عرض للطباعة
http://www.accuratereloading.com/fal4.jpg
البيض فى العش
والعش فوق الغصن
نظر حسن البيض فى العش و طلع
وجمع البيض ونزل
و حضر الطير و ما وجد البيض
فحزن و صرخ
وسمع حسن صوت الطير
فندم و ندم ندم و ندم
و اخذ البيض وطلع
و وضع البيض فى العش
و حضر الطير و وجد البيض
ففرح و فرح و فرح
مشكر استاذ ابراهيم على الموضوع التزكار الرئع
والصوره كمان لمن تشاهد بتزكرك حاجات كتير ابتدا من غابه ابارونه .
لكن حسن لو طلع العشب عشان ياخد البيض
ما اظنو حاينزل سليم فى الصوره الشايفه دى
يا برهوته دا ذي كلام الطير في الباقير
إنت يازول حكايتك شنو مع الطيور؟
بس المرة الجاية أوعك تجيب لينا أنفلونزا الطيور؟ :D
كدي شوف الكلام التحت دا.
كلام الطير في الباقير
دجاجي يلقط الحب ويجري وهو فرحان
حبيبنا سمسم سلاماتاقتباس:
المشاركة الأصلية كتبت بواسطة سمسم
دي القمرية في السبعينات كانت عاملة كدة
والعجب حسن
اقتباس:
المشاركة الأصلية كتبت بواسطة عزيز عيسى
انفلونزا الطيور ممكن تجي عن طريق الجداد الصيني والتايواني والمصري
لكن طيوري دي رقيقة تشيل سلام وتجيب سلام
انت ما سمعت وردي بترجي في الطيور كيف
بلااااااااااهي يا الطير المهاجر؟ و "بلااااااااااااهي" دي لمن يجرها كدة في كم واحد بكون بكي
انا مزعلني حسن دة
بلعب بأعصاب الطيور ليه؟
هو ما شاف حسن والصفارة؟
ولا يكون ياهو ذاتو وممثل شخصيتين؟
كان ياابرهيم زمنا ماتت فيه الانا وربط الجميع بحبال الوصل رعت فية الشاه لجوار الذئب وباتت الغربان طرا علي اعشاشها تعاف الكري وكان حلمنا بالعيد للبس الجديد وهمنا اكل كسيرة في قعر بيت احب الينا من اكل الرغيف وتحريك خلاخل اخواتنا اجمل من ضرب الدفوف وغارت بحيرتنا حاضرا ونعق الغراب فينا وبتنا علي حضن الليالي نجتر سمن الماضي .البيض في العش .والعش فوق الغصن
مقدورك ابراهيم ان تعيدنا لحبونا فلا تبخل علينا باعادتك .اكتب لنا لتعيدنا ايها السحاب فينا.
لك التحية يا اخ ابراهيم..
تشكراتي لك والله يبعدنا عن انفلونز الطيور جميعا انشاءلله..
يا طالع الشجره ... جبي لي معاك شمسه
تدفي ليالينا ... الأصبحت وحشه
تصالح ... المطره
وتراوغ ... الغربه
تطلع ... قميريه ... ترسل تحايانا
لى حلة منسيه
وحبوبه ... حنيه
وناسا ... سلامتن ... تمحي الأنانية
وطنا ... نهاراتو ... زي لوحه ... أبديه
عنوان ... حنين ... ونص .. أنين ... وكلنا يا ابراهومة ... عملنا عملة حسن ... سرقنا البيض من العش ... ورجع الطير ... وحزن لعدم وجود البيض ... لكن المسافه طويييييييييلة ... رغم الندم ... صعب نرجع البيض .. في الوقت الراهن .. وأه .. ثم أه .. ثم أه
نعم حبيبنا عبد الرحيم كان زمان بسيط في كل محتوياتهاقتباس:
المشاركة الأصلية كتبت بواسطة عبدالرحيم سعيد
الردا الازرق والقميص الابيض والضمير يقاسم القميص اللون والزي موحد
ولكن الحاضر ضن علينا إلا من ذكرى تؤرق ومنية بالعودة ..
