أراضي المغتربين بجدة

الأخوة الكرام السلام عليكم ورحمة الله وبركاته . فقد صرح السيد الفاضل الشاذلي رئيس رابطة محلية ودمدني الكبرى بأن أراضي المغتربين بولاية الجزيرة ستطرح يوم السبت القادم 19/5/2007 بمشيئة الله وذلك بمباني القنصلية العامة بجدة في الفترة المسائية . وذلك بناء على المفاوضات التى تمت مع الوفد الموجود الآن بمدينة الرياض ويضم الأساتذه/ أحمد عبدالله مدير أراضي المغتربين فرع ولاية الجزيرة ـ ودمدني ، والأستاذ / أزهري محمود رئيس جهاز المغتربين فرع ودمدني .
الأراضي ستكون على النحو التالي :ـ
1ـ أراضي خطة إسكانية مشفوعة باليمين من القنصلية السودانية .
2ـ أراضي للبيع تتطلب صورة الجواز فقط .
الأراضي لعموم أبناء ولاية الجزيرة والفترة محدوده . والله الموفق

نصيحه من اخوكم اعملوا حساب لفلوسكم انتوا تعبتوا فيها
بالمعنى احسبوها صاح ( ابو حراز والكريبه ود المجدوب )
ده ناس الاراضى فتحوا باب المغتربيين لتعبئة خزائنهم
واعملوا حسابكم مره اخرى

يا جماعة الأراضي دي في مدني .. ولا حا نركب تلاتة مواصلات عشان نشوفها ؟؟؟

اقتباس:

---

المشاركة الأصلية كتبت بواسطة صلاح الدين

الأخوة الكرام السلام عليكم ورحمة الله وبركاته . فقد صرح السيد الفاضل الشاذلي رئيس رابطة محلية ودمدني الكبرى بأن أراضي المغتربين بولاية الجزيرة ستطرح يوم السبت القادم 19/5/2007 بمشيئة الله وذلك بمباني القنصلية العامة بجدة في الفترة المسائية . وذلك بناء على المفاوضات التى تمت مع الوفد الموجود الآن بمدينة الرياض ويضم الأساتذه/ أحمد عبدالله مدير أراضي المغتربين فرع ولاية الجزيرة ـ ودمدني ، والأستاذ / أزهري محمود رئيس جهاز المغتربين فرع ودمدني .
الأراضي ستكون على النحو التالي :ـ
1ـ أراضي خطة إسكانية مشفوعة باليمين من القنصلية السودانية .
2ـ أراضي للبيع تتطلب صورة الجواز فقط .
الأراضي لعموم أبناء ولاية الجزيرة والفترة محدوده . والله الموفق

---

العم الجميل المناضل المثابر صلاح الدين
مشكور جداً على الايضاح .. وان نقصت المعلومة .. وهذا ليس تقصيراً منك ولكن لانك تريد الخير للجميع .. لذا كان الاستعجال ونقص المعلومة
عمي صلاح الدين .. رجاء تزويدنا بارقام تلفونات الاستاذ الفاضل الشاذلي .. حتى نتواصل معه ومعرفة كامل التفاصيل.
ولك الشكر يا عمنا صلاح الدين

الأحباء الكرام ، مرتضى ومدناوي والعزيز بورتبيل ـ تحية عطرة لكم جميعا .
بخصوص موضوع الأراضي ، ناس الرابطة كانوا مجتمعين حتى ساعة إعداد البوست يعني حوالي الساعة 12 ليلا واتصلوا علي عشان أوصل المعلومة عشان الناس العيزة تشتري تكون جاهزه وتدبر أمورها لأ نو ناس الأراضي مستعجلين على السفر وأظنكم شفتو الدربكة الحاصلة في الرياض من خلال بوست الأخ الحلامابي .واليوم هاتفني أستاذ الفاضل من القنصلية عشان يعلق نفس الإعلان في القنصلية .
أما بخصوص التفاصيل سوف نوافكم بها لاحقا عند إكتمالها لأنها لسه ماإكتملت عندنا وكنا حاسبين حساب لهذه الأسئلة لكن قلنا أول شئ الناس تعرف وقت طرح الأراضي بجدة وبعدين الباقي هين ان شاء الله . وسوف أوافيكم بكل معلومة أول بأول . مع خالص مودتي .

