عاجباني صلعة عصام محمد نور . . الايام دي صلعتو بالغت و شذت . . و جابتو شين . . ساربا سااااكت . . و لا هماها . . التقول الجنا دا ماكل ليهو مال يتيم . . كل يوم قاعد أشوفو بي خلقة تانية . . مرات أقعد أغالط في أصحابي قدام التلفزيون . . و أنا جني غلاط . . أقول ليهم . . الله يكسرني حتة حتة . . دا ما عصام . . دا شيتاً تاني . . و تقوم كاميرة التلفزيون تجيبو قريب . . أصحابي يمسكوني و يتشلبوني من يديني و كرعيني . . و يرموني برة الشارع . . عشان ضهبت في عصام . . عليكم الله كدي النسعلكم . . عصام دا ينعرف كيفن مع النصيبة دي . . لكن النصيحة لله قاعد يزكرني بي عمك تنقو و مجلة الصبيان . . عمك تنقو من زمن مجلة الصبيان ما شفناهو يوم ساكت كدا ضحك . . و عصام أب صلعة دا السنة كلها ماسكاهو أم فريحانة . . و ما جايب خبر للداهية المحكرة فوق نص راسو دي . . هسي كان جاب ليهو منضرة و قعد شاف جنس صلعتو دي تاني ما ظنيتو بضحك . . يفارق الضحك فراق الطريفي لي جملو . . انتو يا ناس تعالوا هنا . . الطريفي دا منو . . و جملو دا مالو . . الله يسترنا من ناس قالوا و قلنا.
عاجباني كلوة وردي الجديدة . . من يوم ركبوا ليهو قطعة الغيار دي . . و صوتو بقى سمح . . و شلاقتو ذادت طابق . . ناس التلفزيون عملوا معاهو سهرة . . ما خل ليهو فنان ما نضم فوق . . انتو الراجل دا ركبو ليهو كلوة و لسان مع بعض . . قالوا الراجل سيد الكلوة . . راجل حريف جداً . . قدر ما يشوف وردي . . يجي و يقيف جمبو و هو يحك في راسو . . و يقول ليهو . . أووووووو أبو الورود . . بالله الكلوة كيف . . ظابطة و الا ما ظابطة . . وردي يحدر ليهو و يشوفو ستة ستة و يقول ليهو بي طرف نخرتو ظاااابطة . . الراجل ينتظر وردي يقول كلمة ظابطة . . و يطير فوووق من الفرحة . . و يقول لي وردي خلاص يا أبو الورود دق لينا جيبك و امسح لينا شنبنا دا بي شيئ.
سنينات ود اللمين الجديدة برضو عاجباتني . . رجعن ود اللمين عشرة سنوات لي ورا . . و بقى جنو ضحك زي عصام محمد نور . . عمك تنقو . . زمان وكتين يزعل كان بدي شلوت . . لكن بعد السنينات الجديدة دي . . تاني وكتين يزعل بقرم و يعضعض سااااكت.
عاجباتني شلاليف رونالدينو . . زمان انا كنت محتار في البسمات البوزع فيها دي . . لكن اكتشفت أنو رونالدينو دا شلاليفو سغار و قصار . . ما بقفلن ليهو خشيمو العريض . . لكن هسي عمل ليهن عمليه ردم . . و بقن مع القيف . . يا ربي شلاليف الجنا دا يكونوا قطعوا ليهن من وين . . الزول دا أواركينو كاملات ما فيهن جنس حفرة . . الله يستر علي لعيبة الهلال و المريخ . . و يغطي عليهن . . الواحد فيهم شلاليفو دبل قبين . . لمن يجري نسمع طخ طخ طخ . . و يدلدلن و يقعن ليهو في سدرو . . و لا حصل فيهم واحد فكر يسوي ليهن عملية تجميل زي رونالدينو . . هسي رونالدينو دا كان جانا في السودان الكلو شلاليف دا . . ما كان ضبطناهو كويس.
عاجباني نانسي عجرم . . قدر ما تغني معجبة مغرمة . . أطير فووووق و أضرب كراعي بالواطة . . و أقول البت دي اتكسرت فيني . . و لحقت أمات طه . . وكتين تقول مش عايزة إلا هو . . تدخلني في أضافريني و أقول بت اللذين دي العجبا فيني شنو . . يكونن العيون . . و الا الساقين الطوال . . قطع شك يكونن ديل العيون . . وكتين تقول ضحكتو نظرتو بتحرك قلبي جوة . . اقوم براي اضحك و أقول ليها . . خجلتيني يا ننوسة . . و يقوم عصام محمد نور الكابوس يجيني طاير . . و يقطع لي سرحتي مع ننوسة . . و ننوسة تختفي خلف الصلعة . . و يجن محلها ناس نجاة و نعمات.
