الموبايل .. وقد الجيب بالطريقة الصاح ..

الشخص العادي في زمنا ده (العندو موبايل)
أحسن من هارون الرشيد في زمنو ..

اتخيلوا .. تضغط ازرار الموبايل تكلم أمريكا
هارون الرشيد لو عايز يرسل message
عايز ليهو 3 شهور ..

ما قلت ليك العندو موبايل
أحسن من هارون الرشيد في زمنو؟؟

الموبايل .. أصبح أهم فرد من أفراد العائلة ..
وأكتر فرد (إذا جاز التعبير) بينصرف عليهو ..
وأصبح أساسي في بند المصروفات الضرورية ..

مغترب خارج السودان ..
وخطيبتو في السودان ..
البشتغلوا بشحن بيهو الموبايل ..

ده كوم وقيمة الأجهزة كوم تاني
وبقى شكل الجهاز وموديلو واحد من دواعي الفشخرة ..
تكون ما لاقي تاكل لكن في يدك آخر موديل موبايل ..

تعرف يا ود الريح عندي رساله في الافلاس .. اسمها الموبايل الكتاح ... الخلانا عدمانين حق قفة الملاح .... واسواء المكالمات البتجيك .. آخر الليل .. ومع نسمات الصباح

وحاتك انت آآآ المبروك ... كان عندك رصيد ... كان ما كملتو ما بتترتاح ... وكان ما شحنت تاني ما بتترتاح ... ولا بنفعك ... (قطاف) ولا غيرو ... أحسن طريقة الشحن في السودان .. قدر ظروفك .... تشحن بى 5 قروش عشان تعمل مس كول ...
لكن الموبايل بقى .... ضروري .. وهام ... ولا من تكون خالي رصيد ... زي المقطوع من العالم اها نعمل شنو يا ود الريح ... عندك حل؟؟؟

انتو المشكلة بتاعت كان ما كملتا الرصيد ما بترتاح دي شكلها مشكلة عامة

اقتباس:

---

المشاركة الأصلية كتبت بواسطة جلالة

اها نعمل شنو يا ود الريح ... عندك حل؟؟؟

---

والله يا جلالة ياخوي دي مشكلة كبيرة ..
زمان تتصل البيت في التلفون الثابت
البتلقاهو توصي لباقي الجماعة ..

الثابت حسه مافي ..
ولو ما اتصلت على اي زول براهو
أرجى الزعل ..

ده لو ماقالوا ليك رسل حق الشحن ..

اقتباس:

---

المشاركة الأصلية كتبت بواسطة طلال الصول

انتو المشكلة بتاعت كان ما كملتا الرصيد ما بترتاح دي شكلها مشكلة عامة

---

الحبيب طلال الصول ..
المشكلة في شحن الموبايل بتكمل رصيدين
رصيد الجيب ورصيد كرت الشحن ..

بس اتمنى انو يخلص في المفيد ..

وكله كوم
والواحد شايل اخر موديل كوم
وماعنده رصيد
شغال بس مس كولات ساااااااي

اقتباس:

---

المشاركة الأصلية كتبت بواسطة مدنيّة

وكله كوم
والواحد شايل اخر موديل كوم
وماعنده رصيد
شغال بس مس كولات ساااااااي

---

لالا يا مدنية الكلام دا الا هناك
هنا الرصيد اهم كتير من الموبايل
النجماعة هنا بشترو الموديلات الجديدة لمن يكونو نازلين اجازة بس :D

اقتباس:

---

المشاركة الأصلية كتبت بواسطة معتز الريح

الحبيب طلال الصول ..
المشكلة في شحن الموبايل بتكمل رصيدين
رصيد الجيب ورصيد كرت الشحن ..

بس اتمنى انو يخلص في المفيد ..

---

والله يا معتز1/5 مفيد والباقي حشو

اقتباس:

---

المشاركة الأصلية كتبت بواسطة مدنيّة

والواحد شايل اخر موديل كوم
وماعنده رصيد
شغال بس مس كولات ساااااااي

---

وكمان تأكيد لصحة كلامك ..
في علاقة عكسية بين موديل الموبايل والرصيد ..
يعني كلما الموديل جديد تلقى الرصيد الفيهو قليل ..
زي الزول اللابس هدوم غالية وجيبو فاضي ..

وبيني وبينك في ناس شايلين موبايلات بدون شريحة..
ولزوم القشرة وبس .. زي الكاميرا بدون فليم ..

