رنة صوتك(قصيدة من تاليفي)
رنة صوتك شدت عصب الشوق
جوا ي وهزت وتر الالفه و ومرت
فوق إحساسي تدغدغ وصحت
فوقي حنين فارقني زمان
داريت الخوف الفي قلبي
عشمان ألقاك تديني أمان
وعليك وديت يااااااااااا قاسية
خطاي وبكيت تحنان
للزمن الجاي وما معروف
وأيام ضاعت في الزمن الكان
خدرت الألم الهد قواي
وحلفت أقاوم للأحزان
وألقاك بي فرحه ولهفة شوق
وشوق ملهوف وحنين ولهان
ألقاك ومعاي شتول ريدي
شايلاها ثمارا هجين من ذوق
ومحبه وريد وغرام وحنان
وعشان ألقاك فتشت عليك
لفيت الكون ماست مكان
فتشت عليك في الخلا والصي
وفتشت عليك جوه الوديان
وفتشت عليك في الزمن الجاي
والماضي الكان مخضر نديان
وسألت عليك زهور الروض
والطير الصادح في الأغصان
والشمس اللسع ماغابت
وسواد الليل والقمر البان
ورجعت وحاتك مالاقيك
لا في الكلمات لا في الألحان
لا في الدمعات السايله بحور
بتصور جرح الزمن الخان
لا في الآلام الخالدة شعار
للجور والذل والحب الهان
وفضلت أغالب في العبرات
حيران بين صدك والحرمان
ورجعت أفتش من أول
تايه مهموم باكي وحزنان
ودلتني عليك رنة صوتك
ولقيتك يانبع الأحزان
آهات وآلام ودموع وانين
وجراح غايرات جوه الوجدان
