دكان ود الصول

[أبوبكرحامد]

نشر الأخ بابكر موضوعاً بالمنتدى العام عن زواج غريب وحدثت بعض المناوشات البريئة بينى وبين عزيز عيسى وأبوشوارب ، وقد رأيت أن ننقل هذه المشاغبات لموقع مدنى على غرار دكان ود البصير ولأن بابكر هو من كان له الفضل فى موضوعه المشار اليه اعلاه فقد خطر لى تسميته دكان ود الصول ، آمل ان يسهم الدكان فى الترويح عن النفس وان ندفع به موقع ودمدنيات الذى يعانى انيميا فى الموضوعات ، ولى قدام.
ود الماذون

[أبوبكرحامد]

سمعنا من ناس الحلة قالوا ود الصول اشترالو جهاز اسمو لابس توب وده قالوا كنبيوتر محمول ممكن اشتغل فى اى بكان فيا سبحان المنَّان.

[أبوبكرحامد]

سمعتوا بى الخواجة اللى اسمو عزيز عيسى ده خواجة مخو ضارب ودايرلو محاية من شيخى أبوشوارب ، الخواجة قال صورة ود الماذون بالأبيض والأسود ، امانة فى ذمتكم صورتى دى ان جابوا النعام آدم بعرف انها ملونة ، وانا اتصورتها للى اللوترى بتاع امريكا عشان كدى قالوا عاوزين الأضان اليمين التقول نحن خرفان عليها وسم ، بعدين ياخواجة صورتك البى قميص تحرمنى منك دى من زمن النبى صبى وقال اتصورتها فى السعودية انتا ياخوى مشيت السعودية قبال شنبك اقوم، غايتو كلامى معاك طويل ومغستى فى الأمريكان وتدنيس القرآن كلها بفشها فيك وفى نائب رئيسكم الإسمو ديك ووزيرة خارجيتكم اللا عندها راجل لاصديق ، بس خايف من شاعركم ود الماحى باين عليهو لسانو سليط .

[ابو المهتــدي]

بسم الله الرحمن الرحيم
الحبيب ود الماذون ربنا يعطيك العافية ولك الشكر في نقل الدكان اربوعنا الذي اظن ان هجير الشمش حجبت عنا كثير من الرواد 0 واتمني ان تكون الرماضة بردة شوية حتي نتب للرواد حفيانين 0
وكما قالوا عندنا شمار تقيل خاصة في الاسمنت بس الجماعة يصلوا 0
واخونا عزيز دة مرق بي طنبو ا من الجماعة كان داير تفش مغصتك اديني اضانك جاي بريك محل تفش مغصتك كدي اللجي ود الصول يفتح الدكان 0
شوفو عمايل ود البكرش 0 وابو شوارب 0 وبعدين نحكم

[ابو المهتــدي]

بسم الله الرحمن الرحيم
للاحباب توضيح بعض الشي في الشمار

الولية بقي ليها الشمار تقيل وفي خيالها موضوع السكر
ما صدقت لقت ليها كورة اسمنت والخريف علي البواب والسبلوقة تعبانة

اه لم ودابوكرش طلع لاصلاح السبلوقة ظن من ههمت الولية للسكر ظن ان الامر بجد تحول لي سكر 0 مش ذي

اخونا كرع بالكورة في راس البيت

الولية تشيل وتصيح يييييييييييييا ودابوووووكرش الاسمنت

ودبوكرش سو الدايرة واضانة طرشة 000 مع تحياتي والي شمار اخر


ولينا جلسة بس شيلوا الصبر ود الماذون عليك بوصول الجماعة وماتنس الشاي بقي اهنا ناس بانت شاهيهم دقيل بالحيل

[أبوبكرحامد]

حبابك أبو المهتدى وماغريبة تكون اول الحاضرين ماياكا كبيرنا ودليلنا وزى ماقال الكابلى " انتا فينا كبير وريدنا ليكا كتير " ، شايف ود الصول مافتح الدكان امكن ياخوى وليداتو طلعوا دكاترة عاوز اسويهو مستوصف علا نحن مابنخلى الحكيم والشفاخانة اللتنا ، غايتو ان بقا ماداير الدكان انا بشتريهو وبسميهو دكان ود الماذون تجارة قطاعى وشغل مضمون.

[ابراهيم]

عارف يا ود الماذون القميص تحرمني منك دة عاجبني جنس عجب

لا خليت طرعت حرب ولا خليت 26 يوليو ولا خليت العتبة حتى وكالة البلح

لفيت عليه كل الدروب قلت يمكن الاقى البشبهو .. لكن تخيل الدروب حرمتني منو

وباين اسم الحرمان دا ما جاء ساكت ...

اما بالنسبة لي صورتك يا ود الماذون شكلها من استديو الساعة لكن ملونة او ما ملونة دي ما بقدر افتى فيها لانو تلوين زمان بفرق من تلوين حسي ... وما عرفنا الاضان اليمين دي ايدولوجيتا شنو كدى الناس يجو يقولو لينا ...

عمنا ابو المهتدي ليك التحيات الطيبات ...

نحن في انتظار شمار الاسمنت

دكانك سمح يا ود الماذون .. عايزين نكسح دكان ود البصير رايكم شنو؟

فتكم بعافية

[أبوبكرحامد]

تشكر ابراهومة على غشوتك للدكان ، قلت فتشت لى قميص تحرمنى منك ياخى بتبالغ لأنو القميص ده موضتو انتهت سنة71 ولو عايز تشوفو الا تمشى المتحف أو تفتش فى آثار الفراعنة ، أما عن صورتى اتصورتها فى استديو فى مدينة نصر جنب الجامعة العمالية، أما استديو الساعة فمشتاق اشوف المرا البترقص قدام الأستديو ، لك تحياتى.

[عزيز عيسى]

الاخوان الحبايب ودالمأذون، ود الصول، ابوالمهتدى وابراهيم،

التحايا والاشواق يا حلوين،

الحمدلله الان البنت اتخرجت وفضيت ليكم.. والله ليكم شوق شديد اني اتناوش معاكم ومع اعمامنا ودابشوارب وودهاشم وعايزين باقي الشباب يدخلوا علشان نعيد ذكريات مدني الحلوة..

ويا ودالمأذون كثر خيرك انك نقلت الموضوع لموقع مدني علشان نقدر نلقى راحتنا فيه شويه.. لانه والله وبكل صراحة المنتدى العام بدأ يفقد طعمه.. واصبح يزغلل عيون الواحد ما تعرف تقرأ شنو وتخلي شنو.. كله كلام منقول.. والظاهر اخوانا ما استوعبوا مناشدة ابوالمهتدى وكلام ابوروان.. وما شايف أي استجابة من الاخوان حتى الان..

أنا كنت عايز اقترح عليك انك تمسيه - شفخانة ودالصول - لكن برضو الدكان مش بطال لانه الجاي والرايح لما يشوف الناس جالسين في الدكان يتونسوا يمكن تعجبه الونسة يجي يتونس معانا.

دكان ود الصول حيكون عامر.. وعندي طلب واحد من عمنا بابكر اهم حاجة انه يكون في الدكان قدرة فول مصري وطعمية ومزيرة نشرب منها موية ساقطة ويجهز لينا فيه كنبات لزوم الجلوس علشان تحلو الجلسة بعد العشاء المظبط وكباية شاي منعنشة للناس البشربوا الشاي ولو جبت لينا معاها باسطه كده من الحلواني الكبير تكون الناقصة تمت والونسة سخنت....

انت عارف يا ودالمأذون عمنا ود الصول ده من ما اشترالو كنبوتر لابس توب شايله وماشي كداري ولافي بيه الاحياء كلها في مدني ابتداءا من حي البوليس.. ومن حلة لي حلة لغاية ما وصل فداسي يوريه أهل ابوالمهتدى.. وهو شايل اللبس توب ده في ايده ذكرني ناس تجار الشنطة زمان..

أها نخش في موضوع قميصي الجننكم ده.. والله قميصي اللى سميتوه تحرمني منك ده كان عاجبني بشكل.. تلقاني شاكيه ليك في أي حفلة امشي احضرها في السودان.. طبعا لزوم التظاهر امام الجكس.. وبعدين يا اعمامي خالد هاشم وصالح ابوشوارب انتو عليكم الله زمان ما لبستوا قمصان تحرمني منك مع الشارلستون والجزمة الكعب العالي والحزام العريض.. في حاجة ثانية انتو نسيتوها خالص.. تتذكروا الخلال والشعر المخنفس.. انا كنت بتذكر في ناس زي ودابوشوارب كانوا مخنفسين شعرهم ولابسين جنازير في يدينهم ويمشوا كداري مخصوص علشان الناس تشوفهم.. هههههههههه..

عليك الله يا صالح انت والشرامة اصحابك فرتقتوا كم حفلة زمان.. بالاضافة للحفلة اللى وجدتوا فيها الفنان الماسك ليه عود ويغني (زيدان ابراهيم) وما عجبكم.. بس انشاء الله ما تكونوا دقيتوا وكسرتوا ليه العود في راسو.. أما انت يا ود هاشم أنا عارفك انت كنت بتاع مظاهرات يمكن تكون ده انت اللى كسرت لبات الشوارع في السوق الكبير.. انحنا لما كنا طلبه برضو كنا بنخرج مظاهرات.. بس كنا دائما مجلودين من العساكر.. كسر شديد (الله لا كسبهم)..

تقول لي يا ود المأذون تشرب محاية ود ابشوارب.. والله محايته دي الا يشربها براه.. احسن لي منها محاية اي واحد فكي جالس بالقرب من سور حديقة سليمان وقيع الله زمان.. وصورتك دي يتخيل لي أو اشك انك ملونه براك.. لكن ضحكتني بحكاية الصورة من الاضان اليمين والخرفان.. أنا زمان لما مشيت لبتاع الاستديو علشان يصورني بنفس الطريقة للجرين كارد.. بقول بتاع الاستديو ده مالو بيمسك لي في راسي ويحولني من ناحية اضاني اليمين.. يمكن ختم لي رقم على اضاني وانا ما جايب خبره.. كدى احسن اتحسس اضاني اشوفها.. لانه الناس ديل الماشية بتاعهم كلها عليها ارقام في اضنينها.

ود المأذون ..أنا لما هاجرت على السعودية كنت صغنوني وفعلا شنيباتي ما قامن.. وقميصي (تحرمني منك) ده الظاهر مجننكم كلكم.. ايه رأيك حأمشي أدور على واحد شكله كده واشتريه علشان اعيد الذكريات.. واحسن تتفشى فيني انا بدل ما اطلق ليك شاعرنا جيمي ويرشك بأبيات من الشعر الحلمنتيشي يقوم يقلب ليك قميصك اللابسه مع البدلة بتاعتك دى تحرمني منك..

يا برهوته.. زي قميصي ده صدقني لو طفت مصر كلها ما حتلقى زيه.. شايف الفن في الخطوط ازاي يا بيه.. وبرضو ود المأذون بيقول انه موضتو انتهت من سنة 71.. اما بالنسبة لصورة ود المأذون بيقول انه اتصورها في مصر.. ارجوك توديها على الجماعة اللى بتكلموا لغات العالم في منطقة الهرم خليهم يفحصوا الصورة ويورونا هل هي صورة ملونه .. انت ايه رأيك مش يمكن واحد صعيدي لونها لود المأذون وهو ما داري.. ههههههه

وتسلموا يا شباب،

عمكم عزوز

[ابراهيم]

دكان ود الصول دة عجيب والله وجاب ذكريات عجيبة ويا ود الماذون انت لسا متذكر المرة البترقص قدام الاستديو .. طبعاً المرا ناس الاستديو بعد عملو حبة تطوير للاستديو طردوها وحولت جنب استوديو السعادة ما عارف غرامها مع الاستوديوهات شنو .. اما بخصوص قميص عزيز تحرمني قلت لي موضتو انتهت من 71 لكن البشوف عزيز قاشر بيه يقول موضتو يادوب ظهرت امبارح كان ما الصورة ابيض واسود اتخيل التصوير الملون الوكت داك ما دخل البلد وسمعت تحت تحت كدة سنة 71 كان يادوب في خمسة تلفزيونات في مدني والله اعلم بس انا ما عرفت سر تسميته تحرمني منك.

والله يا عزوز ذكرتني بالفكي الجنب حديقة وقيع الله دة .. بقصة جميلة كان عندي صحبي الله يطراه بالخير قال عايز ليه حجاب محبة كان مكسر ليه في واحدة كدة من مايو طرف وكانت عنيدة قدر ما حاول معاها حرنت بس زغنا ليك من المدرسة ومشينا جنب الحديقة لقينا الفكي قام ظبط لينا الحجاب والغريب في الامر بعد الحجاب دة البت تاني ما شفناها اصلو هههههههههههههه

ولنا عودة في رحاب الدكان

[قمر الزمان]

يديكم العافية الاعمام الاعزاء ..
طبعا مستغربين انو بت تجى الدكان لكن اسوي شنو دايرة لى سكر وشاي ومافي زول في البيت يترسل لي ... ههههههههههههه
كلامكم والله برد الروح .. انا طبعا صغنووووووووووووونة لكن معاي ناس عاشو ايامكم دى ..
والله يا ابراهيم حتى انا قصة تسمية القميص كانت شاغلانى لكن سالت منو وقالو لي انو مسمنو على اغنية عبدالعزيز المبارك (تحرمنى منك ) وانو لما غناها اول مرة كان لابسو ..
ويديكم الف عافية .. ولى عودة طبعا .. دا اذا ما عندكم مانع ..
ويا ود الماذون ليك تحية خاصة من الوالد العزيز ..

ودمتم ..

[ابو المهتــدي]

بسم الله الرحمن الرحيم
ياجماعة الخير انا شايف قميص تحرمني منك دة موضوعة سمح بلحيل
ضبعا جيلنا الما لبس تحرمني منك مالبس 0 زي حكاية حلاقة جنيات الزمن دة
القاطعنها من راسهم 0
اهو نحن في الدكان او شي وخاصة للجنيات البجي حالق رويسه زي اولاد ديك شيني ما ليهو عندنا الا ان نقد ليهو ابو شواراب وحلاقة صلعة اخر موضة وعمكم ود الصوال بتم الباقي0 طرشه من قعر الصفيحة زيت سمسم 0
ام بنتنا قمر الزمان والله ماقصرت تب طال ما جيت الدكان بي نفسك 0
اهو النوريك شي من القديم 0 والصورة دي لزوم الامتتاح للدكان عشان اخونا عزيز يضمئن شوية نرفع لية سقف انتهاء مدة موضة القميص ال اول عام 80
نهاية 28/12/ 79 كدي خلي اعمامك كل واحد عنده صورة في تلك الايام يتحفنا بيها الصورة من احدي حفلات الزفاف 0 ضبعا مش حفلة واحدة زي اليومين دي 0 ولها خلفية كبيره ولكن اختصرتها علي نفسي 0 لاننا موعودين بحفلة ود الماذون 0تسلمو

[قمر الزمان]

لك التحية العم ابو المهتدى ..
والله اعراس زمان ياحليلها .. ماحضرتها طبعا لكن بحكو لي بيها .. وياحليل ناس زمان زاتهم ..
ويا عمو عزيز والله كنت زول قيااااااااااااااافة بالقميص ..
ويديكم العافية ..

[أبوبكرحامد]

سلامات ياخواجة عزيز والبركة بالشوفة ياخوى ، بعدين ماتعمل تخرج البت سبب لغيابك سمعنا انك قبضت مرتجع الضرائب وآخر بحبحة غايتو بكلم ليك ناس المنتدى اشيلو منك مساهمة مضاعفة ، طيب خلينا من القميص تحرمنى منك أحكى لينا عن السينما المتجولة وقصة البعيو لأننا ماحضرنا الزمن داك وقالوا السينما مااكتشفوها حتى فى هوليوود وكان فى عربية فيها نظام بروجيكتر بتشغل الأفلام ، وعاوزنك تحكى لينا عن حمار الجاز وسكر المكنة وكم راس كانت بتكفى الأسرة " الراس هو معيار الوزن لسكر المكنة وليس الكيلو وذلك لمن فاتهم حسن الإستمتاع بذلك الزمن أمثالى وأمثال دفعتى ابراهيم وقمر الزمان " ، بعدين أحكى لينا عن عم قسم بتاع الجرايد وكان بيعمل شنو لما تقولو ليهو حركة ياعم قسم " على ذكر عم قسم كان والدى عليه رحمة الله مشتركاً فى مجلة هنا لندن ومجلة العربى التى كانت تصدر ملحق للأطفال اسمه العربى الصغير " والله أيام يازمان وكنا أنا وشقيقى عمر نتشاجر للحصول على العربى الصغير ، كدى نخلى عمنا عزيز احكى لينا شوية وبرجع أدردقو تانى .

[أبوبكرحامد]

دكانا نور بى زيارتك ياقمر الزمان وقولى لى ابوك ناس الدكان لايمنك لأنك ماجيت عليهم وأوعى اكون خايف نقول ليهو امسك لينا قضية ولاكدى بس سلمى عليهو وقولى ليهو ود الماذون عندو ليك شمارات عن معتصم سودانى ومرشد ، طبعا حسن حسين معانا فى البحرين ومعانا برضو بشارابودجانة ، بعدين قميص تحرمنى منك ده لبسو عبد العزيز المبارك وغنى اغنيتو اسمها تحرمنى منك وده كان فى السبعينيات من القرن الماضى .

[أبوبكرحامد]

تعرف ياابراهيم فى مناظر فى مدنى مابتنمحى من الذاكرة زى المرا البترقص قدام استديو الساعة وزى زولكم بتاع جزيرة الفيل " طارق هويا " طبعاً اسمو طارق وبنادى الناس دايماً بى كلمة هويا ولمن تلتفت بيعمل حركة بى يدو مابقدر اسويها خايف ناس المنتدى ارفدونى واقطعو راسى .، مرة عمل حركتو دى لى واحد فلاتى فى شارع اتجاه واحد والفلاتى مابعرف طارق وقام جارى ليك وراهو صوف وناس السوق خلو شغلم وماتوا بى الضحك على طارق والفلاتى ، ياسلاااااام.

[أبوبكرحامد]

حبيبنا أبو المهتدى إديك العافية واسكنك الصافية ، الصورة جميلة بس داخلنى شك فى تاريخا أظنك مجامل الخواجة ساكت ، ياخى ناس عزيز ديل كانوا زمان بيحلقوا بى الكورة قدام حديقة وقيع الله والحلاق بيديهم المراية وكان جات الكشة بيقول ليهم لاقونى جنب نادى الإتحاد .

[ابراهيم]

ههههههههههههههه

والله متعة جد يا دفعة هههههههههههه

طبعاً الراجل دة اتوفا الله يرحمو لكن حركة اليد دي اسمو امدأوة .. ما اظنك ودا ما اظنك تكون بتعرفو لانو version جديد اصدار beta ساكن جنب نادي جيفارا الجديد .. ضحكتني فكرة الحلاقين ولاقيني جنب نادي الاتحاد .. يعني الحلاقة ما تتم والراس منتش وبعد دة وراها جرية من جنب الملجة لغاية نادي الاتحاد والله دي شلهتة طبعاً الحلاقين حسي اتطورو شوية وبقو ثبت المراية في الشجر بدل ما تمسكها في ايدك ... لكن والله يا ود الماذون من كلامك الواحد بضحك ويشعر بشجن ويرجع للزمن الجميل ...

[صالح ابوشوارب]

.
الوجيه ابوبكر

اولا مبروك الدكان ليك ولي ود الصول

الشباب

عزيز / ابو المهتدي / ود الصول / ابراهيم / بتنا قمر

اولا آخر الزمن بقيت فكي ؟ والله حاجة تمام

لكن كان معاي واحد اخونا قال لي عندهم عمهم عاطل

وقالت ليه مرتو الصغيرة عايزة توب سلك وعمكم ماعنده قروش

قام عمل شاعر وقال للمرة

ما بخدملك في الخلا انهلك ليك

وما بجيب تـــــوب السيليك ليك

أصلها عيشــــــــــــة تيليك ليك

تمشي انت وتجــــــــــي المتليك

ولنا عودة وحكايات

[قمر الزمان]

السلام عليكم ..
والله لقيت الحكاية ماشة والونسة حلوة .. وزى ما قال العم عزيز .. المنتدى بقى مافيه اي شي جديد ..
ياود الماذون والله ابوي دا بكلمو وان شاء الله يشترك ..
وكمان بقيتنى دفعتك والله ماشاء الله صغير كان كدا .. هههههههههههه
ويديكم العافية وراجعة تانى ان شاء الله ..

[عزيز عيسى]

الاخوان الحبايب،


ود المأذون، ابوالمهتدي، ابراهيم، قمر الزمان، ود ابوشوارب،

ود الصول لسه ما فتح الدكان علشان يجهز للناس الشاي بالنعناع والقرنفل.. بس انشاء الله اللابس توب ما يكون اتعطل.. لكن شايف الجلسة مع الونسة احلوت وابوبكر ماقصر بقفشاته الظريفة وخلانا نضحك....

ود المأذون.. السينما المتجولة شاهدتها اعتقد مرتين وانا صغير في بداية السبعينات.. بتذكر برضو كنا بنجري ونتشعلك وراء عربات الدعاية للحفلات لما نسمع المايكرفون.. أما حمار الجاز وسكر المكنة أنا ما حضرتها واول مره اسمعها منك لكن اللى عارفه انه الجاز كان بيباع بالقزازة والسكر بالرطل.. وعم قسم بتاع الجرايد ما سمعت بيه.. لكن أنا شاهدت ود عم فاروق لما كان يجي ويديك اخبار الرياضة والرياضيين والفنانين ووين المناسبات والعزائم والكرامات في احياء مدني.. طبعا ودعم فاروق موهبة ما كان بيعرف يقرأ او يكتب لكن ممكن يديك أي خبر تحتاج ليه عن الرياضة او الفن خاصة اخبار الممثلين والافلام الشغالة في السينما الوطنية والسينما الخواجة.. والله كان موفر لناس كثير قروش و مشاوير انهم ما يمشوا كشك الجرايد او لوحة عرض الافلام.. وبرضو بتذكر في واحد ثاني اسمه ود عم صابون.. الجماعة لو حيين ربنا يطول في عمرهم لانهم اسعدوا الناس.

أبو المهتدي،
صورتك ما شاء الله كانت رائعة لما كنت شباب مع موضة الصديري والنظارات السوداء بالليل.. موضة الصديري مع النظارات دي أنا ما حضرتها كانت سنة كم؟.. بس اوعه تكون غاشينا ونزلت لينا صورة المهتدى الفنان.

ابراهيم،
الغريبة زمان حول سور حديقة سليمان وقيع الله ده تجد فيه كذا فكي من جميع التخصصات.. تلقى الفكي جالس في الواطه وجمبه واحد حلاق بالمرايا.. زي ما قال ودالمأذون بالله اتخيل منظر نفسك يكون كيف لما تجي الكشة والحلاق يهرب بشنطته ومكنة الحلاقة في يده ويخليك جالس في الكرسي ما سك المرايا ونص راسك ما محلوق.. والله لو طلعت ما بتعرف نادي الاتحاد بي وين الله معاك الا يتمها ليك الفكي الجالس في الواطه صلعة.. غايتو جنس بشتنه..

برضو كنا بنمشي على زنك الخضار نشاغل ليك الجماعة اللى بيبيعوا في الاكياس علشان نضحك عليهم.. بالله بمجرد ما تقول كيس يجوا ناطين عليك اكثر من عشرة.. كل واحد مادي ليك كيس.

واحد اخونا برضو حكى لى قال: واحد مشى للفكي يقرأ ليه مستقبله في نفس منطقة سور حديقة سليمان وقيع الله.. الفكي مسح كوم الرمله الخاتيه قدامه وقال للراجل كله تمام انا حأكتب ليك حجاب من النوع القوي خالص يحميك من كل شيء.. وانشاء الله ما تموت الا اذا اجلك تم...

يا قمر الزمان.. بمناسبة تحرمني منك دي والله أنا أول مره اعرف انه سموها على اغنية عبدالعزيز المبارك (تحرمني منك).. أنا لما شفت اسم عبدالعزيز افتكرت كمان سموها على أنا.. وشكرا انك قلتي لي انا كنت قيافه.. لكن اعمامك الجلاكين ديل ما مريحني في قميصي السمح ده.. وشابكني تحرمني منك.. وعمك ابوبكر كان قصده الدفعة اللى قبل ابوك.. ههههههههههه.

ابوشوارب.. بالله عليك ما عندك صورة تنزلها لينا بقميص من نوع تحرمني منك؟.. ما تخلينا نشوفك.. حارمنا ليه من شوفتك يا حلو؟!

تسلموا ولنا عوده،

عزيز

[ابو المهتــدي]

بسم الله الرحمن الرحيم
الاحباب الكرام 0 ابو شوارب 0 عزيز 0 ودالماذون 0 ابراهيم 0 قمر الزمان
انشاء الله كدي اكون رتبت بالسنون الاسماء 0 ومازلت بين الاخوين ايهم ابداء 0 وان كان اخونا ابو شوارب لسع داسي صورتة 0 امكن مشاكل ناس
الحكومة 0
ضبعا الصورة ملونة بحسب الكمرة والتاريخ صحيح ليس فيه لمس 0 ولو دايرين
لاجيب ليكم صورة من استديو فارتي مقلوبة 0
بعدين انتم عرفتو ودعم فاروق 0 وعم قسم 0 طيب ليه خليتو 0 الجبرن 0
واظن نكون تلاقينا عند عمكم باشميل بتاع السندوشات 0
بعدين انا تراجعت عن ظني بانني اكبركم 0 التوارتخ تقول اننا نددا 0ام اخونا ود الماذون لقيت له صديق 0 دفعتة 0 وظهرة لنا السنون في عمره بالمناسبة عبد العظيم يغريك الاسلام (شنكو)
الاخ ابو شوارب لقد تسرعت في نقل تلك المقوله والله كنت اريد حكايتها
ولكن الخيرة في الجاية
وبالمناسبة لنا عم سريع النكتة ولك منه تلك
فقد ارسل له ابنه من المهجر عراقي وسروال طويل 0 وبعد فتر قام واتصل بابيه يساله عنهم 0 فرد عمنا له والله ياولدي وصيتك وصلت لكن والله ياولدي قدر ما طبقتهن ابن يدخلن في الجزلان 00
000
ولنا عودة انشاء الله عندما يكطتمل بقية العقد من احباب المندي وما زال شمار الاسمنت له بقية مع ود ابو كرش تسلمو

[أبوبكرحامد]

والله يابرهوتا امدأوة دا ماسمعت بيهو بس متأكد من طارق هويا لأننا كنا بنلف السوق عشان نلاقيهو " زمنا الكنا لاندرى بما كان الزمن ضامر "

[أبوبكرحامد]

أبو شوارب يامنقة البركة بالشوفة ، بعدين سويناك فكى مالك مابيها صحى مرمى الله مابترفع ، بعدين الفكى أنواع فى فكى بيكتف الكور وفكى بيسوى عمل وفكى بيفك العارض وفكى بينجم الخصوم وده النوع الأنا قاصدوا لأنك منجم عزيز عيسى ولاعب معاهو مان تو مان على طريقة ناس الكورة.

[أبوبكرحامد]

يعنى ياقمر الزمان الواحد لما اقول دفعة بيقصد الفرق سنتين تلاتة ، بعدين كتر خيرك شايف عمك عزيز طلعنى دفعة أبوك ، يعنى فى داعى تشمتى فينى الأعداء؟

[أبوبكرحامد]

ياسلام عليك ياخواجة رجعتنا للزمن الجميل وعربات الدعاية للحفلات وكنا بنسكها وبنكورك " ورقة ورقة " طبعاً كنا بنقصد دعاية الحفلة " البوستر " ، أما ود عم فاروق فأذكر انو كان بيلبس كمية من الهدوم تحيرك وكانت الوالده لما نلبس هدوم كتيرة بتقول لينا " مالك عامل زى ود عم فاروق " ، بالله ياخواجة شوف لينا الأمريكان ديل كان عندهم جهاز إرجعنا للزمن الجميل داك على غرار الفيلم الأمريكى الذى كان يحكى عن اكتشاف كبسولة الزمن التى تعيدك سنوات للوراء والبنت كان اسمها ألانا " والجماعة فى السودان اتكسروا فى سماحة البت "

[أبوبكرحامد]

الاحباب الكرام 0 ابو شوارب 0 عزيز 0 ودالماذون 0 ابراهيم 0 قمر الزمان
انشاء الله كدي اكون رتبت بالسنون الاسماء 0 ومازلت بين الاخوين ايهم ابداء 0 وان كان اخونا ابو شوارب لسع داسي صورتة 0 امكن مشاكل ناس
الحكومة 0
.......................................
الأسمين الأوائل رتبتهم صاح بس لخبطت فى ترتيب الباقين لأنو قمر الزمان فى الأول بعدها ابراهيم ثم شخصى الضعيف ، بعدين ياأبو المهتدى شايف الخواجه مابتنفع فيهو الحسنة قال دى صورة مهتدى ولدك " انا من زمان عندى راى فى الأمريكان " ، بعدين شيكو ده اكبر منى بى كتير بس كاتلوا القصر والوش السغير تحياتى ليهو ، بس ماعرفنا الزول الذكرت اسمو قلت الجكنن ولاشنو ياريت توضح لينا اكتر وادينا نبذة عنو .

[قمر الزمان]

قمر الزمان ،، ابراهيم ،، ود المازون ..
والله كويس ..
بعدين ليه تقول عمو عزيز عدوك ؟؟ حرام عليك ظالمو والله ..
وانت الظاهر عليك يا عمو ابوبكر داير تدخل ليك في قضية كبيييييييييييرة .. ابوي اكبر منك آى ما قلنا شي .. وتقريبا بكون قدر العم عزيز لانو البقية انا ما عارفة تواريخ ميلادهم .. وانت مدام انك ماكبير ما تشارك في حكاية تواريخ الميلاد .. ولاشنو يا جماعة ؟؟؟؟
ابراهيم .. انت اكبر من ود الماذون ؟؟؟

[خالد هاشم علي]

ياسلاااااااام عليكم ومليون صفقة للفكرة الحلوة دي .... والحمد لله لقينا لينا حاجة نقدر نتكلم فيهو... والأهم من كده غنو الموضوع إستقطب ناس غاليين فراقهم كان مبكينا...وآسف جداً علي التأخير في المشاركة لكن... جاكم كان الله أداكم...

[خالد هاشم علي]

الغالين شديد ود المأذون أبو المهتدي أعز عزيز إبراهومة أبو شوارب بتنا الصغنووووونة قمر الزمان...
طبعا ياصالح إنت حتكون لاحظت إني رتبت الأسماء حسب الترتيب العمري ولا ما كده؟؟؟؟.
بعدين شوفوا بتنا قمر الزمان بتقول صورة عزيز حلوة. بالله شوف. يابتي زوجته لمن شافت الصورة كانت عايزة ترجع أهلها لولا تدخل الأجاويد. وحاليا لمن تعمل معاهو الشمطة عمك عزيز بهددها وبقول ليها أخخخخخخ بضم الألف عشان تخاف. وطبعا أولاد الخواجة ماشافوا صورة أبوهم دي لأنهم لو شافوها إحتمال كبير يشتكوا عزيز لمنظمة العدل لانو بشبه الجنجاويد.
وبالمناسبة مافي مقارنه بين عمر إبراهيم وود المأذون . بس إنتي براك قولي لي الكبير منو؟؟؟؟.

