مناكفات اولاد مدنى واولاد الخرطوم

مدنى حبيبه لكل اهل السودان فهى العاصمه السابقه وام المثقفين والسياسيين والفنانيين والرياصيين يكفى انها شهدت مولد فكره (مؤتمر الخرييجين) الذى مهد لاستقلال السودان ..فهى الجمال والوعى والنبع الدينى بشيوخها العارفين بالله فهى مدينه تحتاج الى مجلدات للكتابه عن تاريخها ورجالها لذلك تلاحظ بسهوله تاثير هذا الارث على على (شخصيه ) اهلها ......وبين (اولاد الخرطوم) و (اولاد مدنى ) مناكفات جمليه فجمهور مدنى الرياضى جهمور ذواق وعنيد كثير ماعانت منه فرق الخرطوم واتذكر انا كنت دايما بشيل هم لامن (المريخ ) يلعب فى مدنى ودايما (برالمة) مدنى فى الجامعه (شفوت) مابترلموا لينا اصلو وفى الدورات المدرسيه كانوا بقيفوا لينا فى حلقنا ..... ولامن (نطقطق ) فريق من مدنى كنا (بنجرس) اولاد مدنى اصحابنا ونسوى ليهم (الحومبى) بمناسبه (الحوم بى ) دى قالها الاستاذ الكبير / محمود ابوالعزائم وهو يؤرخ للفنان الراحل / حسن عطيه وعن طريقه اداءه للغناء الذى تفرد بها الراحل المقيم والاستاذ /ابوالعزائم ارخ للتاريخ الاجتماعى لمدينة ود مدنى بتوثيقه/لسيرة حياة الفنان الكبير /الكاشف ابن مدنى اظنه كان تحت اسم (ابوالعزائم ينقب فى سحارة الكاشف) ارجو التصحيح لانى باكتب من الذاكره ...بالمناسبه الممثل المصرى السودانى ابراهيم خان من مدنى ....وكده.

شكرا الزين علي حبك لمدني اتمني تكون زرت مدني ؛ فعلا كلنا بنحب السودان ومدني قلب السودان النابض معليش اذا كنا متعصبين شويه في حبنا لمدني لاتواخذنا لان كل واحد من مدني مخلوق من ترابها
لكلامك الجميل اهديك هذه الورده

شكرا يا الزين، وكتاب محمود ابو العزائم اسمو تقريبا (من سحارة الكاشف)
وناس مدني يبادلوك المشاعر الطيبة دي، ولأنهم بيحبوا مدني وبيحبوا بعضهم، فهم بيحبوا كل من يحب مدني، وعلى فكرة، كتير من الناس (سواء سودانيين او غير سودانيين) عاشوا فترة في مدني فأصبحوا مدنيين ، وبيحبوا مدني زي اهلها او اكتر، السر في ده شنو؟ ما عارف!!

بسم الله الرحمن الرحيم
السلام عليكم ورحمة الله تعالى وبركاته
تعرف يا الزين اي زول اقام في مدني او درس بها او حتى زارها لابد ان يقع في حبها ......

http://www.asmilies.com/smiliespic/FAWASEL/024.gif

وصحيح كلامك هناك مناكفات كثيره جدا بين اولاد مدني واولاد اي منطقة ثانيه في السودان . وبشوفونا نحن بنبالغ في حب مدني وبنعظمها وبنديها اكثر من حقها .... يعني متعصبين ليها شديد.

http://www.asmilies.com/smiliespic/FAWASEL/024.gif

فنحن نعشق مدني حتى الوله .....
لك تحياتي اخي الزين وتحيات كل ابناء مدني واهلا بك ابناً من ابناء هذه المدينة الرائعه ...

من قلبى بدعيلك يارايق يازين ........ لانملك إلا أن نبادلك الحب فمدينتنا الحبيبة ملك مشاع لكل عاشق وهى انموذج مصغر للسودان الذى نرومه ، فمرحباً بك وأنت الأولى بمدنى من مواطنيها لأنها اختيارك الواعى غير المرتبط بجغرافيا أو تاريخ ، أما مسألة الخوف على المريخ حين ينازل فرق مدنى فكلنا فى الهم شرق .
مرة أخرى مرحب بيك وماك غريب الدار .

