نويت أو قررت أني ما ح أكتب موضوع جديد....للاسباب الاتيه

صدقوني
ترددت...كثيرا قبل ان اعلن هذا القرار
وذلك
أولا: لاني ود امبارح في هذا المنتدي يعني لسه ما بقي عندي(زبائن)ولا شعبية...كبيرة(ولا صغيرة)فبالتالي حقو اصبر شوية
ثانيا: الناس ديل(.........بعض الاعزاء جدا ما قصروا معاه الود الاسمو صالح شرف ده.........)
ثالثا: تأكدت من معلومة ان ما يكتب(الود ذاتو)ليس مسار اهتمام علي ما يبدو...
دي دخلتنا في المشاكل النفسية(ومدد يا دكاترة علم النفس البشري)
رابعا: رابعا دي عشان اكثر بيها السطور سااااااااااااااااااااااكت


والاهم من ده كلو ...إن كل المواضيع الكتبها صاحب هذا القلم(أو الكي بورد)
كُتبت باستعجال نظرا لاني ادخل من جهاز خاص بالعمل(الاذاعة والتلفزيون)وبالتالي الزمن ما حقي ...
دي نشرة
وده موجز
ودي مفكرة
ود ربط علي الهواء
ود اذان
وده ختام المحطة
وده اعتذار الكهرباء قطعت


المهم قررت ما اكتب(اساسا ما مهم يبدو)
الا في حالة (علي طريقة جمع التواقيع لغرض معين) في حالة ان اقرأ كمية(محترمة كده من الردود)انشاء البوست في الاصل يلقي واحد يقراهو.....



وفي الانتظار
اقبع



اسمي ...
صااااااااااااااااااااالح

حبيبنا صااااااااااااااااالح

تبعا الد علي وزن المد !!
تبعا ما فاهم حاجة
المهم يا اخوي
مافي داعي للمشاكل النفسية
يعني الشغلة ما مستاهلة
والدنيا ما ناقصة
روق اللعب
زي ما بتقولوا في التلفزيون
وخلوا الكورة واطة
ونلعب لعبة حلوة
وبالمناسبة انا نازل قريب
اجازة السودان ويا ريت
اقابلك ولو امكن ترسل
لي رقم جوالك ...

دمـــــــــــــــــــــت ،،

عمي العزيز //صالح
انا واحد من الذين اعجبت بكتاباتك الجميله ولاداعي للزعل في كم اصبر شويه والمكنه دي بتفتح هي اصلا الانجكترات بتاعته تعبانه حبه عايزة معايره لذلك لابد من المسارقه لكي نصل بها الي بر الامان وبكم نصل الي بر الامان .
وابقي مواصل ونحن نشد من ازرك وكلماتك جميله زي جمال جياتك عشان كده ماتحرمنا جمال جياتك .
ابن اخوك الشوربجي

الاخ صاح شرف بعد التجربة

ليست بفكرة راجع نفسك او مرة ومرة وفي البداية كان لي تقريبا نفس الشعور ولكن مع الايام اصبحت هذه الصفحات من اروع ملذاتي بمجرد النظر لما هو مطروح او كل اشوف او ادعو عضو جديد اشعر بالفرحة وكل ما اسمع الحكمة اشعر بالسادة وكل ما ابعد اشعر بالشوق


الحياة لحظات أعزبها الحب واجملها اللقاء . كما هو الحال أصعبها الفراق .
وأملها الإنتظار .


ومازلت أنتظر لعل انتظاري يشفيني .

ياعمو براحة وروق المنقا
الناس ديل لذيذين وظريفين
وكل شي في اول صعب
كدي اتزكر اول مرة طلعت فيها علي الهواء
ماكنت خايف ... مافكرت انه الناس بكون ماعجبم شغلك
وهسه تلقي ناس الجزيرة كلهم بنتظروك
سيل الصبر وحبة حبة

انا بسالك سوال ماتزعل مني
انت بتكتب عشان الردود؟
انا متابعة مواضيعك كلها
بس مارديت عليها كلها
لانه في حاجات روعه الواحد مابعرف يرد كيف

ولو داير ردود من نوع يسلما وشكرا
بتلقي كتيييييييييييييييييييييييييييييييييييييير
بس الردود الفاهمة امكن تاخد حبة وقت
بس انت روق

