ونسة مع عمك تنقو ... وقراءات وطرائف
سنتر الخرتوم.. السلام في الجضوم!!
ذكر احد الاصدقاء :
عشر سنوات عجاف.. في غربة.. لما مشيت لها قلت لها ليكي اللحم ولي العضم.. وفعلا عدت.. وانا عضام نخرة.. عشر سنوات متواصلة انقطاع عن البلد.. دخلتها اباطي والنجم.. وخايف لا الاباط لا النجم بعد شوية ما القاهن!!.. ملاحظاتي ملاحظات زول مندهش ويتلفت بسبب وبلا سبب..
* سمعت انو عوض دكام اتوفي الله يرحمو.. لكن كل ما اركب حافلة واللا اسمع حفلة.. اي فنان يقعد يكورك يا عوض دكام.. يا عوض دكام.. الفنانين قابلو الزول دا.. وفي قبرو ما دايرين يريحوهو..
* لاحظت.. البنوت بقن.. اكثر سماحة من على البعد.. وأول مرة اعرف معنى خافت لونين ـ تلقى الواحدة الوش ابيض ناصع البياض.. والايدين والكرعين سوداء.. يعني خاتف لونين اللون الاساسي لون زينب.. والباقي اجتهاد منها.. السلام في الايدين خلنو.. وختن ليهو القدرو.. بقت الواحدة اول ما تتشعبط في اختها.. تقعد تسلم في الجضوم.. لكن بي حرفنة شديدة.. عشان ما تبوظ البوهية حقة الوش.. تسلم وبعد تفكها تقول ليها: بالله كيف يا ميمي؟!.. واللا.. نيني.. ميمي اسم دلع لمريم ونيني اسم دلع لندى.. واب نيني.. مرض معروف يصيب الماعز.. اليوم داك.. وانا في المسرح.. جنبي قاعدة شلة بنات.. بيني وبينهم مسافة كبيرة.. جات واحدة.. وقعدت تسلم عليهن في جضومهن.. بالدور.. والله لحمي اكلني.. ودخلت في ضفوري.. وخفت البنية دي تقوم تصلني ونبقى في السلام اللعوج دا.. واضمرت في نفسي.. لو جات وحاولت محاولة زي دي.. علا البعا واطيرها هنوووك.. والله اياهو.. كما دا الفضل.. لكن ربنا ستر.. وحفظني.. وغتا علي.. نحن باقي لي ماشين فوق درب الخواجات.. المحيرني ومخليني استعجب.. تلقى اثنين يتقابلن في السوق العربي.. ونص النهار.. ويشعطبن في بعض... ويقعدن يسلمن في الجضوم.. في القايلة دي... والشمش الحارة.. والعرق يخر بيني وبين نفسي فكرت.. يا ربي؟ يكون السلام اللليل البنوت دا في اتفاقية السلام فرت؟ والله يبقى في تكون الحكومة اتلومت فينا.. لوم ضكر..
بائعو الثلج..أرزاقهم ارتبطت بالنشرة الجوية وودمدني في بورتسودان :
واقرأ لآخر نشرة جوية :
الأجواء الباردة التي تسيطر على طقس السودان في نهاية كل عام، برغم أنها فأل خير للمزارعين وخصوصاً مزارعي محصول «الفول المصري» الوجبة الأساسية المشتركة لكل السودانيين حيث أنه يتفتح ويستوي عادة في موسم الشتاء، الا أن تلك الأجواء الباردة تمثل نذير شؤوم وحالة ركود اقتصادي ساخنة على تجار ومنتجي «الثلج».
* السيد علي حسن - بائع ثلج بمنطقة بحري:
أكد انهم يهتمون جداً بحالة الطقس لما لها من تأثير على حراكهم التجاري.. بل وأكد إن معظم المتعاملين في قطاع الثلج يتابعون بصورة يومية النشرة الجوية بالاذاعة والتلفزيون التي تحدد حالة الطقس وبموجبها يتم جلب الكميات التي يمكن توزيعها من الثلج.