ود الماذون

مرحب بالزين وذكرتني بالمناكفات دي ونحنا في المتوسطه ايام معرض الخرطوم الدولي من البص ادخل الخرطوم اشبكونا ليك ( في الجزيره نزرع قطنا............. الخ) وطبعا الوكت داك بصات الجزيره ويا حليلها يالزين

شكرا لك الاخ الزين و لموضوعك الذى يزكرنا بايام جميلة و يعرفنا بمدى حبنا لمدينتنا مدنى و طبعا فى الغربة الناس بتتكاتف و الكل حسب مدينته او ماشايه ذلك و صراحة كانا اكثر الناس تعصبا و كان ندنا التقليدى ابناء ام درمان و كان اغلب صحبتى منهم و حتى الان و بالمناسبة هناك رابط غريب بيننا يعنى احتمال يكون من شكل ارتباط الاسر الكبيرة فى مدنى و امدرمان و الله اعلم

عموما يعطيك العافية يا الزين الزين ..

أخونا الزين .........
بعد الترحيب والذى منو نتوقع مشاركاتك معنا بالمنتدى وبلاش حركات ضيوف يللا أرفع كباية العصير واجغما مرة واحدة بلاش حركات ضيوف بين الجغمة والجغمة " تستطيل حوائط " ، وبعدين ماعندنا مقاسك عشان نديك جلابية وتفك التشنيطة الخانقاك دى .
يللا يازين البيت بيتك............
ود الماذون

أخونا الزين :
شكرا جزيلا وأهلا بك بيننا ، نحنا أولاد مدنى متميزين ، وفعلا وأذكر تماما أيام الدراسة بالجامعة الإسلامية ، فرابطة أبناء مدنى كانت متميزة فى كل برامجها مما جعل بقية الروابط تحذو حذوها ، أيضا أبناء مدنى متميزين فى كل مكان، فأنا كنت بالسعودية ومكثت بمدينة الرياض ثلاث سنوات ،فأبناء مدنى متميزين فأذكر شارع غبيرة العام المشهور بتواجد السودانيين وأبناء مدنى كانوا هناك وجودا ،فإذا أردت أن تبحث عن أحد من أبناء مدنى فما عليك إلا أن تذهب إلى شارع غبيرة وتسأل أى أحد من أبناء مدنى فسوف تجد عنوانا كاملا .
ولك شكرى وتقديرى ،،،
أخوك أنور محمد _ عووضة - شركة مصفاة الخرطوم

خرج الزين ولم يعد ؟ ؟ ؟ ؟

أينما كنت أيها الزين لك منى التحية..
مدنى / الخرطوم زى هلال مريخ..
أتذكر عندما كنت صبيا كانت لى عركة مع صبى خرطومى..كان يصر ان الشارع اسمو "شارع الخرطوم مدنى" وكنت أصر بأن أسمه "شارع مدنى الخرطوم" وفطنت بعدها هو الأصح فقد كنا بالخرطوم ويبدأ تسمية الشارع من حيث نوجد.

مشكور اخ الزين رجعت بى الى زمن جميل .. جميل وهو فتره دراستى بالهند .... فكانت تجمعات ومحبه اولاد مدنى لا توجد فى اى رابطه اخرى ... رابطه ابناء ود مدنى تعتبر تانى الروابط اللى قامت فى الهند بعد رابطه ابناء النوبه ومن بعدها انتهجت بقيه الروابط نهجنا وامتدت لاكثر من 15 رابطه ... وللمحبه اللى بينا فلم نسميها رابطه واسميناها ... اسره ابناء مدنى.... من النادر جدا ان تجد شخص من ابناء مدنى يسكن مع اى شخص من مدينه تانيه .. الكل متحد ... حتى طلعت فينا مقوله معروفه من بقيه الروابط تقول ان اولاد مدنى عنصريين ... وكنا دائما نقول لهم بان تلك ليست بعنصريه وانما فقط المحبه اللى بينا وبين ابناء المدينه الواحده هى اللى تجمعنا ... حتى فى دورى الروابط كانت مدنى تمتاز بتيم مميز من امهر اللعيبه .
اسال الله ان يديم المحبه بين ابناء مدنى .... ودمتم

دائما هي الاشياء القديمة معتقه و جميلة
و دائما ما تسعدني الدفاتر القديمة و أقلب فيها و أحس بشوي
و أستغرب كثيرا كيف كتبت هذا
و الاجمل إن إجتمع القديم مع الجديد

انا وصديقى الضيف الخرطومى

فى اواخر الثمنينات زارنا فى مدنى اخ خرطومى وكنت لااعرفه من قبل وكانت فى مباراه اهلى مريخ بنفس اليوم والراجل مريخابى متعصب ومشينا الكوره مع بعض ولم نجد كراسى فادخلونا الميدان وجلسنا على الارض مع الخط واخونا كان منفعل جدا وكان تشجيعه فيه الفاظ صعبه وبعد ربع ساعه قلت اهديه فقلت ليه ياخى نحن فى مدنى غير متحيزين وبنشجع اللعب الجميل سمع كلامى ولكن لم ياثر فيه وبعد شويه بدا فريق المريخ يحسن لعبه وانقلب التشجيع للمريخ فتفاجا اخونا والتفت الى وقال والله فعلا ناس مدنى بتمتعوا بالكره افضل مننا وبشجعوا اللعب الجميل بون تحيز ....