واحد



أتنين



ثلاثة



ثلاثة ردود....
الشوربجي....(أنا عمك.... والله صالح ده محظوظ حظ)
سواح.....(ما تبطل الهملة وتعال بجاي....والله الحوش عندنا النوم فيهو براهو حكاية.... عظمة...وقمرة... وهواء بااااااااااااااااااااارد... وناس ترعاكا بعيونا)
واخيرا(اخيرا يمة اء الميلاد)عنوان احدي قصائدي....
التحلية...الشبرقية....
الشبرقة... هي التزين... واضفاء الجمال علي زينة البيت (القديم)البروش والاصباغ علي المناضد والحيطان برسم الاشكال المنمنة...
جملت الفكرة وتجملت بها العبارات....

أبقوا واصلونا ....نحن بيكم

عذراً أيتها المصائب فما أنا بالخانع أو المستكين ...انما هي استراحة مُحارب
اخي انت لاتكتب لااحد انما تكتب لنا جميعا ونحن نقراء ولكن يمكن مانقدر نرود لروعة ماتكتبون نحن معك حتي الثمالة ولاتفتر همتك ودمت عزيزي الغالي

أنا أدعوك يا صالح .. دعوة في شكل همسة مسموعة لمن أراد ان يملأ الدنيا أملاً .. وأن يزيح الهموم واليأس .. ويحول الكابوس الى حلم جميل .. وجنة خضراء .. وبيت شعر للمتنبئ ..
أحيانا تراودني فكرة أنّ أطباء النفس لديهم علاقة حميمة مع الشياطين .. فكلمّا وسوس الشيطان .. وجد اليأس مكان ، وامتلأت غرف الانتظار عند أطباء النفس بالهم والغثيان ،،، دعك من كل هذا واكتب فلنا في كتاباتك . شدو وصدى ولمعان ،،،

لا يا اخى صالح كله ولا النفسيات
نحن نقرا لك ولكن ربما احيانا لا ياتينا الرد بروعة كتاباتك
لكن لو مستنى الردود
ليك على
ودمت للمنتدى

الأليف .. صالح شرف ...

يا سيدي .. في البدء وقبل أن أخلع كل أقوالي أنوه إلى أني دلفت لهذا البوست

ليس من باب المجاملة أو التربيت على الكتف .. ويجوز أن أكون قد قلت برغم

تجربتي غير الناضجة في التعبير وبالرغم من أني لا زلت تلميذ مواظب بينكم هنا ..

إلا أني قلت أن الكتابة غسيل الروح .. والكتابة تحمل أنفاس كاتبها .. واللغة

ماعون إحساس والحروف مواعين معنى .. يعني يا أستاذ صالح اللغة ياها اللغة

والحروف ياها الحروف لكن كل واحد بعبيها بالمعاني حسب بصارتو وقدرتو ..

وأنا أجدك بك حرفنة قدير في تعبئة هذه المعاني .. وأشم رائحة أنفاس عتيقة

تتخلل مفردات كل ما كتبته هنا .. يعني يا صالح شرف أمسك زي النص بتاعك


أنا أمشي وين (نص شعري) والمطلع بدايتو بتقول فيه

أنا أمشي وين

لفيت كتير

في كل مكان بلقالي واحدة بتشبهك

يا ريت حياتي

حلم .. حلم

لمن خلاص


وإلى آخر النص .. آها يا صالح النص ده مليان مصداقية لما مدفق ..

ومليان صراحة مهذبة جداً .. ناهيك عن أنو يصادف وقعو في داخل ناس

سمحين كتار .. أنت أصلاً ما بتكون جايب ليهم خبر ..

أو مثلاً شوف زي النص بعنوان (موت صالح) برغم ما فيه إلا أنني وهذه

نظرتي الخاصة قد لامس مسمعي فيه صوت نوبة وحلقة صوفية عامرة وطعم

مفردات طالعة من قلب درويش غرق في حلقة ذكرو وغرق في لجة روحو

وأتدفق بعد كده كيفما أتفق ونقاء بصيرته ..