[خالد هاشم علي]

الغالي عنا أبو المهتدي...
والله لكن صورتك شرط للأرض.لكن عليك الله وفي ذمتك دي هسة أم العيال دي مدمدمنها كده تشوف الحفلة بي وين؟؟؟ والله إلا تعمل ليها فتحة في القرمصيص ده عشان تقدر تكشَف. وإنت ماشغال بيها الشغلة المسكينة تلقي الحر طلع عينها . ولا شنو ؟؟؟؟ هاهاهاها.

[خالد هاشم علي]

تعرف يابكري ضحكتني بي ذكريات طارق هويا الله يرحمة ( عرفت إنه توفي من فترة ) وطبعا زي ماقلت كان بقول هويا ويعمل الحركة ديك بي يده. وفي مرة من المرات كان أخوي الكبير دفع الله بفسح في زوجته في السوق أيام شهر العسل. وفجأة ظهر طارق هويا وبقي يكورك ليهو .. هويا هويا.. طبعا أخوي ماعنده فكره عن طارق لأنه ماكان مستقر في مدني . المهم طنش شوية لكن طارق برضه ماسكت ومصر يناديهو. هويا هويا. ودفع الله ماداير يتلفت ليهو كلو كلو .. في الآخر طارق سكت وجاء علي دفع الله وهزاهو من كتفه. طبعا دفع الله إتخيلوا زول تاني .. وأول ماإتلفت ليهو .. طوالي طارق أداهو ليك واحدة من النوع أبو كديس هويا هويا . وطبعا دفع الله عريس وأتحرج قدام المدام وكان داير يخنق طارق لكن في آخر لحظة عرف إنه راجل مسكين ومعذور.

[خالد هاشم علي]

بالمناسبة ياشباب أنا إتصلت من دقيقتين بي عمنا بابكر ود الصول لأني لاحظت إختفاءه عن الدكان والراجل بسلم عليكم شديد وبعتذر ليكم شديد لأنو ولده ممتحن ومزنوق شوية والمدام فارضه عليهو حظر من كل النواحي عشان يذاكر لي ولده مازن... فتقبلوا تحياته.. ووعدني إنه يدخل علينا في أقرب فرصة ممكنة..
ودمتم...

[بابكر]

بسم الله الرمن الرحيم 00
الاخ الراقى ود المأذون

الاحباب كلكم بلا فرز كيفكم ان شاء الله طيبين

يخس عليكم كلكم,, يعنى اخوكم مزنوق الزنقه دى وانتوا قاعدين فى الدكان تتونسوا000 والله المره حرمت على اللاب توب ..عشان الولد ممتحن كلما اجى افتحو تقوم تحمر لى وكتر خير خالد وليد هاشم ضرب لى تلفون يسال منى وكلمنى بالدكات,, قمت براحه خليت ليك المره نايمه دخلت وعلى الدكان عدل وهاك يا قرايه,, والمهم الدكات ده طلع اسرار كتيره,, واولها ود المأذون العامل فيها صغير و هو من زمن السينما المتجوله,, وزمن عم قسم,, وبالمناسبه عم قسم ده كان فراش فى المدرسه الاهليه وكان عندو عجله ولمن يرسلوه المدرسين للجريد بكون راكب العجله تقوم تقول ليهو حركه ياعم قسم يقوم يرفع كرعينو 000وانا شايف الجماعه بقوا يطلعوا فى زكريات زمان ايام استديو اناقه وموريس الاطرش وماخفى اعظم بالمناسبه انا لمن كنت صغير كنت ببيع العده فى يوم الزياره لو واحد فيكم بتذكر الزياره بتاعة المستشفى بالمناسبة فيكم واحد بيتذكر التوم قرشو (( قراش الضب ))
اها انا ما شى احهز ليكم الفول والطميه ذى ما قال عزيز الفرده,, والشاى المدنكل وحقة تمباك لى ود المأذون اوع تقول مابسف
لكم منى الحب واهو الواحد والله اتنفس شويه بالدكان ده وكتر خير ود المأذون
اها المره دايره تصحى خلونى امرق بى سترتى

ولنا لقاء
خواف خواف

[عزيز عيسى]

ود الصول والشلة الجالسة قدام الدكان الحبايب الغاليين،

الحمد لله الدكان صاحبه جاء وفتحه.. وألف حمدالله على السلامة يا ود الصول على فك حظر التجول وانك وجدت غفلة من الوزارة وقدرت تطل علينا.. في البداية افتكرت انك ما سددت الضرائب لناس الحكومة وجوا قفلوا ليك الدكان.. وزي ما شايف ود المأذون ما قصر لم ليك الناس قدام الدكان وشغلهم بالونسة وخلاهم يأخدوا راحتهم لحدى ما جيت وفتحت لينا الدكان..

وبنشكر اخونا ودهاشم السباق اللى اتصل بيك يعرف احوالك ويطمئنا عليك.. أنا برضو لما لاحظت انه ودهاشم تأخر في الدخول افتكرته مشى يقود ليه مظاهرات.

وحبيبنا ود ابوشوارب ورانا وشه وشتت وثاني ما ظهر.. بس انشاء الله المانع خير.. والله مشتاقين لمحاورتك يا ابو الشباب..

وين باقي الشباب عايزين مشاركتكم في الجلسة الحلوة وتتحفونا بالذكريات.

ابوبكر.. المسلسل الامريكي اللى ذكرته وبرجع الواحد للوراء اسمه Back to the Future وبطله اسمه Michael J. Fox الممثل الشاب الان ترك التمثيل وتقاعد لانه مصاب بمرض اسمه الزهايمر يصيب الاعصاب (نسأل الله السلامة) وهو نفس المرض الذي اصاب الرئيس السابق رونالد ريغان..

قبل ستة شهور صادف وجودنا في كاليفورنيا وقمت مع الاولاد بزيارة Universal Studios بمنطقة هوليود ركبنا ترام طاف بينا جميع الاستديوهات وكنا نشاهد على الطبيعة الممثلين بيمثلوا في الافلام والمسلسلات.. وبالصدفة شاهد الاولاد السيارة اللى مثلوا بيها مسلسل back to the future واصروا انهم يدخلوا الاستديو..

دخلنا الاستوديو وعينك ما تشوف الا العجب.. ركبونا العربية وتعال شوف كانت هناك مناظر كأنها طبيعية مع احداث حركات ومؤثرات صوتية بمساعدة الكمبيوتر تخليك تشعر زي الكأنك بتمثل في المسلسل.. شي رائع حقا.

وبعدين يا ابوبكر ترتيب ابوالمهتدي للاسماء حسب الاعمار.. ابو شوارب 0 عزيز 0 ودالماذون 0 ابراهيم 0 قمر الزمان.. بعترض عليه ومفروض يكون كالتالي:

ابوالمتدي 0 ابو شوارب 0 ودالماذون 0 ابراهيم 0 عزيز 0 قمر الزمان..

بالطريقة دي تكون القائمة معتدلة...

وبمناسبة ود ابوشوارب يكتف الكورة دي.. زمان كنا بنسمع عن حكاية الفكي اللى بيكتف الكورة دي.. بيقولوا قبل المباراة ما تلعب الفكي بيجيب طشت يكب فيه مويه ويعمل شعوذه يخليك تشوف اللاعبين بيلعبوا كورة امامك في الموية وبعدها تعرف نتيجة الغلب.. يا جماعة صحي الحكاية دي حقيقة؟

يا ود المأذون في حاجة ثاني أنا اذكركم ليها.. زمان لما كنا صغار خلال الستينيات الوالد الله يرحمه كان بيأخذنا على السيرك الهندي والسيرك الصيني.. والله الحكاية دي أنا من صغير لازلت بتذكرها.. انت عارف السيرك الهندي والسيرك الصيني لما كان البلد بخيرها ده كان بيقام في مدني في ميدان بالقرب من جامع اشلاق البوليس.. كانت الفرق بتحضر بكامل افرادها ومعداتها وحتى الحيوانات مثل الافيال والاسود والنمور والقرود والطيور بيحضروها معاهم.. وقدمت الفرق عروض بهلوانية جميلة جدا اسعدت الكبار والصغار في مدني.. بالله شايفين كيف اهمية مدني زمان؟

ولنا لقاء،

عزيز

[صالح ابوشوارب]

الاخوان كونكان ستة

ازيكم والله انا كذلك ذي ما قال عمنا ود الصول مزنوووق

مع الامتحانات ولكن عودة قريبة انشاء الله

-----------------------------------------------------------

بخصوص الاعمار يا جماعة انا حضرت السلم التعليمي بالردا في

المدرسة الاهلية ب يعني ما قدركم

ولذلك يا بكور وياخالد شكو الكوتشينة من جديد

بخصوص السينما المتجولة كان المسئول منها واحد كنا بناديهو

عمنا موسي وكانت في سيارة كومر

اما الصورة عن قريب وحتكون بقميص تحرمني وحتكون مفاجئة

اما بخصوص الفكي يابكور ليه قصة معاي والدكان ما بكفيهو

[امير عبدالباقي]

شباب ازيكم والله الواحد مقصر معاكم لكن شايف الجلسه حلوه والشاي مدور لكن ياعزيز بالغته عديل كده كدي فكر في الترتيب بتاعك ده ياعمو ابراهيم ده صغير انت لما كنت بتحضر السيرك ده الماسمعنابيهو ابراهيم ده لسه ماولدوه احتمال اموه زاته ماعرسوها ؛
ودالماذون قهوتك وين ماشايفنها اهم شي قهوه الضهريه ياودالخال وشايف الجماعه ختوك معاهم في اول الترتيب
كدي ارتبه ليكم انا لكن ماتزعلو ودالصول في الاول ياجماعه وتاني عزيز وابوشوارب يجي بعدكم ودالماذون حتي انا وخالد هاشم وابراهيم وثم قمرالزمان
شايف عم التنقو بتلبد عاوز يشم الشمار من بعيد وهو اضانه تقيله كدي كوركو ليهو خلي يجي يصنقر جنبكم
ودالصول اعمل حسابك وزاره الداخليه تصحي تصادر منك اللاب توب

[عزيز عيسى]

ابوالمهتدي الغالي،


كاتب الرسالة الأصلية ابو المهتــدي

طبعا الصورة ملونة بحسب الكمرة والتاريخ صحيح ليس فيه لمس 0 ولو دايرين
لاجيب ليكم صورة من استديو فارتي مقلوبة 0
يا حبيبي أبو المهتدي.. انت قايلنا هنود ولا عندنا قنابير.. مش يمكن صاحب الاستوديو يديك صورة لشخص ثاني وعليها تاريخ حديث.. طيب انحنا نضمن كيف انها تكون صورتك؟.. انحنا لازم نعمل تحقيق ونعين لينا محقق في موضوع الصورة ده.

وبعدين زي ما قال ودهاشم.. صحي انت ام المهتدي دي اهلها ملفلفنها بالفركة كده ليه.. انت عارف ام المهتدي دى (بس اوعه تكلمها) ذكرتني بنكتة اختنا مهيرة عن الراجل المسطول:

كاتب الرسالة الأصلية مهيرة
-------------------------------
واحد مسطول عايز يتزوج 00 لكن أمنيته يتزوج ليهو واحدة سمييييييييييينة !
المهم في واحد من التجار ديل بتو بايرة وعايز يزوجها بأي شكل كان 00 لكن مشكلته أنو البت ضعييييييييييييييفة لدرجة قف !
سمع بي جارهم المسطول ده عايز يتزوج وسمع كمان بي شروطه 00 فقال في نفسه مسطول ماجايب للدنيا خبر قام اتفق معاهو يزوجو البنت 00
يوم الزفاف قام التاجر لف ليك بتو العروس بي جرايد الشهر كله عشان تظهر قدام العريس سمينة
تم الزواج والبت بعد الحفلة ذهبت مع راجلها القريب من البيت !
المسطول داير يشوف عروسه للزمان 00 قال ليها وريني وشك ياقمر ؟
قالت ليهو شوفو براك 00 وبدا يفك في الجرايد الليل كله عشان يشوف وشها
في النهاية زهج وقام كورك بالشباك :

ياعم عبد الوهااااااااااااااااااااااب 00 بتك دي في صفحة كم ؟؟؟

وتسلم يا أبو المهتدي وتسلمي يا مهيرة ولكم خالص الود،

عزيز

[عزيز عيسى]

الفرده ود الصول الخواف،


كاتب الرسالة الأصلية بابكر
بالمناسبه انا لمن كنت صغير كنت ببيع العده فى يوم الزياره لو واحد فيكم بتذكر الزياره بتاعة المستشفى بالمناسبة فيكم واحد بيتذكر التوم قرشو (( قراش الضب ))
اها انا ما شى احهز ليكم الفول والطميه ذى ما قال عزيز الفرده,, والشاى المدنكل وحقة تمباك لى ود المأذون اوع تقول مابسف

انت يا أبوي ما تقول لي كنت شغال دلاليه عديييييييييييييييل.. كدي ورينا يا بابكر بعت ليك كم عمود وفنجان قهوة لناس المستشفى؟.. واسعار بضاعتك بتتفاوت بين كم تعريفة وكم قرش وكم شلن وكم فريني وكم طراده؟.. بس اوعك تدخل لينا فيها الملاليم.. ههههههههههه
أنا غايتو ايام اجازة المدراس زمان اشتغلت مراسلة في مكتب المقاول بمارنجان.. ولما الموظفين يرسلوني اجيب ليهم (هيلا هوب) (شراب فواكه مخلوطه بالثلج المجروش).. كنت في كل مره بطلب كباية كبيرة للشخص اللى بيرسلني وواحده لي.. ولما أرجع باقي القروش الموظف بيدخها على جيبه وما بيحسبها.. غايتو ربنا يسامحنا في أيام شقاوتنا.

اخوي الكبير حكي لي قال كان في ولد واحد شغال معاهم سميييين وأكال اكل شديد أي حاجة يقول ليه بتتأكل بياكلها.. قال الولد ده مغلب ابوه في البيت في الاكل.. وماهيته كلها مكملها في الفطور.. ما بيشبع وبكمل باقي الشبعة جرورة.. وأبوه آخر الشهر بيجي يدفع لصاحب الكشك زيادة على ماهية الولد باقي المطلوب.. وبعد ده ابوه راضي.

التوم قرشو بتذكر الاسم ده لكن نسيت كان بيعمل شنو زمان.

وطالما انت ماشي على السوق الكبير.. بالاضافة الى التمباك لودالمأذون.. جيب لينا معاك تسالي وفول مدمس وكمان شوية نبق ولالوب وقنقليس.. من سوق الزنك علشان نتسلى بيهم.

تسلم ولنا لقاء،

عزيز

[ابو المهتــدي]

بسم الله الرحمن الرحيم
كدي اول شي خلو عمكم ودالصول يفرش لينا سباتة باقي ليكم الجلسة فيها متربع الكرعين مريحة 0 ودايرين لينا فيها جبنة مدنكلة 0
اول شي الصورة دي من خلال مراسيم الزواج واوع ميكم واحد يقول لي زواج زمان 0 سنة تمانين دي كلكم كبار وتميتو الدراسة 0 وشقالين 0 دايرين
تكبرونا 0 وانا ما بعترف ليكم 0 المهم كل واحد يجيب تاريخ هجرتة وليس ميلاده 0 ام عن الحاجة والفركة دي كانت موضة للرجوع 0 الزيجات الاباء
لان كانت هناك كوشة 0 وفستان زفاف ابيض 0 الاسم الاصلي لها ايام عرسنا 0 والله كانت هناك 0 مراسيم 0حلوه 0 ومتنوعة 0 وخاصة انني كنت كبير العايلة واول زواج للاسرة 0 سيوف ورقيص رقبة 0 وكل صديقات الوالدة حضرن وقمن 0 بما يرجعهن للماضي ووفاء لكبير صديقتهن 0 التي رحلت عن دنياهن 0 والزكريات لي فية كبيرة ولي من الصور في الزواج مافوق التصور
لا كانت هناك عدة كمرات تصور 0 بس ايامها الفديو لم يظهر كدة 0 ونحمد الله علي تلك التحف التي 0 اصبحت لدي فيها من رحل عن الدنيا وفيه من كان صغير وغداء رجل او شابة 0
وسوف يطول الحديث 0 ولنا كلام كتير 0

[بابكر]

SIZE=3]تعالوا يا اخوانا شوفوا العجب 00زمان قبال الكرسى الساخن كان الكل بيقول لى يابكور وفى واحدين قايلنى مامتزوج ولمن الجماعه عرفوا الاولاد ومن ديك وعيك ,,شبكتونى ياعمو 00 واقول ليك ياعزيز يافرده ياعجوز النصارى ,,انا بذكر السيرك الهندى لانه كان جنب بيتنا فى ميدان البوليس وانا كنت والله وليد صغير وكنا بندخل بى فتحة الخيمه وبتذكر كان عندهم كشافه كبيييييييييره بتعمل شعاع يتشاف من مسافات بعيده00 واما التوم قرشو ده كان مجنون ,,لمن تقول ليهو قرشو يسكك سك شديد00 وانا كنت فى عطلة المدرسه ببيع الكبايات ( سته بريال) فى يوم الزياره عشان نطلع حق السينما وكانت بى 4 قروش شعب
انا اقترح انو الفكى ابو شوارب (( يلحقنى ويفزعنى )) يسوى حجابات لكل العجايز,,, ويبدأ بى العجوز المتخفى ابراهيم المصرى وود المأذون الظريف وامير عبد الباقى وبقى الشله وعاوز حجاب بالانجليزى لى عزيز الحاضرها من زمن السينما المتجوله ,,وكمان ود المأذون برضو حضر السينما المتجوله وسواقها عم موسى السمين والكومر,, ولو تذكروا كان بيجيب فيلم فيهو بنت لابسه توب وهى ماشه بتجى جنب شجرة شوك الجماعه بره يكوركوا كلهم (( الشوك الشوك )) وين ود المأذون ماداير يجى يشيل تمباكو,,و لاكابى الزوقه خايف من الوليه,, مادايرها تعرف انو بيسف00
انا عندى اقتراح كل واحد يخت صورة الزواج بتاعتو اسوة بالاخ ابو المهتدى لان صورة الزواج بتكشف المستور وتلقى فى جماعه لمن تزوجو لم تكن الصور قد اكتشفت بعد وبعدين يا جماعه البنات ديل مافهن واحده من جيلنا ولاشنو يا ود المأذون وياعزيز افتونا
اها انا عاوز اظبط ليكم الفول بالسمنه والطعميه والشطه والشاى كان جاهز رأيكم شنو؟؟؟؟؟

الخواف الاكبر
ود الصول [/SIZE]

[بابكر]

ده عمكم ابو شوارب

[امير عبدالباقي]

والله يابابكر انا الشاي الكتير ده عملينا حيرقان وبعدين منو القال ليك عاوزين الفول بالسمنه زيت السمسم مالو وياريت لو تفتح لينا في الفول ساردين بصلحو كويس وعلي حسابي ماتخاف وكتر الشمار
وبعدين ياجماعه السينما المتجوله دي كان بجيبوليكم فيها فلام وكده وكنتو بتحضروها وين في الشارع ولاشنو انتو بتقولو متجوله ؟ كدي احكولينا عنها بالتفصيل والله ايامكم كانت حلوه سيرك هندي وصيني تمام والله
انت ياعزيز ود الصول ده مادفعتك دحين في المدرسه
ياجماعه ماتسو قهوه ولا عاوزين تطفشونا منكم

[aborawan]

والله احي الفكرة وصاحب الفكرة واستمتعتا بالقراية والمتابعة اشد الاستمتاع وبما انا الدكان ده فيه اللمة والتكيل في الضل برا اكيد طبعا الشمارات بتكون كتيرة عشان كده في شمارات كتيرة قاعده تحصل في الماسنجر بين اعضاء المنتدى عشان كده كده ياريت اى زول عندو شمارة بي تحت تحت يقولا لينا ولو في اى شمار طازج يدينا ليه وغايتو من هسه لو في زول لاقاني في الماسنجر يعمل حسابو ما يديني اي شمارة عشان انا لساني خفيف وبجي بفتو هنا طوالي في الدكان ده

رايك شنو يا خالد هاشم في الاقتراح ده غايتو في ناس كده انتا بتعرفم كويس ما اظن تاني حا يحكوا لي حاجة بعد كلامي ده صاح ولا انا غلطان :):)

[أبوبكرحامد]

ياسلام عليكم ياحبايب ياناس مدنى الحُنان ، الشوق كتير والبركة الشفتو سيد الدكان طيب وياود الصول زمان تفرتقوا الحفلات وهسى تخافوا من ام الأولاد عجبى ، وكويس الدكان جاب لينا ناس عزاز أبو هاشم وابوروان وكل الحلوين ، بعدين انا السينما المتجولة ماحضرتها بس بتذكر زمان الوالد ودانا معرض البوليس مابتذكر مكانو وين بس كان حاجة روعة خصوصاً لمن البوليس ادى تعليمات للكلب البوليسى والله أيام يازمان ، زى ماقال أبو المهتدى عاوزين لينا برش للقعاد وفى ناس عندهم رطوبة جيب ليهم صندوق شاى فاضى " زمان الشاى كان بيجيبوهو فى صناديق خشبية كبيرة" " التوضيح ده لى قمر الزمان فقط " ، بعدين ياأمير عامل فيها صغير والصلعة دى يااخوى الجابا ليك شنو " لاحظت انك مانزلت صورتك فى المنتدى" ، غايتو الشمار كتير بس برجع ليكم تانى .

[عزيز عيسى]

مشيت السوق عبيت القفة خضار وديتها البيت وجيت مارى على الدكان لقيت القعدة عمرت..
ود ابوشوارب قطع مصارينا بقصته مع الشيخ والبخره بهناك.. وانا هسع عايز ازغرد لأنه وافق ينزل لينا صورته بتحرمني منك.. أها الباقي لينا ودهاشم لسه لابد وعامل مطنش..
يا أمير.. ممكن تقدمني خطوة واحدة قدام ابراهيم في ترتيب الاسماء حسب العمر.. تفتكر الترتيب استعدل.. ولا كمان عندك رأي ثاني؟.. والسيرك الهندي والصيني ده أنا أبوي كان ماسكني وسايقني من يدي يعني كنت لسه طفل صغير بس الذاكرة قوية.. لكن عمك بابكر الوقت داك كان بيبيع في الكبابي قدام الاسبتالية وكان بيدخل تحت الخيمة علشان يشوف السيرك.. برضو تقول لي دفعته.
وعلشان ما تطفش انا حأكلم ليك عمك بابكر يظبط القهوة لكن ماوريتنا قهوتك عايزه كيف؟.. وبرضو بقول لي بابكر جيب معاك فروة ومساند علشان ودالمأذون يتحكر في رقدته يقنطر السفة ويحكي لينا مع عمنا تنقو حجاوي زمان.
السينما المتجولة دي انا زي ما ذكرت قبل كده حضرتها مرتين فقط.. وما اظن كان فيها افلام لكن بتذكر شاهدت فيها برنامج عن جولات زيارات الرئيس الاسبق المرحوم اسماعيل الازهري.. وبتذكر ابنه محمد كان دائما مرافقه في زياراته.. ولو عايز معلومات اكثر اسأل عمك صالح ابوشوارب يديك ليها لانه عمك ده حافظ حتى اسم سواق الكومر..

عزيز

[خالد هاشم علي]

أهل الزين وأهل العديل كيف قيلتواااااا....

سلام شديد وكتير لكل الحبابيب بالدكان وزي ماقال ليكم أبوروان عايزين نتَفن في الواطة ونفتو فت صاح..
وبالمناسبة أعملوا حسابكم بالجد من أبو روان لأنو خشمه خفيييييييييييييييييييييييييييف.

.

[عزيز عيسى]

كاتب الرسالة الأصلية بابكر
تعالوا يا اخوانا شوفوا العجب 00زمان قبال الكرسى الساخن كان الكل بيقول لى يابكور وفى واحدين قايلنى مامتزوج ولمن الجماعه عرفوا الاولاد ومن ديك وعيك ,,شبكتونى ياعمو 00 واقول ليك ياعزيز يافرده ياعجوز النصارى ,,انا بذكر السيرك الهندى لانه كان جنب بيتنا فى ميدان البوليس وانا كنت والله وليد صغير وكنا بندخل بى فتحة الخيمه وبتذكر كان عندهم كشافه كبيييييييييره بتعمل شعاع يتشاف من مسافات.
وبعدين يا جماعه البنات ديل مافهن واحده من جيلنا ولاشنو يا ود المأذون وياعزيز افتونا
اها انا عاوز اظبط ليكم الفول بالسمنه والطعميه والشطه والشاى كان جاهز رأيكم شنو؟؟؟؟؟
الخواف الاكبر
ود الصول

طيب يا بكور.. انحنا لو شابكين الجماعة السينما المتجولة والسيرك الصيني والسيرك الهندي.. بس قول لي كيف تلقى ليك واحدة من جيلنا.. انحنا لخبطنا البنات لخطبه شديدة.. وكثر خير بتنا قمر الزمان اللى جات تتونس مع اعمامها الجلاكين ديل.. ويا ريت باقي البنات يجن يتونسن مع اعمامهن.

زمان مدني كانت ليها اهمية كبيرة.. كان بزوروها ملوك ورؤساء.. وبتذكر زمان لما كنا طلبة حضرنا احتفال كبير جدا في ميدان 21 اكتوبر بالدرجة امام مدرسة مدني الثانوية (اعتقد انه اسمه تغير الان).. الاحتفال كان بمناسبة ذكري 21 اكتوبر المجيدة.. حضره الرئيس النميري واعضاء قيادة مجلس الثورة بالاضافة الى ضيف البلاد الكبير الامبراطور هيلاسلاسي امبراطور اثيوبيا.. قدمت في الاحتفال عروض كانت غاية في الروعة.

برضو مدني زارها الامبراطور بوكاسا امبراطور افريقيا الوسطى.. قال انه حب مدني واهلها حب شديد.. واضاف انه مدني بتشبه عاصمته شبه شديد علشان كده ابوعاج حلف ستين يمين وقام سجل ليه بيت في مدني بأسمه.. يا ربي بيت بوكاسا ده لا زال مسجل بأسمه ولا اتلحس..

وايضا الاميرة البريطانية آن قامت بزيارة لمدني وعجبتها بركات.. بالاضافة الى آخرين.

عزيز

[بابكر]

الاخوه والاحباب رواد الدكان سلام جاكم ومن اليوم حنفرش السباته والبرش عشان شايف العجايز كتروا وزيى ما بيقول المثل السن بتضاحك نديدها حبى وشوقى لود المأذون ود الحبوبات ويا امير الفول بالسمنه مالو ؟؟ والله لو ضقتو تانى ماتكل فول بالزيت لكن ولايهمك حنجيب ليك زيت السمسم 00 اها يا ابو المهتدى فرشنا البرش يلا اتحفنا بشوية حكايات
وانت يا ياعزيز يا عجوز انت اصلو داير تتزوج تانى ولا شنو تصغر فى نفسك مره تقول قابلت نميرى وانت شغال فى القصر ومره تقول شفته فى احتفالات اكتوبر وانت صغير وتعال انت من زمن هيلا سلاسى جاء السودان الحكايه دى ليها اكتر من 45 سنه انت مالك بتنكت فى المصايب يا عزيز وبالمناسبة الاميره الزارت السودان كانت اليزابيث وليس الاميره آن حسب علمى وبرضو الرئيس تيتو جاء السودان 00 انا غايتو بتذكر لمن كنت فى مدرسه البوليس الابتدائيه فى سنه تانيه محمد وردى طلع اغنية بينى وبينك والايام وبالمناسبه فى نفس مبنى المدرسه كانت ايضا فرقه موسيقى البوليس واذكر انو الفنان محمد الامين كان بيجى يعزف معاهم ,, بالمناسبه ياعزيز بيت بوكاسا اتلحس من زمان ضربوا التماسيح000
التحيه موصوله الى ابو شوارب فكى الدكان
وملحوظه للجميع

ممنوع الدين يا مفلسين
والعفش داخل البص على مسؤلية صاحبه

بالمناسبه زمان كان فى مدنى سياره تاكسى جديده مكتوب على الزجاج الخلفى بتاعها الجمله التاليه (( هذه العربه ملكى وليس لى فيها شريك ))

اخوكم ودالصول
دابى الليل
الشافو خلو
الاسد النتر
الكلس
والمره مرقت للجيران
قلنا نبرم الشنبات
هى انا الاسد

[ابراهيم]

ابراهيم .. انت اكبر من ود الماذون ؟؟؟

والله يا قمر الزمان ما عارف لكن اقري الصورة بتاعة عمو ود الماذون دي صح ولا خلى ود الماذون يجيب لينا الضهرية بتاعة الصورة لانو انا شاكي في الصورة دي تكون ملعوبة بالفوتوشوب زي صورة عمو عزيز .. يا قمر الزمان الناس ديل من زمن السينما المتجولة ههههههههه


ويبدأ بى العجوز المتخفى ابراهيم المصرى وود المأذون الظريف وامير عبد الباقى

والله يا عم بابكر قبل الكرسي الساخن انا لو سألوني عنك اقول ليهم بابكر دة عمرو ما يفوت العشرين سنة عمر الزهور بالذات الصورة بتاعة البنية الخاتيها دي سنة لكن قعدتك في الكرسي جابت ليك الهوا....




ابوالمهتدي 0 ابو شوارب 0 ودالماذون 0 ابراهيم 0 عزيز 0 قمر الزمان..

بالطريقة دي تكون القائمة معتدلة...

عليك الله يا عزيز كدة معتدلة بي وين بس يعني دي بالغت في انت عارف لو ما قميص "تحرمني منك" دة كنت حتقول اصغر من قمر الزمان يعني مواليد 1987م انا سألت قالو قميص تحرمني منك كان قمة الموضة في التلاتينات الوكت داك مدني قالو كان فيها تلفزيونين ابيض واسود وسبعة روادي ناشونال .. وبرضو تقول لي ..

قال تحرمني منك قال


ابو روان انا معاك في فكرة الشمارات دي نتحالف رايك شنو:confused:

[بابكر]

سلام عليكم ياجماعه كيفكم 00
قرأت قصه حبيبنا ابو شوارب بتاعة البخره 000 انا حصلت لى قصه ذى دى بالضبط بس حصلت فى السعوديه
كنت مصاب بألم فظيع فى يدى لايدعنى انام بالليل وطبعا ما خليت استشارى فى المملكه ما مشيت ليهو وتحاليل واشاعات واخيرا نصحنى مدير المستشفى عندنا بأن اذهب الى الشيخ ( 0000 ) بالمدينه المنوره واخبرنى بأنه راجل بركه وسوف ارى الشفاء على يديه00 المهم وديت الاولاد المدارس وركبت السياره ومعى الوليه ام العيال وصلت المدينه وسألت عن بيت الشيخ والذى كان مشهورا جدا هناك ,,لان اى واحد بيعرفو
المهم دخلت للشيخ وكان لوحده,, والمره جلست بره ,, قام الشيخ يقرأ على بعض الآيات ويضغط على رقبتى بشده وكلما ذادت القراءة يزيد الضغط على رقبتى ((يعنى خنق عديل )) ويقول انت مين؟؟ انت مين انطق ؟؟؟ اقول ليهو انا بابكر,, طبعا بكل صعوبه ,, ويضغط مره اخرى ويقرأ ويكرر,, انت مين انطق ياكلب ؟؟؟ وانا اقول ليهو انا بابكر 00 واخير ضغط على حلقى والله حتى كدت ان افقد الوعى ,, فصرت اكورك عسى ان تسمعنى الوليه تجى تخلصنى من المصيبه دى 00 المهم لمن الضغط كتر مسكت يدين الشيخ وبعدتهم من حلقى وقمت قلت ليهو انت عاوز تقتلنى ولا شنو؟؟
عمكم الشيخ زعل وقال لى خلاص قوم انت ما عندك مس
قمت اديتو 100 ريال عمك فرح قام مرق معاى وكان عندو شجرة نبق قام ظعط لى شوية صفق قال لى ده تشربو على الريق
لمن مرقت شاكلت المره قلت ليها الراجل يخنقنى وانا اكورك وانت قاعده تتفرجى على وتضحكى
وحلفت من ديك ما امشى لى فكى ابدا,,, حتى ولو كا ن ابو شوارب

[خالد هاشم علي]

الغالي بابكر...
سلام شوق للشوفة...
أول مرة أشوف لي واحد بدفع من جيبه لي واحد خنقو.. إذا كان كده تعال والله أديك علقة بت كلب وبي خمسين ريال بس.. هاهاها
والله بتخيل في أم العيال وهي بتشوف في الأسد النتر وبتسمع في كواريكو....

