفة بين الجميع ..
ويكفي ان المنتدي جمعنا بانسانة جميلة وراقية بحجم انسانك
كلنا اخوة .. وكلنا ابناء لوطن المليون ميل