السلام عليكم ورحمة الله وبركاته
بصراحه جاي اتناقش معاكم في موضوع كان داير مع بعض الأًصدقاء في مدني
وجيت أنقلو ليكم هنا
وهو بختص في تربية الآباء لآبنائهم
بصراحه في آباء ممكن نشبه علاقتهم مع أبنائهم زي أي شركه تجاريه أو اعلانيه
يعني الليله مثلا شركة أريبا (mtn) تدفع مبلغ وقدره لناديي القمه على ان يكون الشعار
على القميص وطبعا بعد كده مافي أي علاقه بتلم الشركه مع الأحد الناديين
نفس الحال بنطبق على بعض الآباء انو علاقتو مع ابنو تكون المصاريف وبس
لا بجي يقعد يتونس معاه أو حتى أبسط حاجه يقول أقعد معاه أشوف عقلية ولدي بقت كيف
أو بفكر كيف أو ياخد رأيو في الحاجه البتخص الولد نفسو
وتتدرج انو تصل للأسوء من كده انو الأب يمشي أولادو بي كلام الغير
سواء واحد مدعي انو صاحب أو صديق أو أيا كان
والأب تاخدو الهاشميه ويجبر ولدو الضحيه انو يعمل الحاجه غصباً عنو
ومرات تصل لمرحلة عدم العفو انو لو ما عمل الحاجه دي
وفي نفس الوقت تلقى الأب يتباهى انو ما مقصر مع أولادو و عامل ليهم أي حاجه
( وطبعا ده واقف على حتة المصاريف ) و تلقى العلاقه بيناتهم حدها السلام عليكم وعليكم السلام بس
وفي النهاية هو بكون الوالد الحنين المحب لي أولادو والوصانا عليه ديننا الحنيف
اننا نكون تحت قدميه لي آخر يوم في عمرو وطبعا ده حق شرعي ما في زول بقدر
ينكرو
ولكن تبقى العقبه انو كيف يوصل المشاعر الفي قلبو لي ابنو ( الولد تحديداً )
ويزيل العقبه والحواجز البيناتهم
اللهم أحفظ ابائنا وادم عليهم الصحه والعافيه وقدرنا على رد ولو جزء بسيط من حقهم
حاجه سريعه :-
طبعا أكيد ما كل الاباء بالشكل ده لكن نقولها صريحه انو التصرفات دي موجوده
وداير أرائكم معاي في الموضوع ده
ودمتم بود