الله يجازيكم يابابكر وصالح والله ماقادر أمسك نفسي من الضحك...

[خالد هاشم علي]

تعالوا ياشباب نحكي ليكم القصة دي...

زمان ونحن في مشروع الجزيرة كان معانا واحد بلدياتنا كده( مهندس) في نفس المنطقة وقام صاحبنا ده إشتري ليهو ثور عشان يربيهو .. الجماعة إقترحوا عليهو يوديهو عند (عشة) ست العرقي والمريسة عشلن يتغذي كويس ويأكل ( المشق) كمان ياعزيز قول مابتعرف ( المشق). المهم الراجل ودا التور بتاعو عند ست العرقي علي حسب نصيحة الشفوت..
أها صاحبنا ده عنده أخوه أصغر منه سكرجي صاح ( طشمنجي) درجة أولي وكان زبون دائم عند ست العرقي دي .. وعرف إنو أخوهو جاب التور في الإنداية بتاعة العرقي.. فبقي كل يوم يشرب العرقي بالمجان ( بالآجل والجرورة) والضمان طبعا تور أخوهو الموجود عند ست العرقي...
الأيام مرت وكل يوم الراجل يسكر وست العرقي تعمل خط في الحيطة( عشان تسجل عدد المرات) وعدد زجاجات العركي اللي شربها الراجل...
بعد كم شهر كده أخونا صاحب التور قال يمشي يستلم توره من الوليه عشان يبيعه في السوق لأنه بكون بقي كبير وماكن..
قال لي ست العرقي أديني التور بتاعي... قالت ليهو تور شنو ياأخوي؟؟؟ شوف أنا دايرة كم من أخوك؟؟؟؟ وقعدت تعد ليهو في الخطوط.. الجماعة طلعوا مديونين لي ست العرقي وإضطر أخونا ده يدفع من جيبه بالإضافة للتور اللي راح أونطه عشان يسكت الولية وماتعمل ليهم فضايح...
ورجع علي بيتهم وهو زعلان ومغبون من أخوهو.. وأول ماشافو قال ليهو:

والله طول عمرنا بنسمع بي فلان أكل حق أخوهو...
لكن أول مرة أسمع بي واحد شرب حق أخوهو...

[عزيز عيسى]

كاتب الرسالة الأصلية بابكر
اانت من زمن هيلا سلاسى جاء السودان الحكايه دى ليها اكتر من 45 سنه انت مالك بتنكت فى المصايب يا عزيز وبالمناسبة الاميره الزارت السودان كانت اليزابيث وليس الاميره آن حسب علمى وبرضو الرئيس تيتو جاء السودان 00


ده شنو يا الاسد النتر.. انت خرفت ولا المره قاطعه قلبك اليومين ديل؟.. هيلاسلاسي ده زار السودان اعتقد عام 72 او 73.. وبرضك كنت بتشوف طشاش زمان ولا شنو.. اليزابيث دي الملكة ام الاميرة آن.. لكن الاميرة آن هي اللي زارت مدني وبركات خلال السبعينات.. كدى صلح النضارة كويس.. اما الرئيس تيتو ده أنا ما حضرته لما زار السودان.. أها كمان امشي قول لي انك حضرت الرئيس برزنيف لما زار السودان.

لكن ما قطعتوا مصارينا من الضحك واحد بخرات والثاني خنق رقبة.. وزي ما قال ودهاشم الحكاية طالما فيها قروش كلنا ممكن نجي ونعمل اخنق فطس.

ودهاشم.. ضحكتنا بقصة التور.. وأنا لو ما بعرف (المشق أو المشك) اكون حنكوش لليفة.. في ناس زمان لما يشربوا (ام دقوقه) والواحد يملأ كريشته يقوم يتجشأ ويقول (أرقد يا عيش)..

احكي ليكم قصتي دي..

بتذكر زمان لما كنت عايش في الخرطوم امتداد الدرجة الثالثة عندي شقيقتي زوجها كان ما موجود في البيت.. وصادف انه كنت انا وواحد قريب ابو النسب متواجدين في البيت.. طلبت مني اختي اضبح ليها ديك.. ودي كانت أول مره في حياتي اضبح حاجة.. المهم كنت عامل فيها راجل شجاع وقلت ليها جيبي لي السكين.. جابوا السكين وما تأكدت انها سنينة ام لا لأنه ما عندي خبره.. ومسكنا الديك أنا وقريب ابوالنسب ورقدناهو في الواطه وقلت ليه امسك رجوله كويس علشان ما يفرفر.. (لاحظوا اثنين ماسكين ديك علشان يضبحوا).. المهم ابتديت اضبح في الديك والديك يعوعي بشدة.. أنا لما شفت شوية دم طلع من رقبة الديك رميت السكين وفكيت رقبة الديك وقمت جاري.. حبيبي قريب نسيبنا لما شافني جريت هو زاتو فك الديك وقام جاري بي وراي..
الضبح طبعا ما اكتمل والديك كان لسه حي.. الاغرب من ذلك اصبح الديك يجري ورانا وأنا انط من سرير لي سرير وأكورك وصحبي قريب نسيبي نفس الشيء لما شاف الديك جاري ورانا كان بيكورك بطول حسه وقام جرى نط حيطة الجيران.. بعد شويه اسمع ليك الكواريك قامت زيادة في بيت الجيران.. (افتكروه حرامي) ما أشعر الا وأشوف ليك اخونا جاء ناطي الحيطة راجع ثاني ولسه بيكورك.
في النهاية اختي جرت نادت واحد من بيت الجيران جاء وقام تم ضبح الديك.. أها من ديك ولحدي الآن أنا تاني ما ضبحت لي ولا زرزور.

عزيز

[aborawan]

اها خلاص بدينا الشمارات الطازجة
طبعا نسبة لظروف الدوام الشهر ده انا شغلي بكون في الفترة المسائية شغل ليل ونوم نهار وفي كتار عارفين الحاجة دي منهم ود هاشم زول مزعج شديد ومضر قدر ما كلمتو يا ود الناس ما تضرب لي قبل 4 عصر مصر انو يزعجني امس ضارب لي بسلامتو الساعة 9 الصباح قلنا ما اشكال يمكن نسى وعديناها ليه الليلة الساعه 11 ضرب لي برضو لما ما رديت عليه اتذكر اني في المواعيد دي بكون نايم عمل فيها الولد ظريف ورسل لي رساله ( يعني ازعاج مع سبق الاصرار والترصد ) وده نص الرساله بالحرف الواحد (( معليش يا فردة نسيتك انك خفاش بتطلع بالليل ( خلاص نظام الود عمر احساس وحسا بازعاجو لي ) بس امير جاي عندي اليوم وحااديك الشمار)) غايتو ناس جنها شمارات ،، اها القصة زاتا في امير طبعا امير ده زولاَ ظريف شديد وماشاء الله عليه محبوب عند الجميع وممكن تحبو من اول كلمة يقولا ليك اها المهم امير عشان يقدر يصل لمكان شغل خالد تعب تعب شديد واخونا خالد يشيل ويوصف ليه ياخي خش يمين ارجع ورا سيب الزقاق لكن بدون فايدة لكن انا بعذر امير شديد عشان بالجد الايام دي جابو ليه (( مندوب جديد )) تاعبو تعب شديد وملخبط ليه كل حساباتو وبقى برا الخط عديل كده لانو ما قادر يقطعو مع المندوب الجديد لانو معين بـ (( واسطة )) المهم بعد عناء وتعب طويل امير وصل والحمد لله على سلامة وصولك سالم ،، طبعاً لا خالد شاف امير لا امير شاف خالد والاتنين زايغين من ختت صورم في المنتدى ما عارفين السر في كده شنو المهم لحدي هنا انا كلامي قطع واخلي الفرصة للناس الاتلاقو ديل وشنو الونسه والقطيعة القطعوها وهم بشربو في القهوة بتاعت العامل الشغال مع خالد هاشم البقولو ليه جيب كباية شاي اعمل فيها 4 معالق سكر يمشي يجيب 4 كبابي شاي

اها عاد تعالو انكشحو لينا هنا وما تدسوا حاجة والبدس حاجة دقس معاي والله يستر تكونو اتفقتوا تدسو :):)
يلا منتظرين شماركم

[بابكر]

والله ياعزيز قصتك تقطع المصارين راجلين يا ناس اسكهم ديك00 انت شكلك كنت حنكوش من زمان 00 ويقدين يا عزيز انت وكت الاميره البريطانيه جات السودان كان سنة كم ؟؟؟ انا غايتو بتذكر كمن جات لكن ماعارف التأريخ

اما قصة خالد والله كانت من امتع القصص اللى سمعتها
وهاكم دى

حصلت لى وانا كنت عريس جديد لنج

بعد ما جينا من شهر العسل,,, ابوى ادنا غرفه مفصوله,, وكان كل الاهل والاحباب مساهرين معانا آخر ونسه وبعد فاتوا كلهم ودخلنا للغرفه وتأهبنا للنوم00اذابجراده من النوع الاصفر الكبير داك دخلت جوه الغرفه, وركت فى السرير بتاعنا ,,, وانا بصراحه الجراده بسبب لى رعب عديل والله اقابل الثعبان ولا اقابل الجراده وتعال شوف الجرسه وانا اقول للمره انهرى الجراده دى عشان ادخل ,, لقيت ليك المره ذاتها خوافه
والله العظيم قعدنا فى الكراسى بره حتى الصباح ,, ولمن عاينا للسرير لم نجد للجراده اى اثر000000000 نقطه ضعفى التى لم اعرف لها سببا حتى الآن هى ((الجراده ))

[عزيز عيسى]

كاتب الرسالة الأصلية ابراهيم

عليك الله يا عزيز كدة معتدلة بي وين بس يعني دي بالغت في انت عارف لو ما قميص "تحرمني منك" دة كنت حتقول اصغر من قمر الزمان يعني مواليد 1987م انا سألت قالو قميص تحرمني منك كان قمة الموضة في التلاتينات الوكت داك مدني قالو كان فيها تلفزيونين ابيض واسود وسبعة روادي ناشونال .. وبرضو تقول لي ..

قال تحرمني منك قال
:confused:

برهوته،

طيب عشان ما تزعل أنا قدمتك شوية في القائمة.. أها كمان في واحد تاني عايز يحتج يقدمني شوية؟

عمك بابكر عايز يختني في أول القائمة بأي طريقة.. لكن اعمامك ديل قدام خلاص بس خليها مستورة.

يا برهوته الثلاثينات يمكن عربات ما كان في.. كمان تقول تلفزيون.. ده انت شبحت شبحه كبيرة خلاص.. غايتو الثلاثينات دي الا تكون عراريق تحرمني منك.. واللى سألتهم ديل ضيعوك وودروك.

ايه رأيك في القائمة دي:

بابكر، ابوالمهتدي، ابوشوارب، ودالمأذون، عزيز، ودهاشم، أمير، ابوروان، ابراهيم، قمر الزمان.

عايز اخت ضياء لكن ما عرفت اخته في أي ترتيب.. بترك ليك انت امره وتخته في المكان المناسب.

عزيز

[ابو المهتــدي]

بسم الله الرحمن الرحيم
سلام عليكم هوي مساكم الله بالخير 0 وانا شايف الجماعة شمارهم طلع 0 والكبر ما تخافو منو 0 الا اذا كان واحد فيكم شايف ليهو شوفة 0 غايتو من ناحيتي ارقدوا كف 0 واظن اخوي ود الصوال برضوا ماعندوا طريقة 0 نبقي علي اخونا ابو شوارب دة 0خواف موت وعبد العزيز ما بدور طاري العرس 0 ام بقية الجنيات 0لسع في بداية الطريق 0 وشوية شوية بنعرف دروبن
ام تواريخ السيرك 0 الهندي 0 نحن لم نشاهدة 0 ولكني اذكر جيد ان لهم كشافة كان نورها يسطع في سماء الحلة وقتها0 ولم نتمكن من مشاهدتهم نسبة لعدم المقدرة للذهاب للسيرك لصغر السن وعدم السماح لنا للذهاب له وكن نسمع حكاوية من الكبار 0 ام السنماء المتجولة 0 فعلا كانت في سيارة كومر 0 وشاهدناها عدة مرات لانها كانت تجوب كل المنطقة 0وكانت تاتي لنا في السوريبه في فترات متقطعة 0 ونعرف كل افلامها بالحتة
ام عن الذكريات فهناك الكثير 0 وخاصة عند ما كنت طالب في المرحلة الوسطي 0 ومن السنة الاولي 0 اعرف كيف 0 اقوم بتجهيز كل لوازمي المدرسية 0 في فترة الاجازة 0 كنت احد عفاريت السوق وخاصة صف العناقيب 0 بداءت قصتي معة بداية بالذهاب مع اخوتي ابناء عمومتي 0 له 0 ثم التعرف علي كل اخوتي من العايلة 0 بداء المشوار من زيارات المستشفي كما قال عمكم ود الصول 0 شي بيع عدة وصابون
واصتياد القادمين للمدينة 0 وشراء منهم بعض احاجيات 0 وبيعها في السوق 0 ثم تطور الامر الي 0جلاد العناقريب 0 وبعض الاعمال فيها 0 ثم الري 0 حيث كنا نعضي كطلبة اعانة من الوزارة 0
0 اهو من يومها كنت 0 من اميز الطلاب في للبس 0 كنت اردتي الفنلة الشبك في ايامها 0 والساعة الجوفيال 0 والنظارة البيرسل 0 وهذا مما جعلني شقي حال0 وانا في المراحل الوسطي 0
ولي في ذلك دافع اخذتة من الوالدة طيب الله ثراها هي التي دفعتني في طريق الاعتماد علي الزات وجعلتني اعتمد فيها كثير علي نفسي 0بل احمل هم اخوتي من بعدي وكانها تضعني في ذاك الطريق كانها كانت تدرك ريحيلها 0 وانا في تلك السن لانها لم تمكث طويلا بعد دخولي للمدرسة الوسطي
وما زلت اذكر قولها وتلك للحظة 0 حين ذهبت فيها في اول يوم للمدرسة الوسطي 0
وعند حضوري في الظهر وجدت ان امي قد جهزت كل حوائجي من فرش ولوازم مدرسة في الديوان وفصلتني فصل تام عنها وعن اخوتي 0 وعندما سوالت عن ذلك قالت ان كبيرها غدا رجل 0 فكم كانت احلامها عن كبيرها تريد ان تعيشها 0 فياللقدر لم تعش لتلك طويلا 0
وغدوت احمل الحلم وانا يافع 0 فاسال الله ان يرحم تلك الام التي ادات رسالتها لي بالكامل وانا طالب مرحلة وسطي عفوا اخوتي لقد سرقتني الزكري 0 بذكر امي فانا فعلا شديد التعلق بزكراها 0 حتي ان ابني الكبري
تكني باسم امي 0 ودائما اناديها بام ابيها 0
مازال الانس طويل ولنا رجعات 0 في دكا ن الحبيب ودالصوال 0 وكان اخي الحبيب ود المازون اختار ذلك من ربوع دياري 0 لا ن الصول فرع من فروع تلك الربوع الغالية 0 مع اعزازي وتقديري لذاك النسيج الغالي في تلك الربوع 0 وسوف تكون الونسة لها طابعها عندي وبالبلدي للجلسات القادمة 0 وانشاء الله انتم موعودون مع قدح من العود وله خرص كان من مفاخر امي بنت يوسف في المناسبات 0
البيت قريب 0 والقدح ان لم يسرقة الزمن فانتم موعودون بالتحكر حوله وبه لقمة غطاوها طبق احمر 0 ملاحها روب ابيض 0 في جردل طليص 0 وفوقة مكمامة للملوح 0 ونحن عند وعدنا 0 وللحديث بقية دمتم

[امير عبدالباقي]

ازيكم كيف اصبحتو
والله ياجماعه امس مشيت جده وقابلت اخونا ودهاشم الزول ده ماصدق اني جاي جده ماسكني ليك تلفونات من لحظه طلوعي من الطايف اها وصلت وين يصبر ربع ساعه ويتصل اها وصلت وين التقول راكب لي طياره انا المهم وصلت جده وتعال ياوصف خش بالشارع ده وخلي ده لما باقي لي كيلوين لقيتو ليك بقول لي لا ماتلف من هنا اتعدي من الوايت بتاع المويه ولف شمال بعد الاشاره خلعني ليك قلت الزول ده جنبي ولا شنو بقين اتلفت زي المجنون اشوف لي سوداني في ساره ولا ورقف في الشارع تصدقو هو كان مراقبني من بعد كيلوين وهو جالس في الشركه في الدور الرابع كان متابع فيني الشوق بحر طبعا اها وصلت بعد الوصف داه ودخلت عليه وهاك ياسلام طبعا هو قايلني حلبي حسب سكني في فريق الحلبه
والراجل هاك ياكرم وحلف طلاق الجعلين انو لازم الغداء عندو وانا مستعجل عندي شغل عاوز اخلصو لكن اعمل شنو اطلق الدكتوره ماممكن
المهم خلصت شغلي وجيتو البيت وهنا المفاجئه وقابلت الدكتوره ياهم ديل ناس مدني ست بيت من جد والراجل كان مدينا فكره خلط وهاك يالغداء الماخمج وخاصه السمك والشطه العجيبه وبس نسيت اخد كيف الخلطه بتاعته الشطه دي لنو كماناها كلها
وهاك ياعصير عجيب كده والتحليه انا نفسي انقطع من الاكل وصاحبكم خالد اكال اخر زول قام من الصينيه قال عاوز يعمل مراجعه للسمك بقي يفكك ليك في السمك قطعه قطعه التقول مكنيكي بفك ليه في راس عربيه
لكن جد عدينا يوم جميل جدا
بالمناسبه اعملو حسابكم من خالد هاشم ده لسانه سليط اكعب من ابوروان وابو شوارب
شنو شايفكم صنيتو كلكم ماتتكلمو ودالماذون الليله قهوتك وينه
الظاهر ابوشوارب نسي التنباك ماجابومعاه من السوق
ودعناكم الله

[خالد هاشم علي]

بالأمس تشرفنا بزيارة أخونا وحبيبنا امير عبد الباقي من الطائف .. وطبعا العربي لمن يجي المدينة بكون متعب في الوصف وعلي طول يقول ليك المكان داك وين للصهريج.
المهم بعدما سل روحي وصل أخيرا لمكتبي وبرفقتة كريمته الرائعة العسولة رحيق...
وهاكم الشمار ده ياأبوروان...
طبعا لقيت ليك الحقيقة مرة...
يعني كنت متخيل أمير ده يكون حلبي وطويل ووجيه من خلال سماعي لصوته.. لكن تعال شوف...
حاجة قصيرة كدة ومفندكة والصلعة لي نص ضهرو. وكمان أخداااااااار . يعني ماعنده أي علاقة مع الصورة الكنت خاتيها ليهو...
فلكل المخدوعين بصوت أمير الناعم وكلامه اللطيف ... هذة هي الحقيقة بدون أي حذف أو إضافة.. ولو مكضبين أسألو زوجته أم رحيق...
المهم ياأخوانا أمير قال لي ح أمشي لي مشوار صغير وأجيك في البيت لأني عزمته للغداء..
أها الراجل سلا روحنا بالجوع والإنتظار.. وخلاني أقرًض في العيش لمن قربت أشبع...
وجاني قريب الساعة خمسة بعد مابطني طمت من الجوع.. والدكتورة مادايرة تخليني أتصبر بي حاجة وتقول لي إستني الراجل التقول ود عمها.
طبعا أمير قعد في الصينية يمزمز في السمك لمن خفت علي السمك... وقلت أحسن ألحق ألبت لي واحدة تحت الصحن.. برضو لقيتوا مرً عليها وخلاها ليك زي صورة الأشعة.
والله كان يوم جميل ولذيد وسعدنا جدا بزيارة أخونا أمير...

أبوروان... يعني خلاص التقول مساهر في الشغل .. والله تلقاك نايم في أقرب كرسي وعامل فيها صاحي للناس..
بعدين ياأخوي ده شغل شنو ده ؟؟؟؟ أصلك شغال في النسيج ولا شنو ؟؟؟

بخصوص الشمارات فإنتظرها وستأتي تباعاً

[بابكر]

الفرده الرهيب والخواجه الحبيب عزيز الغالى والدايما على بالى ,, شوق ياعسل انا وابو المهتدى مابنخاف من الكبر لاننا ما دايرين نشوف لينا شوفه تانى ..عشان كده مافرقت .., بس انت خاتى نفسك بعيد كده لييه ,,, بس حتجى من اميركا وحنشوفك يا بطل,,, يا السكاك الديك

الرائع المرهف ابو المهتدى لك الود يانبيل نبل اهلنا الطيبين الذين لاتغيرهم الايام لك الشوق يا اصيل
شوف ياعوض صاحبك عزيز مالقى غيرى وغيرك يختهم فى المقدمه خليهو يخت نحن شيالين التقيله مش كده ؟؟؟؟؟؟

وبعدين تعال ياهاشم ياوليد خالد,,, شمينا الشمار بتاع الغدوه 00 وانت براك جبتو لى نفسك ,,وامير فضحكم فضيحه بى سمككم اللذيذ والشطه الرهيبه بس كدى وصف لى المكان عشان اجيكم ساى,,, ياخى السمك بتاعكم يشهى الواحد,, وعاد قول لى جده امانه ما جوك ناس
بس نحن خابفين من طولة لسانك ,, ومن اسع انا بقول ليك انا ازررراق وشييييييييين ولى شلاضيم وومفندك كمان والكرش كبيره ,, عشان تكون عارف من اسع ماتقوم تفضحنا ساى ,, انا عارفك انت بس زعلان من امير عشان ضرب السمك كلو ومافضل ليك شى
وانت يا امير,, وكت ضربت السمك, ماتسكت ساى,, يعنى لازم تفك الشما ر000 انا خايف على الراجل يحصل ليهو هجوم رهيب ,, يقوم يشرد يخلى جده .. هو اصلو ناس العمره عاملين ليهو زهلله

سلالالالالالالالالالالالالالالالالالالالام
بس خلاص

[أبوبكرحامد]

ياود الصول زمان الواحد لمن اتزوج بيقولو ليهو أضبح ليها الكديسة بمعنى انك توريها قساوة قلبك تقوم تقول ليها انهرى الجرادة ، عشان كدى ياخوى مااظنك تدخل الإنترنت حتى بعد نهاية الإمتحانات الا بأمر من المدام ، عموماً مابراك شايف خالد هاشم قال المرة منعتو ياكل لغاية مااجى امير تقول أمير مكة ، عموما ح نعمل كشف بالرجال البيخافوا من النسوان وبرشحك رئيس وابوهاشم نائبا للرئيس وعزيز عيسى السكاهو الديك المضبوح امين عام .

[خالد هاشم علي]

الغالي أبوبكر حامد...

نحن السابقون وأنتم اللاحقون....
منو في الدنيا دي مابخاف من الوليه ؟؟؟؟ كضاب البقول ليك ضابح ليها الكديسة ولا موريها العين الحمرا..
ياخي ديل كيدهن عظيم... وكيد الشيطان كان ضعيفا...

[عزيز عيسى]

عمنا عوض ابوالمهتدي الحبيب،

مساك الله بالخير،

تقول لي طاري العرس.. انت عايز المرا تودينا في داهية ولا شنو؟.. وكلامك عن الام والله مؤثر شديد.. ربنا يرحمهن جميعا بقدر ما بذلوه من أجلنا ويدخلهن جنات النعيم.. آمين يا رب العالمين.

عزيز

[عزيز عيسى]

بابكر الفرده يا عنتر يا الاسد النتر،

طيب أخير منو عليك الله.. أنا سكاني الديك لاني ما قدرت اضبحه.. لكن انت الجرادة اللى كنا زمان بنمسكها ونجنحها ونطعنها بالشوكة ونقول ليها طيري تقوم تخوفك.. أكان كدى أخير أنا.

ولو جيت على جده أنا بقول لي ودهاشم امشي شوف ليك جرادة كبييييييييره امسكها وتعال خوف بيها بابكر وقول ليه اوخخخخخخخخخخخ.

عزيز

[بابكر]

الحبيب الغالى الاستاذ ابو بكر والله طلتك بالدنيا وينك 00 فاقدنك يا نوارة الدكان ويا زينة المكان مكانك فى القلوب محفوظ 00بس ماتغيب علينا كتير
وبالمناسبة انت عريس جديد بتخاف ولا لسه ما ضبحو ليك الكديسه؟؟؟

ويا خلودى انا قلت بخاف من الجراده.,,, مش من المره ,, افهموها يا خوافين
مالك طنشت العزومه بتاعة السمك ولا خايف من الدكتوره؟؟؟؟؟؟

ياعزيز انا عارف السودانبه بتمشى للفكى تكتف الراجل ..والمصريه بتقطعو وتختو فى اكياس بس الاثيوبيه بعمل شنو ؟؟؟؟؟ فهمنا يا عزيز ابو ديك ؟؟

[عزيز عيسى]

أمير الغالي،

صباحك أو مساءك بالخير،

عليك الله يا أمير جاي طاير من الطائف قاطعك قلبك ولافي في جبل الهدا لحدي ما راسك داش علشان تأكل ليك سمك في جده.. طيب ما قلتوا لينا نوع السمك اللى اكلك ليه ود هاشم.. لو ما طلع من نوع (الهامور) معناتها ما اكلت سمك.. لأنه سمك الهامور ده اطعم سمك في جده.. وبعدين السمك اللى اكلوك ليه ده كان بالفرن ولا مشوي ولا محمر؟.. ومين الطبخه ودهاشم ولا الدكتورة؟.. ولا اشتروه جاهز من السوق؟.. وخلطة الشطة منو الظبطها؟..

شايف ود هاشم فاضحك وقال انك مع السمكة زي الميكانيكي.. وعرفت انه السمك اللى اكلتوه ثاني في التشليح ما ينفع.. بالهنا والعافية انشاء الله.

المرة الجاية اتحرك من الطائف بدري قبل الفجر علشان يأكلوك كبدة ابل..

عزيز

[عزيز عيسى]

أبو بكر الغالي،

انحنا الواحد فينا ما قادر يضبح ديك.. كمان تقولوا يضبحوا للمرا كديسة.. قال كديسة قال..

انت عارف لو بابكر قدر يضبح الجرادة.. أنا ممكن اضبح الديك.. وبعد داك نفكر في الكديسة..

ولا شنو يا بكور؟

عزيز

[عزيز عيسى]

يا بكور يا فرده،

الاثيوبية بدق الزار.. يعني أنا مدستر عديييييييييييل.. وأنا دستوري نازل..

يعني اخوك لما تضايقه الولية بقول ليها ابعدي مني أنا مدستر.. وما بديها ليك فرصة انها
تقوم تطلب حاجات مني اول.. بالعكس بقوم أنا أطلب منها حاجات تجيبها لي لآني مدستر.
عزيز

[aborawan]

كاتب الرسالة الأصلية خالد هاشم علي
وهاكم الشمار ده ياأبوروان...
طبعا لقيت ليك الحقيقة مرة...
يعني كنت متخيل أمير ده يكون حلبي وطويل ووجيه من خلال سماعي لصوته.. لكن تعال شوف...
حاجة قصيرة كدة ومفندكة والصلعة لي نص ضهرو. وكمان أخداااااااار . يعني ماعنده أي علاقة مع الصورة الكنت خاتيها ليهو...
فلكل المخدوعين بصوت أمير الناعم وكلامه اللطيف ... هذة هي الحقيقة بدون أي حذف أو إضافة.. ولو مكضبين أسألو زوجته أم رحيق... [/B]

انتا عارف يا خالد الزول ده انا شفتوا وكنتا خاتي في بالي صورة اسمح من الانتا خاتيها مرة وانا ماشي العمرة قبل اتحرك من هنا سالتو شكلك كيف ( قلتا احضر شعوري لاي صدمة واكون جاهز ) قال لي وسيم عديل كده قلتا خلاص الواحد يمشي يعمل حق الله ويعمر عمرة حلوة في الشهر المبارك ده ( رمضان ) ويمشي يكحل عيونو بي شوفة الوسيم القلبي رادو وبعد الشوفة دي كنتا متوجه لمحافظة الدوادمي مقر اقامة الغالية خطيبيتي (( ام روان )) يعني شوف الهناء الانا فيه
عمرة في رمضان
شوفة الوسيم
لقاء الاحبة

المهم بعد خلصتا العمرة بقيت اتلفت يمين شمال ورخيت اضاني عشان اسمع لي صوت كداد (( سيارات الاجرة )) الطائف الطائف فجاءة مااكحل ليك الا سيارة برادو 2004 ( يمين جديدة بي اكياسا ) جاية علي عديل كده وقال لي وين بغيت قلتا ليه بغيت الوسيم سوري اقصد الطائف قال لي نط اتكيفت كيف شديد واضفنا للكوم داك بتاع العمرة وشوفةالوسيم ولقاء الاحبة ركبنا سيارة برادو في الهدى الجميل المهم اول ما وصلت الطائف وكان مشوار طويل علي شديد لاني متلهف لي شوفة الوسيم اتصلت عليه وقلتا ليها ياخي اسمعني انا في الموقف قال لي انتظرني في موقف مكة وفعلا انتظرتا في موقف مكة بعد شوية جاء الكاشف يقول لي تعال تعال انا بيني وبين نفسي قلتا ده مالو ده مجنون وا شنو بعرفني من وين يقول لي تعال تعال طنشتو اها تاني القى ليك صاحبك مصر الله ده مالو ده ممكن مشبهني فجاءة كده اتذكرتا انو امير قال لي سيارتو مازدا 2004 والزول البنادي فيني ده برضو سيارتو مازدا :D:D تصدق طلع ياهو زولي زاتو ابو النسب :D:D

انتا عارف يا ابو هاشم الزوول الوحيد الشاف امير ده بالصورة هو خطاب العبيد ;) ;)

غايتو انا بقول الباقيين المارسلو لينا صورم ديل يختوها هنا في دكان ود الصول ده غايتو يا ود هاشم وامير وياسر انا في رقبتكم دي ما في اى زوغه بعدين هسه لمة زي دي كان مفروض تتصورو صورة مع بعض وتنزلوها في المنتدى عشان يكون توثيق للزيارة دي بالصور
يلا الجايات اكتر من الرايحات

[بابكر]

الاخوه الاحباب رواد الدكان,,, لكم الشوق والتحيه 00ايه رأيكم لو كل واحد يكتب قصه غريبه او طريفه حصلت له,,, وذلك لاجل المتعه والخروج من الرورتين والرتابه وحتى نعطى للدكان حيويته وتحلى الونسه ونفك عن نفسنا شويه ,, واكيد ان كل منا حصلت حكايه او موقف 00 فى الطفوله او الشباب
ارجوالتفاعل 00 مثل قصة * بخرة ابو شوارب 00 وديك عزيز00 وثور خالد00 وجرادة بابكر
وبالمناسبه وينك ياابوشوارب طولت الغياب ان شاء الله الداعى خير

[admin]

السلام عليكم شباب وشياب وجلاكين .. دكانكم عامر ماشاءالله .. والصراحة انا الجابني ليكم الليلة شمارين حارات .. اول شئ بالنسبة لزيارة المشرف المزعوم لجدة كانت في القصة خساسات تقيلة .. ففي اليوم المحدد اعلاه اتصل علينا في حوالي الساعة الحادي عشر ابوهاشم .. وقال لي الامير جاي في الطريق واول ما يصل واقابلوا بديك تلفون .. طبعا المذكور ابوهاشم اتصل علي من تلفون مجهول الظاهر عشان خايفني اتتبع المكالمة واعرفو بتكلم من وين واكابسهم .. وطبعا لغاية يومك دا انا قاعد مستني في مكالمة ودهاشم لكن يبدو انو خاف علي السمك هههههههه

بعدين تعالوا انا اول مرة اشوف لي جلاكين حناكيش .. ياعزيز ديك شنو البتجري منو انتا وانتا ياسيد الدكان قبورة شنو البتخوفك .. بالغتو والله .. انتو عارفين اخر الشمار شنو ياشباب واحد من الجلاكين ديل العاملين فيهو اصغر من قمر الزمان عرس واحد من اولادو في اغسطس القادم يعني بعد شهر وحبه .. وبعد سنة من الان ان شاءالله بكون بقى جد رسمي ..

