المساعد الشخصي الرقمي

مشاهدة النسخة كاملة : أنا شفت يا بت في المنام



admin
29-05-2004, 08:43 PM
أنا شفت يا بت في المنام
(إلى ابنتي لينة بطاقة اعتذار وعهد ورؤى)
شعر هاشم صديق
تتأملي.....
تتحيري.....
عمرك يصير
سنّة قلم
جوّة الألم
مجبور يناهد
وينغمس
و... تتفتحي
زي وردة
في صخر الجبل
وتفجي في اللجة
الأمل
وتشوفي جرحنا
في الشمس

ممنوع يطول
غصن الحلم
ممنوع نبل
ريق الهمس.
زمنا مصنقر
في الهوان
ظلماً كسر
عود الزمان
كضباً صبح
فرس الرهان
جبلاً نزف
حالاً وقف
كيف يمش؟
وحزنا وقد
ما بتهبش

تتململي...
تلملمي...
وتطيري
بجناح الفراش
وتباركي
أطفال الحجارة
وتعودي
زي نفس الدغش
شايلة البشارة
وتتلفتي..
وتعايني
في وش الزمان
وتشوفي كيف
حزمة رجال
شنقو الحلم
عدموا الدبارة
كيفن صبح
طعم الفجر
جمرة حقارة
كيفن صبح
بيع الضمير
بس بالإشارة
كيفن سكن
صوت الديار
جوه المغارة
كيفن سقط شرف الخصام
كيفن رخص رطل الحرام
كيفن كمل
لحم الكلام
لامن وصل
حتى العضام
كيفن صبح سوق الكضب
حرفة وشطارة
كيفن صبح
حق الفطور
داير بصارة

أنا شفت يابت
في المنام
فرساً ينقز
في الخلا
ناراً تحتحت
في البيوت
رعداً كتل
روح السكوت
ملكاً مصنقع
للسما
وخنجر ملبّد
في الضرا
وشمساً بتشرق
من ورا.

أنا شفت يا بت
في المنام
سبعين برق
ضووا الشرق
وأبريق
وصرحين من سبأ
ونوبة ونحاس
ردحن دغش
جابو النبأ
وسيفين يبارزن
في الهوا
وسرجين
على بغل الحواة
ومسرح كبير
معروش وعالي
ومستدير
فوقو كان
بطلاً بطير
وجمهورو قاعد
في الحصير
عيونو شاردات
لي ورا
لاكنو لا شاف
لا رأى

أنا شفت يا بت
في المنام
وإلي بيعمر
في المقابر
وأسراب نسور
سودا وكواسر
سرقن دغش
سور الكتاب
طارن وغابن
في السراب
دارت على الوالي
الدواير
وفاساً كسر
خشب المنابر
وجوقة أفاعي
اتسابقن
حلبت سمومها
على المحابر

أنا شفت يا بت
في المنام
نهراً يضيع
جوة الحناجر
وكفاً نجس
فوق الكتاب
مشنوقة في عروقو
الضماير
وعبئاً حرق
قمح الصدور
وغراب يرفرف في البكور
وإسفين بعج
ضحك المحاجر

أنا شفت يا بت
في المنام
(بطلاً) يموت
في كل مرة
وينطمر
جوة الدفاتر
تنزل على القصة
الستاير
ويرجع (يقوم)
حاوي وحريف
يعرض فصول
نفس المناظر

أنا شفت يا بت
في المنام
ساقية بتدور
ساعة السحور
تغرف عذاب
عطش الحفاير
ومطراً نزل
رجّه وكلام
وجفير رقد
فوق الحكام
من فوقو كان
جزمة مغامر

أنا شفت يا بت
في المنام
نجمة بتبارز
في المسا
وضحكة بترش
نار القصب
وأرضه بتقرقر
في العصا
ومكّاً محنط
بنبرش
بي طولو
من كرسي العرش
ويرقد ممدد
في الحصا

أنا شفت يا بت
في المنام
فجراً بتاوق
من شفق
وبرقاً لبس
توب التخا
وجبلاً مخضر
بالصفق
وسيوف بتنزل من رفوف
ترقص
على شبق الدفوف
خاطر
على الحاضر شرق

أنا شفت يا بت
في المنام
وتراً يهز
قلب الحلم
وبرداً غسل
ذنب النضم
وزفرة بتولع
في الورق
وأكليل من الرأس
انسرق
وجموع عباد
لابسين خِرف
وأعصار
محصن بالدرق

أنا شفت يا بت
في المنام
سيلاً دفر باب
الملك
هدير يعشرق
بالغضب
كفاً كسر
سور السلك
صراخ يصل
وش السحاب
ناراً تبقبق
في الخراب
وغبنا يدشدش
في الكلاب

أنا شفت يا بت
في المنام
روحك تلوح
للفجر
ووراك وشوش
ناساً سمر
تتشابا
لي ليلة القدر
أيديك رافعات
الكتاب
والناس صفوف
واحدة وقُراب
بتنادي
لي يوم الحساب
وينداس صنم
زمناً حقير
والمطرة تنزل
في الحفير
والدنيا ما ترجع
رهاب.

