غير عاجل بالبريد الزاجل، من عمدة المطامير
بسم الله الرحمن الرحيم
من عمدة حلة المطامير ريفي شنب الباعوضة ، كتب بواسطة عبيدالله ود الحرم
بريد البندر ، ومنه ـ بارك الله فيهو ـ إلى جنا المطامير ، ، ، ،
جنا المطامير، بعد تحية الاسلام،،،
سمعنا انك اتمردت علي كبيرك وضهرك ومقدمك (شبارقة) ، وعصيت كلامو ، وانا وصيتك قبال ما تمشي البندر و قلت ليك ـ المخالف بياخدنو الزوالف ـ وانت شكلك باريت جنيات البندر وسمعت حديثم ، دحين والله ـ أقلب الصفحة آ عبيدالله ودالحرم ـ والله و والله وما طالبني حليفة ، ما تمسك الدرب العديل علا أجيبك علي قدومك واسرحك بالبهايم تاني، وبت عمك مدنية دي قول ليها اسمعي كلام أخوك شبارقة، ولاّ والله برضو أجيبا المطامير تلقط الويكة وتحش قش الغنم ،، والسلام ،،،
ملحوظات من عبيد الله ود الحرم (ابوي العمدة يسمو في القراية عشان كده قلت أسلم عليك من غير ما يعرف):
ازيك آ جنا المطامير ، والله حواء ست المريسة مما مشيت من الحلة قفلت الانداية وخسرت خسارة بياع القرع ، وكلم مدنية قول ليها الويكة غلت غلا في الحلة مما ادرعت البنادر، والصناديق ماشة زي السيف ... ابوك العمدة ركب دش ومصنقر في روتانا سينما وميلودي أفلام النهار جت.
في وداعة الله ..
