يبدو العنوان غير مفهوم
بس المعنى أنه الحرف والكلمة لم تطلع من بين اياديك لازم تكون صادق في كتابته ودي مسؤولية كثير مننا بتجاهلا ولا عامل نفسه ما عارف حاجة ، يعني الكلمة لمن تجي تكتبه لا زم تراجع دقته ومراجعته منك شيء أساسي ، ما تدخل كلام غيرك على كلامك ده شيء غير محترم منك لازم الكلام يكون إما منك ولا تقول بصراحة ده ما كلامي ولا أنا عدلت فيه ولا مضاف عليه من طرفي .. عشان ما يكون الكلام مجهجه والواحد ما عارف هو بيقرأ في شنو ولا حتى تلقى بداية النص بالفصحى الماممكن تدخل عليها دارجي وتجي ( تخرم ) بالدارجي ،، أصلو الكلام ده ما معقول .. بتضعف النص وبتطلعو من سلك المعقول ماله كلمة منقووووووووووووول فيها إعتراف بالدقة في النقل .. وبنشجع على النقل الهادف ،، وانته لا زم تحاول الكتابة أخطى وصيب والمرتادين للمنتدى عارفين انك بتحاول تطور كتابته هنا بلحقوك ويساندوك عشان تطلع كتابتك بالصورة النهائية تحفه فنية جميلة تفخر بيها ونفخر بيها نحن .. واما توجيه النص يعني اختيار الموضوع لازم يكون مناسب للمستمع ( يعني القارئ ) وما تشدد على القافية في الكتابة الأدبية يعني إنته ما بتكتب شعر .. النص المقفى شيئ جميل واحتراف نتمنى مشاهدته في منتدياتنا بشكل مرتب .. أما الإستعارة سواء نصية أو كلامية لازم تكون واضحة بشكل غير مخل يعني ممكن تميزة بلون ولا تفرزة براها المهم تكون واضحة للقارئ إحنا ما عاوزين نشرح آداب الكتابة يعني قريناها زمان في مادة الأدب والنصوص وفينا من درس دراسة وافية عن الثقافة وتنوعه ... وبرضو البلاغة والنقد ... وكل المواد الثقافية بتنوع مصادرها .. المهم ثقف نفسك شوف الناس بتكتب كيف وكيف قوة الحرف واستخدامة عند الكتاب الكبار وكيف يوظف الحرف على الشكل المطلوب في النص ... وترتيب الأحداث طبعا مهم .. ده كلو عشان تسلم من الإحراج وبالتالي لمن تكثر أخطاءك وتكون غير متناسقة شيء أكيد عزوف القارء على متابعت كتاباتك لأنه بحس ( بجوطة وزحمة ) عند ما يقرأ نصك .. فيترك النص ولا يفكر يرجع تاني بالتالي كتابتك ما حيكون ليها معنى .. ولو عايز تقيم كتابتك شوف الناس العلقت على الكلام مشرفين ونسبة التعليق ولو الموضوع ما كسب على الأقل تعليقين أدبيين راجع ملفات كتابتك واسلوبك طوالي .. لأنه معناها الموضوع ما شدة زول لقرايته .. وخليك من التعليقات المحرجة ليك يعني تعلق على موضوع برد غير منطقي أو أنته جاهل بيه أكيد ما حتقدر على الردود الجاية ليك من كاتب الموضوع ولا من الأعضاء يعني خليك قد الكلمة الطالعة من بين يديك .. وانا أسي بعتزر لأني كتبته بالدارجي المنظم ...
وسامحونا وبنستنى أضافاتكم على الموضوع والتعليق حر للجميع
وده راي شخصي ودمتم