السؤال المطروح الان تتوقعوالجلكين دا يكون منو؟؟؟؟؟؟؟؟؟؟؟؟؟؟؟؟

[admin]

احتمال تكونوا ما صدقتو حتة تتبع المكالمات دي .. واسعة شوية صاح .. لكن عشان تصدقوا تمام رايكم شنو اجيب ليكم صور الجماعة ديل الداسين نفسيهم وعاملين فيها ملوك الوجاهة .. والوسامة .. والوجه الحسن .. حاتكون مفاجاة صاح وشمار تقيل .. طيب يلا نبدا بي مشرفنا امير عبدالباقي ونشوف الن ديلون القرن الثلاثين
http://www.wadmadani.com/up/pic2/6020.jpg
وصورة تانية عشان الحبايب لامير
http://www.wadmadani.com/up/pic2/6021.jpg

نجي بعد دا لابوهاشم .. وطبعا انا جبتا ليكم صورتو انتقاما لاكلة السمك الضاعت علي
http://www.wadmadani.com/up/pic2/6022.jpg

كان ممكن اجيب ليكم صور العرس لكن الجماعة ديل ما لبسو نسوانهم قرمصيص يوم العرس ههههههههههههههههه

[صالح ابوشوارب]

كونكان اخوان

تحية ليكم وآسف اليومين ديل في زنقه ربنا يحلنا ويحلكم بالسلامة في بلاد الغربة الراجل هو العايز الحلل اذا في امتحان هو الممتحن
ينزل من البيت شايل كيس طالع شايل كيس
موية مافي ننزل بالجراكن ونطلع بالدقيق
الديمنو بايظ نزل جاب السباك
السلطة كملت نزل سوق الخضار

المهم اولا الشكر لعمنا بابكر ود الصول لاتصاله بالهاتف للاطمئنان علي وذلك عندما سمع قصة البخرة والفشل الكلوى وابدي استعداده للمساعدة والتبرع وشكرا عمنا دا من اصلك
( طبعا لازم يوم احكي ليكوم قصة الفشل الكلوى من طق طق الي 00000 والراجل يقيف يسمع )
نجي في الجد اولا اعمامي عبد العزيز وبابكر وخالد والله شرطوا عينا واحد من الدجاجة ( دجاجي يلقط الحبة ويجري وهوفرحانو ) والتاني قبورة , قبورة يابابكر نحن كنا بنقبض القبور ونشيل بطنه ونشويه وناكله وخاصة السدر
والتالت ووب ووب علي ، ووب علي كيف تقول ليك ماتصبر ( اقلب ليها الصينية في الواطة ) وفرتك انتظر صاحبك امير وعلي الكرنتينة عدل وهناك في واحد بيعمل اقشيه ، عشان المرة الجاية ما تقول ليك ماتصبر
وانا عارف انت جبتها المنتدي عشان ما نشتغليك لكن الشغل شغل
وبعدين امير دا كان ساكن فريق الحلبة ولا الحلة الجديدة
وشايف الاخ ابو روان واقف بين يافطتين عزيز وبابكر ، يا اخوى احسن ليك فرتك ديل بيشربو دمك
وبعدين قصة جدنا ابو المهتدي دا شنو قال ماشاف السيرك بالله تلقاك بتمشي السيرك وشايل ليك دليبة
وبعدين قصة الصورة الملونة ما داخلا مخي انت في زمنك زمن السينما المتجولة
ماكان في صور ملونة
ويا ود المأذون فتحتا الدكان للشمارات والقطيعة وكشف الحال والجماعة طلعوا
فرة وما قايظني الا الاخير القعد مربع يدو
ومنتظر صاحبه امير والألفة واقف جنبو هههههههههه
وبعدين يا ادمن ( ماشاء الله ) الصور واحد تقول سواق قندراني
مربط وعريض
والتاني تقول بتاع الليمون في بصات طابت والشمس غابت

كدي كويس يا ود المأذون

[rasheed]

والله ياجماعة الكير إشان أوصل أخر البوست ده وأرد لقيت الدوام إنتهى وعندي شغل كتير ،، لكن ببعث ليكم تحياتي لامن أجيكم راجع تاني ويا ود المأذون سلم لي على بشار وقول ليه الرشيد ركس بقول فلة تلاته جنوب الأهلية (ا) وين هسع وذكر بأستاذ عبد الله البشير والتحية لكل الدفعة في تلك الأيام سنتين وراء وسنتين قدام ،،،

[aborawan]

والله يا بكري ما قصرتا فتيت لي الاتنين ديل بالصور

عليك الله شوفم يلمعو كيف ما خلو ليهم نقطة كركار حايمة

بكري من هنا تقبل شكري الجزيل على الصور دي عشان الواحد احسن ينصدم بالصورة قبل يشوف الخلقة على الطبيعة والمعروف انو الواحد في الصورة بكون احلى من الطبيعة لانو بكون ( مجهبز اخر حهبزة للصورة ) غايتو الله يستر عليما من الشوف على الطبيعة

البسمع فصاحة ود هاشم في امير الطلع مفندك ده بقول الود نانسي عجرم لكن لحدي هسه وبعد امعان دقيق في الصور لسه ما قدرت اكتشف الفوارق الا الصلعة لانها ظاهرة شديد لكن بعد فترة حا يكون شبهينا واتلاقينا لاني شايف لي شوية جلحات في الصورة الاخيرة

انتا يا بكري الصورة الاخيرة دي صورة خالد هاشم صاااح :D:D

[aborawan]

مسابقة ابحث عن فضولي واستخرج الفوارق لاول مرة قدام باب دكان ود الصول


شارك في المسابقة ولا تدع الفرصة تفوتك

شروط المسابقة

1 /
ان لا يتعدى عمر المشارك 50 ولا يقل عن 20
( كده ناس الدكان معظمهم برا الفورمة ناس عمي عوض وعمي عزيز وعمي بابكر لتجاوزهم السن القانونية للاشتراك :D:D
كمان اختي قمر الزمان لعدم بلوغها سن الاشتراك وبعد تلاتة سنة تعالي بدري سمح :D:D

2 / لا يسمح لاصحاب الدقون الطويلة المشاركة في المسابقة
( كده بعد لقينا لعمي بكور طريقة دخلنا معانا واتقاضينا عن حكاية العمر دي طلعتو الدقينة برا الفورمة تاني وكمان اخوي بكري ودرتو كلو كلو معليش هارلكم وفرصة اوسع انشاء الله وخلو روحكم رياضية اهي البرازيل وغلبوها تلاتة عادي يعني الروح العالية اهم شئ

3 / على المتسابق ان يشترك باسم واحد فقط ومحاولة واحدة فقط ولا داعي للتكرار
( عشان الناس الكبار ما يسجلو باعمار واسماء شبابية لزوم الاشتراك مافي اى طريقة )

4 / يمنع العضوان ( امير عبدالباقي ) و ( خالد هاشم ) من المشاركة في المسابقة لاسباب امنية
( افتو ولا ما افتو ):D:D



السؤال الاول ابحث عن فضولي في الصورة دي ؟؟














http://www.wadmadani.com/up/pic2/6020.jpg


سؤال الاسبوع

استخرج ستة فوارق من الصورتين ادناه











http://www.wadmadani.com/up/pic2/6021.jpg

http://www.wadmadani.com/up/pic2/6022.jpg

[عزيز عيسى]

والله يا بكري كتر خيرك الواحد فينا من زمان بيدور في تشوق انه يشوف صور حبايبنا امير عبدالباقي و خالد هاشم.. لكن يا شباب ما شاء الله آخر حلاوة والبركة في الشوفة.. وعرفنا حاجات كانت مدسوسه.

ندخل في المرمطة.. عليك الله يا بكري جايب لينا صور مطوعين وتقول لينا ديل امير و ودهاشم..
ود ابو شوارب ما قصر في وصفه ليهم.. انت ما لقيت لينا صور ليهم بقمصان تحرمني منك؟.. لكن عليكم الله أنا ما أصغر واسمح من العجايز ديل.
يا بكري صور الجماعة ديل أنا اتخيل لي شفتهم زمان معلقة في الترحيل.. والدليل انه صورة خالد مخرمة.. هههههههه


حبي وودي،

عزيز

[aborawan]

اطرف نكتة في دكان ود الصول


واحد من الجماعة رواد الدكان لما عرف انو صورتو اتختت في الدكان احتجا وعمل شمطه وكورك وقال عايز يشتكلي لمنظمة حقوق الانسان عارفين ليه ؟؟
قال الصورة دي شينة وكان قاصد يتصورا شينه عشان يخوفو بيها شفع الحلة وطالب وناشد انو الصورة تزال من الدكان وانو حا يتصور صورة ويرسلا لينا عشان نختها وانا من هذه النقطة احب اوجه كلمة واحدة بس للاخ العامل شمطة ده واللي هي


كان عملتا السبعة وذمتا ما بتغير في خلقة الله حاجة


طبعا بما انو الدكان بتاع شمارات ومفروض اني اقول اسمو منو لكن اعذروني ما بقدر اقول اسمو مافي داعي للشمارات الكتيرة لكن بختا ليكم صورتو واعرفو براكم :D:D هو غايتو اول حرف من اسمو خالد

دي صورتو والشطار يعرفو
http://www.wadmadani.com/up/pic2/6022.jpg

[امير عبدالباقي]

ادماين لكن مصادرك رهيبه في استخراج الصور
شايف الشمار ولع ؛ المفروض يابابكر تغير اسم الدكان سميه دكان الشمار
لكن يابوروان مالقيتك بتاع شمار صاح ؛ كدي جيب صورتك خلي الجماعه يشوفو الخلقه ؛ حسي في وجه شبه بينا انا وخالد يااحوص
ابوشوارب نحن صورنا طلعت لكن الباقي عليك خايف يقولو عليك عجوز ماتخاف من عزيز خته وبنمسك ليك خشمو مابنخليه ينفتحو عليك
خالد الجماعه عملونا موضوع اها رايك شنو

[بابكر]

الشله الموقره والفرد الاعزاء
لكم الشوق والتحيه
والله انا كنت متصور امير عبد الباقى وليد ابيضانى ومسمسم كده
وكمان كنت قايل خالد هاشم نحيفونى وصغنونى كده لان صوتو فى التلفون يوحى بذلك

كمان انا سمعت بأنو فى ناس من زمن فلم جانوار فى السينما الوطنيه ومدسين وماعاوزين يورو وشهم
وكمان ابو روان ماداير يخت صورتو ليييييه ؟؟؟ انا غايتو بديهو يومين لو ما نزلها سوف اضطر انزلها من عندى وحأنزل ليهو اشنى صوره
وانت يا ابو شوارب يا اكال الجراد صورتك وينها؟؟؟
وابوبكر ابو صلعه دس الصوره حقتو عشان شنو و لييييه ؟؟؟وهو عمدة الجلاكين
والله الجلاكين دى انا ما عارف معناها شنو اظنها الناس العجايز مش ؟؟؟

[عزيز عيسى]

أنت عارف يا بابكر ود ابو شوارب ده لو ما خت صورته.. الا نجيب ليه الفكي يبخره بي لستك ويقول ليه اخرج اخرج عشان ينزل صورته.. أنا غايتو راسم ليه صورة في خيالي بس اسكت خليها احسن نخليه يجي.

اخرج يا عجوز.. اخرج .. ورينا صلعتك.. اخرج.

عزيز

[ابو المهتــدي]

بسم الله الرحمن الرحيم
اولا سلام لكل الحبة الغوالي والله انه لكنز يغتني 0 والحمد لله كدة
نقول الواحد مطمئن 0 لان الاسماء كانت عاملة لينا طشاش 0
وبالمناسبة سوف يجد عزيز الطريق ممهد وممكن يتفنطز عليكم 00 وللستة العمرية سوف اتركها له 0 بعد ظهور 0 كوكبة الندداء الجدد 0
لاتفتكروا ان الصبغة سوف تغشنا 0 ويكون اخونا ود المبارك قدم لينا حقيقة اخري اذا قدر جاب لينا صورة اخر عجوز داسي نفسة 0
لك التحية اخي ود المبارك 0

[بابكر]

اعلان هام لجميع رواد الدكان

وصلتنا اليوم كميه محدوده من البزازات الاميريكيه الاصليه ماركة فاقد حنكشه وارد شركة عزيز ابوديك المحدودة 0000 كما وصلت ايضا كمية من اللهايات الخطيره ماركة البخره وارد شركة ابو شوارب 000فعلى كل من الاعضاء ورواد الدكان الصغار 000 الجهال والى بعضهم لسه فى اللفه سرعة الحصول على هذه البزازات السحريه واللهايات العجيبه قبل نفاذ الكميه 00 ننوه بأن الكميه محدوده ولا عذر لمن انذر

ابوجراده
الاسد النتر

[بابكر]

تعرفوا ده منو ؟؟؟؟؟؟؟

[عزيز عيسى]

[QUOTE]كاتب الرسالة الأصلية aborawan
مسابقة ابحث عن فضولي واستخرج الفوارق لاول مرة قدام باب دكان ود الصول

السؤال الاول ابحث عن فضولي في الصورة دي ؟؟

http://www.wadmadani.com/up/pic2/6020.jpg
دمه عكران.. محتحت ومجبص..

سؤال الاسبوع

استخرج ستة فوارق من الصورتين ادناه

http://www.wadmadani.com/up/pic2/6021.jpg
دمه رايق.. اكل سمك خالد وعمل ليه كضوم..



http://www.wadmadani.com/up/pic2/6022.jpg
حردان.. وندمان على زيارة أمير ومراته لأنهم كملوا السمك كله..



http://www.wadmadani.com/up/pic/azez.jpg
مش اصغر واحلى من صور المطوعين العجايز اللى فوق؟..

يا جماعة فين برهوته مختفي.. والله عايزنه يظهر علشان يلعب لينا في الصور دي شوية..

عزيز

[ابو المهتــدي]

بسم الله الرحمن الرحيم
احبتي الكرام كم هو جميل ان يتحكر والواحد في وسطكم وهو جالس متربع الكرعين وكرجتة المطببة مستندة الي كتفة 0 لزوم القومة 00 وصينية الجبنة في وشه 0 والبنيه قمر الزمان واقفه تبحلق بعد ما جابت الصينية من بيت ود الصول 0 واعمامكم بسلامتهم جالسين علي عناقريب ود الصوال الطلق ملص 0 احدهما من سدر 0 والاخر من حراز 0 وهم يانون من حمل القوم 0 ذات الاحجام العائلية 0 ماداير اقول 0 من هم 0 ام صناديق الشاي لصغار القوم 0 ام من الميمنة ضبعا بحكم السن 0 ابو شوارب 0 ام من الناحية الاخري ود الماذون لزوم ضيافة القوم 0 وامامة كما اخاف الكضب الجي ابراهيم 0 لمناوله الفناجين للعجايز الا ن السباتة علي الحيطة وجنب باب الدكان 0 لزوم ود الصول يطلق طهرة فيها 0 من القومة والقعدة المتكررة 0
المويه ياجماعة الخير الزير جديد 0 للداير يشرب00 تري الداير يشرب 0 ابراهومه 0 جنب الزير 0 ولو دايرين موية التلاجة تري البنية قمر الزمان رسلوها قبل ما تلفح طرحتها وتمشي للعلم 0 تجيب ليكم كورة تلج من بيت عمها ودالصول 0 ولا تعكب علي فريقنا وتجيب ليكم كورة تلج من هناك 0
تري الجلسة حطول 0 ولي حديث له وقع لدي
واول شي داير اقوله لكم 0 والله لا بخاف 0 من ولية 0ولا غيرها 0 واول يوم لها كمكمتها ليكم بالفركم عد متها النفس
اخير عمكم ابو شوارب مرق من الفكي بحيلتة 0 وتاني لابخاف من جرادة ولا غيرها بنقبضها عديل وبنشرك بيها في الترعة للسمك 0 ام ديك عمكم عزيز 0 خلوة 0نحن الكديس لو جاء عندنا بحرن من بعيد ويرجع
يعني الولية عرفاة ضبحتة لا اكلت ولا شربت 0
رقم ذلك 00 انني لا اخاف عديل من أي شي 0 بس في شي احد ما عندي مابخاف منو ةلاكن لاحبه هو الحلف بالطلاق 0 وطيل حياتي لم احلف به سوي مرة واحدة ولي فيها زكري كم هي جميلة 0 مماجعلتني لا اداني الحلف به او من طبعي لا اعرف الحلف بة 0 اه بعد كدي نصلي ونجيكم 0 انا اخوك ياابو شوارب
ما قلت ماكبير كدي قوم من دون العصاية الصلاة وجبت يا جامعة وبعدها نواصل

[خالد هاشم علي]

شوفو ياشباب...
الصورة النازلة دي لا تمت بالواقع بصلة وهي صورة الرخصة وإتصورتها تصوير سريع بنظام التصوير الفوري...
والصورة الجديدة الولية دستهم مني وقالت أحسن ماأنزلها لأنها بتخاف علي بنات المنتدي من الفتنة...
لكن حتنزل لي صورة حديثة في القريب العاجل وبالحجم العائلي ... بس ماتقومو تطبعوها كروت وترسلوها هدايا زي صور النجوم وكده.. ولازم بنات المنتدي يتعهدوا إنهم حيتحملوا ويقاوموا الوجاهة الشديدة دي وماتحصل ليهم حالات إغماء...

بخصوص صورة أمير فدي أحسن صورة عنده .. وكان معطون في الحمام لمدة يومين وفي الكلوركس لمدة تلاتة يوم عشان يتصور الصورة دي... وبرررررررضه حقيقته مرة..... ياأخوانا الشين شين والوجيه وجية ( زيي كده )... ولا شنو ؟؟؟ نحن نحتكم لي بتنا قمر الزمان بس بعد ماأنزل الصورة الجديدة. لأنو الجنس الناعم بفهم أحسن منكم في المسائل الجمالية دي ياحاقدين.

[خالد هاشم علي]

شماااااااااااار:
ياشباب والله أمير طلع ود ناس رسمي وشعبي...

أمبارح تشرفت بي زيارة كريمة منه ومن أسرته المكونة من والدته وزوجته وشقيقته...
وحقيقي الراجل طلع ودناس ماساهلين ... لكن مافي أي وجه شبه بينه وبين أسرته... والله التقول أمير ده لقوهو واقع في الواطة...
غايتو الله يعين أم ريان ويجيرها في مصيبتها.. ونحن في الدكان مستعدين نقايط ليها أمير ونستبدله ليها وندفع الفرق من جيوبنا... بس هي تطلع من حالة الغيبوبة الي هي فيها دي وتفوق وتصحصح لأنو أكيد أمير بكون عامل ليها عمل وبخرات عشان تتزوجه.. وإحتمال يكون مشي لي الشيخ حق أبو شوارب...


شماااااااار طازج :

إتصلت بي أخونا صالح أبوشوارب وطلبت منه ينزل لينا صورته عشان نشوفه.. قال لي ليه أنا عوير ليكم...
ومن هنا نعلن عن جائزة قيمة لمن يتمكن من إحضار صورة لصالح أبو شوارب.. ويلا ياآدمن إستخدم مصادرك السرية ولا فالح فينا نحن بس...


شمااااااااار حااااااار:

عرفت من حبيبنا أمير إنو صورة أبو روان المنزلها في المنتدي العام ومتلفح فيها بي العمة لا تمت له بصلة... وبالمناسبة أمير ده شاف أوروان عيان بيان يعني أكيد كلامو صاح وقال لي إحتمال كبير الصورة دي تكون ماحقته... أها رأيكم شنو

[خالد هاشم علي]

كمان بالله شوفو عزيز بتكلم في الوجاهة ... ياحبينا البركة في أمريكا لمعتك وبقتك ناير.. يمين لو كنت قاعد في مارنجان لسه ماكنت لقيت واحدة تتزوجك ... وبرضه البركة في أم العيال وبصماتها ظهرت عليك ... وهسة أمير الشين ده لو وديناهو لي أمريكا برضه حيطلع حاجة تانية... ولا شنو يافردة...
كدي هسة ياعزيز نخلي برهوتة يشتغل لينا في صورتك دي شوية... بس يطلع لينا البدلة دي ويلبسك جلابية من حقات الغبش... أها كيف يكون الحال... يعني إنت تاميها وجاهات وبدل وقشرات سااااااااي.. يلا يابرهومة فلفل لينا عزيز دنيانا ده..

[خالد هاشم علي]

بالله عليكم ياأخوانا... صورتي وبي شناته دي وهي في النص بين صورة أمير وصورة عزيز مازي ساندويتش المربة ؟؟؟

طبعا أنا المربة وعزيز وأمير ديل العيشة من الجنبين ولا شنو...

بعدين تعالوا هنا كيف تقولوا أنا بشبه أمير ؟؟؟


ياأخوانا أمير ده وشه زي كورة التنس... ومنفخ كضومو زي لقيمات الصدقة

[ضياء الدين احمد]

والله ياخوانا دي شمارات ومولد كبير جدا جدا فاتنا منو الكتير
لكن انا ببدأ بي موضوع خالد هاشم ووجاهتو الظاهر انتو ما مصدقين كلامو لكن انا طبعا بعرفو من اول ياخي ده بعد اجي عندنا في الجامعه بوقفها علي فد كراع وبنات الثانوي كاسرات رقابن فيهو انتو قايلنو هين ولا لين
وياود هاشم بقول ليك المابعرفك بجهلك والناس دي ما عارفه امكانيتك
(اسمع حول 500ريال في حسابي انا ما قصرت معاك)
والله يا اخوانا الدكان ده جميل جدا جدا بس عندكم تمباك
وبمناسبة التمباك دي قبل عشره سنوات رسلوا لي مجموعه من الشباب اصحابنا في جامعة الخرطوم جواب وقالوا لي بكره عاملين احتفال بمناسبة اليوبيل الفضي لحقة عبد الحق في البركس وطبعا بحضور اخونا محمد عبد الحق واخونا الرشيد الرمبه واسامه ابو ضرس وشله وطلبوا مني قصيده بهذه المناسبه وبصفتي سفيف قديم وقلت ليهم
السفه ياسبب الهنا
يالفي الخشيم ليك كم سنه
اصبحت اعشق ختتك
وشلوفتي صبحت مدمنه
يا احلي من كل البرنجي
وكل سيجاره مدخنه
عطرونك الاصفر لذيذ
ولما اللسان فيك انتنى
حسيت بانو الدنيا بهجه
والاغاني مدوزنه

وبمناسبة التمباك طبعا قالوا لي كان ما خليت التمباك عرس مافي شفتوا الحكم البقينا فيهو من هسع
واخيرا لكم تحياتي

[بابكر]

تبقي سيرتك هي الكلام * وتبقي صورتك هي الرؤي الحلوة البعيشا في صحوتي أو حتي في عز المنام* ويبقي إسمك هو الغنا* هو البخفف لي عذابات الضنا* مالشفته منك يامني الروح ياأنا* وصفو بصعب ياجميل وبعدت عنك ولما طال بي النوي بقي لي أسيبك مستحيل

خلى الطابق مستور يا خلودى
وانت عارف انا قاصد شنو الله يخليك

[aborawan]

امير عبدالباقي الامين من المستحسن تختاني وتفك شوطي

خالد هاشم علي من المستحسن تختاني وتفك شوطي


ياخالد و يا امير انتو الاتنين بالذات انا لو قابلتكم حا تتعبوا جدا عشان كده اختوني بعدين يا امير انا ما ناكر انو صورتي بالجلابية لا تمت لي بصلة لكن برضو صورتي في الواقع ما احلى من خلقتك دي ، الله يسالك لما تجي تعاين لي ما بتتحلق ، الطول ده براهو في حد ذاتو مقياس جمالي يا مفندك بعدين انتا مافي داعي للشمارات بالكلام سااااي مفروض تفتني بالصورة عديل كده

بعدين يا خالد هاشم تعال هنا بعد كده مش كان جبتا صورة حديثة خلاص الفيك اتعرفت وزي ما قلتا ليك كان عملتا شنو وشنو ما حا تغير في خلقة الله
شمارة صغيرة :
امس قلتا اضرب على اخوي خالد ده واسلم عليه المهم ردت علي الدكتورة وعرفتا منها انو خالد قافل على نفسوا الحمام من تاريخ الخميس 9 / 5 لزوم الصورة القادينا بيها دي وقال انو حا ينزلا قريب عشان كده يا اخوي صورتك لمها عليك نحنا بندور صور على الطبيعة ما صور يستحموا ليها

يلا المغرب قرب ياذن عندنا الليلة نصلي جماعة في دكانا نفرش البروش ويلا يا بكور نط في التبروقة قدام وسوقا بينا انتا

[عماد الصادق]

السلام عليكم
دكانكم رهيب عديل كده..
وأجبرنا على الظهور عنوة والتهليل .. وإنفرجت أساريرنا
لكم التحية ناس الدكان ..
بس ملحوظة صغيرة كده..
يا أخ ابو روان ...
الصورة قبل وبعد ..
العيادة دي بتاعة تشحيم .. ولاّ تشحيم وتلوين..
يعني أنا ما قاصد حاجة!!!
بس يستحيل تكون بتاعة تجميل
ويستحيل تكون بتاعة ريجيم!!!
وخليك قريب أستاذنا العزيز .. ودالمأذون (وماندورك في شر إن شاء الله)
ودمتم سالمين

أبو أشواق

[aborawan]

يمين الشوق بحر اخوي عماد وبركة في الشوفة دي انتا عارف كان ما جيت كان جينا عملنا حملة تفتيش لي جدة دي كلها وغربلناها وطلعناك لكن غايتو جاتنا شمارة تحت تحت كده انك سمعتا بالكشة الكانت في الكرنتينة من كم يوم كده وقلتا احسن تدسا قبل يعكشوك

بتمطر صاعوط انتا ولا شنو :D:D

[بابكر]

ياس انتوا جنيتوا ولا شنو ؟؟؟ شابكننا انا صورتى اجمل من صورتك,, خلاص فضوها سيره,, واحكوا لينا حاجات حلوه,, واستهدوا بالله خلوا الونسه تحلى 000 عاوزين قصص طريفه,, ومواقف عجيبه من واقع الحياه,, وخلونى اقوم اظبط ليكم الفول الما خمج,, وخلى عمكم ابو المهتدى يعمل الشاى الرهي,, وانت يا امير افرش البرش ,,وخلى محمد ابوروان يجيب الاباريق والمويه,,, واهو انا شابف عمكم عزيز جاى من بعيد,, وكمان ابو شوارب,, والقعده للصباح مششششششششششششش؟؟؟؟؟؟؟؟؟؟؟

[أبوبكرحامد]

سلام جاكم ياناس الدكان ، بشوف دكانكم عامر وجاب عماد الصادق بعد طول غيبة وجاب كمان ضياء العريس ، وماشاء الله على ضياء شايفوا من هسى رفع الراية البيضاء وخلى التمباك عشان تهديد المدام " لى قدام بنسميها الولية بس خليها تقدم شوية " ، لكن ياأمير شبه روحك والجاز مسوحك ، وكان خالد هاشم رقبتو مسلولة ذكرنى الكورس بتاع أغانى الحقيبة ، وعمكم عزيز أنا لمن شفت صورتو قايلو كولن باول أيام شبابو ، غايتو الصور مابتتقابل وبحييى أبوروان فى مسابقة الصور ، بعدين ياعزيز قالوا لى هسى بتخاف من الديك كان لقيتو فى الزغنى بتنفض يدك وبتقوم جارى ، غايتو ماعارفك بتعمل شنو مع التيركى فى الثانكس قيفينق " Thanks Giving

[امير عبدالباقي]

الحبائب ازيكم ودالصول اهااااا البريش فرشناه بس خلي الجماعه يقعمزو في الواطه دي
انتو تعالو القال ليكم انا شغال بحكايه الصور دي منو لكن صراحه ماشايف زول فيكم اوجه مني صراحه وانا الوجاه بعد كده داير بيه شنو الله يدينا عمر وربي اولادنا وبطلنا حركات المراهقه دي زمان يعني الواحد مابفكر في العرس تاني ياخوانا؛
بعدين يابوروان صورك عندي بالكوم بس مافي داعي للفضايح انت برضو حبيبنا
بعدين ناس المنتدي بقومو يجرو لما يشوفو الخلقه دي
ودالخال ودالماذون طبعا انا شبه روحي دي ماعاوزه ليها كلام والعارف نفسو مستريح قايلك بتيف معاي ضد الارهاب زي مابقول المثل...................
والله ياود الصول الجماعه لقو ليهم موضوع نعمل شنو خليهم يفرفشو شويه
اماخالد هاشم لقيتو ليك عامل قلبه في البت وبفتش ليه في اوجه صوره عندو الدكتوره لما اضايقت منو قالت ليه ياهو شبهك عاوز تغيرو
ابوشوارب ياجماعه قال مابنزل صورتو خايف تسلو لسانكم عليه قال لي احسن خلقتكم انا لوجبت صورتي ح يعملو فيني شنو ماتشيل هم جيبه ماتخاف ياجماعه امسكو خشومكم خلي الراجل ينزل صورتو

[بابكر]

جندى امريكى يحمل طفله عراقيه رغم منعه من ذلك


ارجو التعليق

[أبوبكرحامد]

سلام ياشباب ياحلوين ، يللا للحكاوى والمرة دى بحكى ليكم حكايتى مع المأذونية ، بعد وفاة الوالد عليه رحمة الله انتقات المأذونية لشقيقى الأكبر " كوارة " ، وحدث ذات مرة أن تصادف وجود عقدين فى نفس التوقيت وتقرر ارسالى لعقد فى بانت جوار نادى الإصلاح والشباب هناك شلة كشتينة ومسخرة ، وحضرت عربة لإصطحابى لبيت العقد ووصلنا إلى هناك وقام أحدهم بفتح باب العربة لى كنوع من التوقير للمأذون ، وقد تحاشيت عند نزولى النظر للشباب عشان ما أضحك من منظرى ، وتم العقد بخير ، وعند عودتى للبيت حضر لى أحد الأصدقاء قادماً من أمدرمان للمشاركة فى الزواج الذى قمت عصراً بإجراءات العقد فيه ، وأصر صديقى على للذهاب لبيت العرس وحاولت التهرب لأننى كنت الماذون ولايصح أن أذهب للحفل وبعد إصرار صديقى رافقته بشرط وقوفى بعيداً ، وبعد وصولى للحفل أصر صديقى على الدخول لنبارك للعرسان ، وعند وصولنا منتصف الخيمة تجمع حولى رفاق السوء وعملوا دائرة وأخذوا يرقصون وأنا فى منتصف الدائرة وهم يهتفون " بى ماذوننا " وطبعاً الموقف غير محتاج لتعليق يعنى ماذون العصر ورقيص المسا " شقاوة "

[القناص فوزي]

أخ بابكر :

تصدق كتبت رد على الصورة أعلاه
وكل ماكتبت لايوفي بحق الصغيرة التي بيده

الذين إذا أصابتهم مصيبة قالوا إنا لله وإنا إليه راجعون

وحسبي الله على من كان السبب

الله لايسامحه لا في الدنيا ولا في الآخرة

والله العظيم إن القلب ليبكي على مصابها وإن الأمر جلل

هل أصرخ وأقول ............ وأمعتصماه .........