اذا لنقيم نفير العودة هنا اخي عبد الرحيم
حرف حرف
وليكن حسن وطيوره بداية لمعازلة الماضى
ربما تحرج الحاضر برهة وسمح لنا بالعودة
لك الود
اقتباس:
المشاركة الأصلية كتبت بواسطة ريانية
اختنا ربانية تحياتي وسلاماتي
تلك الطيور ما بتجيب انفلونزا اطمني كتييير والزمن داك ما اظنه كان في انفلونزا طيور ولا جنون بقر ولا حمي خلاعية ولا الاخيرة بتاعة الخرفان ... الناس كانت بتاكل الشية والمرارة النية اكل العدو
زمان كانت الدنيا عزيزة ولذيذة
وكنا بنحفظ كتاب المطالعة كلو
اقتباس:
المشاركة الأصلية كتبت بواسطة عثمان جلالة
عثمان جلالة
سلامات يا حنين
انا بقيت اخاف من مداخلاتك "المزركشة" دي والكلام بروح مني والكيبورت ببقى لي كالكوليتر
البيض يا عثمان صعب يرجع وحتي الطيور بقت لما تبيض ما محتاجة تحضن بيضاً في عشاً صغير
حتى الطيور هبت فيها ريح العولمة
حليل لما الحمام كان بيته في صفيحة الطحنية معلقة في راكوبة في زاوية آخر البيت
المسافة بين حسن والطير وحبنا للزمن داك اقرب من انك تتذكر حبيبتك في الليل الهادي "دة من وجهة نظر هلامية"
لكن بحساب الزمن صعبة وطوييييلة طولة بال الطريفي مع سكينة
حاشية سفلية ــــــــــــــــــــــــــــــــــــــــــــــــــ ــــــــــــــــــــ
المزركشة دي وردت في كتاب المطالعة بتاع سنة تالتة وجهجتنا جهجهة السنين
نفير يا جماعة اي زول متذكر حاجة يلحقنا ودي حالة طارئة جداً
الذئب والبجعة
الدجاجة الصغيرة الحمراء
الرجال البلهاء
الغراب النبيه "دة في منو نسختين"
مريم الشداعة
القرد الاعمش والنظارة
سهام والهام
سليمة بائعة اللبن
زرقاء اليمامة
الفيل الظالم
كلب عبد الجليل
اسماعيل والهر
المهر الذكي
النملة الشفوقة
ابو مركوب
حيرني الذئب اول حاجة عزم البجعة عشاء وقالوا كان في بيناتهم علاقة لكن الاستاذ ما قال لينا الحتة دي لشيء في نفس يعقوب .. المهم البجعة وصلت للذئب اول مرة تلاقيني بجعة قلبها قوي كدة .. في البداية كانت متوجسة شوية لكن الذئب كان عامل مرقة تجيب الرايح وجابها ليها في صحن "مفلطح" البعجة قدر ما حاولت ما قدرت تلحس المرقة والذئب بعد ما جازف المرقة بتاعته بقى يعاين للبجعة بالكرباوي كدة ولمن قبضته بالثابتة قال ليها هل شبعتي؟
قالت الحمد لله وكظمت غيظها .. ودفنتها ليه بينها وبين نفسها ..
مرة في الويكيند البجعة عزمت الذئب غدا صاحبنا مشى البعجة سلمت عليهو المهم وقدمت ليهو المرقة في قلة الذئب قدر ما حاول ما قدر جات البجعة جازفتها منو بي إهمال بعد شبعت تمام قالت للذئب هل شبعت؟
قال ليها الحمد لله وهو يكاد يموت من الغيظ وقام اتخارج زعلان ومشي للثعلب وحكى ليهو القصة
الثعلب ضحك ملء شدقيه وقال للذئب انت البديت بالظلم والبادي اظلم
ومنذ ذلك اليوم
صارت هذه الحكمة متداولة بين الثعالب والذئاب
والبجعات.
حاشية:ـــــــــــــــــــــــــــــ
مفلطح دي برضو جهجتنا
شتى مناظر مرت خطف بارقة
كما تمر بك الأحلام منتشره
مرت وليس لها من عودة أبدا
كالطيف ولى فمن ذا يقتفي أثره
لو تأملنا الحاضر ملياً
لعرفنا قيمة الماضي في هذه الابيات
فهي تصف القطار وقتذاك
ولكنها تصف الماضي الآن
كانت القصيدة اسمها "في القطار"
مدخلها هيهات هيهات لا جن ولا سحرة
بقادرين على أن يلحقو اثره
"جاري وجارين وراه
الشاعر مندهش لفكرة القطر آنذاك وهو يا ربي يكون عرف قطر اليابان البمشي بسرعة الصوت
ولا يكون سافر مع القطر الغالط الجنون والسحرة؟؟ .. والجنون والسحرة ذاتم زمان كان سرعتهم كم في اليوم؟؟
كان يا مكان في قديم الزمان دجاجة صغيرة حمراء تعيش مع في احد المزراع مع حفنة في الانارب والثعالب والكدسة والفيران ... وفي يوم من الايام وبينما الدجاجة تتنزه في الحقل وجدت حبات من الفول فأخذتها وذهبت بها الى الارانب والفئران وبعض الحيونات المتخلفة ..