طيب يا أستاذنا .. صالح كل النصوص خليها بما فيها الـ (200) نص المتفاسل

بيهم علينا وقافل عليهم دفترك وقاعد تتمطقهم كل ما تلقى فرقة زمن يصادف

مزاجية عالية لديك وده موضوع تاني .. فقط ما وددت قوله أن هناك أشياء

لا تقل جمالاً زي موضوعك المعنون (سائق تاكسي) أنت طبعاً والله أعلم بتكون

متخيل أنك لوحدك القطعت مشوار نحو ذاكرتك لتخرج هذه اليوميات .. ولكن صدقني

كل من قرأها أيضاً بيكون قد تقاطع معك في طريق ذهابه نحو ذاكرته لاستحضار

ما قاله وهو في مشوار التاكسي .. ودي يا صالح سكلجة لذهنية القارئ بتحتاج

ليها لواحد حريف كتابة .. ده غير باقي الكتابات المصبوغة بنكهة خاصة زي

"الزمن جاء" و "طرق أكثر قوة على باب من له باب" و"ألم" و"حظي" والنص

الجميل "بعض ما تعلمناه" بالإضافة للنص العاجبني جداً وأنا داسيهو هدية

لصاحبي كاظم الزعيم .. لأنو النص ده فيهو نفس كاظم وبيشبهو كثير وكاظم ده

يا صالح كتاب كتابة ودرب حرفوا براهو وده كلام تاني أحتمال أكملوا معاك

على ناصية ذات النص في مكانه وقطع شك ريحة روعتو بتجيب لينا كاظم بهناك ..

وأخيرا .. لك مني يا صالح شرف .. الود والبهاء والألق ولك مني الندى وبحوزتي

لك عميم ود وهميم محبة .. أقول لك أن توقفت عن مواصلتنا هنا وإمتاعنا بما

تنثره يداك ستكون قد جنيت في حق نفسك وفي حق كل الذين يطالعون حروفك

وأنت يا صاحبي معك يراع متزن ومعتق بريحة خبرة وأصالة نحتاج أن نتعلمها

منك فهلا تستجيب ..

ناضر تحياتي .. وحياك الخالق وأبقاك ،،،

حباب صالح شرف
حباب الجانا
يابوى نحن لقيناك وين عشان نخليك تمشى مننا
ياحبيب والله نحن بنحب الناس
وخاصه الزيك ديل
هآ يازول انت حقنا تب
كدى تعال لى جوه من السخانه دى
بعدين لك على ..كما تلقى كل الحبان جوك
قول ودحسن كضاب ...

سوباااااااااااااااااااااااااااااااوي

اولا شد ما اعجبني وانا ممتثل لما قلت إحتراما لجميل كلامك
شد ما اعجبني...ذكرك لاخ واستاذ لي اسمه كاظم الزعيم...وانا ابن الجيران المتعب الذي يلتجء بكاظم لشرح(التحليلية)والبلاغة والنصوص... والمعلقة الشعرية...
كل ذلك وأكثر جعلني أقف مع نفسي لانظر هل انا مصيب فيما انوي فعله...
والنتيجة أني لاكون برفقة أمثالك(يا عظيم)باقٍ ولتسلم لاخيك ...
الصالح...
الذي وصفته بالدرويش...
ويصفه اصدقائه حبا فيه(أرجو أن أكون كما قالوا)بالشيخ ... وما انا بهذا ولا ذاك إنما انا واحد حياتو ملخبطة...
ومستني...باكر
كان يجي...
يمكن يجب الخير معاه


لك من دون الناس حبس واعزازي

ياكا زولا في الزمان ....
بحروه
وياكا
المن نشو كانو دايرين زينا ...يسعوه...
وليهو يملكوا ناصية كلامهم وحبهم....

يا ايها العالي في بهاء المودة

لك من صالح
الحب الاليف ... والاخوه الصادقة... والمحبة في الله


ودمت له...اخا كبيرا ...ورفيق درب ناصح نصوح

براقة
عجيبة التفصيل
انسانة
من عشقها التبجيل
شبارقاوية


الرد مني ... ومن من بجواري....اخي....الدرويش...
بالمناسبة انا سميتو ابو الدراويش....
باقي هو ابوهم صِح صحِ...
الدرويش يقرئك السلام...
وانا احيك...
وكلانا ندعو لك...
بما لا تسألي...
بل اتركيه دعوة خير طواها الغيب....