(((( قد أسمعت لو ناديت حيا **** ولكن لاحياة لمن تنادي !!!!!!!

[بابكر]

الاخ الوفى الرائع القناص فوزي شكرا ل تعبيرك البليغ







والله العظيم إن القلب ليبكي على مصابها وإن الأمر جلل

[عزيز عيسى]

أفو يا ود المأذون.. أنا أخاف من الديك.. انا باكل الديك مطبوخ أي طبخة حتى لو كان زغني.. بس الضبح ما معانا.. وانتو هسع جالسين قدام دكان ودالصول ده امشوا قبضوا جداد الحلة كله اضبحوا ونجضوا أنا ممكن أكله..

وبعدين انت عارف انه في محلات عربية بقت تبيع التيركي (حلال) مضبوح وجاهز.. بمشي اشتريه واسلمه للولية اخليها تظبطه بالفرن.

عزيز

[عزيز عيسى]

سلام جاكم يالقاعدين قدام دكان ودالصول وتتونسوا،

امبارح كنت بدور في البوم الصور.. وعن طريق الصدفة لقيت لي صورة من عام 1982 قبل ما اتزوج بشهرين ثلاثة بالزي الرسمي السعودي.. بتذكر اتصورتها في استوديو ببني مالك في جده..
ويلا يا أبوشوارب وخالد اخدوا راحتكم وبهدلوني زي ما عايزين..
بابكر ود المأذون أمير وابوالمهتدي.. ايه رأيكم؟

صاحب السمو الملكي الامير عبدالعزيز بن عبدالله عيسى آبو السعود حاكم امارة ودمدني..

http://www.wadmadani.com/up/pic2/fgfg.jpg

وبالمناسبة اتذكرت نكته حدثت لاحد الاخوان السودانيين في جده زمان.. وهي ليست بمثابة صخرية من اخوانا السعوديين.. ولكن كنوع من الطرفة حبيت اني احكيها.. وأرجو من حبيبنا القناص فوزي ما يفهمني غلط ويزعل.. لانه لما كنت في جده اخوانا السعوديين كانوا شايلين حالنا بالنكات عن السودانيين.. المهم..

واحد اخونا سوداني ذهب للبقالة لشراء بعض الحوائج.. وقد دارت بينه وبين صاحب البقالة الونسة التالية..
صاحب البقالة للاخ السوداني: والله والنعم.. ويش بلدكم؟..
رد السوداني: أنا من السودان..
صاحب البقالة: ومين يحكمكم من ابناء الملك عبدالعزيز..
اعتقد اخينا السوداني أن صاحب البقالة بيسخر منه..
وراح رد علي صاحب البقالة صاخرا:
الامير جعفر نميري بن عبدالعزيز آل سعود.

عزيز

[بابكر]

نكات المساطيل للدكان فقط
مسطول نايم في الحوش .. أمو بتصحي فيهو .. يا ولدي قوم الشمس طلعت .. قال ليها : دخليها وأقفلي الباب .



اثنين مساطيل .. راكبين عربية الأول سايق والثاني راكب ورا .. الراكب ورا سطل سطلة شديدة ..
ماشين في شارع النيل .. السايق شاف الشجرة (مضروبة جير أبيض نصها التحت) أفتكرها عسكري حركة .. راح واقف .. لما شافها شجرة ضحك وطلع طوالي ..
بعد مسافة الثاني من ورا .. قال ليه .. التافه دا قال ليك شنو ؟



واحد مسطول سألوه مالك زعلان ولا شنو ؟ قاليهم لا بس الوالد شوية متوفي


مسطول سالوهو منو من الانبياء كان بتكلم مع الحيوانات
قال ليهم طرزان
واحد مسطول شايل لوح ثلج وتعبان بيفتش فيه واحد سأله
ما لك يا زول قال ليه بينقط وبشوفه مقدود من وين 0

واحد مسطول رجع بيتهم ما قادر يفتح الباب نادى لي ولدو قالو مين ؟رد عليه انا ابوك الباب ما فتح معاي، قالو ارسل ليك المفتاح ؟ رد لا المفتاح معاي رسلى لى خرم الباب
واحد مسطول شاف أهلو بتغدو فول ،،،، قال هي شوف أخواني بتغدو فطور

في مسطول قال لي زميلو: أمبارح اليوم كلو بالي مشغول
رد عليهو زميلو : يمكن يكون في زول رافع السماعة

[خالد هاشم علي]

ياعزيز يمين تشبه محمد الخليوي...لاعب المنتخب السعودي

[بابكر]

لكن بالغت يا عزيز كنت متصور اى شىء الا انك بالذى السعودى,,,,,,

[امينو]

سلام هوووي يا ناس الدكان ما اقطع عليكم ونستكم
انا بصراحة بتابع جديد الدكان دا طوالي والبوست دا بالجد ارع بوست في المنتدى ودي اول مرة اعلق بعد متابعة طويلة بس في حاجة حارقاني شدييييد انتا يا عزيز صورتك دي جادي انها سنة 82 والله شكلك كدا ابو عبد العزيز ( الملك ) زاتووووو

[أبوبكرحامد]

عمنا عزيز ، مصدقين انو الصورة سنة 82 بس اعتقد انك نسيت تكتب قبل الميلاد ق م ، بعدين ياخوى انتا مشيت السعودية عمرك كم سنة ، وشنو مناسبة لبس الزى السعودى مع العلم انك درست جميع مراحلك الدراسية بالسودان غايتو ده إلا اكون زى ناس الهيئة " الأمر بالمعروف " نرجو التوضيح وياويلك وسواد ليلك من الجاييك يالبتخاف من ضبح الديك وبتجرى وتضرب الكواريك ، وغايتو لو عاوزنى اسكت رسل مرتجع الضرائب بتاع السنة دى " The Tax Return"

[أبوبكرحامد]

تشكر على المرور يا أمينو يازول يارائع ، أنا بالجد متابع لكل موضوعاتك ومعجب بيها جداً وماشاء الله عليك حضور دائم لأنى قبل شوية فتحت صفحة المنتديات لقيتك مشارك فى أغلب المنتديات ماشاء الله على الشباب وكده الواحد بيفرح لما القا ناس دفعتو متواجدين بدل مانحن ممكونين بى مجلس الآباء ناس عزيز وأبوشوارب وود الصول وعاوزين نشوف مشاركاتك فى الدكان ومن عندى بتوسط ليك لى ود الصول ابيع ليك بالدين لغاية ماأهلك ارسلوا المصاريف وتخلص جامعتك بتفوق انشاء الله

[ابراهيم]

السلام عليكم يا اهلنا الزينين

وماشاء الله الدكان عمران وجاب الناس الغايبين يا عمدة سلامات وليك وحشات والله وبركة الشفناك طيب ...

لكن يا جماعة بقيتو اي واحد شايت براهو حسي الواحد يشوت على وين..

* لكن يا عزيز العقال ماسك محلو حددتها مع الملك ذاتو ..

* ود الماذون والله بالغت مع عزيز ههههههههه عشان كدة يا جماعة الابيض واسود دة اخطوه عشان ما تتصنفو مع ناس ق.م ..

* يا عم بابكر دكتور جون سجل معانا في المنتدى ولا شنو؟

* يا أمينو والله كويس الجيت آزرتني انا طبعاً صغير القوم في الحتة دي كان في قمر الزمان لكن عمنا ود الماذون طلعها دفعتو انت قايل تاني شفناها ههههههه طفشت من الدكان .. عشان كدة ابقى قاعد عشان نخمس الجماعة ...

فتكم بعافية

[عزيز عيسى]

يا خالد تقولي تشبه محمد الخليوي لاعب المنتخب السعودي.. ده ما ياهو أنا زاااااتو.. واحدين قالوا بشبه محمد عبده.. هههههه

بابكر يا فرده.. اتصورنا بقميص مشخط قلتوا ده تحرمني منك.. جيتكم تاني بالزي السعودي قلتوا لي بالغت.. غايتو بعد دا الا الواحد يجيكم متصور بعراقي وسروال طويل وطاقية.. ما عارف حتقولوا شنو؟.. ويمكن لو اتصورت بلبس الكاوبويز يقوم واحد فيكم يقول شافني في فيلم ساراتانا لايرحم.. والله حيرتوني عديييييل.

وبرضو أنا زي ابراهيم لما شفت صورة جون قرنق افتكرتكم استضيفتوه في الكرسي الساخن.. والله كان نفلفله ليك جنس فلفله واحده.. بس الله مرقو.

أمينو يا رائع.. مرحب بطلتك على دكان ودالصول العجيب.. وعلشان نكرمك - بدل ما ابوبكر يفتح ليك حساب عند ودالصول وتدخل في مسألة الديون والمطالبة - انحنا حنطلب ليك من عمك ودالصول يعمل ليك فولة مظبظة.. ومن خالد يظبط السمك.. ولو ما عايز ده كله أنا ممكن اضبح ليك ديك للغداء.. وعمك ابوالمهتدي يقلى البن ويعمل القهوة.. ولو بتسف صعوط نديك من حقة ودالمأذون سفة لحدي ما أمير يمطر التمباك.. والفكي ود ابوشوارب يجهز ليك بخره يلحقك ويفزعك بيها علشان تجح لينا في الامتحان.. ولحدي ما ترجع لينا تاني نخلي ابراهيم يلعب ليك في صورتك.

وبعدين يا أمينو عليك الله صورتي القيافة دي ما عاجباك ولاشنو؟.. ولو ما مصدق انها من عام 82 شوف نوع العقال مش من النوع الحديث.. حقو الواحد يمسكك يكتفك بيهم.. ههههههههه

أبوبكر.. مالك مجنني في صورتي دي.. صورتي من زمن الملك عبدالعزيز لما كان بيوحد في القبائل السعودية.. أنا لما اتخرجت من الثانوي العالي اشتغلت في بنك فيصل الاسلامي السوداني لمدة سنة بالتمام والكمال وبعدها فكيت البيرق على السعودية وكان عمري 20 سنة.. ومناسبة الزي السعودي دي يا أخوي كنا شلة من اولاد مدني ماشين نلعب كشتينة في شقة واحد من اخوانا العزابة الغلابة المحتحتين وصادف مرورنا بسوق بني مالك في جده.. واحد من الجماعة قال عايز ليه صور باسبورت.. قمنا دخلنا الاستديو والجماعة لقوها فرصة كل واحد اتصور ليه صورة بالعقال قلنا يمكن يشوفوا صورنا السعوديين يقوموا يدونا التابعية.. لكن غيرنا رأينا ودسينا الصور.. يمكن بدل التابعية يقوموا يودونا على الترحيل راس..

وعايزني ارسل ليك مرتجع الضرائب.. انت يا أخوي طالبني.. مش كفاية الجماعة ديل لهطوا مننا الضرائب ورجعوا لينا منها شوية ملاليم حق البنزين ما تجيبه ليك ولا حتى شمومة.. بس الله غالب.

برهوته.. بالله مش مفروض من صورتي دي كان السعوديين ديل يدوني التابعية وينصبوني أمير على أي امارة حتى ولو في السودان ما عندي مانع..

يلا افوتكم بعافية.. ماشي أودي القفة للاولاد علشان امهم تسوي ليهم الاكل نتفك من غلبتهم وبجيكم راجع.

عزيز

[عزيز عيسى]

نغير لموضوع الصور وندخل في الذكريات:

زمان لما كنا اطفال صغار كانا بنعمل اعمال اطفالية وصبيانة عجيبة.. أنا واحد من الناس كنت نضام وكلامي كثير وبسأل الناس أسئلة كثيرة جدا عايزه ليها صبر شديد..

هذه قصة عن شخصي لما كنت صغير حكاها لي الوالد.. قال لي يا ابني انت لما كان عمرك حوالي اربعة أو خمسة سنوات كنت شقي شقاوة لا يعلم بها الا الله.. في يوم من الايام حضر واحد قريبنا كان جاي من سفر ونزل عندنا في زيارة قصيرة.. أنا كنت غايب في العمل.. امك قامت بالاستقبال سلمت على قريبنا الضيف وكلمت اخوك الكبير يأخذه على الديوان يجلس يستريح فيه لغاية ما أنا أرجع من العمل..

قريبنا الضيف كان الارهاق باين عليه وعايز يأخذ ليه شوية نومة يرتاح..وحسب ما حكي الضيف للوالد.. قالوا أنا كنت بلعب مع الاطفال ولما سمعت جانا ضيف قمت جريت طيران على البيت ودخلت على الديوان وسلمت على الضيف.. الضيف المسكين يا دووب عايز يخت راسه في السرير يرقد بس ما يشوفني الا جاي داخل توشك عليه.. وقبل ما اجلس كويس في السرير رحت لامي ليك في الضيف وقعدت أسأله أسئلة عمره ما سأله ليها حد ولا حتى محقق يستطيع أن يسأله ليها.. وهذه امثلة من نوع الاسئلة التي سألتها للضيف:

انت اسمك منو؟..
الضيف قام رد على وراني اسمه.. بعد شويه ثاني قمت سألته:
أبوك اسمه منو؟.. برضو اداني اسم ابوه.. قمت قلت ليه:
انت جاي من وين؟.. وعايز تعمل شنو؟..
انت شغال وين؟
انت عايز تقعد معانا هنا ولا عايز تسافر بكره؟
انت عندك اولاد؟
اسمون منو؟..
هم كبار ولا صعار؟
عندهم لعبات زي لعباتي؟
ليه ما جبتم يلعبوا معاي؟
بعد شويه اقوم اواصل في الاسئلة:
مرتك اسمها منو؟.. وهكذا..

المهم الوالد قال لي كرهت الضيف بالاسئلة.. والضيف طبعا كان محرج جدا وعايز ينوم يرتاح لكن ما خليته لازم يجيب علي أسئلتك..

في النهاية الضيف انبسط منك لأنك ما قصرت قمت اديته معلومات كاملة وطازة عن الفريق و الحاصل في الفريق شنو من تطورات ( طبعا كل الشمارات).. حتى اسماء الجيران وأولادهم ما قصرت أديتها ليه كلها.. فلانه بت الجيران ديك عرسوها.. والولد ود فلان طهروا.. واولاد الجيران فلان وفلان عملوا شكلة امبارح لانه واحد فيهم اخد كورة الشراب بتاعة التاني وقام شرطها ليه.. وواحد فيهم ضرب الثاني.. والثاني قنب يبكي وشال ليه حجر قام فلق بيه الود الضربه لغاية ما الدم كب من راسه وقاموا ودووه الدكتور خيطوا ليه راسه.. وهسع راسه مفلوق ولافنه ليه بقماش ابيض.. بعد شويه دخلت في أشيائك الخصوصية وقمت قلت ليه: أبوي جاب لي لعبات وعندي كذا وكذا.. وانت اولادك عندهم زي ديل.. لو ماعندهم ليه ما تشتري ليهم.. المهم فتيته ليه فت شديد..

لما الوالد رجع من العمل الضيف قام حكى ليه بالمعلومات اللى اديتها ليه كلها.. الوالد ما استغرب لأنه عارف المعلومات أو (الشمارات) دي أداها ليه منو... الضيف قام قال للوالد والله ولدك ده شقي شقاوه عجيبة وسألني أسئلة أنا عمري كله ما فيش حد سألني ليها. وأداني معلومات لو فتحت تسمع الاخبار في الراديو ما تلقى زيها.. يا أخي ده عارف اخبار الفريق كلها.. وصدقني ولدك ده لما يكبر يا اما يطلع مخبر أو صحفي... قام الوالد اعتذر للضيف وقال ليه أنا ثاني الود ده ما بخليه يجلس مع ضيف أبدا.. ياخي ده أي ضيف يجينا مكره الجية.. ويخليه يكره عيشته واليوم الجابو لينا ذاته.. الضيف قال للوالد بالعكس انا كنت مرهق ونعسان.. لكن ولدك ده ونسني لغاية ما انت جيت..

ولنا لقاء في شقاوة اخرى..

عزيز

[امينو]

ود المأذون والله ما قصرتا تب انتا وعمنا عزيز دايرين تقعدوني معاكم للفولة والقهوة والكلام دا انتا قايل انا جيتكم ساي انا الحاج رسلني للاجار بتاع الدكان دا قال ليكم خلي مقعدين ومريحين وظابطين جبنتكم كل يوم امرقوا الشهرين العليكم .

ويا عمنا عزيز انتا اتاريك شقاوتك في مواضيعك دي ما جات من برا تاني اظنو ضيفكم دا بكون ختاكم لي يوم الدين لكن ما وريتنا ابوك ما اداك العلقة اللي هيا بعد الاستجواب دا كلو .

[عزيز عيسى]

امينو انحنا ذنبنا شنو تاخذ مننا حق ايجار الدكان.. الدكان ده حقنا ولا حق ود الصول.. أمشي دور عليه يدفع ليك حق الايجار.. وبعد داك لو قال ما عنده ومعلم الله أنحنا رقبتنا سداده.. وحندفع ليك.. الراجل ده مش كتر خيره أكرمنا وخلانا نقعد نتونس قدام دكانه على الاقل نرد ليه شي من جميله..

فعلا بعد بهدلة الضيف بالاسئلة والكلام الكتير الراجل شتت وتاني ماشفناه.. والوالد الله يرحمه كان حنين جدا زي أي والد آخر أيام زمان.. تصدق ما كان بيجلدنا.. كان بتكلم معانا فقط.. وأنحنا الواحد فينا بعد شقاوته الكتيرة دي بس كنا بنسمع الكلام ونحترم الكبير وما كنا بنسوى شيء غلط كبير علشان يعاقبونا عليه.. أهي كانت شقاوة بريئة.

عزيز

[عزيز عيسى]

ما عارف ليه كلما ادخل على دكان ودالصول واتونس معاكم بيجيني احساس وشعور غريب اتخيل فيه انو دكان ودالصول ده في 114 بالقرب من الادارة المركزية ناحية الترعة.. واليكم هذا الحديث التصويري وأعيدكم لذكريات مدني ايام زمان:

يا جماعة قالوا الليلة ودالصول فول قدرته حرقان.. ايه رأيكم تختاروا واحد في الاثنين بعد ما نرجع من التمرين.. اما نمشي نظبط الفولة عند ابوظريفة.. او نمشي عند عم حسن جاد الله نمزمز السمك؟. لأني مهوي تهوية شديده خلاص.. أنا غايتو بعد العشاء عندي مزاج ونفسي في باسطة من الحلواني الكبير وبعد داك عايز ادخل السينما الدور التاني..

واليوم الصباح كنت في السوق الكبير مريت على مكتبة مضوي اشتريت لي كتابين.. بعد ما خرجت من المكتبة.. لاقاني ليك ود الفتلي شايل تمساحه الصغير في يده ويوريه للناس في السوق.. المهم قلت أديها طلة وأشوف الافلام الشغالة اليوم شنو.. مشيت شفت لوحة عرض الافلام المعروضة في يسار الحلواني الكبير بتاعة السينما الوطنية بتقول عارضين الفيلم الهندي جانوار بطولة شامي كابور.. وبكره في فيلم أبي فوق الشجرة بطولة عبدالحليم حافظ.. وفي لوحة عرض افلام السينما الخواجة اللى جمب مكتبة مضوي بتقول الليلة شغال فيلم النجمة السوداء بطولة كلنت ايستوود.. وبكره في فيلم ديجانغو بطولة فرانكو نيرو وترنس هيل.. والاسبوع الجاي نازله افلام جديدة لنج يا دوب طالعه لجوليانو جيما..

أنا غايتو عندي مزاج اني اليوم ادخل السينما الخواجة الدور الثاني بعد العشاء.. عارفين ليه بس عشان اسمع اغنية الجريدة لأبو اللمين واستمتع بيها حسب مزاجي قبل المناظر ما تبتديء.. ولو ما عندكم مزاج تدخلوا سينما ممكن نمشي ندخل كورة في الاستاد لأنه اليوم الاهلي والنيل لاعبين مباراة في الدوري الممتاز وحتكون مباراة ساخنة.. سمعت سنطة وقلة لاعبين وحموري حالف يطقطق ناس الاهلي بهدفين نظاف.. وبهناك الحاج الامين وناس الاتحاد منتظرين الغالب من الاهلي والنيل علشان يلاقوه الاسبوع الجاي.. والله الواحد احتار يمشي السينما ولا يدخل الكورة.

وبرضو سمعت انو الليلة في تلاته حفلات واحده في بانت والتانية في العشير والتالته في ام سويقو.. والتلاتة قالوا قاجات بس ما عارف الفنانين منو اللى حيغنوا في الحفلات..

يا جماعة كدي وقفوا لعب الضمنة ده دقيقة.. أنا عايز اشوف كم عدد الجماعة القاعدين جمب الدكان واللى عندهم رغبة يمشوا معانا.. لأنه ممكن انادي اصحاب التكاسي التلاته الواقفات هناك ديل.. شايفنهم واحد كونسل والتاني بيجو والتالت هيلمان..ممكن يكفوا العدد براحه.. ولو ما عايزين ممكن نركب البولمان أو بصات الدرجة ونمشي على موقف السوق الكبير والباقي نتمه كداري وندخل السوق الكبير نمشي على مطعم ابوظريفة أو مطعم عم حسن جاد الله حسب اختياركم.. وبرضو علشان نلاقي الناس ونسلم عليهم ونشاغلهم.. كدي هسع اتفقوا نمشي وين قبل ما عمكم ودالصول يجي ناطي ويقوم يقول لينا ماشين وين..
أها قلتوا شنو؟

عزيز

[بابكر]

كونسل والتاني بيجو والتالت هيلمان

ياعزيز شنو يا انت كل مره تجيب برهان على انك من عهد الفراعنه,, كونسل شنو يا اخوىده كان سنة 60 بالصبط الكلام ده وكمان هليمان فاضل تقول بيبى كمان والله خوفتنى عديل وكمان الصوره بتاعه العقال دى كوم لوحدها وكمان ابيض واسود وفى السعوديه يعنى دى اخذت عام 64 تقريبا
يأخى مالك بنكت لينا فى المشاكل 00ولو عملت مشكله تانى انا حاسميك (((عمو الفرده )))
بعدين السؤال ده موجه للابن امينو 00 انت شعرك ده عملتو كيف؟؟؟ كويمات كويمات كده عليك الله كان ماوريتنا عشان عمو عزيز يعمل شعرو زيك ويرسل لينا الصوره امكن تغيروا الفكره بأنو عجوز00وبعدين اقول ليك ابوك امبارح جاء وشال ايجار شهرين خلاص

[امينو]

لا خلاص يا بابكر وقت شالو الايجار مدوا لي جبنتكم دي جاي نشوف دواها كيف ههههه
وشعيراتي دي يا بابكر زي ما قلتا ليك جبتا لي ست فول من الموقف قلتا ليها عليكي الله اقعدي في راسي دا ربطو شعيراتو زي ما بتربطي اكياس التسالي والفول ....
لكن يا بابكر باقي ليك لو جبنا ست الفول دي لي عمو عزيز بتلقى ليها عقاب شعيرات تربطن ولا اتحتن من بدري هههههههههه
ولكم التحية جميعا يا جماعة الدكان.........

[خالد هاشم علي]

أهل الزين وأهل العديل...
سلام جاكم... ,وآسف لفترة الغياب في الفترة الأخيرة وكنت داير أعمل لي شوية عزة لقيت مافي زول هببوا لي قلت ياود سيب التقلة وأمشي الدكان..

من كم سنة كده كنت مستقر في الخرطوم لظروف العمل في الشركة الوطنية للتأمين التعاوني وكنت قاعد مع ناس أختي في البيت.. في مرة من المرات أختي وزوجها كانوا طالعين مشوار زيارة لي ناس أصحابهم . وهم طالعين قام واحد من أولادهم إسمو حسن إتعبط فيهم وقال إلا يمشي معاهم..
المهم الأولاد بيخافوا مني وبيعملوا لي مليون حساب. فقام أبو حسن قال لي ياخالد الولد ده عيان ماتخليهو يمشي معانا وكمان ماداير يشرب لينا الدواء...
أديت حسن نهرة بت كلب وقلت ليهو أدخل جوة.. بعد داك أختي وزوجها مشوا مشوارهم وكنت بتفرج في التلفزيون في فيلم أجنبي وكان فيهو رعب رهيب ( مصاصين دماء وحاجات مخيفة ) قمت إتذكرت إنو حسن قاعد معاي في البيت قلت أناديهو يشوف الفيلم وأضحك عليهو شوية بعد الهرشة اللي أديتها ليهو... وفجأة ظهرت لقطة مخيفة جداً قمت كوركت لي حسن ( ياحسن أجري) ... أخدت لي خمسة دقايق وحسن ماظهر... قمت تاني كوركت ليهو ( ياحسن إنت وين ؟؟؟؟) رد لي من بعيد ( إنت ماقلت لي أجري )... طلع حسن كان واقف وراي وشاف اللقطة المخيفة ديك ولمن أنا قلت ليهو ياحسن أجري قام مشتت وجرا للشارع...

[ضياء الدين احمد]

والله يا اخوانا خايف من قعاد الدكاكين يعني اليوم داك سمعت النسوان بتكلمن قالن الرجال ديل مرصرصين جنب الدكان هسع كان دايرين نشتري مافي طريقه وبالطريقه دي دكان ود الصول بفلس وتاني قطعوا فيكم قطيعه كتيره ما خلن شئ وقالن اكان لي ود المأذون بطل شغلتو واليوم كلو مصنقر جنب الدكان وهي ياانتي هو ود المأذون براه شوفي النبي ودهاشم ينضم ينضم غايتو الشمارات اديها ليهو
اجي عاد يابت امي ده كلام شنو ده
بري عاد منهم
وكان لي عزيز
عزيز منو يا انتي
عاد بالغتي ما عرفتيهو ‘ عزيز ود عيسى
هي واي ده بتاع امريكا
بالحيل من جا وهو حاتل معاهم مدي اضانو للخبارات اجازتو كملت وتري لسع قاعد
وطيب ود ناس وداعه (ضياء) بقعد معاهم
بري يا انتي ضياء عاد ضياء السرور وبعدين تعالي هنا ضياء ود صغير البقعدو مع الناس الكبار شنو اعميني فيهو غير يجي ياخد شيتو وامشي
غايتو العملها بابكر مرصرص العجايز ديل وقاعد
يلا يا اخواتي ارحكن سريع قبل ما اجي ............ قالوا عينو حاااااااره وعايان

انا غايتو وريتكم الحصل وعشان ما تقولوا كضاب اسألوا مينو انا وهو كنا بنلعب بلي تحت الشجره

[خالد هاشم علي]

يمين ياضياء من شدة ماإنت زبون في الدكان شفناك قاعد بي جوة بتمطر في التمباك


قال ضياء ود السرور قال...

[أبوبكرحامد]

سلام ياناس الدكان ومتأسفين للغياب لظروف قاهرة .
وين باقى الناس مالوا البرش فاضى ولا خايفين من كلام النسوان الجابوا ضياء غايتو نحنا قعدتنا مابنخليها وهن عارفات فى شباك بالناصية حق النساوين وعلى اليمين مافى زول شغال بيهن بلا معاينة بلا كلام فاضى .
بس ياود الصول فاقدين وجودك معانا وكتر خير عزيز وابوهاشم وضياء وامينو وابراهيم رغم انو الوليدات ديل بيلعبوا الكورة قدام الدكان ومقومين علينا العجاجة وماعندهم تقدير للناس الكبار العندهم ازمة.
لكن ياعزيز بريت الضيف برى نضيف وشكلك كنت نضام وبتاع شمارات .
وين ياناس ابوشوارب وباقى الناس الكبار ناس عماد الصادق وباقى الجلاكين.
كدى عندى مشوار وبرجع ليكم وعندى نية أدخل دار الرياضة مع عزيز .

[امينو]

عمنا ود المأذون خلي بالك اعمامنا الكبار ديل شافو ليهم درب تاني الظاهر النساوين ديل سحروهم بالنضم الكتير ، إلا نمشي نشوف ليهم بخرة الفكي
وعلى فكرة احنا ما كنا بنلعب كورة كنا بنلعب كمبلت العجاجة دي ما مننا دي من بيت ناس خالد هاشم شغالين كنس سااااااي شنو العيد الكبير خشا ولا شكلكم كدا عاملين عزومة معتبرة غايتو أكان بقت كلها عصيدة ونعيمية ما تناديني وكان ضابحين بتلقاني رادف الضباح في عجلتي وجايي عليك .

[صالح ابوشوارب]

الاخوان كونكان ستة

نأسف للتأخير لكن الصورة يا عزيز انا شفتها

فى مكة شارع المنصور او علي ما اعتقد في

سوق البرنو

افتونا يااهل جدة ومكة صاااااااااااااااااااااح

وبعدين التلاشيش دي شنو يا عزو

وبعدين كنت قواااااااااااااااااااااال يا C N N

[ابو المهتــدي]

بسم الله الرحمن الرحيم
السلام جاكم والله ياجماعة الخير اخرتنا عنكم اليومين ديل 0 لزوم الزاملة لم نتمكن من الحضور 0الله يكرم الجميع الحمار كان عاير 0 بقي اليومين ديل ناس الحكومة جابو ليهم كلام في حق المزارع قانون وما ادراك ما قانون 0يعني بيني وبينكم 0 دايرين ياكلو بقولنا حلاوه 0 0 اهو قنا نتدرج بي كرعينا للواضة بقي هي والله عزيزه شديد عندنا 0 وامكن الجماعة يكونو صادقين
اهو الضريسة ماخلتني اكمل مشواري وكمان الحفي فيها بحبو شديد لكن الشقلة جابت ليها شوك العتب علي النظر 0 وحسع كدي نادول الجنيات النقسل كرعيني يا جنيات 00 الابريق وين 00
وجيبو ليكم ابرة من ود الصول 0 للشوكة دي 0

اه مسولين عن الخير الصورة المن زمن اسود وابيض دي صورة ود عيس
ومال لو ابو شوارب نزل ليكم صورتو تكون من زمن الانكليز 0
كدي الشمار نخليهو شويه بعد الجبنة

[أبوبكرحامد]

سلام ياناس الدكان ، وينكم غايبين خاصة ود الصول سيد الدكان وباين زايغ من الأيجار غايتو امينو بالغ معاك ياود الصول بس لو بتسمع كلامى رسل ليهم الأيجار بالبوستة لأنهم كده شكلهم عاوزين زيادة وخليهم امشوا المحكمة لأنو القضية بتاخد ليها عشرة سنة لغاية ماتتحكم .
بالله ياناس تعالوا على الدكان لأنو عندنا مواضيع كتيرة محتاجة نقاش .

[خالد هاشم علي]

أهل الزين أهل العديل...
وين الحلوين وين وراحو..

