زول إسمو حماد ود سعيد

وقائع قصيدة ممهورة بلون الدم ومرفوعة من أهالي قرية أم بكول ضد بص شمبات
زول إسمو حماد ود سعيد
بلدو الصغير إسمو أم بكول*
ميلادو ما معروف متين
لكن كبار ناس أم بكول
بيقولو ساعة البحر غطى الجروف
ساعة الميجر*
زار أم بكول
والعمدة كان عازم العمد ضابح خروف
أعظم تواريخ في سجلات المواليد في الوجود
نوع العمل
إتوفى قبال عشرة يوم
وفي الجيب خمسطاشر قرش
وحجاب عشان عين العدو
والرادي بعد الكافينول *
يعلن عن الجثة ويقول:
[زول بي شنب وخدود أفقي مفصدة
وفي الجيب خمسطاشر قرش وحجاب عشان عين العدو]
إنتو أضحكو الدنيا أيه
غير المسرات والضحك
وكلام على الهاتف مع أحلى البنات
وأشعار غزل .. ليل وشوشات
وهدية من أغلى البنات قارورة من أرقى العطور
وهدية لي نفسك براااااااااك
قارورة من أرقى الخمور
عشان الليل بيك ما يطول
وأنا بعتذر يا أصدقاء حماد شنو وبلد أم بكول ؟
ناس في غاية الضحك والإنبساط
ذكر المسائل الما بتسر
حدثنا عن بهجة مدن تضحك على رنة وتر من الفجر
وحتى الفجر
حدثنا عن نهدين حلاوة البرتكان
واقفين بيتحدوا النظر
حدثنا عن ليل البنات ليل الخدر
لكن !!! برجع وبعتذر يا أصدقاء
ماله باكية أم الحسن
أختو اللي من أربع سنين لابسالا توب
واحد قديم وجد تمشيبو للبكاء والفرح
تمشيبو للجار والبعيد
والله ... أبداً ما اشتكت وقالت قدم ودايره الجديد
كيف تشتكي ؟ وهي العارفة بي مغص القرش
تاراً قديم من زمن أبوه وجدو والجد الكبير في
لحظة ما بتصادقوا
ويصعب على حماد شقى أم الحسن يتعب شديد
ويكدح شديد وبرضو القرش ما يوصلو
ولمن خلاص ضاق عليهو الحال
باع التور وإشترى توبين جداد لأم الحسن
ونعلين جداد وأداها من باقي القروش عشرين
ريال
من خوفوا من قدر الزمان
وحماد نزل جاء العاصمة كايسلو أعمال
حماد طلع حماد نزل عذابو ضاق بيهو الجبال
يقولوا أمشي تعال ... وبعدو
كأنهم بختارو في صبر الرجال
ولمن خلاص الدنيا غنت وزغردت
قبلوهو في البوليس نفر
قالوا لو تقدر تمش وتستلم الشغل آخر الشهر
حماد فرح وتمنى لو يطير عشان يمشي البلد
يودي الخبر
وحماد سرح ( والله يا أم الحسن والله يا ما تسعدي
والله لا تسقي البهم *
لا تحشي قش وسماحة ساكت تقعدي
شطح الخيال قدامو وشاف أم الحسن في أحلى توب
زي العروس متحننة ومتعطرة )
وفي اللحظة ديك
لاقاهو بص شمبات
وحماد طار على الأرض إنطرح
والدم بحر سال في التراب
وقليبو يا دوب محتضن الفرح
والدم كتب فوق التراب
والله يا أم الحسن والله يا ما تسعدي
والله لا تسقي البهم لا تحشي قش
وسماحة ساكت تقعدي )
والرادي بعد الكافينول
يعلن عن الجثة ويقول:
زول بي شنب وخدود أفقي مفصدة
وفي الجيب خمسطاشر قرش وحجاب عشان عين العدو