وصية ام نجيضة لبنتها ردا على موضوع شبرقية

يا بت هوى افتحى عينك وابقى نجيضة وفالحة قدر ما اجى داخلة عليكم القاكى هى هى هى وكركركر و.قرقرقر تضحكى مع عبدالله دا...الراجل ما تضحكى ليهو كتير . يسعالني الله يحقر بك....الراجل اديهو العين الحمرا.... وان قدرتي لعند ايدك تلحقيها ليهو لحقيها...ابقي نجيضة.....أ ية..... زي امك.....الله بسعلني وقت ابوكي يقول حاجة تضحك.... امشي اتحشر في الاوضة واضحك زين واجي مارقة صارة وشي.....و بعدين اوعك ثم اوعك ثم ايضا اوعك... تقولي لو الجلابية دي سمحة والله العمه اللابسها دي سمحة... نفسو تقوم تعجبو يعرس فوقك.... وبعدين تشربي ما تروي....واكربي هو بالطلبات.... اوعي تخلي لك قرش يبيت في جيبو...واوعك تخليهو يشوف المسلسلات.... بيخربن الرجال.... وقت المسلسل داك.... شفتي جيبي فندكك...واقعدي دقي أي حاجة جنبو ويا ريت لوكانت شطة... والله كان عندك شافع بيرضع وجيعان وبيبكي خليهو في بكاءهو داك لمن المسلسل ينتهي....وبعدين ما يجي داخل يلقاكي تغني ......حتى ان بقيتي دايرة تغني.... اوعك من الغنا الخايس ناس حبيبي حبيبي.... امسكي في الغنا الحار...... زي البيجري نسيبتو و مرتو طلقانة......والله اندب حظي ام امالي...... والله دفاعنا الشعبي ياهو ديل.....والله النار ولعت بقلبي بطفيها..... اااااااااااي.... عشان تربي لو الزلعة .....والخلعة....بس اوعك تغني لو الليلة يوم الرجال.... بيقوم يصدق و يتحنفش فوقك ساكت........ واوعك تشكري لو حاجةجابها.... ان جاب لك لحم.... ختي ايدك فوق راسك...وقولي لو وب علي وب علي وب علي....غشوك وادوك الجلافيط.....وان جاب لك فتيل ريحة...اول ما تفتحيهو... وتشميهو.... طوالي كشري وقبلي غادي وابصقي..... وقول لي لو..... دا شنو يا عبدالله؟...... الريحةالمتل ريحةالفسيخ دي جايبها من وين؟......غايتو انت مغستك تقد.......

وان جنك نسوان والله بنات....ما تخليهو يقعد وسطن....ويتونس.... طيريهو من البيت....وان ابى يمرق... قدرمايقولو نكته والله يخفف دمو قدامن صري ليهو وشيك.... وقول لي لو انت يا عبد الله ما عندك غير النكتة دي؟ يا خي عملت لنا بها وجع... وش......اصلهم الرجال عارفاهم... الواحد فيهم من يشوف لو لمت بنات يقعد يخفف في دمو ويعمل فيها ودنفاش.....وتلقيهو يضحك بلا سبب... حتى ان واحدة قحت ساكت ... يقعد يضحك ويصفق اديهو....واوعك تخليهو معاهن وتدخلي المطبخ تسوي لك شربات...... وحات الله بنات الزمن دا ان غفلت من راجلك دقيقة بس تلقيها عرستو

لو دي وصية ام لي بتها
فبتبقي مشكله
الراجل ما بي نفس الفكره دي بالعكس في حاجات بسيطه بتخليو اسعد زول
والوصيه دي والله الا من ام ما دايره تعرس لي بتها
الزواج تفاهم تقارب اندماج تنازل عشره حلوه موده الفه
انتي الام دي راجلا مضوقه المغصه ولا شنو
بعدين الرجال ما واحد
زي ما ماكل البنات بنات

أختا .. بت النيل ..

والله دي خطة حرب عديل كده .. بس حلوه ..

ودايره تسمعي وصيتي .. أوعك تطبقي الخطه دي لأنها بتودي الأخرة أقصد بيت أبوك طواااالي

نحن في القرن العشرين ... وليس العصر الحجري ...

اقتباس:

---

حتى ان بقيتي دايرة تغني.... اوعك من الغنا الخايس ناس حبيبي حبيبي.... امسكي في الغنا الحار...... زي البيجري نسيبتو و مرتو طلقانة......

---

اخينا دا اديتي الحل من المصيبة
الختيتيو فيها
بتنازل عن كل الرجالة وبجر
عشان يرتاح من البلوة العندو

اخواتي النواعم ايكن ثم ايكن وكمان ايكن
وهذه الوصية

الكترااااااااااااااااااااااااااااااااااااابة ،

دي وصية ابليس نجيض وخراب بيوت ساااااااااااكت يا سلك ،

احسن ليك تغيري الخطة وتشوفي ال بي بلان!!

غايتو الخطط عندك يا بت النيل

همسة : انت يامجدي لسة في القرن العشرين ؟؟؟:eek: ما لك ما جيت معانا للقرن الواحد وعشرين ;)

[FONT="Arial Black":eek: ]دى خطة جهنمية بس كان طبقنها نمشي بيوت اهلنا ساكت:D [/FONT]

اقتباس:

---

المشاركة الأصلية كتبت بواسطة مدنيّة

غايتو الخطط عندك يا بت النيل

همسة : انت يامجدي لسة في القرن العشرين ؟؟؟:eek: ما لك ما جيت معانا للقرن الواحد وعشرين ;)

---

والله يامدنية بالغتوا عديييييييييييييييييييييييل كده :confused:

تمشو براكم وما تسوقوني معاكم ... ياخي ما كان تنتظروني شويه :mad:

بس الواحد ما تشيلو نومه يصحي يلقاكم ما فيشين ::mad:

والدنيا إتغيرت ::D

يابت النيل
في زمن الفضائيات والإنترنت
وعالم الماسنجرات والمنتديات
والجوالات وتكنولوجيا الأقمار
الصناعية ، الوصية دي إلا
تعملوها محاية سااااااااكت.
ويابناااات هووي أعمل حسابكن
ولو باريتن الكلام دا بضيعن
سااااااااااااااااااااكت وتقولي
يا ريت اللي جرى ماكان.