أنا يا غربة من بلاد السودان

[سمل الحلفاوى]

*أنا يا غربة من بلاد السودان ** بلاداً فيها الضيف مالك الدار

إن درتي كيفين الكرم فيها *** متل نيلها البيسابق كل الأنهار

في شمالا النخيل زي شموخا *** سماحة أهلو متل الزهر النوَّار

وفي جنوبـا مَرضَع النيل *** بيروي ربوع البلاد والأمصار

في شرقها اليم بِلاطف ضفافا *** متل حنان ضمة الأم للصغار

وفي غربـها دهب الرمال *** زي سيوف مسلولة لجيش جرار

في وسِطا شِهِد ليها التأريخ *** بطرد المحتل بيدين جنود أحرار

بناتـا لهـنّ مروءة الشجعـان *** شهامة رجالا متل الإعصار

وأطفالا رمز البراءة والصـفاء *** في الجد جد سماتم متل الكبار

فارقنا الأهل والأحبة والخلان *** وعيونّا لبُعادُم من دموعا تحتار

إن فارقنا الوطن هو ما بيفارقنا *** ونحنا ليهو بعد الوالدين أبرار

حُكمك ياغربة ضوّقنا الويل *** وسَّدنا الألم لبَّّسنا الغم شعار

وعزة النفس وكرامة الرجال *** رفسا بكرعين اللئام والفجار

شقيت وإستنيت يوم ورا يوم *** لوعودك بلقيا الحبيب المختار

شنو الجنيتو غير إني مستاء *** وظلمك لَي ، العدو فيهو بحتار

ما شفت منك غير الحقد ألوان *** وبشاشة وَشِّك مليانة أغدار

ما جيتك من بلدي والله للذل *** عزتي منحوتة على كل منار

تعالي يوم بين أهلي وأرضي *** حتشوفي فزعة شعبها المغوار

حتقعدي على ضفاف النيل *** وحتقولي يا ريتو المِنّي ما صار

[سمل الحلفاوى]

ياوطني بتـأوه وبتحسر لفراقــك ***** بتذكرك زي أم وجنين في حشاهـا
ذكــراي مـن صرختـي الأولــى ***** وقت ضمة يمة والفرحة بمحيَّـاهـا
وقت ما بعرف شكــوَت وجعـي ***** بصرخ للمسة حنـانها فمـا أوفـاهـا
بشوف شفقت قلُيـبا في عينيـهــــا ***** فسبحـان الخلقـا والفطرا وسـوّاهـا
كل يـــوم بشـرع سفيـــنة الصبـر***** وبَعِد ليوم صبـاي وأبحر لرضاهــا
فــي تـلتي الأول لســن العشـــرا***** ضــاع الأمل بين ذكراهـا وثراهــا
فرحماهـا من الله العفــوّ الرحمـن***** فالجنـة مثواهـا والكــوثـر سقيـاهـا
جيتك ياوطني أشكي ليـــك همي ***** الرسمَتـو الأقــدار بـأمــر مـولاهـا
مـن شرقــــك أنا ود حـوريــتــو ***** لآلي سـواكن من جيــدا ورثنـــاهـا
شاركَتنا فرحة صبـانا وأحلامنـا ***** رافقتـنا بحنيـا لأيـــام مـا احـــلاهـا
وقت الدغش بقيف بشبــاك بيتنـا ***** بنتظر صـفرة شمســــها وضيـــاهـا
بدندن أهازيج طفل مليـــان فرح *****بيحكي أطماحـو وبنقشا في سماهـا
بيشيل خرتايتو بعد شربة الشـاي *****بإطـلاقة بخور تيمـــان مــا أنـداهـا
بيــمش مدرستــو بزيـــو الأزرق ***** برفقة خـلو ودردشـة مـا أصفــاهـا
وقت رجعتـو مع أقرانـو وخلانو ***** قرقرة ضحك وحكــاوي وفكــاهـا
وقت العصـرية بيلعب الدافــوري ***** لعبـة الطفولـة والصبا البيــهواهـا
يـوم الجمعـة بينتـظر لمَّــة الأهل ***** وجلسة خالاتو كان دايماً بيتمنـاهـا
فــي العطـــلات بتكتـــرأفراحـــو ***** في بحـرهـا وأرضهــا وفضـــاهـا
بيبشر ليهـــــو البـحر بامـواجــو*****والأسمـــــاك بتفرحبيـهو بلقيــــاهـا
وقت القمرا بطـل بهيبـة جمـــالا ***** خيالو بسرح في عروس وبهــاهـا
كبر وكبرت احــلامـو وآمـــــالو ***** بينتظر يـــوم يفديــــك بـــعد الإهـا
شاف بلا د الفرنج ورغد معـاشا ***** شاف فيها جمال الدنا في ارجــاهـا
وشافك يــا وطن بتتـألم لأرضك ***** الحفَّرا الرصـاص وبـالــدم رواهـا
ركب براقـــو وبصهلـة فرحـتــــو***** روحو في جنوبـك الموت هـواهـا
شاف جنـــوبك زي طفلة رضيعة ***** تيّمتا الحروب بين ليـلا وضحـاهـا
وسط أصوات البنـــادق بتضحك ***** وهمهمة الجند بتظن واحد دعـاهـا
شـاف رجـالك في الوغى يا وطن***** نمـور في الكـون مـا في ســواهـا
وقت الحمـا لبسوا شــارة السـرور***** لشـوفة الحور بشجاعة ما ألفناهـا
طــال بيــــنا العــهد بوقف الحـرب***** بسبب أحقـاد، السلم مـا هو مناهـا
ضحيــت عشـــانا كتيــر يـا وطن ***** بدماء روح شبـابـك ما أزكـــــاهـا
وقت شاف السـلام بيتسـلق قممــو ***** للهفتو قال منبع النيـل في عـلاهـا
شافــو بيبتســم من شـرفة غربتـــو***** بتيابواـالبيض زي نجوم في دجاها
ما فارقنــاك والله ياالحبيـب جفـــا ***** من نجـد بنرسليك أشواقنا وشـذاها
متيـن يكتمل بقربك هنانـا وأٌنسانـا ***** ونبني أرضك من تــرابا وميــاهـا
بــاب السـلام لكل أولادك ياوطن ***** كفانا ألم كل الهموم السلام محاهـا
كــل العــالم بنتظر يــوم عرسـك ***** بيشاهدو هلال حريرتك وسنـــاهـا
فالله .. الله .. يا سودانا قـم لجَدَّك ***** وأكرم أرضك وقوة الله ترعـــاهـا

[zoolfrda]

سمل الحلفاوي
محتار اقولك ايه ما لي معاك صراح..يكفيك حنين قلبي اللي انته زدته جراح

[سمل الحلفاوى]

شكراً على الكلام الطيب