حكاية تضحك الغنماية........... ابوي نساني؟!!!!!!!! ادخل وشوف

[سوار الياسمين]

السلام عليك ورحمة الله وبركاته

اخواني واخواتي في المنتدى حبيت اشاركم في الحكاية الغريبة الي حصلتلي من يومين مع الحاج (ابوي)

كنا بسلامتكم راجعين بالمساء من الشغل انا والحاج وكنا عايزين نمر على الصرافة عشان نسحب قروش

قام الحاج وقف في مجمع تجاري بدون ما يقيف في الباركن على اساس ما لقليه واحد

المهم قلتا خليهو ينزل هو في الاول لما يخلص بعدين انزل اسحب انا

ولما رجع الحاج قبل ما يقعد في السيارة نزلت انا ورحت وسحبت لما رجعت للسيارة ما لقيت ليكم الحاج

قعتى اعاين يمين شمال بدون فايدة قلتى يمكن لقى ليهو باركن انمشي نفتش ولقيت ليكم فعلا سيارة زي بتاعتنا

بالضبط فتحتها وعايزة اقعد (ملحوظة : انا كنت خاتة الموبايل في باب العربية اول ما فتحتى الباب قلتى عشان يمكن

يكون وقع ولا شي لقيتو مافي ولما عاينتى للسواق القى لقيكم واحد هندي خخخخخخ كنت عايزة اجن طبعاً هو على

العليهو ما فتح خشمو ولا قال ده منو العايزة تركب ولا اي شي بس لقيتو ليكم مصهضب... طوالي قفلتى الباب لمان

قربتى اخلعو من الخلعة الي فيني وفتشتى في اي حتى عشان قلتى القى ابوي ما لقيتو ((عايزة اجن طبعا))

وبعد شوية القى زول بيضرب بوري وراي طبعا لقيتو ليكم الحاج وقاعد يكركر من الضحك لمان شرق ((اسم الله

عليهو )) سألتو كان وين اختفى لقيتو ما مجمع من كثر الضحك وانا مستغربى ودمي فاير

اتخيلووو كان رده شنو............


قال انو نسى اني كنت معاهو ؟!!!!!!!!!!!!!!! وانا طبعا شغالة مع ابوي :confused: وكل يوم مقابلاهو يجي يقول انو

نساني كيف يعني (( عملتى من الحبة قبة طبعاً )) قال لنو ما عاين في الكرسي الجنبو الا لما وصل قريب للبيت

وبعدبين اتفاجأ اني ما في السيارة انا بنتو الوحيدة لو كنى عشرة كنت قلنا معليش لاكن وحدة وينساني

طبعا الحاج لحد اسه بيضحك وقلتى ليهو الا اقول للناس المنتدى على الحكاية

والحاج طبعا مستني ردكم :)

فما تبخلوا عليهو بالرد

وتحيااااااااتي للجميع

[مكتول مدنى]

والله بالجد حكايتك ابداع والضحك شرطنى وقربت اشرق بالجد والحق الحاج{ابوك} لكن الله ستر لان شرقتى كعبة لكن حكايتة نسيتو ليك بالجد ما قادر اركز معاها لكن الحاج معذور للمشغوليات وانت براك قلتى الشغل لحدى المساء يعنى اقوى الناس تركيزا لما تجى المواعيد دى تلقيه مسح بس اعملى حسابك ما تتنسى فى حتة مقطوعة وتكونى لامعاك قروش لا موبايل

[ياسر فقيري]

والله يا سوار بالغتي عديل كدا...
وحفاظاً على سلامة أختنا الغالية سوار الياسمين إهداء خاص عبارة عن سلسل طويل تتربط مع الحاج في يدو لأن عملية النسيان دي ممكن تتكرر ونبقى في حيص بيص ....

[بابكر]

[[ والله انا لو منك امشى اتزوج طوالى وخليهو يلقى ليهو بنت :d عشان ينساها تانى00[ بالمناسبه انا ياسوار عندى بنت واحده زيك

[الوفي]

تحياتي لأختنا في المنتدى سوار
اولا فعلا ضحكنا من قلبنا والله وابداااااااااااااااااااااااع يعني حاجه كدى ما تخلص على قول ناس مدني
ولكن ردي للحاج والله ياخ ما معذووووووووووووووووور بت واحده هي او يكون في شي شاغل بالو تصدقي يا سوار يكون شايل هم يرجع البيت ويرتاح ويتعشى ويشوفكم بعين نشيطه ما عين مارقه من الشغل وتعبانه
عموما اقدر اقول ليك يا سوار ولا يهمك يا زوله وانتي تاني ابقى حريصه اوعك تنزلي من العربيه زاتو
اما الحاج فاقدر اقول ليهو ربنا يديك الصحه والعافيه ويطول عمرك ويبيض خطوتك وانا متاكد هفوة ليس إلا
اشكركم
تحياتي الوفيه