وتروج تجارة الثلج عادة في التجمعات والأسواق الكبيرة ويتوافد على شرائه بائعو المياه المتجولون وأصحاب المطاعم الشعبية وتجار الأسماك.
* عثمان عمر يوسف- تاجر ثلج:
أمّن تماماً على متابعتهم للنشرة الجوية باعتبارها المؤشر الحقيقي لحركة التوزيع في اليوم الثاني. وعن تجارة الثلج أعتبر انها نوع من المغامرة برأس المال لعدم توفر الكهرباء بصورة متصلة وعدم توفر الثلاجات الكبيرة للتخزين وأكد أن الانتاج دائماً يكون حسب حاجة السوق حتى لا يسبب عدم التوزيع في جلب الاضرار للمنتج.
* محمد عبدالله- الدروشاب
انتو تحقيقكم عن التلج ولاّ «كسير التلج» في ناس بتكسر تلج كتير. لشنو ما عارف. نحنا التلج ذاتو عندنا فيهو رأي. وبعدين أنا ما بشرب موية باااردة لظروف صحية. ولو عملتو شغل عن «كسير التلج» ادوني خبر.. عندي ليكم خبارات تقيلة.
* بشير محمد - سائق لوري
أغرب الاشياء أنو مرة في واحد شاحن معاي تلج ما شين بورتسودان بعدين اللستك ضرب علينا لما مشينا جبنا اسبير وجينا قام التلج ساح وبقى موية ساكت صاحبنا قام صوف مني وزاغ جري في الخلاء داك حق الشحنة ما أداني ليهو وما عارف جنّ واللا حصل ليهو شنو. بعدين بورتسودان فيها نوعين من التلج في صناعة محلية وهو تلج مر وفي واحد بجي من مدني دا تلج قوي ومرغوب من تسمع ناس البكاسي يكوركو في الحلة «مدني...مدني» تعرف أنو دا تلج مدني الله فوقو.. مرات سعر اللوح في عز الصيف بيصل لحدي 50 ألف جنيه عديييييل كده.
* عبدالعزيز - الخرطوم «2»
التلج غايتو ذي البصل البيع بما حصل.. لو الواحد داير يشتري تلج كثير يجي المغربية بيكون قرب يسيح عشان كدة التاجر بتخارج منو بأبخس الاسعار.. أطرف حاجة في رقصة جديدة اسمها «التلج- التلج» ودي رقصة شتوية في الحفلات بت عم «النبق النبق».
ود الشواطين والسمسرة
ذهبت الى ود الشواطين مضطراً- فالمهمة التي يريدونها في معرفة سر السعر الحقيقي لمنزل يريدون شراءه ويتوجسون إن السمسرة وضعت مبلغاً كبيراً على السعر الحقيقي.. الجرأة التي تتطلبها العملية لا يقدر عليها سوى ود الشواطين.
* أما الذين يريدونها هؤلاء فهم أصدقاء اعزاء خدمتهم واجبة رغم صعوبة الموقف.. ذهبت الى ود الشواطين وعثرت عليه بعد مناورات فهو دائماً في حالة إخفاء لنفسه هرباً من مواجهة أصحاب ديوان أو موتورين عرفوا إنه وراء المقالب التي شربوها.
* المهم اصطحبت ود الشواطين وما كدنا نقترب من الدكان حتى انفلت عبر شارع جانبي وقال لي: بلاقيك قدام. هنا باغتني سيد الدكان الذي يبدو انه كان يعد كميناً لاصطياد ود الشواطين. فلم يجد سواي، قبض على ساعدي الزول الماشي معاك هسع وينو؟ فتلعثمت تقصد ود الشواطين فقلد حديثي مع مط الياء والنون في الشواطين. قلت متلعثماً مشى. والله ما عارف إمكن رجع البيت؟ قال لي سيد الدكان العضلاتي انت صاحبو؟ فقلت: لا لكن يعني تقول تقول بعرفو؟ فسألني في حسم: يعني انت بتعرفوا كويس! قلت: أنا ما قلت كده. حقيقي أنا بعرفوا لكن ما كويس؟
* طيب اعذرني أنا ح أمسكك رهينة لغاية ما يجي ودالشواطين يدفع الحساب بتاعو؟ انت مجنون ولا شنو؟ قلت للرجل.. صاحبك ده يجنن بلد؟ قروشي ما بقدر ألم فيها الا يجي الزول ده. عشان كدة أنا ما بفكك الا يجي هو؟
* يا حاج انت ما بتعرف ود الشواطين معقول يهتم بي زول رهينة ولا ما رهينة.