نعود لموضوع الذكريات... والقصة دي حصلت لي وأنا في سنة اولي ثانوي .. كان مرشد الفصل هو استاذنا الجليل الأستاذ الفاضل السنوسي ذلك المربي الجليل والموسيقي الكبير والملحن المقتدر فقد لحن معظم أغاني الفنان امين عمر أمين والفنان عصام محمد نور ومن أغنياته ( أنساني وأنسي هواي لودرت لي أعاني). فهو برغم كل تلك الأحاسيس الفياضة التي تنبع من دواخله إلا أنه الرجل الحديدي في مدرسة السني والذي يخشاه الجميع بدون فرز من طلاب ومعلمين...
المهم كنا شلة جميلة جدا في الفصل أذكر منهم الأخ ياسر أحمد علي ( أنو ) وعبد الرحمن عيدابي وأنور جودة وجمال حسين وراشد عوض ووليد بلة.وعبد اللطيف الشيخ ومجموعة من الأخوة الرائعين...
وكان ألفة الفصل هو الأخ راشد عوض وطبعا نحن كنا مستثنيين من لستة المهرجلين لأنننا أصحاب الألفة وكدة..
أذكر في ذلك اليوم ونحن مستجدين في سنة أولي مهدي كانت الحصة فاضية وأنا كنت نايم ومعذب النوم صاح.. الظاهر الفصل كان جايط وفيهو هرجلة شديدة وراشد كمان مرخم وماكاتب مهرجلين ... فجأة ظهر أستاذ الفاضل في الباب وقال لي راشد جيب لي المهرجلين بي سرعة في المكتب... طبعا راشد ماكاتب مهرجلين ولا حاجة وعشان يتخارج من الزنقة دي قام كتب ليهو لستة مستعجلة كدة من معتادي الهرجلة .. ووداها لي أستاذ الفاضل.. قاموا الشباب المكتوبين في اللستة إشتكوا لي أستاذ الفاضل وقالوا ليهو : ياأستاذ الألفة ده ماقاعد يكتب أصحابو... أستاذ الفاضل قال ليهم أصحابو زي منو .. قالوا ليهو زي خالد هاشم ووليد بلة وعيدابي ...
في اللحظة ديك راشد بس سرعة شديدة كتب أسمي وإسم وليد بلة في اللستة عشان يتخارج من الموقف..
المهم نادونا ليك أنا ووليد بله في مكتب أستاذ الفاضل .. وصلت لقيت ليك الجماعة أقنعوا أستاذ الفاضل بي إنو الألفة ده مفتري عليهم وهم ماهرجلوا ولا حاجة.. والحكاية لبست ليك راشد وأستاذ الفاضل داير يجلدو.. وماأدراك بي جلد أستاذ الفاضل .. ياللطيف...المهم أخوكم داير يعمل نفسو تفتيحة ويخارج صاحبو الألفة من الزنقة دي.. قلت ليهو ياأستاذ الناس ديل كضابين ونحن كلنا هرجلنا والألفة ده مظلوم...أستاذ الفاضل قال لي : الفصل ده مابيضبطوا الألفة... الفصل ده بضبطوا أنا... ورجع لي ورا وطلع ليك قناية كبيرة قدر الليلة وباكر... الشباب قاموا شتتوا وكبوا ليك البيرق.. حاولت أنا ذاتي اشتت مع الجماعة لقيت مافي طريقة والباب مزحوووم وأستاذ الفاضل واقف في نص الغرفة وبقول لي تعال تعال .. اللستة موجودة حتمشوا وين يعني... المهم إضطريت رجعت ليهو ..قام خت ليهو كرسي وقال لي نوم من فوق يد الكرسي ... وقال كده رفع ليك القناية دي فوووووووووووووووووووووووق ... أنا قلت أكيد الراجل ده ماجادي وبهظر معاي ساكت ومامكن ينزل القناية دي من فوق كدة...
الساعة النزل ليك القناية فيني وبكل قوته.. يالطييييييييييييييييييييييييف والله لا عرفت أكورك ولا عرفت أبكي ولا عرفت أغمر ... يعني جلدة في حياتي ماأخدت زيها...
المهم أخدت علقتي وكانت تلاتة جلدات وطلعت من المكتب...
بعدي كان الدور علي صديقي وليد بلة وطبعا هو برضو أضافه راشد في اللستة عشان يغطي نفسة...
وقفت إستنيت وليد عشان نرجع الفصل مع بعض ...والطريق ضيييق ... وليد طلع من المكتب وجا قاطع ليك فيني ساااي وعيونو حمممممممممممممر.. ومشي الفصل.. لحقتوا في الفصل وقلت ليهو ياوليد ليه مابتقيف لي أنا مستنيك؟؟؟
قال لي عليك أمان الله ماشفتك.. مع إنو الطريق ضيق شديد ومابقدر يمر لو ماخبط فيني ولا زحيت ليهو من الطريق...
ليه ياوليد ماشفتني؟؟؟
قال لي والله الزول ده قطع فيني تلاتة قنايات لو زادهم واحدة كان أغمي عليا..

[فدوى الحسن]

ازيكم يا شباب , كيف الامور ؟ وين الليلة ناقصين ؟

عمنا ود الصول
أمير
وين ليكم كم يوم مافيشين ؟

العمود فاقدكم

انا ماشة وجاياكم وعندى ليكم شمارات كمية

بس ما تتحركوا من محلاتكم دى

والعمود دة خلو ليه بالكم واى زول من الشباب

يجى بى عندكم خلوهو يستنى

وجاياكم

تحياتي
.............

[ضياء الدين احمد]

طبعا ياود هاشم رغم اننا كنا بنقرا في مدرسة مدني الا انو لو جاء استاذ الفاضل زياره ساكت للمدرسه الناس كلها تلاوز والله حتي اني سمعت انو في اساتذه في السني كانوا بخافو منو*
من الاشياء المره الحصلت علي‘ انو نحنا كنا اربعه بعد الدافوري هوينا شديد قالوا نمشي نتعشي عند عمده وناكل باسطه من سلا ونرجع الدرجه طبعا ماشين من الجوع كلام مع بعض مافي شقينا السكه حديد ووصلنا لعمده ضربنا الفول والباسطه اتملينا لحدي ما عايزين ندشر وجينا راجعين ونحنا في منتصف السكه حديد لقينا ليك المحولات بس مسكنا نلعب بيها ونتضاحك ماخلاص شبعنا والشبع بولد قلة الادب‘ في الاول كنا مضبلينين المهم جاء واحد قايد ليهو عجله بس قبضنا ليك ده شنو البتعملو فيهو وكان زعلان جدا انتو عايزين تكتلو الناس انتو من وين ؟ قلنا ليهو نحن من الدرجه
ايواااااا من الدرجه اولاد الراحات جايين تكتلو المساكين ديل
طيب انتو بيوتكم السمحات ديلك ما بتخربوهم جايين تخربوا هنا
يلا معاي !
وين؟
تمشوا معاي النقطه
بقي هو ماشي ونحنا زي الغنم وراهو
وكان في قطر واقف مننا اتنين قالو نجري ننط بين عربتين ونجري وهو ماشي قدامنا بمسافه وفعلا الاتنين زاغو ونحنا طبعا خوافين مشينا معاهو لحدي نقطة السكه حديد ولقيناها ليك مليانه جنس خلق من الركاب وكل زول اسألوا ليك ديل مالهم؟
والله لقيتهم بلعبوا في التحويلات
ونسمع ليك مره تقول شكيتم لي الله اكان عاوزين اكتلونا
اسمع يا سليمان ده واحد تاني كمان ودوهم اقفلوهم
المهم غايتو نحنا فضلنا علي الحال ده زي ساعه كامله من الذله والاهانه ومافي زول مافتح خشمو الاوسمعنا كلمة فارغه
في النهايه فكونا وقالوا لينا اوعي تاني نحصلكم هنا‘ عندكم اي قلة ادب اعملوها في درجتكم ياعديمين الربايه.
اها ياود هاشم شفته ليك ذله جنس دي؟

[admin]

كيفكم شباب ان شاءالله تمام
طبعا يا ابوهاشم انا درستا في مدرسة السني وفي فصل مهدي دا ذاتو واخدتا نفس العلقة من الاستاذ الفاضل/الفاضل السنوسي .. طبعا وبلاشك قبل سرد القصة ومع خوفنا الشديد منو والآام العلقة التى لاتنسي .. لن ننكر افضال هذا المعلم الفاضل علينا .. فكان ذو اسلوب متميز في تدريس مادة التاريخ وكانت حصته هادئة تسمع فيها حديث النمل (من الخوف طبعا مافي زول بتنفس) اطال الله في عمره ووفقه الى ما يحبه ويرضاه .. المهم من البداية وقبل دراسة مادة التاريخ للصف الاول الثانوي كنا قد درسنا تاريخ الفاضل السنوسي وقنايتو الشهيرة .. وحفظنا الدرس صم .. وفي يوم جاء داخل الفصل علينا وطبعا كالعادة وقف الطلاب جميعا للاستاذ وفي هذه اللحظة وصل وكيل المدرسة (استاذ الصائغ) عند طرف الباب وتجاذب اطراف الحديث مع الفاضل .. ووقفتنا طالت فقمتا قلتا لجاري المسكين الزول دا ما يجي يدينا الحصة خلينا النفوت .. وطبعا لهدوء الفصل الشديد سمعني الاستاذ فاكمل حديثه وسالني ماذا قلت فنكرت كالعادة فاخذت مقدمة العلقة كف صاموتي وارسلتا انا وجاري المستمع المسكين الى المكتب وجلسنا بانتظاره حتى مابعد نهاية الدوام المدرسي حيث اخدنا العلقة المظبوطة بعد الاعتراف الجبري بالجريمة.

بالمناسبة مرفق صورة امينو بعد ان حصلت عليها مصادرنا

[امينو]

اللهم لا نسألك رد القضاء ولكن نسألك اللطف فيه

:eek: :eek: :eek:

والله يا Admin انا برفع الراية البيضاء قدامك

الصورة دي نكتها من وين الله يجازيك

[بابكر]

بسم الله الرحمن الرحيم0
الاخوان والابناء والبنيات 000لكم الحب والتحيه,, ولكم منى الحب الكثير لسؤالكم عنى ,,والله يعلم انى مشتاق اليكم جميعا 00لم انساكم لحظه فأنتم دوما فى حدقات العيون,, لانكم اهلى وعزوتى
لكن المثل بيقول(( الغائب عذره معاه)) وانا والله مشغول حتى النخاع 000 اتصل بى ولدى نزار واخبرنى بأن اخطب له زميلته وهى طبيبه معه فى المستشفى,, وعندما خطبتها له من ابوها,,, قال عاوز زواج,, الحكايه وسعت واهو اخوكم خش فى تجربه لم اخضها لاانا ولازوجتى من قبل,, وتعال شوف كل يوم فى جده والله ما خلينا حاجه ما اشتريناها,, وكل مره تجى واحده تقول ناقص كده,, نقوم نجرى نجيبو وكل واحده عامله لينا انها هى الوحيده البتفهم فى الحاجات دى ,,واخوكم قرب يفلس 00 شى شبكه وبناجر والبيت اتملاء شنط ,,المهم الزواج حيكون يوم السبت 12-8 فى النادى السورى بالخرطوم والدعوه موجه للجميع الفى السودان والبره,, وعلى فكره بيتنا فى حى الزهور بجوار مستشفى ابن سينا بجوار الشانزلزيه000 تسأل اى واحد تقول ليهو ,, فين بيت د نزار اى واحد بيدلك 00وانا حأكون ان شاء الله هناك وحبابكم عشره واهو اول واحد فى المنتدى عندو ولد عاوز يتجوز وعقبال عندكم جميعا

عمكم ود الصول

[ابراهيم]

عمنا الغالي ............. بابكر

تهنئة تلاحق تهنئة .... وأمنية تعانق أمنية

والف مبروك للعرسان

نتمنى لهم حياة هنية وإنشاء الله بيت مال وعيال

وعقبال الباقين ....

يلا يا ناس الدكان نحتفل بزواج دكتور نزار في الدكان مبدئياً ويلا يا بنوت زغوردة فرح للعرسان


http://www.hanaa.net/postcard/images/wedding6.jpg

[امير عبدالباقي]

ود الصول والله عجبنا ليه الف مبرك عقبال البكاري يعني خلاص كلها كم شهر كده وتبقي جد شد حيلك الجماعه فاتحين خشومهم مابريحوك ناس ابوشوارب وعزيز الغائب غايتو ربنا يستر عليك منهم

[عماد الصادق]

مبروك .. مبروك لإبننا الدكتور أخي بابكر

ونتمنى من الله الكريم أن يتمم ويديم الأفراح ..

وأتمنى لكم الصمود أخي بابكر في هذه المرحلة الحياتية المثيرة..

وحقاً لكل مرحلة من مراحل العمر .. طعم ونكهة فريدة ..

ونحن على الدرب سائرون .. (وأشواقنا) على أعتاب الثانوية..

كما نتمنى أن نشارككم الأفراح .. خاصة وأننا في ذللك الزمان ..

منتصف أغسطس حنكون إن شاء الله بالديار الحبيبة ..

كما أنه خاصة أخرى أن للأخ خالد الصول (زميل دراسة بمصر) معزة .. ومحبة

ومبروك مقدماً .. وماتنسونا يوم توزعوا الشربات في الدكان ..

ولكم التحية

[خالد هاشم علي]

الغالي ود الصول...
مليون مبروك لنزار وربنا يتمم ليه علي خير...

طبعا مين زيي لأني كاتل العرس بإذن الله... وح أحتوا حت صاح كية في ناس ابوشوارب

[admin]

كاتب الرسالة الأصلية ابراهيم
عمنا الغالي ............. بابكر

تهنئة تلاحق تهنئة .... وأمنية تعانق أمنية

والف مبروك للعرسان

نتمنى لهم حياة هنية وإنشاء الله بيت مال وعيال

وعقبال الباقين ....

يلا يا ناس الدكان نحتفل بزواج دكتور نزار في الدكان مبدئياً ويلا يا بنوت زغوردة فرح للعرسان


http://www.hanaa.net/postcard/images/wedding6.jpg

[114]

مبروك يا ود الصول، ومبروك يا دكتور نزار، وربنا يتمم بخير، وكان ودي احضر العرس، لكن الإجازة دي ناوين نقضيها بره السودان، ولو استجدت ظروف اكيد حنحضر بإذن الله..

[صالح ابوشوارب]

جدنا الغالي ............. بابكر

تهنئة تلاحق تهنئة .... وأمنية تعانق أمنية

والف مبروك للعرسان

نتمنى لهم حياة هنية وإنشاء الله بيت مال وعيال

وعقبال الباقين يا جــــــدووووووووووووو....

يلا يا ناس الدكان نحتفل بزواج دكتور نزار في الدكان مبدئياً ويلا يا بنوت زغوردة فرح للعرسان بعد كدا شوف ناس قدرك من اليوم ما كو فردة


http://www.hanaa.net/postcard/images/wedding6.jpg

[امينو]

الف الف مبروك يا عم بابكر لي دكتور نزار وربنا يتم على خير وعقبال البكاري
وعقبالنا احنا برضو بس ما تنسونا بالدعوات .

[صائغ الحروف]

فكره جميله تستاهل الثناء ونشكر كل من ادلى برايه وافكاره لبناء هذا ىالمنتدى الشامخ

[فدوى الحسن]

الف الف مبروك يا عم بابكر لي دكتور نزار وربنا يتم على خير وعقبال البكاري
وعقبالنا احنا برضو بس ما تنسونا بالدعوات .

[بابكر]

الشكر لكم جميعا


:D

--------------------------------------
تبقي سيرتك هي الكلام * وتبقي صورتك هي الرؤي الحلوة البعيشا في صحوتي أو حتي في عز المنام* ويبقي إسمك هو الغنا* هو البخفف لي عذابات الضنا* مالشفته منك يامني الروح ياأنا* وصفو بصعب ياجميل وبعدت عنك ولما طال بي النوي بقي لي أسيبك مستحيل.
_________________

[صلاح ودالطاهر]

كاتب الرسالة الأصلية فدوى الحسن
الف الف مبروك بابكر لي دكتور نزار وربنا يتم على خير وعقبال البكاري
وعقبالنا احنا برضو بس ما تنسونا بالدعوات .
طبعا ان شلت كلمة ياعم وبالرغم انني اصغر الاعضاء سناً الف مبروك وربنا يتم علي خير

[عزيز عيسى]

كاتب الرسالة الأصلية ابراهيم

جد جدنا الفرده العجوز الحبيب الغالي ............. بابكر

تهنئة تلاحق تهنئة .... وأمنية تعانق أمنية

ألف مبروك للعرسان

انشاء الله ربنا يتمم بالخير ونتمنى للعرسان حياة هنية وسعيده وبيت مال وعيال

وعقبال الباقين ....

يلا يا ناس الدكان نحتفل بزواج دكتور نزار في الدكان مبدئياً ويلا يا بنوت زغرودة فرح للعرسان

عزيز

http://www.hanaa.net/postcard/images/wedding6.jpg

[عزيز عيسى]

أهل الدكان الحنان.. ازيكم وكيف حالكم يا حلوين،

الواحد ياخد ليه خفسه كده ويجي راجع يلقى الدكان مقفل.. في البداية افتكرت صاحب الدكان ودالصول هارب من دفع الايجار لكن عرفت انه خطف رجله ومشى على جده يلملم في شيلة ولده دكتور نزار اللى جنن ابوه بالعرس.. وأصر انه يدخل في المعمعة.. ربنا يتمم ليه بالخير.

وكمان عرفت انه ودالمأذون رابطه ليه في راسه وبفكر انه يرجع السودان نهائي.. كدى عليك الله خت الرحمن في قلبك وفكر شويه قبل ما تقرر نهائي في موضوع العودة ده.

وضياء الدين.. عريس المستقبل القريب.. أريتك عريس الهنا والسرور.. يظهر ويختفي زي هلال رمضان.. انت يا أبو الشباب حكاية تجميع الشيلة دي ما خلصت منها لسه.. انت قاعد تشتري في الشيلة 12 قطعة من كل نوع؟.. بس ما وريتنا متين عرسك علشان نخلي الشباب يزفوك من جده.

ويا أمينو.. أتاريك كنت خاضعنا بصورة الجنى الخاتي صورته المضفر شعيراته.. لكن الادمن برهن انه عنده مصادر قوية وعنده مقدره انه يجب صور الناس ديل من سلك لقط.. لكن والله يا الادمن لو قدرت تصطاد لينا صورة ودابوشوارب وتنزلها لينا ما عارف حيكون مدى سعادتي يكون كيف.. لأنه عايزين نشوف قرعة جدنا الفكي ده بأي شكل علشان نتبرك فيها..

يا أمينو لكن ما مقلبتني ..أنا اشيل وأربي في شعري علشان يطول وقلت اقوم اضفره زيك كده.. خلاص زعلتني احسن اكرده صلعه وارتاح واجي اصنقر قدام الدكان.

ويا ود هاشم انت بقيت مشرف وأنا ما عارف؟.. ليه ما زفوا لينا الخبر الجميل ده.

أمير عبدالباقي.. يا أمير الكل.. تفتكر ودالصول الراجل العجوز ده حنريحه.. بس كدى خلى العرس ينتهي ويجي يفتح دكانه ده تاني.

أبو المهتدي.. انت ولدك الفنان ما فكر في العرس.. يلا خلونا نفرح ونعمل سيره للجميع.. وبعد ما تخلص من موضوع المزارعين تعال ندور الجبنة.

الاخ عماد الصادق.. مرحب بيك في دكان ودالصول.. بس ما وريتنا بتسف تمباك ولا بتحب تشرب معانا جبنة.. ولا نكلم الجماعة يجهزوا ليك ام فتفت؟.. ابقى ادخل ظبط معانا القعدة.

ودابوشوارب.. مالك ما عايز تدخل على دكان ودالصول.. بتجهز ليك في بخرات ولا شنو.. ولا عايزنا نكلم ليك الفكي بتاع الشرق يكرب ليك بخره قويه ويجيبك.

الاخت فدوى الحسن.. قاعدين متحكرين نشرب في الجبنة ومنتظرين نسمع شماراتك.. يلا اظهري جاي.

تسلموا.. ولنا عودة،

عزيز

[بابكر]

جد جدنا الفرده العجوز الحبيب الغالي ............. بابكر

طبعا يا فرده 00 دى فرصتك عشان تبين انك مش عجوز والله انا كنت فاقدك وسألت خالد هاشم اليوم منك وطلبت تلفونك عشان اتصل بيك لانى حاولت الاتصال بس ماقدرت اجمع مفتاح المنطقه ارجو كتابة التلفون كامل
المهم عقبال البنيات
ويديك الصحه ياعزوز

[ابو المهتــدي]

بسم الله الرحمن الرحيم
الاحباب كبار وصغار سلام عليكم والله يعافيكم
ضبعا اول شي نقول لابنناء الحبيب نزار مبروك من القلب وعفارم عليك
طالع لاهلك بجد 0 اهو كدة تمام التمام 0لا تهاون 0 ربنا يوفقك ويتم لك بخير
ولو اسعدني الحظ بالحضور ساكون اول القائمين علي امر الزواج
لك التهنئة الاخ الحبيب بابكر 0
وبالمناسبة ياهل الدكان 0 الجني دة ولدنا ودايرنين ابوه ا ليوم داك يرجع بنا الي ايام اهلنا 0 ما يسوي لينا عزيمة اهل البندر 0
دايرين بوش من التقيل 0 تيران 0 للحم 0 والنيران في الشارع 0 وناس الفريق كلهم يستعدوا الجماعة كلهم بي عيالهم 0
ولي اخوانا الكبار 0 دايرين المداح 0 اه كلامكم شنو 0
الحديث كتير وراجع ليكم ياعزيز 0 ابو شوارب 0 ود هاشم 0 صلاح 0 والبقية شيلو صبر 0

[أبوبكرحامد]

حبيبنا ود الصول ............. ربنا اتمم بخير وعقبال نسمع بيك بقيت جدو عشان الكيمان تتفرز والعاقبة لى بقية الشباب ، سأعمل مابوسعى لحضور الزواج فى السودان وبقوم بالعقد وناس ابراهيم بعملوا الكروت أما التوزيع خليهو لى أبوروان وخالد هاشم وامير لأنهم ماشاء الله نشيطين فى الشمارات ، بعدين ناس امينو ح اتولوا خدمة الضيوف ، يعنى المنتدى كلو فى حالة استنفار ، لكن بصراحة بعد العرس بنعمل ليكم منتدى اسموا الديوان تقعدوا فيهو انت وبقية الجلاكين ، بلغ تهانينا للعريس نزار وبرجع ليكم تانى ياجدو ود الصول .

[عماد الصادق]

أستاذنا الجليل ودالمأذون .. أهلاً بطلتك ومنذ أيام وأنا بفتش لعطر كلماتك

وأتمنى أن تكلل مساعيك ونشوفك في السودان رغم الأمطار والأعاصير

وطبعا ناس الإرصاد السنة دي مخوفننا عديل كده .. وهسه لزوم الإجازة شايلين

معانا لساتك (لزوم السباحة) ..

أخي ودفعتي عزيز .. لك التحية

وأنا واالله كلو لازمني صاعوط .. بن .. دخان .. وبعد الراس هه .. مرة يظبط

ومرات كتيرة .. ما ظابط .. نسأل الله السترة

بعدين عرفت إنك اشتغلت في بنك فيصل ؟ متين ؟ لأني اشتغلت فيهو

عام 1981 من زمن المحطة الوسطى اللي حرق !!!

ويا خالد هاشم إن شاء الله نشوفك في مدني .. ولا النادي السوري ..

وياريت نشوفك هنا في جدة ..

ولكم التحية

[امينو]

سلام هوي يا ناس الدكان اخباركم والله الواحد اشتاق لي قعدتكم السمحة ولمتكم لكن الظاهر انتو انشغلتو شوية الايام الفاتت بي تجهيزات العرس وكمان المسافرين السودان غايتو وصيتي ليكم الماشي السودان يخفف الشنط شوية قالوا الجمارك شادا حيلا في المطار اليومين ديل .
انا غايتو بتقدمكم بكرا انشاء الله متحرك على السودان وربنا يجمعنا هناك في ودمدني
وسلام .
على فكرة انا قلتا احصل اصل السودان سريع قبلي ما جون قرنق دا يصل ويحبسونا في المطار ولا حاجة اعملو حسابكم يا الجايين السودان الاسبوع الجاي .
اها ودعناكم الله ولنا لقاء ان شاء الله

[عزيز عيسى]

كاتب الرسالة الأصلية عماد الصادق


أخي ودفعتي عزيز .. لك التحية

وأنا واالله كلو لازمني صاعوط .. بن .. دخان .. وبعد الراس هه .. مرة يظبط

ومرات كتيرة .. ما ظابط .. نسأل الله السترة

بعدين عرفت إنك اشتغلت في بنك فيصل ؟ متين ؟ لأني اشتغلت فيهو

عام 1981 من زمن المحطة الوسطى اللي حرق !!!

ولكم التحية

الاخ عماد،

احييك اطيب تحية،

بعد أن تخرجت من الثانوي العالي التحقت للعمل في بنك فيصل الاسلامي السوداني عملت مدة سنة واحدة بالتمام والكمال خلال الفترة من عام 1978 الى عام 1979 - قبل ما يحرق ومنها هاجرت للسعودية - .. عملت منها مدة شهرين كمحاسب في فرع المحطة الوسطى أيام مدير الفرع الرجل الطيب اعتقد اسمه - احمد عبدالله (معليش الفترة طالت نسيت الاسماء) علمت انه استقال بعد ما أنا هاجرت.. ثم تم نقلي للعمل بمكتب محافظ البنك الشريف الخاتم محمد - مكتب الادارة العامة - مع الاخ عوض الزين في عمارة باوارث الطابق الثاني فوق مكتب الحجز التابع للخطوط الجوية السودانية بالقرب من مكتب الاحصاء.. واذكر ايامها كان معنا في نفس الطابق الاساتذة حسين عبدالقادر محمد.. عبدالرحيم حمدي - وزير المالية السابق.. التاج حسن علام.. والزين صغيرون..

بالمناسبة أنا أول واحد يستقيل من بنك فيصل منذ أن تم افتتاحه.

نرجع لدكان ود الصول:

اخونا أمير عبدالباقي لسه بيمطر في الصعوط.. كلمته يرسل ليك كيس كيسين تفك ليك الخرمة.

وخالد هاشم نزل على سوق البلد يجيب البن لأنه ود الصول بنه خلصان وخلانا متقريفين.

مع خالص الود والتحايا العطرة،

عزيز

[عماد الصادق]

عزيز يا دفعة يا

فعلا انت من الجيل الأول لبنك فيصل .. ولقد بدأت عملي مع الاخ عوض الزين

في قسم التلكس .. وتلك الأسماء ما سمعت بيهم في البنك ..

إلا حمدي اللي كان نائب المدير العام الباقر مضوي..

بعدين في المؤتمر العليا مدني كان معانا من الإشلاق ..
محمد صالح .. لا أعرف عنه خبرا حالياً
عادل حسن الهادي يعمل في الشرطة
بابكر حسن أظنه في سونا مدني الآن

أكياس الصعوط خليها .. أنا بجي هسه أعبئ الحقة الما خمج ..
أصلو أن ما بعرف أسف من الكيس .. والكيس حق البلاستيك ده ببوظه..
زمان كان بدونا ليهو في ورق السجاير..

وحتى لقاء آخر لك ولكم الود
ومع التحية

[عزيز عيسى]

الاخ عماد،

اطيب التحايا،

فعلا انحنا دفعة واحدة.. ويا سبحان الله انت عارف انك حليت محلي في بنك فيصل.. أنا وعوض الزين كنا ما سكين التلكس.. وأخوك ما شاء الله كان سريع جدا في مسألة الطباعة.. وكان الامير عبدالله الفيصل رئيس مجلس الادارة و اعضاء مجلس الادارة مثل الشيخ صالح كامل والشيخ محمد عبده والشيخ احمد صلاح جمجوم لما يكون عندهم اجتماع مجلس الادارة في الخرطوم بيحتاجوا لينا في ارسال رسائل فورية عبر التلكس.. كنا أنا وعوض الزين نقوم بالترجمة الفورية لكلامهم ونرسله..

تتذكر الجماعة الطيبين اللي كانوا شغالين في المكتب امثال عمك عوض ومضوي.. يا سلام الناس ديل أنا طول عمري ما أنساهم.. وربنا يطول في عمرهم.

ولنا لقاء انشاء الله،

عزيز

[عماد الصادق]

عزيزنا .. الدفعة ..

ذكرتنا بايام بنك فيصل .. وبالراجل الظريف عوض الزين

بالمناسبة لسه أنا متابع أخباره ,, وهو الآن في بنك الاستثمار الخرطوم ..

وناس عم عوض ومضوي حتى زمن قريب كانوا موجودين

وكان عندهم شاي حليب مبااااالغة .. وحيث أننا كنا نتبع لمكتب المدير العام

كنا في نعيم مع عمك عوض ومضوي ..

وحتى لقاء لكم التحية

[عزيز عيسى]

يا عمدتنا،

انت عارف والله ذكرتني بالايام الحلوة.. انا الشاي ما بشربه لكن لما أوصل المكتب الصباح ألقى عمك عوض مجهز لي كباية كركدي من النوع التقيل مع الثلج حاجة ما تخلص.. بمجرد ما اصبح واسلم عليهم وامشي على مكتبي أشوف ليك عمك عوض جاي شايل كباية الكركدي ويقول لي يا ولدي دي حتصلح ليك مزاجك اليوم كله.. وبعد ما نفطر يجي مضوي شايل ليك كباية الليمون العجيب..

ياسلام.. الناس ديل كنوا بيعاملونا زي أولادهم وكنا بنحترمهم والجميع اسرة واحدة يجمعنا الحب والوئام وما فيش ده كبير ولا ده صغير.. ديل أهلنا الطيبين.

ربنا يمتعهم بالصحة والعافية.. ويقدرنا على جزاءهم.

والى اللقاء،

عزيز

[ابو المهتــدي]

بسم الله الرحمن الرحيم
الاحبة الكرام نسبة لبعض الظروف في وسيلة الوصول ليكم يعني خلل فني
ابعدنا عنكم اليومين الفاتن 0 وانشاء الله لنا جلسة بمناسة زواج ابن الحبيب
ود الصول 0

[عماد الصادق]

ناس الدكان .. سلام

وين حبيبنا الاستاذ ود المأذون ؟؟

لعل المانع خير.. نرجو أن نسمع عنك كل خير ..

مع التحية

[admin]

الصورة التي طال انتظاركم لها
اخيرا
نجم من نجوم المنتدى
ابوشوارب
http://www.wadmadani.com/up/pic2/SUDANI.jpg

[امير عبدالباقي]

لكن يابكري بالغته عديل كده
انت بتنكت الصور دي من وين
لكن مصادرك ماعجيبه لكن
بقيت تخوف انت مباحث ولاشنو

ابوشوارب خلاص ياحبيب صورتك وجات خلي عزيز يجي يشوفها
وين عم بابكر تعال شوف عم ابوشوارب

[aborawan]

واخيرا سقط الفارس في الاسر عمنا والله ما شاء الله منور المنتدى هسه عليك الله صورتك دي داسهيا من زمان مالك خايف من العين ولا شنو

[عزيز عيسى]

أبو بكر.. لكن ما تقول لي مصادرك عحيبة بس الله يسترنا منها.

الاخ صالح،

لكن حيرتني ما عارف أقوليك يا عمي ولا يا جدي.. طبعا أنا لقيت فرصتي.

والله كنت فاكرك ازراااااااق وكمان عندك صلعك لغاية العنقرة.. لكن ما شاء الله طلع اللون فاتح والشعر (تفة) والصورة آخر روعة وكمان فاقت تصوراتي اللى كنت واضعها في ذهني.. ما عارف ليه انك كنت متردد تنزلها؟!.