اقتباس:

---

المشاركة الأصلية كتبت بواسطة طلال الصول

الجماعة هنا بشترو الموديلات الجديدة لمن يكونو نازلين اجازة بس :d

---

كلامك صحيح 100% ..
والواحد يمشي السودان بموبايل قديم بكشفوا حالو ..
يقول ليك ده عامل مغترب وشوف موبايلو تلاتين حشرة ..
وحيقولوا ليك الزول ده جاي واقع ..

اقتباس:

---

المشاركة الأصلية كتبت بواسطة طلال الصول

والله يا معتز1/5 مفيد والباقي حشو

---

البركة في الواحد ده ..
أخير من 5/5 ..

العملاق ودالريح
حقيقة انو الموبايل ضرورى لكن مالزوم الفشخرة الفاضيه والواحد تلقى موبايلو اخر صيحة وبعمل ليك مس كول يعنى بالواضح ماعندو حق الرصيد والغريبة الناس من جهلها بقت تقيم الشخص حسب موبايلو وكم انا فى شوق لاقتناء هذا الجهاز العجيب والله يرزقنا اولا بالرصيد وبعدين الجهاز .وما مهم النوعيه ثلاثتين عشره اربعتين حشره اى حاجة تتكلم وخلاص بس نكون خارج نطاق الهباله وازعاج الناس(بالمس كول).:d

لكن في عينة بتلقاهو بيطلب منك تعمل ليهو مسكول مش مسكول اتصال عديل وهو ما يفتح نظام (تحشيش):D

اقتباس:

---

المشاركة الأصلية كتبت بواسطة ودكمبال

الرصيد والغريبة الناس من جهلها بقت تقيم الشخص حسب موبايلو

---

ثورة الاتصالات هي الأسرع نمواً ..
والتطور في الموبايلات بقى سريع سرعة البرق ..
تلم قروش الموديل الجديد .. بعد ما روحك تطلع ..
يطلع ليك موديع بعدو أجد منو .. وبالتأكيد أغلى ..
والله يعين العندهم مرضة الجوالات الحديثة ..
لكن يعملوا شنو .. لازم يواكب

وياريت التقييم لو بقى على الموبايل بس ..
شكراً يا ود كمبال على المرور ..

اقتباس:

---

المشاركة الأصلية كتبت بواسطة المرتاااااح

لكن في عينة بتلقاهو بيطلب منك تعمل ليهو مسكول مش مسكول اتصال عديل وهو ما يفتح نظام (تحشيش):D

---

الحبيب المرتاح ..
العينة دي موجودة .. وأنا واحد منهم أول أيام اقتنيت موبايل ..
حركة جميلة ولذيذة .. وانت عامل فيها متجاهل المتصل ..
وتحشيش ألف ..

شكلك معاي انت في الموضوع ده ..

مرة يامعتز شحنت الجوال وعندي مكالمة مهمة جدا
المهمة ختيت الجوال في الشاحن جاءت ام محمد
والله ماخلت زول ماتصلت عليهو السودان امريكا الامارات لما الجوال صفًر عديل حتي المس كول مابيعملو
المهم من اليوم داك قررت اكون مستقبلا عالمي لازم اشحن واكمل الرصيد في الحال
الله يكفينا محن الجوال ومصايبو

الموبايل من أسرع وسائل الإتصال بين الأهل والأصحاب والأخوان، لكن يظل أيضا من أسرع وسائل قد الجيوب.

اقتباس:

---

المشاركة الأصلية كتبت بواسطة nasir

والله ماخلت زول ماتصلت عليهو السودان امريكا الامارات لما الجوال صفًر عديل حتي المس كول مابيعملو

---

والله يا ناصر ام محمد ما قصرت ..
والبركة في الاتصالات الدولية دي ..

وحاتك نحنا جماعتنا
بكملو الرصيد في الاتصال الداخلي ..
يخلوك لا تعرف تضحك ولا تعرف تبكي ..

خليتو الشحن .. بقيت اتصل بالكروت العادية
ومن تلفون البيت ..

اقتباس:

---

المشاركة الأصلية كتبت بواسطة خالد النور

الموبايل من أسرع وسائل الإتصال بين الأهل والأصحاب والأخوان، لكن يظل أيضا من أسرع وسائل قد الجيوب.

---

والله قلبي معاك يا خالد ..
الصبر بس نعمل شنو؟

موضوعك في جرح يا ود الريح

كدي راجع تاني

المهم في النهاية الواحد بتمأن علي احبابو واخوانو وكده والقروش بتجي وبتروح يا معتز ولا شنو؟

والله يا معتز كل شهر الواحد يقول يخفف الفاتورة تقيلة بالحيل بس النقة ما تديك الدرب انا قعدتا

سنتين من غير جوال حردان بس لكن الظروف تخليك خروف ورجعت حليمة لي قديمة


وسلمت على الموضوع