- طيب وكت عارف كده بتباريهو ليه؟
- غلطان وندمان وسافي التراب!
- أخيراً تمكنت من الخلاص من الرجل المغبون. وبعد عدة شوارع ظهر لي ود الشواطين وهو يضحك قائلاً: الجلك دقة ليك جرس طويل!
- جرس ده كان ح يعملني رهينة. أنت ما تدفع ليهو قروشو
- يا خي في زول الزمن ده بدفع - مافي ده زمن تشيل- تهبر.
- لكن كده ما نهيت معاملتك معاهو تاني ما ح يتعامل معاك حتى لو دفعت ليهو؟
- غيرو «الدقوس» كتير.. والكدايس ما كملت الفيران.
- ولما ظهر لنا «كشك» في رأس الشارع اختفي فجأة. وكان سيد الكشك يقف واضعاً يده اليمني على خصره واليسرى يضرب بها على رجله في عصبية ولما حازيته كان يحدر لي حدرة لو حدرتها لأهل الصين لكفتهم. فلم أجد سوى أن أبادره بتحية منافقة وبحماس لاهث صحت فيه: السلام عليكم ورحمة الله وبركاته.
كيف الحال والاحوال.. لكنه رد ببرود محرج: أهلاً- وين الحيوان الكان معاك ده. فتلعثمت تقصد مين؟ أقصد منو؟ فقال: وانت مالك خايف- تكون زيو مش كده ماهو الطيور على أشكالها تقع فقلت له مدعياً الظرافة. لكني أنا ماطيره وضحكت. فصاح بقسوة في وجهي: طيره وستين طيره كمان.
الله يسامحك فقلت ومضيت أغني: والله نحنا مع الطيور.
كان على أن أذهب بعيداً لألتقي بود الشواطين حتى يأمن أن سيد الكشك لا يراه- لما فكرت قليلاً: عدت ادراجي لأقول لاصدقائي: انسوا موضع شراء البيت ده خالص. وقد كان.
قراءة اخري وفضلات خيرهم!!
* ألا تتفقون معي بأن (الاسد) المروض يحلم دائما (بالغابة)!! فهل يا ترى يتحقق (حلمه)!!
* ان يكون لك معارف كثيرون فهذا يعني انه ليس عندك صديق واحد!! ولكم ان تتحققوا من صحة هذه المقولة عند اقرب (ضيق) تمرون به!! فستجدون ان كل من حولكم مجرد (معارف) فقط!!
* لا تعتذرون.. فمن يعتذر يقدم دليل الاعتراف باتهام نفسه.. وعلى طبق من (اعتذار)!! فعذرا سيئاتي ساستي.. على عدم (اعتذاركم)!!
* ان تكون (خاسراً) في التعامل مع العقلاء، خير من ان تكون (رابحاً) عندما تتعامل مع مجانين!!
* لوقت قريب كنت اعتقد ان سبب اصابتي بالرطوبة وآلام المفاصل هو انتظاري الطويل لاطلالة سودان جديد خالي من (الكلسترول)!!
* أخاف على السودان من ان (تفوح) رائحته وتعطن الاكوان.. واليونانيون يسمدون اجواءنا (بفضلات) خيرهم!! وانا من هذا المنبر اعلن تضامني مع ابو الجعافر في حملته ضد صفقة (التبادل) الثقافي بيننا واليونان.. تحت شعار (نحنا الفينا مُعفنا).. ولالوب بلدنا ولا (فضلات) تفاح بلاد برة!!
