تحية شوق وشوق دفاق
محكر جوه فى الاعماق
وجد حراق
مولع زادو غربتنا
ملان وجعا
موسم بفراق ناسى
مقسم فى براحاتى
وغلب كلى
متين ترتاح رواحلنا
وتكف السير
ويرجع فيناطعم الليل
ونوم الليل
وعشقا طال زمانو بخيل
نجيكم يوم
بدون ما نكون نوينا رحيل
ونسكن جوه فى عيونكم
نحلق فى سماء الاحداق
رموشكم غيمه ضليله
كرمكم فينا زاد الخيل
وجود حاتم قليل بالحيل
ولمن فينا يبقى وجع
بتضوو الليل
وشوقنا الزاد كتير بالحيل
عليكم ديمه سايقنى
وجادى السير
سلامى على بلاد النيل
ولاد النيل بنات النيل
ضراير الريل
سلامى على شوارعنا ومزارعنا
وخفجة طينه
فى مطرا مساهر الليل
وشوقى الديمه متوقد
يصل لكل جميع الناس
ويكون وناس
ويسكن جوه فى الاحساس
سلام من الله وانشاء الله
جميعكم ديمه متسامحين
وصحه وعافية فى كل حين
بفوتكم فى امان الله
وعشان الله
تردو رسولى تو الحين