[سواااح]

والله يا سوار الياسمين
اولا: حمدا لله علي السلامة ..
ثانيا:كويس انو السواق الهندي جاتو حالة تتنييح ..
ثالثا:الوالد ربنا يديهو العافية معذور مادام نحنا الشباب بننسي ..
وانا شخصيا واحد من الناس الحاجة اللي عايز اعملها اذا ما كتبتها في الاجندة فعليها السلام ..
افتكر انو الناس محتاجة لتنشيط الذاكرة وممكن يكون ذلك بان نحاول ننسي مشاكل العمل في مكانها
حتي نعطي الاخرين فرصتهم في مشاركة وجودنا وبالاخص الاسرة.

*سوار الياسمين .. المرة الجايه لما تمشي الصراف انزلي انتي اولا وانشاء الله ما ينساك تاني.

مشكورة اختي علي الابتسامة.

[سوار الياسمين]

اخي العزيز مكتول مدني

حقي راح كان تاني ما عملتى حسابي

مراقبنا الاخ فقيري

يا لهوي لو ابوي حيعمل بنصيحتك ويربطني بسلسة ما انا البروح فيها

وتحيااااتي ليكم على مشاركتكم

[سوار الياسمين]

المشرف القدير بابكر

لو ابوي قرا تعليقك ده فعلا حيعمل بنصيحة ياسر فقيري

وربنا يخليلك بنتك وتفرح بيها انشاء الله


اخونا المميز دائماً الوفي

تحيااااتي الكبيرة ليك على مشاركتك وفعلا زي ما قاتي ان الحاج عايز يصل البيت باي طريقة وربنا يسمع منك

ويديهو الصحة والعافية وتاني كان نزلتى رجلي على رجلو

وما عدمناك يا الغالي


عزيزنا سواح احتراماتي ليك

اولا الله يسلمك

ومن ناحية النسيان فانا ابيض يا ورد بنسى بسرعة ما تتخيلها الا الحاجة العندي فيها غرض

وشكرا ليك على ردك الكريم وما عدمناك

[مرتضى ساتى]

ربنا يديك العافيه وادى ابوك العافيه صراحه انا
ضحكت لمن دموعى نزلت

[الشريف الهندي]

سوار الياسمين

أولا : ابوك والله ماليه حق .... وكلميه بكدا
ثانياً: انتي زاتك دورك ميت مادام سمحتي بأن ينساك ..اذن انت ناسياهو وكمان منشغله عنو ...
ثالثاً : زي ماقالوا الجماعه انزلي انتي في الاول
رابعا : أبوك عذرناهو لكن الباقي عليك انتي خلي بالك أكتر من أبوك
خامساً : اسمعي كلام مشرفنا بابكر لكن برضو ماتخليهو

وليك ولأبوك أحلى تحيه

وقولي ليه انت أحلى أب
ياربي يطول ليكي في عمره ويديهو العافيه وتاني ماينساكي

[سوار الياسمين]

اخي مرتضى ساتي

تحياتي الكبيرة ليك وشفتى الابوي بيعملوا فيني

يالا الحمد لله على كل حال والله يستر من الباقي

[سوار الياسمين]

الفعال دوما الشريف المهندي


دوري ميت كيف ازا من الصباحة لحد المساء انا معاه في الشغل لانو هو مديري اكثر من كدة اعمل شنو

((والله يعينو علي ساااااااااااي))

من ناحية الوصية بتاعة عمنا بابكر هههه فما توصي حريص

وفعلا يا اخواني ابوي ده اعظم انسان في الدنيا وربنا يديه طولة العمر

ويفرح بي كدي يا يمة وانا في بيت العدل انشاء الله

(( يا حاقدين ما تقولو آآآآآمين))

وتحياتي ليك وما تحرمنا من مواضيعك

[الشريف الهندي]

آآآآآآآآآآآآآآآآآآآآآآآآآآآآآآآآآآآآآ

مممممممممممممممممممم
يييييييييييييييييييييييييييييي
نننننننننننننننننننننننننننننن
كده كويس بالطول والعرض واكبر خط

طيب علموك قولة أمين وجمعاً دي ما مرت عليك

[Jamal Elmahi]

العزيزه.....سوار الياسمين....
أبوك والله حاشاه ماغلطان....وليهو حق ينساك مادام أنتي لاصقه فيهو أربعه وعشرين ساعه....يا بت أميّ ما تفرزي عيشتك وتخلي أبوك في حالو هو ناقصك انتي كمان ....أتلحلحي وشوفي ليك عريس وأتخارجي بدل البهدلا دي كل يوم ناسنك في حتّه....والله المرّه الجايه ما يجيك راجع....قالت نساني قال...


