ما لايحدث إلا فى السودان

أثناء إجازتى بالسودان .....
كنا و صديقى فى ونسه عاديه حكيت له عن إفطار صائم فى السعوديه ،
و الكلام ده كان فى رمضان قبل 3 سنوات ، قال لى صديقى :
اليوم حا أوريك إفطار الصائم الجد جد ، و قصد صاحبى إنو نتحرك من
الخرطوم لمدنى و باقى على الإفطار حوالى ساعه تقريبا .
و فى الطريق بدأت ألاحظ وقوف الناس بكثرة
على جانبي الطريق و يأشروا بإلحاح للعربيات بالوقوف ،
للفطور طبعا !
و لمّا خلاص مواعيد الإفطار باقى ليها دقايق
إذا براجل واقف فى نص الشارع رافع كلتا يديه ،
يعنى لازم .... نقيف لازم نقيف ...
قلت لصاحبى ده أكيد ضابح خروفين أقل حاجه ،
لمّا وقفنا فى نفس اللحظه وقفت معانا حافله
فيها 14 نفر تقريبا ،
الراجل نحفان و كملان من لحم الدنيا و لابس عراقى
من شدة ما قديم و مهترىء ممكن تشوف ضلوعو من تحتو ،
أخذ الرجل يهرول داخلا لى جوه الحله
و هو يأشر لينا نتبعو ، ولقينا ولدينو مستنيين قدام الباب
. والله والله والله الفطور كان عبارة عن لقمه ( عصيده )
وملاح و شوية بليله و حلومر ،
و هم كانوا مباشرننا بفرح و سعاده غريبه !! ،
بعد لقمه لقمتين و جقمة مويه إتلفت أعاين حالة البيت
وحسيت إنو الراجل ده جاب لينا كل العندو ،
و ما أظن فضل شى لوليداتو !!
لا أذكر أننى بكيت فى حياتى كما بكيت ذلك اليوم ،
فى الطريق قلت لصاحبى عبدالمنعم :
إنت ما وريتنى إفطار صائم ، إنت وريتنى سيرة شعب عظيم .

وهو الحال دائماً اخي صدقي معهود باهل الجزيرة واهلي السودانيين الكرم الفياض بما هو موجود ويؤثرون على انفسهم ولو كان بهم خصاصه

اولاً كل عان وانت بخير

والله يعني انا بشهد لي شارعنا مدني الخرطوم بكرم اهله

انشاء اللله ربنا يكون ليهم في ميزان حسناتهم

والله والله مشتاق اجي واحصل يوم فطور زي الفطور حقك ده

وانا ماشي من الخرطوم لي الجزيره

لانه احساس الواحد مايقدر يوصفه

علي العموم اديك الف عافيه وبقول ليك دي حال بلدنا

الأعزاء أبو روان ... أبوقيس

تحياتى لكما ..

هو فعلا ده ياهو حالنا بس الطلوع بره السودان خلانا نكتشفو ،
و نعرفو أكتر ،،

إنشاءالله ربنا يرد غربتك و تبل شوقك يا أبوقيس بى فطرة زى دى ،
و تفطروا مع واحد تكون حالتو أحسن من زولى ده شويه
و يجيب ليكم مع اللقمه صلطة روب .
:D :D

طبعا أنا حصل لي الموقف دا وانا ماشي على شرق السودان
خشم القربة بالتحديد وبالجد منظر مبالغة
يوريك انه لسة البلد في أمان والشعب في ألف خير
"وسلامتكم"

دا هو الشعب السوداني العظيم

وديل هم اهل الكرم

يعني انا على حق لمن اخترتا

وما حب الديار شغفن قلبي
ولكن حب من سكن الديار

اهل الكرم واهل الحاره ديل اهلي
واسفي اذا ماكنت سوداني

عاداتنا وتقاليدنا فى هذا الشهر المبارك لا تندثر مهما حصل وأهل الجزيرة أهل كرم معروفين ، ربنا يديك ألف عافيه لتذكيرنا بهذا الموقف الذى مر به كل شخص فى ترحاله من مدنى للخرطوم وبالعكس ، شكرا كتير أخوى صدقى .

الأعزاء :

مزونى
أبو السعود
أمير
myrelan
شكرا لمروركم الكريم ، نتضرع للمولى الكريم أن يحفظ لنا أصالتنا من نوائب الدهر ،
و كل عام و أنتم و الجميع بخير .