ما بين عطبرة ومدنى

مالو اعياه النضال بدنى

وروحى ليه مشتاقة لى مدنى !!

مدنى ؛ وما ادراك ما مدنى ؛ لمن ولد ونشأ وترعرع فى عطبرة ؛ ولم يزر هذه المدينة الجميلة والرائعة فى حياته الى الآن – كشخصى - ؛ وان كان فى الروح شوق لا ينضب لهذه المدينة ؛ ذات الوجود المركزى فى حاضر وقلب وشعور كل سودانى ؛ وان لم يسعفه الحظ بزيارتها .

فى عطبره لنا احساس خاص بمدنى ؛ واذا كان فى كلامى الكثير من العمومية او روح المبالغة –حيث يختلف الناس فى مشاعرهم -؛ فعلى الاقل فان هذا احساسى واحساس الكثيرين من اصدقائى .. اننا نعشق هذ المدينة ونفخر بها . قد لا نعرفها الكفاية ؛ لا نعرف مثلا حى دردق ؛ او لا نعرف شخصياتها الفولكلورية المتارجحة ما بين الحقيقة والاسطورة – لكل مدينة فى السودان مثل هذه الشخصيات ؛ عطبرة لها مكلية وابو جنزير- محمد عوارة - ؛ او غيرها من التفاصيل. ولكننا نعرف انها بحق عاصمة للابداع والثقافة والفكر ؛ منها خرجت فكرة مؤتمر الخريجين ؛ ومنها خرج ابو عركى ومحمد الامين ؛ ومن تلفزيونها "الريفى " ترعرعنا ونحن نشْ لم نشب عن الطوق ؛ على واحد من انجح وارقى البرامج الثقافية حينها ؛ "فى محراب الآداب والفنون" .

وهكذا ؛ بالنسبة لنا نحن ابناء مدن " الاقاليم " ؛ لا تشكل لنا مدنى منافسا ؛ وانما هى بمثابة الاخت النديدة لنا . وفى الحقيقة ما بين عطبرة ومدنى الكثير من اوجه الشبه ؛ من الاسهام فى التاريخ الوطنى ؛ ومن سكانها ذوى الجاذبية والتفرد ؛ ومن المبادرة فى النشاط الفكرى والثقافى ؛ ومن المنافسة ؛ الناجحة مرات والفاشلة مرات ؛ مع العاصمة الخرطومية بكل بهرجها وامكانياتها ؛ والتى غيبت فى الكثير من المجالات ؛ ليس فقط الآلاف من قرى وحواضر السودان ؛ بل وسعت – بسياسة رسمية – الى طمس معالم مدننا الرئيسية . فى ذلك اقول بحق وفخر ؛ ان مدنى قد مثلتنا ولا تزال تمثلنا خير تمثيل ؛ نحن ابناء المدن اللا عاصمية .

فى عطبرة نسمع الكثير عن تعصب بنات وابناء مدنى لمدينتهم ؛ وان كنا نرى فى هذا القول الكثير من المبالغة . وذلك لاننا نؤمن بان من لا يعشق مكان ميلاده ونشئته ؛ لا يمكن ان يعشق وطنه الكبير . اننا نرحب من كل قلبنا بهذه الروح من الوطنية المحلية ؛ ونرى فيها عاملا ايجابيا ؛ طالما لم تحجب الافق عن معرفة وحب الوطن فى مجمله ؛ والشعب فى عمومه ؛ والانسانية فى كليتها ؛ والكون فى تفرده وتعدده .

اننى فى نهاية هذه الخاطرة ؛ لا املك الا ان اشكر القائمين على موقع مدنى بالشبكة العالمية ؛ على جهدهم المتميز والمقدر ؛ لتقريب صورة هذه المدينة الجميلة والانيقة والفتية ؛ ليس لابنائها فى المهجر فقط ؛ او لعموم السودانيين ؛ وانما لكل من يملك منفذا على شبكة الانترنت ؛ فلهم منا الشكر العميق ؛ وعلى راسهم الاخ العزيز بكرى ؛ ولا املك فى النهاية الا ان اردد التساؤل مع العملاقين ؛ خليل فرح وود الامين :

مالو اعياه النضال بدنى

وروحى ليه مشتاقة لى مدنى !!


عادل محمد عبد العاطى
مؤسس موقع عطبرة بالشبكة العالمية

يا سلام مدني وكفى

مدني البداية وانهاية

كلم جل الاحترااااااام