جمال الماحي

[سوار الياسمين]

الشريف المهندي

كدة كويس خالص

وآآآآآآآآمين وجمعاًاااااااااااااااا انشاء الله

تلقليك يايمة كدي بنت حلال تنهي حياتك معاها

آآآآآ عفوا قصدي تبدى حياتك معاها

(( قول آمين وجمعاًً ))

[سوار الياسمين]

اخوي جمال الماحي

انا برضي بقول كدة يعني صحي الحاج معزور

وانا الافرز عيشتي ولا هي متتفرز من عندها

يا اخي كله بيد الله تعالى



(( تعال هنا انتى ابوي ده شكلليك ولا حاجة مضايق مني كدة ))


آل اتلحلحي آل (كلام مصرين )

[ليمياء]

لكن ما حكاية تجنن عديل
انتي زاتك قلبك قوي يا سوار والله لو دي انا كان مت قبل ارجع البيت

[أبوريلان]

أختنا سوار الياسمين

سلامااااااااااااااااااات

كدى خلينا من أبوك النساك دا ، أنا بضحك فى الهندى العملتى ليهو زلعه ده ، موقفو شنو ويكون لحدى الآن مخلوع ومستغرب !!

[ناصر الباشا]

حقيقة يا سوار الياسمين حكاية تضحك الغنامية و انا مع رد استاذنا فقيري

شوفي ليك سلسلة و اتربطي معاه او لما تنزلوا في مكان اضمني المفتاح

اول في جيبك ،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

[rasheed]

والله يا سوار يا أبوك ده قاصد عديل وعاوز تفكري تشوفي ليك زول ما ينساك عشان كده عمل الحاجة ديه وأظنك عاصراه عصر شديد ،، يعني في الدوام ده الواحد بعد مرات بلقى راحتو وأنتي شغاله ليه حرس ،، وبصراحة أنتي والحاجة مكترنها عليه ،، يعني في البيت حرس وفي الشغل حرس معقول ،، وبعدين يا أختي أنتي لمان أشتغلت زي ما قلت ومع أبوك ما تفكي منو وتريحيه خلاص ، يقعد يسكك لمتين ،، الروضة المدرسة بمراحلها المختلفة الجامعة وكمان الشغل حرااااااااااااااااااااااااااام عليك فكي الراجل شوية ،، وبعدين كان كلامي ده ما صاح والحاج رافع الراية يعني أحسن تاني تشيل المفتاح بتاع العربية وبتاع الشقة وبتاع المكتب وتختيهم عندك عشان الحصار يكون محكم ،، ولا كيف يا حاج الله يديك العافية ،، لكن بقول أنو أنت أخير من صاحبتنا اللي ناسها أبوها في العربية لحدي الساعة تالته صباحاً والكلام ده في مدني والمذكور من الدرجة ومشى معاه بنتو عشان يجيبوا الغاز وطبعاً زمان في مدني الغاز في محلتين الخواجة أبو شمس والتاني ما بتذكر أسمو لكن قريب من أبو شمس اللي كان جنب حلواني الخواجة (( مبنى البنك الفرنسي على ما أعتقد الآن )) وجنب أبو الجون (( النقلتي )) والتاني في نفس البلوك بس فاتح على دواجن خليفة يعني قريب من كشك بتاع الفول )) المهم أخونا بعد ما جاب الغاز لقى ليك أصحابوا وكان ده في زمن الجاهلية الوقت داك يعني قبل قوانين سبتمبر (( قوانين الشريعة 1983 )) فعمنا لقى ليك أصحابوا وكسح ليك معاهم وقعد قعدتوا لحدي الساعة تالته صباحاً وطبعاً البت المسكينة لمان أبوها ما جاء نامت في العربية (( الزمن كان بخير والدنيا أمان )) تخيلي لحدي ما أتذكر الحاج بعد داك وجاء مخلوع وحالتو يرثى لها بس لقى ليك البت نائمة 00 تحياتي للحاج وقولي ليه يا غريب يلا يلا لبلدك ،، يلا لبلدك وسوق معاك بتك وسلام وما تنسي تشيلي المفتاح وتتعلمي السواقة وتشيلي معاك جلابية وعمه تختيهم وراء في الضهرية (( الشنطة)) عشان كان حصلت حاجة زي دي تلبسيهم وتسوقي لحدي ما ربنا يفرجها على الحرمات هنا إذا كنت في المملكة ،، وبعدين الموبايل مشحون وحق اللموزين ضروري وتاني سلام أخير ،، وما بقول ربنا ما يفرقكم عشان تقطعي وشك من الحاج ده وتريحيه :eek: :eek: :confused: :mad: :mad: ،،

[سوار الياسمين]

