أنا حأصف ليكم المغترب
هو طبعا ما اسمو المغترب أسمو ( المنتحر )
المنتحر اول مااجيه العقد او الاقامه بكون مبسوط لأنو خلاص حأطلع من السودان لى دوله جديده حأشوف وشوش جديده حيأكل اكل جديد وطبعا والاهم أنو حأصلح من وضعو المادى دى الفكره طبعا لأنو هدفو الاول داير اعرس
المهمه الثانيه ابدأ اعمل فى اجراءتو واكون مبسوط بتين اخلص عشان اسافر وبعد ما اخلص اسافر واول ما اوصل الامبساطه تزيد بالمبانى الشاهقه والناس الملمعين السمحين والبقالات العجيبه والمطاعم الفاخره لكن بعد ما اوصل لى كفيلو الحال اتغير وووووب الروووووووووووب كلو بطير ليه فى راسو الكفيل ابدأ اوريه طريقه سير الحياه فى البلد ( نار جهنم ) الدوام اكتر من 12 ساعه والراتب بستر الحال احسن من السودان
المنتحر اقول طيب احسن لى من السودان على الاقل حأسمن وابقى ناير والبس هدوم شديده وحأعرس اسمح بت فى الحى أكونو شباب الفريق المحلين كلهم قافلين عليها
وابدأالمنتحر فى حياة الغربه وتمر الشهور وبعد مرور الشهور تبدا الجرسه ....الحنين للوطن... والحنين للاهل... والحنين للشماره او الزوجه.... او الشله .... وابدأ اسمع فى الاغانى البتخلى الواحد ابكى وزمان اول ما جاء ما كان بفتح تلفزيون السودان كان مباريها قنوات افلام واغانى لكن بعد كدى أبدأ أفتش فى قناة النيل الازرق وتلفزيون السودان وهارمونى السودانيه وانتظر بالاخص برنامج ( ألو مرحبا ) و ( مراسى الشوق ) وابدا بالعياط والاتصالات ( ألحقونى ياأهلى أنا ما قادر اقعد اكتر من كدى ) ( انا داير اجى السودان اكلها معاكم بى بصله على الاقل بكون وسط اهلى ومبسوط وبالى مرتاح ) والاهل اردو ليه ( يا ولدى تجى السودان تعمل شنو ما فى شغل الناس قاعده عطاله خليك قبلك ) ما بعاينو لى نفسية المنتحر .
ومن المشاكل الاساسيه البتواجه المنتحر تجيك مشاكل تجديد الاقامه.... ومشاكل نقل الكفاله .... ومشاكل التزوير .... ويا ويل العندو شويت تزوير ...وتانى تجيك الاهانه والاستعباد .....
خلاصه الموضوع ياشباب وبالاخص ( مدنيه ) المغترب حالتو تحنن بعد ما اجى الغربه بلقى حالتوا بقت صعبه ورجوعو للوطن بقى صعب لأنو عندو التزامات ما يقدر أتخلى عنها لكن صدقا المغترب ربنا اكون فى عونو .وياريت تدعو ليه ربنا ارد غربتو عشان اكون وسطكم .
وانشاء الله اكون قدرته أوصف المغترب بصوره حقيقيه