وقلت ليهم: من منكم يساعدني في زراعة الفول؟
قالت الفئران متمردة: سيك سيك العمل صعب ولن نقدر عليه وحدنا
وقالت الانارب متجرسة: وا وا العمل صعب ولن نقدر عليه وحدنا
وصاحت الكدايس متهربة: وا وا العمل صعب ولن نقدر عليه وحدنا
وبعض القرود والثعالب سخرو من الدجاجة وضحكوا ..
قنعت الجدادة من خيراً فيهم وزرعت الفول الله ورقبتها!
كانت تذهب الى الزرع وتعتني بالفول حتى نما وحان حصاده
بعد أن نضج الفول قالت الدجاجة للحيوانات المتخلفين: من منكم يساعدني في حصاد الفول
فتكرر منهم نفس المنظر
قالت الفئران متمردة: سيك سيك العمل صعب ولن نقدر عليه وحدنا
وقالت الانارب متجرسة: وا وا العمل صعب ولن نقدر عليه وحدنا
وصاحت قطط مجقلبة: ناو ناو العمل صعب ولن نقدر عليه وحدنا
وبعض القرود والثعالب سخرو من الدجاجة وضحكوا ..
الجدادة حصدت الفول براااااااها
وبعد الحصاد طلبت الدجاجة من الحيوانات ان يساعودنها في حمله ولكن كالعادة تواكدوا عليها فعتلته براها
والآآآآخر كدة جا دور العضة فقالت الجدادة: من منكم يريد مساعدتي في اكل الفول
فتطاقشت الحيوانات من كل فج عميق طمعاً في الفول ولكن الجدادة قالت ليهم لا قبة
اكون بيلو
وقالت قولتها الشهيرة:
الفول فولي
زرعته وحدي
حصدته وحدي
وحملته وحدي
وعملت منه دكوة وحدي
وسآكله وحدي
فرجعت الفيران والكدايس والارانب مكسورة الخاطر والندم يبدو علي وجوههم
وهذا جزاء الحيوانات الما cooperative .
تعرف يا تلش ذكرتني استاذنا الجليل وداعه استاذ اللغة العربية في الصف الاول بمدرسة البندر عندما كان يتغني ب:_
لي قطة صغبره سميتها سميره
تنام في الليل معي وتلعبوا باصابيعي
بشعر القصير وزيلها الطويل
ولانني احبها ولااحب ضربها
*******************************************
كانت ايام لها ايقاع!!!!!!!!!!!!!!!!!!!!!!!!!!!!:confused:
وجاء اسماعيل تبدو بسمة في شافتيه
حاملاً صحن طعام ورغيف بين يديه
مشاققه
لكن يا تلش ما لقيت قديم جنس قدم
أجدادنا القدماء
إبراهيم
صلاح ود الطاهر
انا غايتو لا دفعتكم و لا ود حفرتكم
حضانة ... روضة ... تمهيدي ... اساس .. جامعة الرباط
لا سمعنا بي طه القرشي مريض
و لا في القولد التقيت بالصديق
لا أكلنا البفرة في يامبيو
و لا الكسرة في ريرة
بمناسبة ريرة دي البتذكر حليب ريرة يرفع يدو
القده الكيس و شرب لبن البطانة ولا ديري لاند يقيف بي جاي
برهوتــة
قدرك تقيف في العاصفة مكسور الجناح
و في رواية اخري جاي تفتش الماضي ؟؟؟
يا سلاااام يا ود الطاهر تعرف القصيدة دي
ليها وقع خاص لأنو اول قصيدة الواحد حفظها في المدرسة
والغريبة القصيدة الوحيدة الممكن مافي زول بنساها مهما بلغ من العمر
اما اسماعيل الذي عرف ما يصبو اليه القط قائلاً
يا صديقى أنا أدرى بالذى تسعى إليه ..
وما عارف الحصل شنو في الآخر .. بعض من أجزاء هذه القصص الجميلة أكل عليها الدهر ولا زال يشرب
رد المشاققة ــــــــــــــــــــــــــــــــــــــــــــــــــ ــــــــــــــــــــــــــــــــــ
انا قديم لكن المطمن في الأمر هنا معانا ناس من زمن اخرتعو الكسرة (ارشيفيين) :D
غايتو يا إبراهيم دي قلبت فيها هوبة..اقتباس:
المشاركة الأصلية كتبت بواسطة ابراهيم
الظاهر الجدادة دي كانت حاجة بتبيع الفول..
كدي نسأل أستاذ صلاح ود الطاهر من حكاية الدكوة
دي ذكرها لتلاميذه قبل كدا أم لا..