انت عارف لساني طويل.. كلامي كثير وجني قطعية (بتاع شمارات).. والمره دي ما حتسلم من لساني.. لكن قبل ما أقطع فيك عليك الله اعفي لي لأني كنت في المرات السابقة قاسي عليك شوية.. واسمح لي المرة دي اني ادخل نوع من روح المداعبة المتعارف عليها بين ابناء الحبيبة مدني وده كله نابع من حبي وتقديري واحترامي لشخصكم الغالي.

قطيعتي طبعا يمكن تكون عارفها في شنو.. لأني كنت منتظر أشوف صورتك بأحر من الجمر.. وأمير عبدالباقي عارفني ما حأقدر امسك لساني الطويل.. بس الله يستر عليك من عمنا ودالصول وابوالمهتدي وودالمأذون وودهاشم وابوروان وضياء وابراهيم وباقي الشلة.

لكن عليك الله يا صالح قميصك الزي الشطة ده - طبعا ما حأقدر أقول عليه وأشبهه بتحرمني منك - انت مصبغه بي (تفته) حمرا ولا شنو؟.. ههههههههه

مع حبي وتقديري،

عزيز

[صالح ابوشوارب]

الاخوان الاعزاء
الادمن الخطير

والمعلم امير

والمهندس ابو روان

لكم الشكر والتقدير وعايز امشي للفكي بتاع

البخرة السيوبر كما قال اخونا عمر وربنا يستر

شكرا شباب

[صالح ابوشوارب]

عزيز اللذيذ

تحية طيبة وعرق محبة

اولا عافي ليك انا للقطيعة وعافي لي انت للقطيعة مهم ؟

ثانيا والله انت قديييييييييم جدا ياخي ما في زول بيعرف ( التفتة )

انا الان اشك في عمرك مافي كلام

وشكرا وصلتني رسالتك بالاميل وفيها ريحة باترا ياعجوز

عرفتني انا ما قدركم انت وابو المهتدى وبابكر

واخيرا سلامي للاهل حتي رسالة اخري

[ابو المهتــدي]

بسم الله الرحمن الرحيم
احبتي الكرام 0اولا نرفع الشكر للاخ ود المبارك لوضع تلك الصورة واكيد ود المبارك جابوها ليهو من البلد وماداير يزعل اخونا ابو شوارب فاجري بعض التعديلات والالوان المناسبة 0 لاخفاء جهد السنين
0ود الصول 00عبد العزيز 00 امير 00 ود هاشم 00 دايرين لينا جلسة مخصصة والقول الصريح 00 ومن هنا انا ارفع التحدي بان ياتي لنا بصورة طازجة غير ذلك لا تجدي المرافعة ونتوقع الكلمة من الذي جاب لنا الصورة
والحكم لك ياودالصول وبعد ذلك المداخلات للاخوة الكرام
لك تحاتي الحبيب صالح تري ماتاخذ منا ربما يكون الشوف طشاش ربما ودهاشم يشوفها غير وامكن ود الصول يقلبها ةعبد العزيز ماشافها كويس
ام امير فسوف يعرضها علي ابوة 0 للتعرف وتحديد العمر المديد
ومع ردود الاحباء تجد الحب والوفاء 0 تسلم

[ابراهيم]

السلام عليكم اهلي الطيبين

والله يا آدمن حيرتنا ذاتو ... وانا شاكي انو يكون عند علاقة بي ناس الموساد


أخيراً نزلت صورة عمنا ابو شوراب ... وطبعاً كانت عكس التوقعات زي ما قال عمنا عزو .. لكن ماشاء الله وعيني باردة عليك يا ابوشوارب مافي كلام تب ... بس يا آدمن عايزين تاريخ استخراج الصورة ..

لكم تحياتي

[ابراهيم]

الصورة دي في جزيرة الفيل يا شباب

http://www.wadmadani.com/up/pic2/madani.jpg

[بابكر]

الصوره خطيره يا ابو شوارب فاقت كل التوقعات وعينا بارده عليك

[بابكر]

سلامات يا ابراهيم يافنان مالك ما ختيت صورتنا مع الشله عشان نبروزها

[عزيز عيسى]

ياربي الوحوش ديل شفتهم وين؟

عزيز

[admin]

اخر اخبار الشمار
الصورة الاولى
غابة الابنوس+ابوروان+عماد الصادق+خالد هاشم
http://www.wadmadani.com/up/pic2/Image265.jpg
الصورة الثانية
خالد هاشم+غابة الابنوس+ادمن+عماد الصادق
http://www.wadmadani.com/up/pic2/Image266.jpg
الصورة الثالثة
غابة الابنوس+عماد الصادق
http://www.wadmadani.com/up/pic2/Image268.jpg

[شاكسس]

ارجو الاضافه الى هذا الدكان

نستفيد من الناس المنورين

صور جميله والله لسه شباب

[التيمان]

شبا ب ساى يا شلكسس شباب ومنورين وخامين الجكس


مننا المساكين ديل

[امينو]

سلامات يا جماعة الدكان
والله يا ادمن انتا الله يخليك لينا بتجيب الصور دي من وين غايتو يديك العافية

ويا بابكر دي شنو الصورة الجبتها دي انشالله خير لعن مافي عوجة كنتا بتمثل في فلم الادغال ولا شنو ههههه

[ابراهيم]

http://www.wadmadani.com/up/pic2/dukan.jpg

[أبوبكرحامد]

سلام ياناس الدكان وآسفين على الإنقطاع عنكم وشكراً لكل من سأل عنى وخاصة عمدتنا ود الصادق الراجل المنقة ، بعدين اهنىء الجميع بظهور صورة حبيبنا شواربو وياخوى الشيب مالى راسك انا افتكرتك جايى من طاحونة الدى لكن الظاهر ده شيب عديل غايتو نحمد ربنا عندنا كبار وقالوا الماعندو كبير اسوى ليهو كبير ، طبعاً اليومين ديل موسم افراح ابو روان ونزار ود بابكر ود الصول ماشاء الله وربنا اديم الأفراح ، سعدت بالأمس بإتصال هاتفى من عزيز دنيانا ود عيسى فله الشكر والمودة والشكر للآدمن على هذا الموقع الرائع الذى جمعنا بخيرة أبناء السودان فلكم جميعاً محبتى وودى ولى عودة.

[الزبير محمد عبدالفضيل]

دكان ود الصول هي المحطه الجميله للذكريات في مدني يديكم العافيه جميعا

[قمر الزمان]

يديكم العافية يا ناس مدنى مع انو اختفيت لفترة كدا <نسبة لظروف الجامعة وكدا > وكمان ابوروان طردنى عديييييييييييييييييييل كدا لكن ما مشكلة ........
والحمد لله الدكان شغال لسة ... وربنا يديم الافراح ان شاء الله
تحياتي الحارة للاعمام الاعزاء



قــــــمــــ الزمان ــــــــــــــــر

[بابكر]

لكم التحيه والشوق ايها الاعزاء منورين ايها الرائعوووووون00

[admin]

طبعا ابوشوارب ضحك علينا وجاب لينا صورة بعد ما ظبطت نفسو كويس .. وما قدرنا نقول فيها حاجة لانها كانت فعلا جميلة .. لكن رايكم شنو انا الليله جايب ليكم صورتو وهو لابس قميص تحرمني منك زي الجماعة .. ههههههههههههههه.. وبقى عندي ثلاثي تحرمني منك المرح عزيز وابوالمهتدي وابوشوارب .. اتمني ليكم قضاء وقت ممتع ومشاهدة سعيدة هههههههههههههههههههه.

http://www.wadmadani.com/up/pic2/0048.jpg

[الزمن المريح]

تسلم يا ادمن ،،،،،،،،،، بالله دية ابوشوارب ،، و الله انا قايلوا عبد العزيز المبارك /،،،،،،،،،،

و بالمناسبة عبد العزيز المبارك من العشير ود خالة ابوعركى ،، و لى المعلومة فيها خطأ ،،،

و الدكان اليومين ديل فاضى ما فى زول يشترى انشاء الله صعود ساكت ،،،،،،

الله يعينك يا ود الماذون ،،
ود الماذون ذاتو ذى القفل كده

[بابكر]

بالمناسبه اى صوره ابيض واسود معناها قبل الثمانينات والعب غيرها يا ابو شوارب000

[أبوبكرحامد]

أهلاً بالحبايب رواد دكان ود االصول وشايف الهمة فترت شوية الحاصل شنو ياناس امكن حظر التجول منعكم من الخروج ، بمناسبة حظر التجول قالوا فى واحد سكران نايم فى الشارع جوهو ناس الأمن قالوا ليهو مالك نايم فى الشارع انت ماعارف حظر التجول ، الراجل عاين ليهم وقال : بالله هسى المتجول فينا منو انتو ولاأنا ، وبمناسبة المتجول كان فى زمان واحد اسمو محمد الشيخ ومهنته مصور متجول وكان بيمشى على المدارس وبياخد صور تذكارية للتلاميذ مع اساتذتهم ، فأين هذا الرجل الآن عساهو بخير ، وقد قام بالتوثيق للمراحل الدراسية وزملاء الدراسة فى ذلك الوقت فهل لدى أحدكم خبر عنه ، وزى السؤال ده كنتا زمان بوجهو للعجايز لكن بعد الصور الكتوف اتلاحقت فمافى فرق كبير بينى وبين أمينو مثلاً!!! ، أما ناس أمير وخالد هاشم ديل ضميناهم لمجلس الآباء " أبو المهتدى ، شواربو ، عزيز ، عماد الصادق ، عمك تنقو ، ود الصول وبقية العقد الفريد "

[بابكر]

الناس ديل مشو وين يا ود المأذون 000؟؟؟؟؟

[ابو المهتــدي]

بسم الله الرحمن الرحيم
لكم التحية احبتي جميعا 00تسلم ود المبارك 00والله صورة ابو شوارب 0وصورة عزير 00دي موضة السبعنيات 00 وفي البداية 00 انا ما بنكر الزمن داك ونحن ابناء جيل ومن هنا انا اضع ابو شوارب في المقدمة بعد ود الصول مباشرة 00 بالمناسبة كنا دايرين لينا شوية كجيك 00ونعمل ليهو عصيدة كاربة بس ود الصول اليومين ديل ما فاضي لينا 00 ع المطر نخليهوه فسيخ 00
نشوف امير من الفريق 00الجماعة جيانة والدعوة مفتوحة 00

[عزيز عيسى]

والله أنا افتكرت دكان ود الصول قفلو ولا عرضو للتقبيل او نزلو في الدلالة، وما لقيت لي موية بارده اشربها ولا حتى برش اخد لي فيه تكية شوية ارتاح في ضل الراكوبة اللى شيدها لينا ودالمأذون. جلست افكر واقول في نفسى يا ولد قوم ادرج وامشي مر على السوق الكبير وشوف فيه شنو.. بيني وبينكم مشيت عاينت وما لقيت لي حاجة تفرح وجدت الناس في هلع وجنون وكمان بتشتم في بعضها، قلت يا ود احسن ليك تحترم نفسك وترجع لدارك تلقى اخوانك قاعدين منتظرنك.

ابوبكر ودالمأذون،

مالك يا أخوي ظهرت واختفيت تاني؟ وبالمناسبة يا أبوبكر الراجل اللى بتسأل عنه ده محمد الشيخ المصور المتجول أنا ما بعرفه ممكن تسأل عنه اعمامنا التانين ديل.. يمكن اتصوروا عنده قبل كده قدام حديقة سليمان وقيع الله. وما بستبعد انه قام بتصوير عمنا صالح ابوشوارب بقميصه تحرمني منك المشخط بالعرض. لآنه صورة ودابوشوارب بالقميص تحرمني منك اعتقد انها كانت قبل دقائق بعد ما بنوا خزان سنار ووصلوا الكهرباء. وصورتو الاولى بالقميص الاحمر زي اللى انكشح فيه كركدي اعتقد انها بعد ما انعدمت التفته في سوق الزنك.

ويلا يا صالح وباقي الشباب اظهروا والله والله ما طلبكم حليفة مشتاق ليكم كثير اني ادردش معاكم شوية وبصراحة فاقدكم كثير.

وانشاء الله تعودوا لمنتداكم بالسلامة. ارجوكم تبطلوا الغتاته وتعودوا لنعيد ذكريات مدني الجميلة.

مع خالص الود والتقدير،

عزيز

[صالح ابوشوارب]

الاخوان ابو بكر

ابو المهتدى

الزمن المريح

والاخ عزيز

والله انا كمان مشتاق ليكم كتير كتير وانا لي زمان ما شفتكم

الحقيقة المنتدى في نومة عميقة على قول 0000 خ خ خ خ خ

اما الصورة يا شباب بتاع تحرمني قريبة جدا

اما انت ياعزيز تفته ياقديم

خزان سنار يا مفترى

بالله ارجو المراسلة يا شباب بالاميل

وشكرا

[أبوبكرحامد]

تحياتى لكل الأحباب وأشواقى لاتحدها حدود ، فقط مشغوليات أبعدتنا عن المنتدى ونحاول رغم ذلك التواصل عبر المنتدى ، شكراً الرائع عزيز عيسى على سؤالك وسنبذل مابوسعنا لدخول المنتدى متى ماسنحت الفرصة ، حبيبنا أبو شوارب طلب مراسلته عبر الرسائل وربما هو عاتب على غياب المشاركات فى المنتدى وله العذر فى ذلك لكننا نشهد الله أن المشغوليات هى التى أبعدتنا عن المنتدى ونتمنى أن تزول العوارض ونعود للتواجد اليومى بالمنتدى فلك العتبى شواربو والبركة فى بقية الأخوان وأناشدهم جميعاً للتواصل عبر المنتدى واثراءه بالموضوعات الشيقة ولى عودة.

[عمك تنقو]

العزيز ابوبكر

مشتاقين والله
هدي جيتي من الاجازة
ممكن اخش الدكان

وبعدين في جرورة ولا مافي
أقصد بدينو الزول ولا لا http://wadmadani.com/vb/images/icons/icon10.gif

[saleh farah]

تصدقو ياجماعه ماشى لي تمانيه كيلو والدنيا حر والواطه مليانه طين وبفتش فى دكانكم ده لانى مواعد لي واحد هناك ومن وصف لى وصف ومن شارع لى شارع ومن زقاق لزقاق لحدما وصلت الدكان لالقيت الزول لا لقيت الدكان فاتح جا واحد ماشى بى هنا ماعارفه كان محنون ولا ؟؟؟ سألته قالي والله الدكان ده مقفل من يوم 21/8 لحد هسه مامعروف مقفل ماله احتمال اكونو ناس الضرايب جو عليه لكن الخبر المؤكد بتلقاه عند ود المازون لانه عنده اوراق الترخيص .
البلاقى لي ود المازون عليكم الله اسألو لو ماعندو حق التجديد ارسل لينا الورق عشان نجدد الرخصه لانه الايام دى ناس الحله بقو امشو السوق وبينى وبينكم حق المواصلات بقد الجيب ..
تحياتى ليكم كلكم .

[HAMADTO]

تعرف يا صالح أنا ذاتي دقيت نفس المشوار ولقيته مقفل ...تعرف الجماعه ديل من يوم جوهم الجنوبين ولقطتوا منهم حاجات وكسروا ليهم الدكان ما فتحوا تاني ... شنو يا ود الصول انت استاذ ابوبكر حامد ما قدر يجيب ليك حقك ... كان كده استعين بأمريكا " عزيز " وهو بجيب ليك حقك ... والا خليك زي عمنا ابو المهتدي وسلم أمرك لله وافتح دكانك ساااااااكت .......
غايتو أنا وشاعرنا صالح فرح عملنا لينا طبلية تحت شجرة الدكان لحدي ما تفتحت دكانك

[ابو المهتــدي]

بسم الله الرحمن الرحيم
سلام من عند الله لكم والله حالتمك ماتسر 00 مالكم الدكان سيدو اخد ليهو زوقة لكن عرفت انة جاء ولقي الحال مجوبكة عليهو 0
والله في نفسي قلت الم ليكم شوية هيصة في خشم الدكان 00 بقي شايف خير الواضة طلع 00 اه رسلت لي الوليد ابراهيم 00 والبنية دي اظنها قمر 00تجلس في بنبر حبوتها 00 عزيزة ز 00 ربنا يرحمها 00 تبيع ليكم الدردقو 000
والجني ابراهيم خليت عندو كليقة عنكوليب بقي نجيض يالحبل 00 ووصيتة والله وصية خاصة 00 قلت ليهو 00 ود حمتو لو جا بي جاي اعطيهو قصبة قصبتين
ومعاهن شوية تبش 00 عشان ما يصل لي فريق الحلبة00 بقي الطملة شايفها كتيرة 00 والناس ديل فيهم شوية شر 00 وانشاء الله لو جيت المرة الجاية بيكون الفريك طلع 00تب بعبي ليكم الخرج 0بس جهزو الحال وبيكون ود الصول وصل 00 اها اخليكم بعافية 00

[HAMADTO]

انت يا أبو المهتدي اخونا ود الصول ده ما تقول ليهو تعال افتح الدكان ده قبل ما الفئران تعدمه ليك الحبة .. أنت يا ابو المهتدي الريس ابوبكر سمعته أنه مشى امريكا دحين مشى يتفق معاهم على شنو ؟
ياربي ناس امريكا ديل بقوا اصحابنا خلاص ... والا يكون مشى يتفقد ضحايا كاترينا

[ابو المهتــدي]

بسم الله الرحمن الرحيم
الحبيب حمتو 00 والله الناس ديل حيرونا عديل 00 ود الصول من ماجاء عمل اضان الحامل ضرشة وما عارفين ليهو درب 00 ولا يكون خايف من ناس المحلية
لكن ابشرة ناس المحليه ديل لو فرش ليهو مساويك في خشم بيتو بلحقوه 0 ام الريس اظنة اخد الاوامر من هناك واظنه صادم من البلد ديك 00 رسل ليهو بخره من عندك انشا الله تكون جبتها معاك من البلد ولا ما غشيت ود عبد السيد 00 واظن الريس ناس امريكا فهموه غلط 00 بدل ريس منتدي ودمدني
ريس 0000 بالمناسبة تحينا للريس والف حمد لله علي سلامة الوصول 00 ونرفع لك حديث 00ود حمتو للاجابة 00 وايضا ما الفرق بين امريكا 00وبلدنا منو البشبه التاني 00 مع تحياتي سوال غيرة ليس الا ابقي اظهر 00 منتظرين حصاد الرحلة 0 بوجة خاص

[HAMADTO]

عوووووووووووووووك والله فعلا الناس ديل حيرونا يا ابو المهتدي .. انشاء الله بس يكون المانع خير .....
والريس ابوبكر كمان ماعاوز يورينا مشى امريكا لقضية دارفور والا مشى يحرش ناس مدني عشان يطالبوا بحق تقرير المصير ويدعوهم للكفاح المسلح .....

انتو مسئولين من الخير وزارة الطاقة والتعدين العطاء رسى فيها لمنو ؟؟

[ابو المهتــدي]

بسم الله الرحمن الرحيم
تسلم اخي الحبيب نبيل والله الامر 0فعلا يدعو للاستنفار 0 والريس حتي للحظه ما عارفين ليهو درب 00 سوف نحضرة يلفونيا انشاء الله00
ام عن الجماعة والله يقال المساومات جارية بينم الطاقة والمالية 00 التماسيح مادايرة تفك محل التكرع 00ما شايف الجماعة بقو ليهم عناكر 00 ام عن الجزيرة والله نحن ابدي بحق تقرير المصير 00طال ما الجماعة مصرين علي النهج القديق 00 بعد تفسير 00الماء بالماء 00 والانقول ليهم اعطونا وزارة الزراعة بس 0 نحن اهل حواشات 00 ما اكتر من ان يكون المسور حقنا 00 ويبعدوا عنا شر السمارة 00 السمسرة 00
اها مسئول عن الخير 00 الفريق كيف واهلة 00
وانت كد بتتجول ما لا قتك دلوكة وناس بعرضوا كان تاخذ ليك معهم نكزة نكزتين وتكبر ليك تكبيرة تكبيرتين 00 وتكون ساهمت في المشروع الحضاري تكبير تهليل 00بالله كيف حال اهلي الغبش 00 اما زال اهل العز شموخا وسارية عالية 00 لك الله ياجزيرة الخير ما زال الحلم قادم يا اجمل خبر 00

[امير عبدالباقي]

حبابكم عشره
الشي العارفنو ودالصول عرس لولدو ماعارف المانعو شنو من فتح الدكان الله اعلم ياود الصول الناس تعبت من المشاوير تعال افتح الدكان
اما ودالماذون قال بفتش ليه في شغل افضل من الاول لكن ماعارف الحاصل شنو لقي الشغل ولا لا
ماخالد هاشم وصل من السودان بس عامل تقيل ويمكن عاوز يرتاح من الهمله وتعب السهر والحفلات
يلا ياشباب تعالو الدكان وجيبو البن والشاي الضل بقي بارد

[بابكر]

يا ناس رجعنا وفتحنا الدكان ولينا اسبوع تمام مافى واحد ظهر الحكايه شنو ياناس ؟؟؟ يعنى ما نسافر ولا شنو ؟؟؟؟؟؟

[عزيز عيسى]

عليك الله يا بابكر المرة الجاية لما تجي تسافر مسك الدكان لواحد بدل ما تخليه مقفول والناس تتحاوم من ضل لي ضل..
في ناس خرمانين من انت سافرت وعايزين يشتروا تمباك.. ولحدي الان ما لاقين ليهم حتى سفة..وناس زي كدا كانوا عايزين
يضربوا الفولة ويشربوا فنجان جبنة مدنكلة كدا ومعاها شوية ونسة وقرقره مع ودالمأذون وباقي الشلة..

الحمدلله الان دكانك فتح.. ومنتظرين اخوانا كمكان ستة وباقي الشباب يجوا يشاركونا.

وبسأل وين عمنا صالح ابوشوارب.. وودالمأذون.. وعماد.. وغابة الابنوس وباقي الشرامة..
يلا اظهروا خلونا نظبط القعدة تحت مظلة الراكوبة الجديدة.

ودهاشم رجع من السودان وسمعت تحت تحت كدا انو جاب معاهو شمارات كثيرة..

مع كل الحب والاشواق.

عزيز

[HAMADTO]

أهلا وسهلا بسيد الدكان وينك يا ود الصول يعني خلاص عرسته لولدك الدكتور الدكان بقى ما لازمك .... وزي ما قال ليس عزيز الناس خرمانيين شديد ...
اهلا بالشباب وبكرة عازمكم قهوة بجيبه ليكم في الدكان هنا ...

تعرف يا ابو المهتدي الجماعة قالوا لو طلبوا الرئاسة بدولها ليهم لكن وزارة الطاقة ما بفرطوا فيها ...
يعني انتو البمسك وزارة الطاقة عنده حق ملكية نفط السودان والا شنو ؟؟؟
والا عشان الطاقة تعتبر الركيزة الاساسية في التنمية الاقتصادية والاجتماعية عشان كده كل واحد عاوز يسيطر عليها ؟؟؟
تعرف هم بتسابقوا عليها عشان يحققوا لينا الاستقرار ويريحونا ويسهلوا لينا المعيشة ولقمة العيش .....

[عماد الصادق]

السلامو عليكم ناس الدكان,,
كيف الصحة والمال والعيال ..
دايرين لينا ست شاي تقعد هنا..ونرتاح من قهوة الترامس دي!!!
هو السودان فيهو شنو غير ستات الشاي ...
مبالغة عديل كده .. بين كل ست شاي وست شاي محل اتصالات
وبين كل محل اتصالات ومحل اتصالات تلقى رقشة واقفة ولا مدورة ... مافرقت
وبين كل رقشة ورقشة تاني رقشة ...
وأنا خايف المرة الجاي محل الرقشة يكون في قندرانيات ..
حاجة عجيبة ..

والأعجب من ذلك حكومة الوحدة الوطنية ..
أها دي ما عندها حل غير واحد..
اللي هو نخش نحنا ذاتو السياسة دي.. ومافيش حد أحسن من حد
دايرين لينا إسم ... وريس يفهم في الشغلانية
ويعمل لينا التصديق من أقرب محلية؟؟؟

في آخر أيام الإجازة ظهرت مشكلة الجاز المافي ..
والغريبة إنو وزير الطاقة إسمه أبو الجاز ... دي صدفة !!!
ولا الراجل خبرة ..

بعدين عجبني الريس ودالبشير ... الراجل أوفى بوعده
وزي ما قال لي وزير الداخلية سابقاً وسابقته المشهورة وجامعة الرباط ..
قال ليهوما تخاف ولا تجزع ... محلك محفوظ ..
وفعلا صدق في وعده وفصل ليهو وزارة الدفاع ..
باين في أزمة رجال ..

ياخي خلي إكشوني ويرجعوني مكلبش ..
وهناك في مطار السجم ده يفكو القيد ويربطوني بواحد تاني ... وطني ..

فترنا وزهجنا .. وبعدين لمتين بندفع 25 ألف زفت في كل مغادرة ..
والعجيب كمان في الزفت اللي غسمها المغتربين دي بدون خجلة يقولوا
ليك أمشي جيب لينا ورقة خلو طرف من الضرائب.. ضريبة تضرب ..
المهم عشان يدوك هذه الورقة تدفع ألفين .. مبلغ تااااافه ..
لكن التفاهة في إنو أنا دافع الضريبة كاملة ليه ما يدوني الورقة دي من غير فلسفة
ومن غير استنكاح ... حاجة عجيبة

ولا أقول ليك خلوهم إثنين ستات شاي .. واحدة للشاي الليبتون
والثانية للشاي أبو غزالتين ..

كبرنا والله .. حتى البرنجي بقينا ما بنستحمله ..
ولا مالو بقى حااااار كده ...

بديت ليكم بقصة الجاز وسرحت ...
المهم في اليوم داك عمكم كان جاي من سنار نظيف ومشنط
وصلت الميناء البري (صراحة روعة) ممكن الواحد يضيفه للحاجات السمحة والطاعمة
الشفناها في الإجازة ..
المهم وصلت الساعة 2 ظهراً..
ولأهلي بالمربعات أبوسعد أمدرمان .. تعرفوا وصلت الساعة كم
ما بتصدقو .. صلاة المغرب حصلتها بالتلتلة ..
وكان في زحمة عجيبة .. في الكباري والشوارع
محتفلين بالشح في الجاز .. الله ينعل أبو الجاز

وكمان .. ولا خلي الباقي لي بكره
أصلو الكهرباء بتقطع .. كان قطعت كمان الموية بتجاملها وتقطع معاها ..
ونحن لا غسلنا ولا كوينا .. ولا عندنا فحم ..

أصلو الغاز أرخص من الفحم ؟؟؟؟ زمان .. هسه ما عارف ..

في السودان الحبيب ما تتعجب وتلوي شلاليفك لو قالو ليك الريال بقى أعلى من الدولار
ومع السللامة ..

كلام سر .. مع ودالماذون ... ماعندك ألفين فكه .. أصلو الجيب مليان لكن ورق كبار!!!
لزوم المواصلات...

[ابو المهتــدي]

بسم الله الرحمن الرحيم
الاحباب نبيل 00 هل 00هل 00 انا ما قلت ليك التماسيح محل التكرع ما بتديهو 00 وبعدين الناس ديل كل واحد عندو مقاس عراقي جاهز ما بفصلوه 00 الخياط جاهز والمكنة موجودة تعب مافي من بدري المقاسات معروفة 00
بس الشي الداير اعرفو هناك تمساح كبير ما ظهر مع الجماعة 00 الظاهر دة عراقيهو بشكل جديد 00 الله يستر
غايتو 00 نحن عندنا شويرع ظلط صغيروني تلاتة كيلو ليهو تلاتين سنة ما سوا لينا 00ما عارف هل حنتظر تلاتين تانية 00 ولا رايكم نشكل جبة تحرير الجزيرة 00 او نحيل الامر لجبهة تحرير السودان 00 او نتكلم بلهجة عربي مدني 00حتي نسمع صوتنا 00 الغريبة عندنا نحن ناس السوريبة ما عندنا دلوكة 00 ولا نحاس نعرط فيهوا مع انو نحن رمز من رموز دولة الفونج 00 وما زلنا مهمشين 00 ما عارف خليفة كرنك يضيفنا للمهمشين ام لا
ام اخي ود الصادق 00 الرقشات دي ياخوي كل الكوادر الجامعية سواقين فيها 00 انت ماسمعت بالمشروع الحضاري 00 التنمية تمشي كيف لازم تحول الكوادر الفنية الي فئة عاملة وهي الرقشات ما تديك الدرب 00 بعدين ستتات الشاي ديل بدخلن عملة طيبة للمحلية بطريق مباشر 00 وبدخلن عملة لخزينة الدولة بطريق ايضا مباشر 0 انت ما شفت ناس الانطباط 00 هل 00هل00 ياود خالد 00 انت سمعت بعدم الجاز 00 ماسمعت بي كيلو الاسمنت = كيلو سكر 00عفوا نحن السكر عند نا بالرطل 0 00 ولا لم تعجبك الانارة 00 تشوف الكهرباء وفواتيرها تقول الجماعة قايلين الناس من سكان 00 ريدوجانيرو 00 تخيل ليك مشروع حضاري الناس زمان خلت الكهرباء رجعت لي حبوبة مريسيلة 00 برضوا لمو منهم الجاز 00 وخلوا ليهم ابو الجاز 00 الجماعة خايفين يرجعو للمسرجة ام زيت يلمو منهم الزيت ويبقي الملاح بدون رايك شنو 00 اه قول لي وانا في انتظار كلامك 0

[HAMADTO]

ازيكم يا ناس الدكان رمضان كريم وتصوموا وتفطروا على خير

وزي ما قلت يا ابوالمهتدي الناس ديل كل واحد عارف مقاسه ومجهزنوا ليهو ... ده حتى القلع العراقي وقال ماداير جابوهو تاني وسلموهو وزارة ... يا ابوالمهتدي يا اخوي تصوم وتفطر على خير بس اهلنا كيف اخبارهم مع السكر في رمضان ده ...

[HAMADTO]

كل عام وانتم بخير
عيد سعيد - اعاده الله علينا وعليكم بالخير واليمن والبركات

[أبوبكرحامد]

ياخوانا كل سنة وانتو طيبين وعلى أهلكم لامين والله مشتاق ليكم شوق فات الحد ، مشكور نبيل الإسم والطبع على التهنئة بى رمضان والعيد وربنا احقق كل الأمانى الممكنة ونتصافى فى حضن الوطن .. لافيزا لاكفيل ولاحزن .
ود الصادق الفين شنو الدايرة منى ياخى الكواكب خليناهم فى السودان نلقاهم فى الإنترنت وكمان قال سر والله خالد هاشم اكون كلم بيها ناس الخليج كلهم ده كمان غير شمارات أبوروان غايتو أنا بديك الألفين بس الله استر عليك من الشمارات ، ياناس اعذرونا فى عدم استقرار فى الشغل عشان كده انقطعنا عنكم شوية لكن زى ماقالت ام كلثوم " فكرونى ازاى هو انا نسيتك "
تقبلوا محبتى لكم جميعا
ود الماذون

[HAMADTO]

اهلا وسهلا ود المأذون وكل سنة وانتو طيبين وربنا يحقق الاماني انشاء الله

[ابو المهتــدي]

بسم الله الرحمن الرحيم
الاحبة الافاضل كل عام وانتم بخير 00 ولكم مني العزر في الغياب عنكم والله بعض الظروف ونسال الله ان لا يغيبنا عنكم بعد الان
والله جايكم بعد غياب في ايام رمضان 0وانا بدون حرج علي حمارا زين وخرجي مليان بالاخبار ةالشمارات بس ادوني فرصة النتكلكل ليكم في العنقريب شوية 00 وبعد ما اشرب لي فنجان جبنة 00

[HAMADTO]

يا ناس الدكان رمضان وانتهى والعيد كمان الكسل شنو ....
ابو المهتدي لسه فنجان الجبنة ما انتهى يا غالي ...
جديد البلد معاكم شنو يا ابو المهتدي

[ابو المهتــدي]

بسم الله الرحمن الرحيم
تسلم اخي الحبيب 0لك التحية 0
مازال الشوق اللديار شديد وكان العشم الصوم هناك ولكن اتت الرياح بمالا تشتهي السفن 0 وكل شي بمشئة الله وما زال العشم
قائم وانشاء الله عما قريب 0 والجديد ضبعا نحن علي صلة يومية او شبة ولكن بالتلفون 0
وقد تمكن الابن المهتدي من فتح مكتب له بالخرطوم 0 مع احد زملاء الدراسة 0له 0 واسمياه ((بيت الفن للتصميم الداخلي والسراميك )) وهو علي استعداد لتقديم خدماته لكل احباب المنتدي من تصميم ونتفيذ 0 من فن الجبص 00 وكل ماهو مطلوب للديكور الداخي 00 من فن و وحتي المجسمات الشخصية 00 وهذه بمسابة 00دعوة من الشبل للجميع

[nana]

ابو المهتدي السلام عليك ومبروك افتتاح مكتب بيت الفن والاخ المهتدي عرفناه فنان مبدع ونتمني له التقدم

[أبوبكرحامد]

سلامات ياناس الدكان وعساكم طيبين ومرتاحين ، نأسف للإنقطاع القسرى لكن يعلم الله أنكم فى البال والمنى ، لكم حبى.