أٌغنيات هابطة بالمظلات
زينب بشتنة الفنانة والخوة «بقت عفانة»
الاغاني الهابطة التي تنحدر بالذوق العام كثرت زي «قرع ود العباس العشرة بي قرش ومية هواده» الفنانون البكاسي كترو بدرجة مخيفة والفنانات البكاسي والرقشات على قفا من يشيل.
احترامنا طبعاً لفناني بلادنا كبير جداً ونحيي الاحياء منهم ونترحم على الاموات، سرور وكرومة وخليل فرح وابوداوودوالبقية . والاحياء وعلي رأسهم استاذنا الكابلي سفير النوايا الحسنة وابو الامين وابراهيم عوض وعثمان حسين ومحمد ميرغني وحمد الريح على سبيل المثال لا الحصر وكل القائمين على الابداع والطرب الجميل ومن فناناتنا العظيمات الاصوات عائشة الفلاتية وفاطمة الحاج ومني الخير ومن الحاليات الاستاذة سمية حسن التي غنت الحلم العربي وحنان النيل والبلابل وسميرة دنيا وندى القلعة وعابدة الشيخ وبقية العقد الفريد وكذلك فنانات مزجن الموهبة بالعلم مثل امال النور.
بعض الفنانات «البكاسي» اشتهرن بالغناء واحتراف تعليم رقيص العرائس في الصبحيات ويتحكمن في تغيير مواعيد الزواج اذا كان جدولهن مليئا او مسافرات يفرضن الزمن والثمن والهدايا يعني «قطع الرحط» ممكن يقطع خيوط الجيب خصوصاً اذا كان الرقيص في صالة مناسبات.
نعود للغناء الهابط والفنانات مروجات هذا النوع من الغناء الذي يدعو لممارسات ومعاني دخيلة وخطيرة على المجتمع.
* النموذج الذي يجسد هذا الخطر هى الفنانة «زينب بشتنة» وهم اسم حركي اطلقناه انا وصديقي اللواء عثمان سر الختم على هذه الفنانة الوهمية التي يوجد مثلها الكثيرات في عالم الغناء والرقص- يقول صديقي عثمان ان هذه الفنانة تأتي للحفلة لابسة كويس جداً ومحتشمة ومعها كيس نايلو وبعد الرقيص ما يسخن وفي نهاية الحفلة تختفي الحشمة وتظهر حاجات تانية حامياني كما يقول الاستاذ البوني ، الفنانة «بشتنة» تتميز بانها تجلبط «وشها» بالكريمات واصبحت من فوق هندية ومن «تحت كاكاوية» وهى معجبة جداً بالفنان الذري
(هناية.... بت) وتقلده في الاغنية الموضه (كلام في كلام).
* المثال الثاني للغناء الهابط اغنية الشمار الكتل الحمار وهى أغنية تكرس للهجرة وعدم الانتماء للوطن:
شمار كتير انا تاني ما بجي بالحلة ديك انا تاني ما بجي
افارق الخرطوم الحر والسموم أنا تاني ما بجي
في لندن بحوم انا تاني ما بجي
افارق السودان.. انا تاني ما بجي
الحب والحنان.. انا تاني ما بجي
حليل خوة زمان.. انا تاني ما بجي
غير امي وابوي... انا تاني ما بجي
خالي واخوي.. انا تاني ما بجي
شنطتي وعفوي... انا تاني ما بجي
* المثال الثالث وهو اكثر الاغنيات ركاكة فيها دعوة للزواج بطريقة ليس فيها كرامة للمرأة ومعاني خطيرة.