إحتمال تكون فايته عليه.
اقتباس:
المشاركة الأصلية كتبت بواسطة abu_ola
اول تبادي انا لا دفعة ود الطاهر ولا دفعتك
حضانة وروضة وتمهيدى واساس وفوووو الرباط والله لكن جنس عولمة
انتو ناس يااي وهاي وكلزوني وهلم جر
طبعاً عمك ود الطاهر عامل فيها حريف وجا داخل من باب قريب
قال لي قطة صغيرة قال
انا كان ما خايف الكضب يا ابو علا انت تكون من زمن بفتشو القمل في الطابور يوم السبت
لأنو حليب ريرة وريري والحاجات دي كانت زماااان وانا سمعتها عند حبوبة
حاشية: ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ
ابو علا ليك وحشة ياخ
كيف ذاك الكوفي شوب امسى خبراً *** وحديثاً من احاديث الهوي
اقتباس:
المشاركة الأصلية كتبت بواسطة عزيز عيسى
الدكوة دي يا عزيز كانت في النسخة الاصلية من الكتاب
وفي رواية اخرى قالو الجدادة من حلة محجوب
عموماً ننتظر استاذ صلاح يجي يفند لينا الحتة
المشكلة هو زايغ من الموضوع قال لي قطة صغيرة سميتها سميرة
وابو علا طلعنا "اجدادنا القدماء" يعني ركبنا انا واستاذ صلاح في سرج واحد
وانت عارف الاشاعة في المنتدى دة سريعة الزوبان:D
الله يسترنا
برهوتا اللذيذ ..
نسيت شرف والأسد ..
ومحمود الكذاب ..
هجم الأسد .. هجم وهجم ..
اقتباس:
المشاركة الأصلية كتبت بواسطة معتز الريح
يا معتز الحاجات دي ما بتتنسى شرف والاسد شرف الشجاع وهسع لو في تلاتة زي شرف دة كان بقينا اربعة:cool: دة تقريباً في الكتاب الفيهو سهام وإلهام سهام من حلفا والهام من القضارف ولا وين ما عارف.
ومحمود الكذاب والصفحة التالية طوالي بتلقى النملة الشفوقة ولسى الواحد متذكر صورة النملة في بداية الصفحة تمهيد للدخول في براثن القصة ... شنو يا معتز جبت عنوانين واتخارجت دايرين قسس قسس وذكريات تلك المرحلة من اردية ودقشيمات وفسحة فطور وجيب معاك قرمة عليكم الله في زول بتذكر السفوفة بتاعة القنقليز؟
يا إبراهيم ما بتذكر واحدة لكن بحكي ليك القصة دي..
كان يا ما كان.. كان في نمر ماشي في الغابة
وجاتو ليك جوعة شديدة خلاص..
وفجأة شاف ليهو ثعلب ماشي في الطريق مدقس
بس راح شرك ليهو وطب قبضو ليك
قال ليهو شوف يا إبن الذين أنا اليوم جعان
وما لقيت لي عضة
وأهو الحمد لله لقيتك وعايز أكلك..
الثعلب لما سمع كلام العضة خاف من النمر
وبسرعة فكر في طريقة يتحايل بيها وتخارجو من النمر..
الثعلب قال للنمر.. إنت يا زول ما عندك خبر؟
النمر قال للثعلب خبر شنو؟..
الثعلب قال للنمر يا خي أنا الرسول الخاص بتاع الأسد
والأسد دا كلفني إني أقوم بحراسة الحيوانات في الغابة..
النمر قال للثعلب: طيب أنا أصدقك كيف؟
إنت عايز تستكرتني ولا شنو؟
الثعلب قال للنمر لو ما مصدقني تعال أنا بمشي قدامك وإنت أتبعني
وبعدين شوف الحيوانات بتخاف مني كيف وتقوم جارية..
النمر بدأ يحك في راسه ويفكر ولأنه جعان قال للثعلب
أنا موافق أرح أمشي قدامي علشان أتأكد من كلامك..
لكن الحيوانات دي لو ما جرت حأقوم أكلك طوالي
وصوفة واحدة ما يلقوها من جلدك.
قام الثعلب مشى قدام النمر
وشاف الحيوانات تجري وتختبيء..
وطبعا إفتكرها خايفة من الثعلب.
الثعلب قال للنمر: أها ما قلت ليك الحيوانات
ديل عارفني شخصية مهمة
وعشان كدا بخافوا ويجروا مني.
النمر قال للثعلب: يازول هوي أمشي أختاني جاي جاي
والأسد دا ما عايز معاهو مشاكل.. الله بيني وبينه.