تتأملي؟!
تتحيري؟!
...
عمرك يصير
سنة قلم
جوة الألم
مجبور يناهد
وينغمس
و... تتفحي
زي ورده
في صخر الجبل
وتفجي في اللجة
الأمل
وتشوفي جرحنا
في الشمس

لازم يطول
غصن الحلم
لازم نبل
ريق الهمس
ينطمر
زمن الهوان
وينجبر
كسر الزمان
نبقى ونكون
فرس الرهان
لازم نصل
قرص العسل
أيدينا تحلبو
ويتلمس
لازم على الطوفان
نعوم
لازم (نقوم)
من موت أمس

أنا شفت يا بت
في المنام
طيراً رهيب
رف وختف
تاج المكوك
وشفير طعن
كرش البنوك
وخشوم عباد
بعد الصيام
رجعت تلوك

أنا شفت يا بت
في المنام
فرساً ينقز في الخلا
وملكاً مصنقع
للسما
وخنجر ملبد
في الضرا
وشمساً بتشرق
من ورا

أنا شفت يا بت
في المنام
الصيف يجابد
في السقط
وطير الحروف
فوق المداين
والجروف
حلق يفتش
للنقط
كشف الحساب
يصبح جبل
الحيل يشد
بعد انكتل
التربة ترجع
للسقى
الطار يعود
أرض البلود
والراح
يصابح ويتلقي
وقبال يرف
طرف النبي
يصل الرسول
(لسقط لقط)

الرؤية
ما بس بالعيون
والحضرة ما شارع
زلط
والقدرة
ما طقة لسان
والعدل ما حُمرة
يفط

أنا شفت يا بت
في المنام
الدنيا تتفجر
تجوط
لكن بتنفرز
الخيوط
لكن بتنفرز
الخيوط
...
حتماً حتنفرز
الخيوط
حتماً حتنفرز
الخيوط

aborawan
30-05-2004, 05:31 AM
أنا شفت يا بت
في المنام
الدنيا تتفجر
تجوط
لكن بتنفرز
الخيوط
لكن بتنفرز
الخيوط
...
حتماً حتنفرز
الخيوط
حتماً حتنفرز
الخيوط

مهما تعكر الجو لا بد ان تحين الساعة التي يصفو فيها اسال الله ان يجعل ايامانا جميعا ايام سعادة وفرح وصفا ولا كدر اتنين من بعض

114
01-06-2004, 07:51 AM
ابداع لكن يا إدارة

rasheed
02-06-2004, 08:04 AM
أنا شفت يا بت في المنام
الصيف يجابد في السقط
وطير الحروف فوق المداين والجروف حلق يفتش للنقط
كشف الحساب يصبح جبل الحيل يشد بعد انكتل
التربة ترجع للسقى
الطار يعود أرض البلود
والراح يصابح ويتلقي
وقبال يرف طرف النبي يصل الرسول (لسقط لقط)
الرؤية ما بس بالعيون
والحضرة ما شارع زلط
والقدرة ما طقة لسان
والعدل ما حُمرة يفط
رائع ياإدارة ورائع ود صديق وبرضو أدانا الأمل أنو التربة ترجع للسقى والطار يعود أرض البلود والراح يصابح ويتلقي . التحية ليك

صائغ الحروف
02-06-2004, 08:12 AM
رائعة كروعة اهل السودان
وكتابباتهم التى تنزف جراحا
للحبيب وللوطن ولكل عاشق ولهان ودمتم

saleh farah
03-06-2004, 05:08 AM
سميت نفسك ادمين
وسماك 114 ادارة
وسمتك اختياراتك وحروفك الرائع
اسميك منو انا ؟
لقد الهبت جوارجنا وادخلتنا فى غفلة الى حنايا المبدع هاشم صديق الذى اتحاشا كتاباته لكى لا اصاب بالاحباط وانا اترنح بين القوافى
حقا انه القدر .

admin
05-06-2004, 08:44 PM
شكرا يا شباب اخجلتم تواضعنا وان كنت اعتقد الاحق بالثناء هو المبدع هاشم صديق

bshagra
24-06-2004, 10:52 AM
رايع

رايع

رايع
احسنت الاختيار

فنلت رضا الجميع

انور النور محمد
03-06-2012, 02:36 AM
عمرك يصير
سنة قلم
جوة الألم
مجبور يناهد
وينغمس
و... تتفحي
زي ورده
في صخر الجبل
وتفجي في اللجة
الأمل
وتشوفي جرحنا
في الشمس


ما اجملك وابهاك واكملك هاشم صديق

ادارة على قول 114 من زمان ما شفناك في الثقافي

دايرن نشوف الادارة في الثقافي من جديد