صاااااااااااااااااالح

جيفارا



سلام الكون كلو يغشاك

وتسلم لنا...بلغة اهلي...
ورجائي الا تحرمنا اخي الهمام...فارس النضم والكلام
من عباراتك
علي ما نكتب


صااااااالح
اخوك يا جيفارا

شكرا يا قامة
والدنيا منك ضي
شكرا يا حبيب...
الكل بعرفك خي..(أخ محتضن لاخوته)....


ما عارف صراحة بما ارد عليك
الرجاء امهلني بعض الوقت فعسي بسياحتي في الدنيا العريضة اجد ما يكفيك


صااااااااااااااالح...حتي الان (بس) يحييك

اولا النسب لي مدني ... مدنيّ...بس مدناوي ...دي حلوة عندنا بس يا اخي...

والله سررت جدا بما كتبت لاجل اخ لك حديث العهد بالمنتدي...
لك مني التحية والتجلة والود والشكر والعرفان ....
وكل ما تراه ينسب للمجد والعلا والسمو هو لك لخي ... ولست بمن ينسبك اليه
بل احقيتك به قبل ان ادخل انا المنتدي اصلا ....


شكرا يا سعادتك



صاااااااااااااااااااااااالح

أخى الحبيب صالح
لا لن نسمح ليك تسيبنا لأننا فى أمس الحوجه لقلمك الذى
يعطر الصفحات بحلو النغم وعبق ورود الخمائل
كلنا لبعض ويلا مع بعض نبنى جنتنا الجميله .

يا اخوي ما تزعل الزي كتير و انت احسن حالا انا زاتي زعلت و رسلت رسالة للمشرف لكن ما عبرني و لانني احببت هذا المنتدى واصلت فانت تحمد ربك العبروك و بعدين انت بتكلم و تكتب للعامة لكن اذا كنت تريد مخاطبة عضو اظن الشغلة متاحة ما عليك الا تحدد العضو وتراسلة و كان ما عمل ليك قبول شوف غيرو بس بلاش النفسيات عشان ما ناقصين يعني غربة و كمان نفسيات

يا اخوي صالح شرف لك العتبة حتي ترضي
انت اديب كبير وانا اعرفك منذ كونا في السني الثانوية وكنت انت المبدع دوما

دُم لنا اخا قامة0قامة دي ما عشان طويل)بس لانك حقيقي زول مافي منو اتنين....
اخو
...
ورفيق...
وصديق صدوق...
ود ناس...لمن غلط..
انا بحمد الله اني ممن حظاهم القدر بمعرفتك عن قُرب....


شكرا بقامتك ايها الرائع

حبيبنا
وصاحب السفر الطويل
المسافر(اولا حدد وُجهتك وتوكل علي الحي الدائم)باقي القعدوا قبلنا ما عملوا ولا حاجة...
السفر قالوا فيهو سبعة فؤائد...
عارفهن اظنك...
شكرا بعدد الخطاوي في رحلة سفرنا هذه...
ودمت
صاااااااااالح

ود المطامير
الفارس(البنفسجي ما يزعل)الخبير
والاخ الجدير
والزول الخطير
شكراً كتير

ودمت لي...
الباقين الله ليهم...
صااااالح

اقتباس:

---

المشاركة الأصلية كتبت بواسطة صالح شرف

دُم لنا اخا قامة0قامة دي ما عشان طويل)بس لانك حقيقي زول مافي منو اتنين....
اخو
...
ورفيق...
وصديق صدوق...
ود ناس...لمن غلط..
انا بحمد الله اني ممن حظاهم القدر بمعرفتك عن قُرب....


شكرا بقامتك ايها الرائع

---

اخي الخلوق صالح شرف شكرا لك كثيرا لقد جف قلمي من الحبر عندما قرا تلك الاحرف الجملية التي صعب عليها مجارتها
وشكرا و لكن معنا ذلك رجاء

اقتباس:

---

المشاركة الأصلية كتبت بواسطة محمد السر احمد

اخي الخلوق صالح شرف شكرا لك كثيرا لقد جف قلمي من الحبر عندما قرا تلك الاحرف الجملية التي صعب عليها مجارتها
وشكرا و لكن معنا ذلك رجاء

---

حاضر افندم
تمام سيادتك
تاني شنو
المهم خلاصة القول حاضر
يا ابن عواض...
علي وزن ابن الفارض


مع فائق ودي

صاالح