الأخ / صلاح والاخوه ككل
السلام عليكم ورحمة الله تعالي وبركاته
ما كدى ياخوانا كلمو لينا الأستاذ / أحمد عبدالله (مدير الأراضي) وأخونا / أزهرى محمود (رئيس الجهاز) قولوا ليه محمد أحمد بقول ليك أول حاجة أدونا أراضينا بتاعة الخطة الإسكانية بتاعة سنة كم ياربي .... أيوه أوائل التسعينات والدفعنا رسومها وقالوا لينا حصلت مشكلة فيما بين الأراضي ومشروع الجزيرة ولحدى اليوم ممطوحين ردوا لينا عليكم الله ردوا لينا بس بلاش تقولوا المشكلة كانت عند الوالي ورفعها للرئيس وحلها في الشهور الجايه عشان نحنا شبعنا من الكلام ده وبعد كده أطرحوا ماتطرحوا للبيع ودحين .. أكان عندنا قروش النقرى بيها الوليد الماقدرين ندفع ليه ولا بالدين ..... أقول إيه ياربي .... الصبر مفتاح الفرج.
وعشتو والله يديكم قدر نيتكم
أمين
محمد

السلام عليكم أحبتي العزاز ، أخوي أمحمد ودأحمد ناس الأراضي جونا قبال كدي واحد وتسعين وكانت الأراضي في مدني في سباق الخيل 300م تانية والأولى حسب القرعة من 400 الى 700 م وسعر المتر 5 دولار دفعنا واستلمنا العقودات ومشينا السودان إستلمنا شهادات البحث . المره دي حسب المعلومات الوصلتنا كالتالي :
الخطة الإسكانية : رسوم الأرنيك للأولى 100 ألف جنيه والتانية 80 ألف جنيه أما التالتة 50 ألف جنيه. أسعار الأراضي : مليون وميه وخمسين ألف للأولى ، والتانية سبعميه وخمسين ألف ، والتالتة خمسمية وخمسين ألف جنيه .
المستندات المطلوبة : صور شهادات ميلاد الأبناء + القسيمة + اقرار القسم من القنصلية .أما الأراضي خارج الخطة الإسكانية فأسعارها 40 الى 70 مليون ج
والجماعة ديل حيصلوا جدة ان شاء الله ظهر السبت القادم قادمين من الدمام . دا الوصلنا ليهو حت الآن ولو في جديد ح نقوليكم . مع مودتي .
موبايل الأخ الفاضل 0569483154

الأخ / صلاليحو
كيف الحال والاحوال
شوف يا خوى أنا قدمت من داخل السودان وبالخطة الاسكانية ودخلت القرعة مع الداخلين ووقعت لي قطعة في نفس المنطقة البتتكلم عنها .. ومش أنا لوحدى نحنا أكثر من ستين مواطن غلبان وكلنا في نفس المنطقة القلت ليك عليها .. ودفعنا الرسوم وإستلمنا الايصالات .. وبعد بقدرة قادر ناس الأراضي طلعوا لينا بالروايه الحكيتها ليكم .. عاوز أعرف إيه الحصل ... وياريت من لسان مدير الأراضي شخصيا .. وحكاية الأربعينات والسبعينات دى مابنقدر عليها. رقم الموبايل ده لمين ؟؟؟؟؟
تحياتي ودمتم
محمد

أخي محمد عساك بخير ، نمرة واحد لومك علي أسأل ليك مدير الأراضي شخصيا وبعدين ياخوي انت وين ؟ يعني مامعانا في جدة أو قريب عشان تكلموا man 2 man وماعندك مشكله ؟؟؟ وتانيا لو قريت مداخلة العزيز مدناوي كان بسأل عن موبايل الفاضل الشاذلي رئيس رابطة محلية ودمدني الكبرى بجدة . نسأل الله أن تحل القضية وربنا كريم وانت راجل أبو عيال ودعواتنا ليك بالتوفيق .
تخريمة :
حسب معلومات مؤكده من واحد أخونا في الرياض اشترى قطعه لكن في الخرطوم ، وبياناتها للداير إشتري كالتالي : الفرصة متاحة للكل وبدون قسم وموقعها مخطط الوادي الأخضر بحري (موقع المطار) الحاج يوسف . درجه أولى 8800 ريال تدفع ربع المبلغ والباقي تقسط لمدة عامين.

الأستاذ / صلاح
تحياتي وكيف الحال
يارييييييت لو معاكم في جده .. بس بعيد شوية إنتو علي البحر اللحمر وأنا مرقتها عل الخليج العربي .. يازوووول لو كنت معاكم كان حتكون في نقه شديده .. وياريت لو أخونا الفاضل الشاذلي الله يقدرو علي فك طلاسم الموضوع .. وبدورى أشكرك علي الاهتمام وإنشاء الله ربنا يجمعنا حقيقة ..
بعدين تعال إنت خرمت بي وين .. موقع المطار منو القال ليك في بحرى ( الحلج يوسف ) ده زمان نقلو لأمدرمان والتنفيذ جارى وقطع أشواط مقدره .. يعني ممكن لو الله مده في الايام أربعة خمسة إجازات كده حتدخل بيه ..
لك التحية ولكل الإخوة بجده
محمد