[HAMADTO]

اهلا وسهلا ود الماذون عودا حميدا ... والله الدكان مفتقدك ...

ألف مبروووك لمهتدي يا ابو المهتدي وانشاء الله دوما تشوفه ناجح ... وربنا يحقق امانيك وامانيه انشاء الله

اهلا وسهلا بك nana في الدكان والمنتديات

[ابو المهتــدي]

بسم الله الرحمن الرحيم
لكم التحية الحبيب ود الماذون طولة الغيبة 0 وبلك وحشة 0الابنة نانا ربنا يسلمك ويعطيك العافية ونتمني ان نري منك الكثير
ولك الشكر اخي الحبيب نبيل وتسلم لشعورك والطيب ونتمني ان نتلاقي في رياحين الديار

[امينو]

سلام يا اهل الدكان كيفنكم لعل مافي عوجة والله الزمن دا بقا كعب كعوبية انشغلنا منكم الشهور الفاتت لكن كنتو في البال غايتو نشوفكم قريب انا ماشي هنا لي عم مهتدي طولتا منو بكون لايمني جهزوا جبنتي لامن اجيكم .

[ابو المهتــدي]

بسم الله الرحمن الرحيم
تسلم الغالي امينو لك التحية 0 نتمني ان نتلاقي 0وعلي ارض الديار مكباشرة اذا ربنا مد في الايام 0 والنية معقودة تب
ان نشهد العيد في ربوعها 0 ومن الان تب انت معزوم عندي بالسوريبة 0 في رياحين ايام العيد 0 والدعوة مرفوعة لكل احباب المنتدي في تنلك الربوع 0 ويكون لنا شرف للقاء بكم وفي ارض نصرو بنت عدلان رمز من من رموز دولة الفونج مازالت باقية وتاريخ حاضر 0

[مصعب الصول]

السلام عليك ورحمة الله
الاخوه في الدكان تحيه طيبه العيد بقي علي الابواب والخرفان بقت تنسحب من السوق الحاصل شنو الظاهر حتلحق السكر ولاشنو.العم ابو المهتدي مرحبا في ديارك السوريبه .

[مهيرة]

http://hawaaworld.net/files/5215/ramadannnnnnn3.gif

[صالح ابوشوارب]

كل عام وانتم بخير

يا ناس الدكان وينكم وين

ودالصول وين ود الماذون

الحقووووووووونااااااااا

[HAMADTO]

كل عام وانتم بخير


يا ناس الدكان العيد انتهى ما تفتحوا الدكان ده خلاص
تحياتي لكم جميعا وربنا يحقق الاماني انشاء الله

[أبوبكرحامد]

حنينى إليك وليل الغربة بكانى
وطيف ذكراك بدمع القلب بكانى
والله ياجماعة وماطالبنى حليفة ولا " ألفين جنيه بتاعت عماد الصادق "........ مشتاقين لحد الجنون ومشكورين على سؤالكم عنى و.........
انشاء الله ماإحصل فراق لى قلوب بعد مااتولفوا
مع محبتى
ود الماذون البى حبكم مسكون " سكن عزابة هنود ، يعنى مافى ترتيب "

[مهيرة]

[QUOTE=ود الماذون البى حبكم مسكون " سكن عزابة هنود ، يعنى مافى ترتيب "[/QUOTE]

:) :) :)

مشتاقين لزحمتكم الحلوة
وحلوة سكن عذابة هنود

[أبوبكرحامد]

مشكورة يابت ملوك النيل " مهيرة " بت عبود ، أسعدنى مرورك يامشرقة " إبدال الفاء قاف دليل التقدير ، وفى قراءة أخرى تقرأ مشرفة بكسر الراء مع التشديد لدواعى التبجيل " *
* المرجع كتاب أحكام التنوين والسكون للفقير لربه ود الماذون - باب مدنى رائعة المدائن - فصل العشائر والفخوذ والبطون.

[عماد الصادق]

ودالمأذون.. مرحباً بعودتك تاني مرة..
وشنو الحكاية الناس ديل راحو وين..
كتير بنجي .. ونلقى الكنتين قافل.. ونرجع كداري .. كوكب؟؟
مشتاقين للونسة والفضفضة والذكريات .. ومدني الجميلة..
ناس أبوشوارب العجايز جابو سيرتك زمن بنك باركليز..
لكن قلت ليهم هوي الزول ده ماقدركم ..
يعني كان بالغ يتذكر جية ريسنا نميري.. حليل أيامو ..
تحياتي ..

[خالد هاشم علي]

رواد الدكان اهل الزين اهل العديل..
كيفنكم ياناس هوي... الخبر شنو وين انتوا.. يالرحتوا طولتوا.. وعلي ماسالتوا... يالكنتوا مني قراب.. انا وين .. وين انتوا... عهد الوداد خنتوا.. ودكان ود الصول سبتوا..
نداء لكل الرواد:
تعالوا نرجع للدكان ونقعد ونتفن في الواطة دي نفتوا ونحتوا... ونعيد الذي مضي...
عزيز...ابوشوارب...بابكر... ابو المهتدي...بتنا قمر الزمان...ودالماذون الغالي...مهيرة ..ضياء الدين العريس( سابقاً) ابراهيم...حمدتو...امير...ابوبكر الادمن...ابو روان...عماد الصادق...وكل من سقط اسمه سهواً.. بنقول الدكان فااااااااااااااااااتح بس ابقوا تعالوا بدري...ومن هسه الدين ممنوع... ومافي بمشي وبجي هسه... يلا نحن في الانتظار

[أبوبكرحامد]

أهلاً حباب العمدة ود الصادق البى طلتو همنا ارحل وافارق.
مليون سلام ود هاشم وقرب تعال نشم فيك ريحة مدنى والأهل العزاز.
أها ياناسنا الدكان فاتح 24 ساعة ونحن دوامنا بنتهى المساء وبنسلم الوردية لى ناس أمريكا ناس عزيز عيسى وجمال الماحى وذلك مراعاةً لفروق التوقيت .
أها ياود هاشم دايرنك تحكى لينا عن البلد وناس البلد .

[rasheed]

أنتو دحين دكانكم ده لا بتطلع منو عيزومة أكان سماية ولا طهور ولا عرس ولا أي حاجة كده يعني عيزومتكم كلها تتفن في الواطة دي وياكافي البلا وحارس البهائم في الخلا لا صينية عضة كاربة كدة من ناس حاجة فلانة ولا حاج فلان ،، دحين كرامات الحج دي رقدتبوها - ست كدة - لا حس ولا خبر دايرننا نتفن بس ،، الله يعمر دياركم إن شاء الله شاهي بلقيمات يا لحاق بعيد ،،،

[عزيز عيسى]

جيت ماري في الشارع من بعيد شفت نور خافت صادر من لمبة فانوس..
لما وصلت قريب لقيت ودالمأذون بيمطر في (الصعوط)..
ولقيت الرشيد ظهر شايل حقتو وطاقي حنك مع ودالمأذون وبحاجج في سعر التمباك وعايز يعرف ليه ودالمأذون مزود السعر..
ودالمأذون بيحاول يبرر موقفو ويوضح للرشيد مسألة الزيادة دي كان بسبب الايجار الباطني للدكان من ودالصول.. لآنو
ودالصول عندو ظروف اختبارات في مجال العمل خلتو يضطر يأجر الدكان ويغيب.. وحتى أبوالمهتدي شمر ومشي الصعيد علشان يشوف
أسعار تمباك أحسن.. وحيعودوا للدكان عما قريب بإذن الله.

يا ود المأذون أنا شايف راكوبة الدكان فاضية وناس الضمنة ديل لسه ما ظهروا..
لو جبت ليك رتينة كبيرة ونزلت سعر التمباك وشديت ليك قدرة فول..
وعملت ليك (طبلية) ختيت فيها باسطة وبقاشة وسرندبل وجبت كمان سجاير نيوبورت..
ناس عماد وودأبوشوارب وباقي الشلة بيجوك كلهم من كل فج عميق..

بس انت اسمع كلامي وأعمل الحجات ديل.. وبعد داك الدكان بالعافية بمشي..

ودي،

عزيز

[HAMADTO]

سمعنا في تغيرات جديدة في الدكان جينا جارين جري شديد ... اها الافتتاح بتين عشان اول يوم حيكون ملح موش كده ...
يا عزيز انا كل يوم برابط ليك في راكوبة الدكان عشان اتابع ليك ود المأذون وبديك التقرير أول بأول

[أبوبكرحامد]

أنتو دحين دكانكم ده لا بتطلع منو عيزومة أكان سماية ولا طهور ولا عرس ولا أي حاجة كده يعني عيزومتكم كلها تتفن في الواطة دي وياكافي البلا وحارس البهائم في الخلا لا صينية عضة كاربة كدة من ناس حاجة فلانة ولا حاج فلان ،، دحين كرامات الحج دي رقدتبوها - ست كدة - لا حس ولا خبر دايرننا نتفن بس ،، الله يعمر دياركم إن شاء الله شاهي بلقيمات يا لحاق بعيد ،،،

انتا يارشيد أخوى من فارقت ناس حى البان وتجار المواشى ناس طلحة بقيت سعران لى لحم الضان ، عموماً أبشر بالخير يوم الجمعة عندنا كرامة لى خالد هاشم بى مناسبة الحج وعودتو سالم لأنو فى ناس كتار ماتوا فى رمى الجمرات ربنا اتقبلهم وديل ناس سعيدين ، ونحن ناس مدنى ناس حريفين ومتعودين على المظاهرات ورمى الحجار ومافى زول بتفوق علينا فى الناحية دى غير ناس غزة والضفة الغربية .

[أبوبكرحامد]

جيت ماري في الشارع من بعيد شفت نور خافت صادر من لمبة فانوس..
لما وصلت قريب لقيت ودالمأذون بيمطر في (الصعوط)..
ولقيت الرشيد ظهر شايل حقتو وطاقي حنك مع ودالمأذون وبحاجج في سعر التمباك وعايز يعرف ليه ودالمأذون مزود السعر..
ودالمأذون بيحاول يبرر موقفو ويوضح للرشيد مسألة الزيادة دي كان بسبب الايجار الباطني للدكان من ودالصول.. لآنو
ودالصول عندو ظروف اختبارات في مجال العمل خلتو يضطر يأجر الدكان ويغيب.. وحتى أبوالمهتدي شمر ومشي الصعيد علشان يشوف
أسعار تمباك أحسن.. وحيعودوا للدكان عما قريب بإذن الله.

يا ود المأذون أنا شايف راكوبة الدكان فاضية وناس الضمنة ديل لسه ما ظهروا..
لو جبت ليك رتينة كبيرة ونزلت سعر التمباك وشديت ليك قدرة فول..
وعملت ليك (طبلية) ختيت فيها باسطة وبقاشة وسرندبل وجبت كمان سجاير نيوبورت..
ناس عماد وودأبوشوارب وباقي الشلة بيجوك كلهم من كل فج عميق..

بس انت اسمع كلامي وأعمل الحجات ديل.. وبعد داك الدكان بالعافية بمشي..

ودي،

عزيز

انت ياعجوز من زمن بيمطروا الصعوط ، دلوقتى بقو انتجوهو واعبوهو فى مصانع زى الصعوط الأمريكى كوبنهاجن وإسكول ، خليك مع الزمن يا " رحم الله رمضان زايد ".

[أبوبكرحامد]

سمعنا في تغيرات جديدة في الدكان جينا جارين جري شديد ... اها الافتتاح بتين عشان اول يوم حيكون ملح موش كده ...
يا عزيز انا كل يوم برابط ليك في راكوبة الدكان عشان اتابع ليك ود المأذون وبديك التقرير أول بأول

انت يانبيل بس تعال ونحن بالأفراح نجيك .
بعدين ياخى عمك عزيز بيقطع قلبك بالوقفة والمراقبة ماتشتغل بيهو الراجل ده خرف ونظرو ضعف ، دحين امشى انجما وشايف الجماعة منتظرينك فى المنتديات ، وخليهو ارسل واحد من الوليدات الصغار للمشاوير دى ، والقصة دى ذكرتنى زمان فى مدنى كان فى نادى عندو نقطة واحدة فى الدورى والأوضاع ساءت فى الفريق وكان على وشك الهبوط ، قاموا ناس الإدارة استقالوا ، وتم تعيين لجنة جديدة برئاسة لواء شرطة ، أحد الظرفاء رد قائلاً " أول مرة نشوف لينا نقطة إجيبوا ليها لواء "
***** طبعاً النقطة تطلق فى مدنى على قسم الشرطة .

[HAMADTO]

والله ما بتقصر يا ود المأذون ودي المحرية فيك ...
بس كلام عزيز صاح الدكان ده عاوز تجديد عشان الزبائن تجيهو من تاني ..
وانا زي ما قلته حأمشي أنجم ... بس أمانه أول ما تفتح بعد التجديدات قول لي عووووك . وانا مرة مرة كده بمر بالدكان ....
وانا بكلم ليك الجماعه كلهم .. لكن ابو المهتدي حسي ضارب الهمبريب ما بكون جايب للدكان خبر ...

انت يا ود المأذون اسعلك ود الصول أجر ليك الدكان ده بكم ؟ ولمدة كم كده ؟

[فدوى الحسن]

جيت ماري في الشارع من بعيد شفت نور خافت صادر من لمبة فانوس..
لما وصلت قريب لقيت ودالمأذون بيمطر في (الصعوط)..
ولقيت الرشيد ظهر شايل حقتو وطاقي حنك مع ودالمأذون وبحاجج في سعر التمباك وعايز يعرف ليه ودالمأذون مزود السعر..
ودالمأذون بيحاول يبرر موقفو ويوضح للرشيد مسألة الزيادة دي كان بسبب الايجار الباطني للدكان من ودالصول.. لآنو
ودالصول عندو ظروف اختبارات في مجال العمل خلتو يضطر يأجر الدكان ويغيب.. وحتى أبوالمهتدي شمر ومشي الصعيد علشان يشوف
أسعار تمباك أحسن.. وحيعودوا للدكان عما قريب بإذن الله.

يا ود المأذون أنا شايف راكوبة الدكان فاضية وناس الضمنة ديل لسه ما ظهروا..
لو جبت ليك رتينة كبيرة ونزلت سعر التمباك وشديت ليك قدرة فول..
وعملت ليك (طبلية) ختيت فيها باسطة وبقاشة وسرندبل وجبت كمان سجاير نيوبورت..
ناس عماد وودأبوشوارب وباقي الشلة بيجوك كلهم من كل فج عميق..

بس انت اسمع كلامي وأعمل الحجات ديل.. وبعد داك الدكان بالعافية بمشي..

ودي،

عزيز
سلالالالالالالالالامات يا ناس الدكان والله ليكم وحشة قلت أمر عليكم في الدكان كان محتاجين حاجة واعرض عليكم مساعدتي وانا عاوزة اقوليكم انا بمسك ليكم الطبلية وقدرة الفول واظبط ليكم الشاي والقعدة للجبنة........

[أبوبكرحامد]

ياخى ود الصول ده أنا لى هسى ماعارف الدكان ده أجرو لى ولا شراكة ، غايتو الحاجة البعرفا إنو يوم أم العيال تمنعو من استعمال اللابتوب بقول ليها أها ماشى الدكان ، الولية مسكينة تقول ليهو خلص أفتح الكوبيوتر أخير ليك من قعدة الدكان والمعاينة لى النسوان ، الشمار ده جابو واحد من الأشرار الفى بالى بالك ياحمدتو وانت كبير المشرفين وعارف ناس الشمارات منو وخليها مستورة .

[أبوبكرحامد]

سلالالالالالالالالامات يا ناس الدكان والله ليكم وحشة قلت أمر عليكم في الدكان كان محتاجين حاجة واعرض عليكم مساعدتي وانا عاوزة اقوليكم انا بمسك ليكم الطبلية وقدرة الفول واظبط ليكم الشاي والقعدة للجبنة........
مابتقصرى يابت الحسن وياها المحرية فيك ، لكن فى الأوال بندورك تسوى لينا صندوق لأنو الجماعة ضربم فلس عجيب ودفتر الديون فى الدكان اتملا ، أها شوفى لينا البيشتركو منو وكمان بنديك الصرفة الأولى رايك شنو ؟

[عماد الصادق]

مني أنا
إلى Dokanwadalsoul@hotmail.com
الموضوع حظر على الخروج بسبب الدكان
يا جماعة عووووك
نحن من ما جات الديمقراطية وبقينا نشاور الحريم
الموضوع بااااااظ
أي مشوار .. أي موضوع .. أي مشروع .. أي حاجة ...
يقوموا يعملوا ليك سين وجيم .. ويدخلو ليك كلمة لكن..وده مستحيل.. وهلمجرااااا
هسه أنا لي اسبوعين ما قادر أجي الدكان..
والسبب لأني صريح وبقول أنا ماشي وين.. قمة التحضر!!!!
والولية من ما قرت كلام بتنا فدوى قالت ستين يمين مافي طريقة...

وأنا صراحة متقريف لتمباك ودالمأذون.. قالو عمل ليهو خلطة سرية..
قالو مما تخت السفة .. فوق أو تحت ويفضل تحت اللسان!!!
بجيك شعور بأنك فوق .. فوق .. فوق سودانا فوق
وطوالي بتفكر في الرجوع والخروج النهائي ..
أصلك ممطرو بي شنو؟؟؟

هسه ولدنا النشيط أمينو ينتهي من امتحاناتو ويجي لطبليتو..
وكان لي قدرة الفول وليد هاشم فولو القاطعو من راسو ده اتعودنا عليهو

بعدين ياجماعة الشوارع بقت زحمة .. وزهجنا من عربات الجن الكتيرة دي ..
متين نستعمل الهلكوبتر في مواصلاتنا لفك الاختناق المروري..
تخيلوا بعد سنة أو أثنين تقوم تنتشر الهليكوبترات أشكال وألوان ..
وجيك الخبر طاير .. وتسمع .. والله ود المأذون جاب لي مرتو هليو (اسم الدلع للهيلوكبتر) اسكتو ساي تخيلو بتطير من غير مروحة..
وتسمع بي ناس خالد هاشم بيتهم وقع .. أصلو جوهم أصحابهم الفي مدغشقر وعملوا باركنج على راس البيت من غير ما ياخدو الاوكي.. بيني وبينم أحسن لينا عرباتنا دي .. على الأقل لمن تبوظ ولا الوقود يكم بتقييييف .. بس الهليو بتقع !!!!!

أنا الليلة جاي جاي .. كلام رجال ..
لكن ..
لو بت الحسن جاتنا وأقنعت المدام .. إنو الموضوع عادي.. يكون أخير...
ولا شنو

[عماد الصادق]

عاجل...
جانا من مدغشقر من الناس اللي عملوا باركنق على بيت ناس ودهاشم
إنو الاوضة اللي ركو عليها كانت بتاعة الشغالة والحمدالله الشغالة
مشت في أجازة لإهلها بالمكسيك..وأعيد بناء ما تهدم بمواصفات أحدث
من تلك التي استخدمت في قرية اللعوتة..
ومازال انعدام الطين يعد مشكلة في السودان .. وحل محله الزفتي..
والشغل بيهو زفتي .. وريحتو كريهة خلاس..

[rasheed]

هووووووي يا جماعة الدكان تعالوا كده بالعقل كده 00 وفي شان ما تقولوا أنا جلد وما بطلع القروش 00 لكن ود الماذون ده كيفن يزود لينا السعر ونسمع أنو زادولو الإجار من الباطن وده طلع كلام ساكت 00 وهسع هو قال ما عارف ود الصول ده مؤجر ليه الدكان ولا مشاركو فيهو 00 دحين الزيادة الجابها شنو للتمباك يعني وفي شان كده نحن دحين بطلنا صعودو وتمباكو ده وعلا يسفو براه 00 وما كفاية عشان نحن بندور ناس الدكان ديل أتلموا وبندور كمان نربحو في شغلو ده يقوم يزيدلنا التمباك 00 ونحن كان عندنا زيادة لحق التمباك ما كان شربنا البنسون وبقينا زي الأفندية والدكاترة 00 علا ترانا بنسف في الداهي بتاعو ده والتاميهو لينا صفق نيم من شجرة ناس عبد الفتاح ،، هو ما خابرنا بنشوفوا لما يجي يلملم الصفق ولا يرسل وليداتوا ،، شوف يا ود الصادق أنا بعرفلك بكان صعود تمام وجيرانو 00 بس إنت أخد الإذن من الجمااااااااااااااااااعة وتعال والله يكون في عونك 00 والله بعد ده إلا ترجع المؤتمر تاني الشي في أول العمر طه كرار وفي نهاية ؟؟؟؟؟؟؟؟؟ أنا جبت سيرتو 0

[فدوى الحسن]

سلام يا ناس الدكان كلكم وانا على كلامي ليك يا ود المأذون وبعمل ليكم الصندوق وانا متنازلى عن الاولى ليكم
ويا عمدة ما تخاف انا بجي بكلم ليك ناس البيت وصدقني الموضوع عادي ما فيهو اي حاجة...

ويا ناس خالد هاشم كفارة الجاتكم في بيتكم سلامة ليكم


وسلام للخال العزيز الرشيد القشة ليك الدرب الليلة منو وخلاك تجي بالدكان قاشينا بي هنا........

[أبوبكرحامد]

العمدة ود الصادق ............ ياخوى ود الصول ده ضبحو ليهو الكديسة ولاشنو ؟
مشكورة يافدوى يابت يانيل ، بس صراحة قصة الرشيد خالك دى بتنزل من أسهمك شوية وشوفى ليك خال غيرو يعنى قولى خالى محمد على أو خالى جمال عمر " لاقيتو مرتين فى الدوحة المرة الأولى زرتو فى بيتو وكان معاهو الكوتش عباس ريكس ، والمرة التانية قابلتو فى المطار وكان مسافر ماليزيا" ، طبعاً الرشيد ورانا فى المدرسة بى سنة واحدة فقط وكان رجل مشاغب عشان كده لما دخل الكلية الحربية اندهشت لأنو الرشيد راجل أخو أخوان بحب اللمة والقرقرة والشمارات ، لكم جميعاً منى مليون تحية .

[rasheed]

بت ناسن عزاز بالحيل ،، تقوللي القاشلك الدرب منو ،، عمده ود الصادق وود الماذون والخواجة عزيزعيسى وحمدتو وأنت وعوووووووووووك ديل كلهم يمين لمن يجو قاشينلك الدرب ده الكتررررابة 00 العجاجة في السماء 00 والكتاحة من بانت تقوملك في أم سنط وبركات ((وسلام يا بركات)) وخاصة العمدة ود الصادق 00 والله يا بتي ده لمان يدفر قدام كده تاني رقشة ما تحصلوا 00 وخاصة كان جاي من ناس خالو في الدباغة وغاشي صحابو ناس خالك جمال وأولاد ود البيه وبعدها يمشيلك بانت لناس سلاجة 00 دي كلها في عشرة دقائق بس 00 ((الله أكبر وماشاء الله عليك)) لكن هسع ظنيتو بقى حبوبه خلاص والله يكون في عونو ،، أهه بعد ده كله تقوللي القشالك الدرب منو ،،
ود الماذون يا خطير 00 ما كنا كويسين شن جاب السيرة الشينة الزمان دي 00 ما بقينا أولاد ناس خلاص ، وخلينا كده في اللمة والقرقرة والشمارات ،، ويا حليل دكان الزين وفتة الفول ((موية الجبنة وزيت السمسم ببلاش)) دحين موضوع الفولة ده في دكان ود الصول ده ما شوفولو حل أقلاها الواحد يتعشى ويشيل معاها لناس البيت الفول بدل ما مبهدلننا كده ونمشى مشوار عشان الفول ده وبعد داك تلقاهو كلو قشر ،، عاوزين واحد من الشباب ديل يعمل لينا فولة مظبطة كده عشان الدكان يلم تاني وأنا بقترح الود مزوني 00 باقيلكم كده الود مفتح وبعرف كويس 00 لكن ما عارف أقول ليكم شنو هو قاعد يجي الدكان ده ولا الدكان بس للعجاز البجو 00 طيب بت الحسن دي الجابها شنو ولا مرسلنها بالقهوة ،، 0

[أبوبكرحامد]

الرشيد ياخوى الدكان ده مفتوح للجميع وماهو للعجايز ، وكان هو للعجايز ما كان بتلقانا فيهو ، بس نحنا عاوزين عجايزنا إدونا من حكمتهم شوية ، بعدين قدرة الفول أنا بقترح نديها أمير عبد الباقى لأنو تفتيحة من فريق الحلبة وبيعرف إظبط العضة تمام .

[rasheed]

والله أنا موافق بس خايف يقوم يجيب لينا ناس الكريبة أهل وخيلان ،، وناس فريق الحلبة ،، يعني والله القدرة ما تحصلها في عضمها ،، وما نحصل لينا حاجة :eek: :eek: وتاني نقعد نلف ونشوف لينا فوله ،، ونحن ما عندنا حيل للكلام ده وخاصة في الليل ،، :D :D

[أبوبكرحامد]

الرشيد آ’خوى الراجل ده قريبى ، يعنى طرف السوط هبشنى ، بس مافى مشكلة فولك بنحجزو ليك قبل المسلسل اخلص بس اعمل حسابك اولاد العاتى لو دايرين عشا اكلمونا قبل يوم عشان نزود الكمية ، أنا عارف أولاد القرية 8 ديل بحبوا السهر والعضة وأخونا أمير راجل جلكين ماعندو حيل للسهر والتعب عشان كده البجى بعد الساعة تسعة بنديهو بسكويت بركة وقزازة استيم بارد.

[خالد هاشم علي]

هوووووووووي ياناس جيناكم... انا كنت مافي لمن بيتنا وقع لكن جيت من بره لقيتلك العجاجة دي قايمة قمت قلت ياربي الحاصل شنو ؟؟؟ يكون اللفي بالي حصل!!!1 اصلي كنت طلعت من البيت والولية عاملة لي الضغط والسكري وعندي شريط لذيذ كدة كل مااكون عامل شمطة من الولية بقوم بشغله.. شريط الحاج مذكر .. لانو الحاج مذكر معرس ليهو ولية نقناااااااااقة كدي ( نقناقة تنقنقي ومافي حل غير تطلقي ) أها الولية بتاعت الحاج مذكر دي ضابحو ليهو الكديسة ومطلعة عينو وماقادر يقول (بغم) زيي كده قامت مرة ادتوا ليك في راسو وقالت ليهو آآآآآآآآآآآي يامتذكر آآآآآآآآآه عندي صداع فظييييع فظيييييييييييع عليك الله ادعي لي .. اها قام حاج متذكر في سره كده قال ادعي ليك ولا ادعي عليك... قال ليها طيب انا بدعي ليك في سري بس إنتي قولي آآمين .. الولية قالت ليهو طيب... يلا وقام الحاج متذكر انشرح ليك في الدعاء عليها... انتي يالنجطيتيني انشاء الله الله ينجطك قولي آمين والولية تقول آآآآآآآمين ... إنتي يالفقعتي مرارتي انشاء الله ربنا يفقع مرارتك قولي آآآآآآآمين ... إنتي اريتك بالأباتشي اللفرطقك حتة حتة قولي آآآآآآآمين... أها طبعا أخوكم بعد مايشغل شريط الحاج متذكر ويسمع كل الدعاء ده بطنو شوية بتنفش وبرتاح عشان حاج متذكر قال كلام كان نفسي أقولو لكن غلبني سااااااااااااااااااااه. أها طبعا اليوم داك كنت بسمع في الشريط ولامن رجعت البيت ولقيتلك البيت مهروس قلت ياربي الأباتشي جات بي هنا ولا شنو؟؟؟؟؟؟؟؟؟؟؟؟

[خالد هاشم علي]

أها انا قبيل نسيت موضوع العضة كمان.... وشفتكم اقترحتوا أمير عبد الباقي عشان يمسك قدرة الفول ويظبط الشغلة وانا موافق تماما لانو الجنا أمير ده فيهو مقومات معلم الفول ( الصلعة والدغلبة) بس كمان انا عندي اقتراح اضافي ... رايكم شنو لو يمسك الحساب والموارك ( جمع ماركة ) يمسكها ابوبكر الآدمن ؟؟؟؟؟؟؟؟؟ لانو والله بكري ده فيهو مقومات بتاع الماركات ( الجلحات والكريشة الكبيرة) أها ياناس رايكم شنو؟؟؟؟؟؟؟؟

[بابكر]

ياخوى ود الصول ده ضبحو ليهو الكديسة ولاشنو ؟؟
كديسه شنو يا ود المأذون والله اظن انا ضبحيين لى فارعديل كده
وخلى الطابق مستور ياراجل

[عماد الصادق]

فار شنو يا ود الصول.. قول أسد عديل
ووزعتها صاح ياأبوهاشم.. خاصة بتاعة الموارك دي!!
أمير بقى يقسم فوله للجيران شدت ماباير..
أحسن نحن نغير ونحول الدكان لقهوة انترنتية..

الرشيد .. يا حبوبة.. ذكرتنا أيام الكسحي..
والأيام الحلوة .. جمعنا الله في ساعة خير
بعدين تقول لي تعال جاور بعد ما الواطة بقت بالشئ الفلاني
إنت قايلني شغال في السودان!!!!
أنا مامتغرب معذب.. كل يوم بقسم فيها..
ووحياتك مالافقة.. ووحياتك اليومين ديل جابت ليها حركات جديدة..
أقصد القرفة!!!
تعرف بقيت أفط ليك الحمام عديل كده..
وألبس ليك القميص والنطلون ثلاثة يوم على التوالي..
وريحة مافي.. وحلاقة شعر مافي...
وعندي فكرة أحلق الشنب.. اهو تغيير!!!!
والله كان ما الودو .. كان الريحة طقت..
طفشنا..
وتحياتنا لخالد الصول عبر ود الصول...

[أبوبكرحامد]

وانا اشوفك تنكرش ياود الصادق قايل قرصتك نملة ام ريش تراكا ليك شهر مامستحمى ، غايتو من الدكان بتبرع ليك بى صابونة فنيك ماركة الميزاب انتاج محمد عبد الكريم ساتى واولاده " مازلت متذكر الإسم لأنو أبوى الله يرحمو كان بيحرص إلقط صناديق الفنيك واحشرا فى شقوق الحيط فى الشارع لأنو فيها اسم محمد واسم الكريم "