الطيش في المدرسة بلبّعوهو بالبراطيش . . و الطيش في الجامع بسرقو منو براطيشو . . و الشفع يضحكوا عليهو . . و يقعدوا يكوركوا وييييييييييييييو العوير سرقو نعلاتو . . وحات جدي دا غدب ساكت . . هسي القيامة فضل فيها شنو ؟؟؟ . . الزول كان الله هداهو و مشى لي بيت الله . . يطلع منو حفيان و معشكب . . و بعدين زول ساكت يواسيهو و الا يعصر ليهو شيء في يدو ما يلقى . . يعني هسع نصلي و الا نحرس نعلاتنا؟؟؟ . . و ما غايظني شيء عيلا اللافتة المدقوقة . . احترسوا من حرامية النعلات . . نان انتو كان عارفين الحرامية ديل . . سايبنهن يسرقونا لي شنو؟؟؟ . . كان تقولوا لينا تعالوا حفيانين . . و حات أبوي بنجي حفيانين . . مش أحسن ما يسرقونا؟؟؟ . . و بعدين بدل اللافتة دي . . أكتبوا لينا . . الدخول للمسجد للحفايا فقت . . الما حفيان و عندو قروش محرقاهو بظروفو . . يمشي يصلي في الراكوبة البرة ديك . . عشان المساخيت ديل يقنعوا مننا . . أم سلمة الله يخليها لي و يديها الفي مرادها . . قدر ما تشوفني جاي من الجامع حفيان . . تعوج لي و ترقص لي في قدوما و تلولح لي في يدينها . . . . تاني سرقوك يا الكاااااااااااشف؟؟؟ . . آآآآآآي سرقوني انتي مالك و مالي . . هن السرقوهن شوية؟؟؟ . . و بقت وكتين أجي أمشي الجامع تقعد تشحد لي في الله . . يا فيفيد اتوكل علي الله . . الله يغتي عليك من الكيزان و أصحاب البطون الناطات . . و من أمات عيون طايرات . . و حرامية النعلات . . و كلب بخيتة أب جعبات . . قول آآآمين يا فيفيد . . زمان كنت بضحك في الدراويش البمشوا حفيانين في الرماضة . . و أقول ما عندهم حق السفنجة . . أصحابي قالوا لي يا فيفيد . . ديل متغشفين و طلقوا الدنيا طلاق تلاتة . . لكن هسع بعد الغدب الوقع فوق أمة سيدنا محمد دا . . بقيت أقول في سري الجماعة ديل ظنيتن إتلحسوا ذي لحستي . . و ضاقوا الضقتو . . غايتو الواحد فينا بقى كان الله ليّن قلبو و مشى الجامع يصلي . . يصلي صلاة الفزع . . خوفاً على براطيشه . . عين في محل السجود . . و العين التانية في المحل الراكن فوقو نعلاتو . . عاد دي حالة دي؟؟؟ . . ما قلت ليكن دا غدب ساكت . . زمان كنا بنلوم في الكيزان . . ينضموا في الدين نضمي سمح خلاس . . لكن من الدين يصل مصالحهم يقعدوا يلولوا فوقو . . هسي بقينا زي الكيزان واحد . . عين في الجامع و عين في المصالح خارج الجامع . . داك الليلة شلت سفنجتي و مشيت الجامع . . الجامع فوقو بابين . . ملصت سفنجتي . . ختيت فردة سفنجة جمب الباب الكبير . . و غتيتا بي مركوب واحد غرابي . . و الفردة التانية ملصتها جمب الباب السغير . . برضو غتيتا بي مركوب واحد غرابي . . و دخلت الجامع . . بعد جيت مارق من الجامع . . لقيت مركوب الغرابي و ما لقيت سفنجتي . . رفعت مركوب الغراب لقيت الما بتسموا ديل . . ختّوا لي سفنجة معفّصة . . جريت الباب السغير لقيت أخت الفردة المعفّصة مهجورة بي مركوب الغرابي . . و سفنجتي ببح . . عليكن الله شفتوا ليكن ناس زي جنس الجماعة ديل ؟؟؟ مش أحسن نصلي تحت الراكوبة؟؟؟ . . تاني جاتني فكرة . . جبت لي موس و علبة كبريت . . و مشيت الجامع . . اتفنت في خشم باب الجامع . . و قطعت نخرت سفنجتي . . و ختيتها في جيبي . . و دخلت صليت . . جيت طالع . . لقيت سفنجتي قاعدة في حتها . . اتكيفت جنس كيف . . لامن طرت صقرية . . من فكرتي القردية . . مرقت علبة الكبريت من جيبي . . و تشيت بيها نخرة السفنجة المقطوعة . . و لحمتها زي ما كانت . . و مشيت البيت . . أم سلمة شافتني لوت لي قدومها و قالت لي . . سرقووووووق يا الكااااااااااااشف؟؟؟ . . قلت ليها وحات النبي الليلة المساخيت ديل سويت فيهن سوات العدو . . أم سلمة اتكيفت مني . . و من فكرتي القردية . . و لملمت لي نخرين السفنجات الفي البيت كلهن . . و بقت وكتين تشوفني اتوضأ تقول لي . . يا فيفيد . . ما تنسى تشيل معاك نخيرات السفنجة . . الظروف ما معروفة . . اليوم داك مشيت الجامع كالعادة . . ملصت سفنجتي . . و قطعت النخرة . . و دخلت صليت . . المساخيت ديل . . قلعوا سيور السفنجة حقتي و ركبوها في أرضية سفنجة حقت راجل عجوز . . و شالوا سيور سفنجة الراجل العجوز و ركبوها في الأرضية حقتي . . مرقت من الجامع . . احترتا . . نخرت سفنتي في جيبي . . نان سفنجتي دي مالها تنشاف بي نخرتا . . جاني راجل عجوز ناطي . . و دفرني رماني علي خشمي . . قال لي . . انتو البجيبكم الجامع شنو ما دام بتسرقوا . . اتشاكلتا في السفنجة مع العجوز . . قلت ليهو يا حاج دي سفنجتي و أنا كاتب فوقا خمسة بالانقليزي . . . . أمشي كدا قبل ما أنتحك بالعكاز دا أجيب أجلك . . قمت عصرت ضنبي و مشيت خطوتين . . لقيت أرضية سفنجتي لابسها واحد غليييييييد و ماكن . . و يتضرع بيها في نص الشارع . . كان فيني مروة كان لحقتو و فنقلتو و ركبت فوقو و قلعت سفنجتي . . لكن خليتو لي الله . . و حقي بخلسو منو يوم القيامة.
