عرض للطباعة
إنت المهم الناس جميع ما تهمني
إنت العزيز افرد شراعك ضمني
خايف تفوت والسكه بيك ما تلمني
انت الوداد
نبض الفؤاد
بستان نضير
وصفا وعبير
وجمال رهيب
ودلال عجيب
ريّح شقايا وجمّني
جاييك شعاع
نجمه وشراع
نسيني يا عمري الضياع
انا لسه تايه دلّني
قول ليا قول
يا احلى زول
خلي الحزن يرحل يزول
لو كنت جد بتعزّني
انا ليك وبيك
مداح عيونك ومشتهيك
مهما تجور بنزف واجيك
لا بقسى لا بزعل عليك
لانك انت تهمني
كلمات عبد العال السيد ...
عندما تجتمع البساطة في التعبير
وقوة الإحساس ، تعطي مشهداً هو
اقرب إلى السهل الممتنع.
فيغدوا القارئ في أجمل حالاته ورضاه
لك التحية على هذا الإختيار
وشكراً جميلاً لروعة هذه الإتكاءة
أخي ضياء الدين .. لك كل ودي وتقديري ... ما اجمل الاتكاءة معكم في ود مدني ... تنسي الهم .. وتخفف الآم الغربة المريرة .. وتزيدنا ولها بهذه المدينة التي عشعشت بداخلنا .. ولكم انتم يا بقي العقد الفريد .. وتقبلو وافر الاحترام .
التحيه للجميع و كل عام و انتم بخير و ربنا يحفظ السودان و مدني و الناس البكتبو لينا الكلام الجميل و القصيده رائعه جدا
شكرا ليك اخي مجاهد علي هذا الكلام العزب لصاحب الصرخة الاستاذ عبد العال السيد
ياصاحبة قوليلي ياروح مواويلي
وانا رغم الامي واقف علي حيلي
شكرا لصاحب الصرخة عبد العال السيد
قولي للنيل ضفة ضفة
والعشيات لما تصفا
والنسيمات البتاخد
من عفاف ريدتنا عفه
انو شوقي يقيض بحر
شوقي شوق انسان معزب
ضيعوا اليل والسفر
لاينابيع ريدي جفت
لا ولا اشواقي خفت
كل يوم في غربه زايده
بيها كل الدنيا عرفت
شكرا لك مره ثانيه اخي مجاهد لي الاستاذ عبد العال السيد صاحب الاحساس المرهف الرقيق
من بعد ماعز المزار
والليل سهي وملت نجومو الانتضار
وشرب الزمن حزن المواويل
وانجرح خاطر النهار
شكرا لكم شباب علي طرح الموضوع عن المبدع الشاعر عبد العال السيد واليكم هذه المشاركة
من بعد ما عز المزار
الشاعر عبد العال السيد
من بعد ما عز المزار
والليل سِها .. وملّت نجومو الإنتظار
والشوق شِرِب حزن المواويل
وإنجرح خاطر النهار
*********
وبقيت أعاين فى الوجوه
وأسأل عليك وسط الزحام .. قُبـّال أتوه
يمكن ألاقى البشبهك
ما الليل براح
والشوق .. تعالى بيندهك
*********
شايلاهو وين النيل معاك
عصفورة جنحاتا النجوم .. وأنا بى وراك
بسأل عليكى مدن .. مدن
وأعصر سلافة الليل .. حزن
بسأل عليك فى المنفى .. فى مرفا السفن
يمكن طيوفك أُخريات الليل تمر
تملا البراحات ..
لى الحزين طول العمر
********
ما نحنا بينا الأمنيات والتضحية
بينا المعزات .. والعذابات فى الحياة
بينا الهوى ..
إخلاص على قلب إنكوى
وكلام قديم
قلناهو آخر الليل .. سوا
إنو راح نتلاقى لو طال النوى
لكن كلامنا الكان .. وكان
خايف يكون شالو الهوا
واليكم هذه القصيدة للشاعر عبدالعال السيد التي ابدع في تقديمها الزعيم الراحل مصطفي سيداحمد
الدنيا ليل .. غربة ومطر
وطرب حزين
وجـّع تقاسيم الوتر
شرب الزمن فرح السنين
والباقى هداهو السهر
*******
ياروح غناى
الغربة ملّت من أساى وغربتى
وبقيت براى .. حاضن أساى
الوحشة ملت من شقاى .. ووحدتى
لا غنوة .. لا موّال يبدد حسرتى
غير الدموع ياملهمة
الغربة مرة .. ومؤلمة
*********
كلمى النيل ضفة .. ضفة
والعشيات لما تصفى
والنسيمات البتاخد
من عفاف ريدتنا .. عفة
إنو شوقى يفيض بحر
شوقى شوق إنسان مضيـّع
ضيعو الليل .. والسهر
لا ينابيع ريدى جفـّت
لا .. ولا أشواقى كـفـّت
كل يوم فى الغربة زايدة
وبيها كل الدنيا .. عرفت
واخيرا وليس اخيرا اليكم هذه القصيدة لهذا المبدع
الدنيا ليل .. غربة ومطر ..
وطرب حزين ..
وجع تقاسيم الوتر ..
شرب الحزن فرح السنين ..
والباقي هدَّاه السفر ..
يا روح غناي ..
الغربة ملَّت من شقايا وغربتي ..
وبقيت براي .. حاضن أساي ..
الوحشة ملَّت من أسايا ووحدتي ..
لا غنوة لا ضواي ..
يبدد حسرتي ..
غير الدموع يا ملهمة ..
الغربة مُرَّة ومؤلمة ..
قولوا للنيل ضفة ضفة ..
والعشيات لما تصفا ..
والنسيمات البتاخد ..
من عفاف ريدتنا عِفّة ..
إنو شوقي يفيض بحر ..
شوقي شوق إنسان مضيع ..
ضيّعوا الليل والسهر ..
لا ينابيع ريدي جفت ..
لا ولا أشواقي خفت ..
كل يوم في غربة زائدة ..
وبيها كل الدنيا عرفت ..
الدنيا ليل غربة ومطر ..
شكرا لكم علي المشاركات
مشكوريييين .. وما قصرت يا عمر
والله الف شكر يا مجاهد
وتسلموا كلكن على هذه الكلمات الاكثر من رائعه
انا الان في حالة دمعية والله ليس جبن ولكن عندما نقراء الحزن في كل بيت شعر نتخيله في كل بيت في السودان. هل ياتري نحن نهوى الحزن لا والف لا ولكن ضاعت اسباب الابتسامة فمتى تعود .
لكم الشكر اخي هشام وعبدالحفيظ وعماد السائح وضياء الدين والاخت امنية علي المشاركات والردود علي هذه القصائد ونشوفكم