هوووووي يا مدينة أختي أصبري النسعلك . . انتي الناس دي ملمومة و بتكورك و تسرخ كدا فوق شنو؟؟؟
انتي قاعدة فوق اضنيك يا الشول يا اختي . . دا ود المسخوت بتعرفي؟؟؟. . ود المسخوت الدنقلاوي . . انقرض يا الشول يا اختي و لحق أمات طه . . مات واقف علي طولو . . وحات أبو وليداتي وجعني جنس وجيعة!!! . . و هجمني جنس هجيمة!!!. . حلييييييلو المبروك . . سغير و جاهل . . راح ساااااكت في حق الله . . جنازتو جابوها بالبوكسي هسع دي من المستبشى . . قالوا كان عندو اسهال مائي . . أعدم أبو وليداتي يا الشول . . كان شديد و لضيض انطط و يلعب في الكورة . . جاتو النصيبة البقولولا اسهال مائي دي في نص الميدان . . الله يحفضك و يحفضني . . بري بري ما تجيبي شوطو بي لسانك يا الشول . . برك ليهم الله يعزك في دايرة السنتر . . و بهلوا ليهن . . جووووووووووو . . موووووية زرقة . . الولد نشف خشبة . . و جسمو عدم نقيطة الموية . . حيلو دا انهد كلو كلو يا الشول . . و انماص ليهن كدي في الواطة . . ختفوهو فسراع فسرع . . دلقااااان . . و جروبوا للمستبشى . . الحكيم وكت شاف الولد مشبّح عويناتو . . خاف علي روحو . . فز منو و قام صوف . . الرجاجيل قبضوهو في خشم باب المسبشى . . كركروهو و جابوهو صادي . . قال لهم وليدكم دا عندو اسهال مائي . . الوليد سلم الروح لي مالكا هاك بي هاك . . عاد كركركر علينا يا الشول . . من الاسهالات الماليات البلد اليومين ديل . . دايرات يكملن أمة محمد . . الناس سابت دارفور . . و كوفي عنان . . و سابت نضمي السياسة . . و نضمي الدين . . و بقت تنضم فوق الاسهال . . البتناغميهو كلو . . يجيب ليك سيرة الاسهال . . الواحد كان شافلو زول ساكت بعرفو. . يسلم عليهو و يطايبو . . و يقولو . . كيفنكم مع الاسهالات . . نعل ما غشتكم . . و حات نضري يا الشول . . البارح القريبة دي . . أكلت لي حتة طعمية اشتريتا من نفيسة الحلبية . . كانت نفسي مسدودة لكن برضو أكلتها . . النفس دنية يا الشول اختي . . سوت فيني جنس سوا . . و غلتّت علي جنس غلات . . بطني اسمعها يا الشول . . شغالة كرررررررررر . . و احس لي بي شيء يحش فوق مصاريني . . و النصيبة دا يتاوق و كايس للمرقان و أنا أباصر فوقو كان يوصلني المستراح . . شلت كرعيني يا الله و يامين كركرتهن لي عند المستراح. . وحاتك انتي يا الشول و وحات طيبة وشك دا طلع مني جنس شيء . . لالالالا إله إلله منو . . تقولي بس ماسورة و شاتا لوري . . جسمي دا اتلحس و مات كلو كلو . . و خفت أقع بي قد المستراح . . و شلت هم لي وليداتي بعدين يطلعوني كيفن . . و خفت بعد ما أموت النسوان الشنافات ديل . . يقومن يشنفني . . و يقولن مدينة ماتت في بطن مستراح . . عيلا ربك رب الخير . . رسل لي . . نجاة بتي . . قبضتني من نصي . . و درجتني لي عند عنقريبي . . ودوني المستبشى قالوا اسهال مائي . . لحقوني و انا بطلع في الروح . . و يا الشول يا أختي أنا كوم و عبد المجيد راجلي كوم تاني . . عبد المجيد أبو وليداتي يا الشول . . راكب في الباص . . كان يشعر ليهو بي شيء لين ودافي في الكرسي القاعد فوقو . . هبش صلبو . . يخربو . . لقاهو معطون اسهال . . ضرب الكوراك في نص الحافلة يا الشول . . أحمدك يا مالك روحي . . أتاريهو اسهال السجم دا . . طلع مو حقو . . حق جاروا في المقعد . . جارو في الحافلة كباهو جااااز كدي . . و هو مو جايب خبر يقرأ في جريدتو . . ظنيتو نزل منو مسارقة . . الحيكومة كتر خيرا . . رسلت لهم اتنين غلالالالاد . . ختفتو فسراع فسراع . . و جروا بيهو للكرنتينة . . قالوا دا الاسهال المائي . . هسي يا الشول يا بت أمي كدي النسعلك . . باقيلك الشيء الحايم في البلد دا . . اسهال و الا كوريلا . .؟؟؟ نحنا من قمنا الاسهال المائي دا ما سمعنا بيهو . . في زمتك يا الشول سمعتي بيهو ؟؟؟ . . الاسهال ياهو الاسهال . . شيتاً كدا ينزل مووووووية . . قالوا الحيكومة ناكراهو . . خايفة من البشتة . . و شيل الحال . . بشتنة شنو يا الشول . . نان هم من يومن مبشتنين و معولقين و حالن مكشوف . . هسع جنس الموت الحايم دا كان هبشلو واحد من وليداتم كانو سكتوا عليهو؟؟؟ . . لكن يا الشول يا اختي . . هسي الحيكومة دي يمكن عندها كبير غرض في الكوريلا دي. . باقي لي يا الشول يا اختي الناس اليومين ديل الناس بقوا سمحين و نايرين . . و سمان . . و نسوا الجهاد و الكفار . . تكون الحيكومة دي جابت ليهم الكوريلا دي . . عشان تذكرهم بي دين الله . . شفتي فلاحة حيكومتنا يا الشول!!!