عزيزتي لمياء

تحيااتي ليك واشكرك على تشريفك لي

وبعد الشر عليكي وانشاء الله ماتحصل لحد

ويديك العافية

[سوار الياسمين]

عزيزتي لمياء

تحيااتي ليك واشكرك على تشريفك لي

وبعد الشر عليكي وانشاء الله ماتحصل لحد

ويديك العافية


المشرف القدير ميرلان

انا كيف عملتليو زلعة ومخلوع من شنو بالجد انا ما فاهمة


يا ريت تفهمي الحاصل شنو

مستنياك



اخي ميرلان

[سوار الياسمين]

اخي الرائع رشيد

لك كل اتحايا المعطرة بكل الورود

وهي من ناحية الحصار فالحصار شديد ((الله يعين الحاج )) ولا حصار ليبيا ياخي انا قبل الشغل لما اعرف انو في سكرتيرة جديدة جات تشتغل كنت بنجدو نجاض عشان اعرفها عشان كدة تقريبا كل السكرتيرات الكانو قبلي بقو صحباتي

ولو من ناحية الفكة فابوي ابدا ما عايز يفكني ياخي انا حيلتو على اربعة اولاد ويفكني بالسهولة ده وصدقني هو اكثر شي بيكون عايز يعملو بعد الشغل انو يرجع للحاجة ويتونس معاها مع يوم طويل من الشقى الله يديهم العافية ((شادية ورشدي اباظة ساي)) ماشاء الله

والحاج بيرسل تحياتو للكل وبقول ليك هو خلاص ما قاعد زاتو في البلد ده ومقرر انو يمشي السودان نهائي بإذن اللهيقعد في بيتو مرتاح البال (( الله يديه العافية ))

وما تخاف عاقدة احاول مع ابوي اني اسوق لي سنة ونص وشكلي كدى بعد الحادثة ده حيقتنع قريب ونحمد الله اننا ما في السعودية

وتحياااااااااااااتي الكبيييييييييييييييرة ليك على تشريفك الجميل (( والحكاية الحشرتها لينا في النص هههه))

[صالح ابوشوارب]

بتنا سوار الياسمين

تحياتى لوالدك وقولى ليه عمى ابو شوارب بيقول ليك الماخد عقلك يتهنى بيهو
لكن اذا الوالدة مكانك كان بيقدر ينساها ؟

[سوار الياسمين]

عمي العزيز ابوشوارب

ازيك يا عمو واشكرك على تشريفك الكبير لي

وبالنسبة لجواب سؤالك فده من سابع المستحيلات

لانو الحاجة هي الي ماخدة عقله

والله يهني سعيد بسعيدة

ههههههههههه

وتحياتي ليك ياعمو وما عدمناك

[rasheed]

عفواً يا حبايبنا تكرر الموضوع لخطاء ما

[rasheed]

حلوة يا سوار والله يهني سعيد بسعيدة عجبتني والظاهر الحكاية ما عاوزة مننا تحشر ونقة والله يخليك لسعيد وسعيدة وأديكم العافية والحمد لله أنتو ما هنا ،، وتحياتي لرشدي أباظة وشادية يا غادة عادل ومبروك جالك 0000 وسلام 00

[فوزيه]

الاخت سوار الياسمين

اول شي اسمك حلو ... مع انو غريب شويه

بعدين قصتك قطعت مصاريني من الضحك ... وسمعتها قبل كده في جريده في موضوع مذكرات زوجه

وبتعاتب فيها راجلها

انو فات يجيبها من السوق هي فتحت الباب بس نست شي قامت قفلتو ورجعت تاني وجات ما لقتو

قامت ضربت ليهو حتن التفت في الكرسي مخلوع ولقاها ما جنبها

قال ليها افتكرتك ركبتي هههههههههههههه

الله يعين الرجال بس

وحلها ابقي عشره علي ابوك ده وختي بالك عليهو

وانتي بعد ده عرفتي حاجه عشان تاني تقدري تلحقي روحك لو حصلت حاجه زي دي

تكوني متوقعاها بعدين

[الزبير محمد عبدالفضيل]

وقولي ليه انت أحلى أب
ياربي يطول ليكي في عمره ويديهو العافيه وتاني ماينساكي
__________________

[سوار الياسمين]

المميز دوما ودائما رشيد

تحياتك وصلت لابطال الفيلم ووبيوعدوك انهم يدوك دور بسيط الفيلم الجاي

هههههه اوعى يدوك دور الهندي خخخخخخخخخخخ

وماعدمناك

[سوار الياسمين]

اختي الجديدة فوزية

تحياتي ليك واشكر تشريفك لموضوعي

يحلي ايامك وهو اسمي حلاوتو في غرابتو

اما وصيتك لي فاعمل على قول اهلي المصرين

واحطهى حلقى في وداني

وما عدمناك