بالضرا ان شاء الله راجل مره
جاياك وجايه افتو معاك يا ابوشرا
بختي وان شاء الله راجل اختي يا ابو شرا
* المثال الرابع اغنية حنانة والخوه بقت عفانة
حنانة ونسى اهله ما نسانا
دق الباب وجانا وانا جريت ليه حفيانة
ما قاصده الخيانة دايره يقيل معانا
حنانة والخوة بقت عفانة
الخاينة جارتنا تأكل في صحانتنا
جار الزمن وغدرتنا وللآخرة ودتنا نسى اهله ما نسانا
قالوا امه مجنونة بريدة واريد جنونه
ما بسيب حبيبي لو جاب الحكومة نسى اهله ما نسانا
ركبني عربيته وعرفني بي بته
راجل مره وانا قبلته نسى اهله وما نسانا
دق الباب وجري وانا جريت بي ورا
كنت قايلاه حبيبي لقيته راجل مره نسى اهله ما نسانا
ركبني دفاره وعرفني بي حاله
انا ما فاضية لي شماره نسى اهله ما نسانا
النماذج كثيرة وخطيره وتدعو للوقفة والتأمل والكرة في ملعب المثقفات في بلادنا والمطلوب منهن محاربة هذه الظواهر والاغاني الهابطة في مجتمع النساء ويا حليل زمن غناء البنات الجد جد وهن يتغنين للعريس المنتظر:
سايق العظمة سافر خلاني وين
يا الماشي لباريس جيب لي معاك عريس
شرطاً يكون لبيس من هيئة التدريس
يا الماشي لام درمان جيب لي معاك فستان
شرطاً يكون سيتان زي خدك النديان وسافر
* واغنية الليلة وين لي وين يا عيني انا
عجبوني كالوا العين يا عيني انا
بتغنيلو بت عباس يا عيني انا
في القهوة ما جلاس يا عيني انا
في الكورة ما خد الكأس يا عيني انا
بتغنيلو بت خالو يا عيني انا
بتشكر افعالو ياعيني انا
طبق الحمل شالو يا عيني انا.
يومياتي وراي الشخصي قرات للشفت هذا الحديث :
(( فى رأيي بناتنا السودانيات يستاهلن راغب علامة يقول فيهن اكتر من كدا! ))
ونسة اخيرة :
* الخرطوم ضاااااقت:
يا كافي البلاء الزول الخطط الخرطوم زمان عملها على قدر الناس والعربات الفيها والليلة قصاد كل عربية زمان مئة عربية. والاستيراد لسه شغال. ولو داير تمشي مشوار لو ركبت امجاد ووب ولو ركبت حافلة ووبين.. يعني الواحد «لاقدر الله» كان رطب ما يشتري ليهو عربية ولا شنو يعني؟
* الخرطوم والشخبتة:
دي بلد كلها مشخبتة بالاعلانات.. شئ حلويات وشئ لساتك.. وشئ معجون.. وشئ... عووووك القيامة قايمة. واليوم داك لاقتني لافتة بها صورة أحد المسؤولين الكبااااار بالدولة فوقفت أبحث جاهداً في هذه اللافتة عسى أن أجد في ذيل اللافتة العبارة الشهيرة «منتج آخر من ...»
* الخرطوم والجفا:
ناس الخرطوم جافيين ما زي ناس الريف اليوم داك واحد اتوفي الى رحمة مولاه بس الجماعة كوركو كده وسكتوا بعد شوية جابو ليك كراسي «أفراح الشمالية» وهاك يا القرقراب ويوم يومين انتهى حرّم في بلدنا ناس الحلة يواسوا أهل المتوفى وينوموا معاهم على الجابره ويشاركوهم أحزانهم أسبوعين بالتمام.
* خرطوم ..روتانا
واحد شاف السوق العربي قبل «15» سنة وجاء شافو اليومين دي.. ولما سألوه عن الفرق رد بكل بساطة: زمان السوق العربي كان تلفزيون السودان والليلة روتانا سينما! ومش حا تقدر تغمض عينيك.!!
* من ود مدني سلام
ودمدني مدينة جميلة وعريقة وما عندنا فيها كلام بس في مدخلها مكتوب على صيغة التحتيم والالزام انت الآن في ودمدني «ابتسم من فضلك» طيب يا ناس مدني ياحلووين الزول لو جاي يشيل فاتحة يعمل شنووو؟
هذا مع أنبل الود والاحترام
قراءات لعمك تنقو
