علي ......... بالتلاته أكان تخش وتقرا الموضوع دا
أيام الاسبوع:
حدثنا الحاج فلسفه وقال (هنالك اعتقاد سائد بين الناس عن أيام الأسبوع
السبت
بقول ليك السبت اخضر انا ما عارف يوم هو ولا ملاح خدره وعلي حسب ظني مافي واحد بحب السبت من ايام الدراسة لانه كل البلاوي والمصائب بتجتمع فيه وكمان لانه جاي بعد يوم ( ركلسه) هو يوم الجمعه وبالمناسبة كلمة ركلسه وصاحباتها مغرزة وجمجره (مع إضافة نقطتين لحرف الجيم معزرة ما عندي في الكيبورد ) كلمات مختارة من اغنية راجل المرا فإذا تمعنت هذه الاغنية و في (الحته) بتاعت سمحة مرته الكبيرة شينه مرته الصغيرة طيب هو المصيبة الواقعه فيه شنو طال ما انو هي شينه معرسها ليه وكذلك التقدير لامهاتنا وحبوباتنا والحته بتاعت (العجوز الخرفانه تتمسح بالديانه –والعجوز القاعه بره قاعده لي انا للمضره )
يوم الاحد :
هذا اليوم يفرح به المسيحيين .
الاثنين
يوم تفاؤل عند المسلمين فهو يوم مولد المصطفي صلي الله عليه وسلم وفرحا وابتهاجا بهذا اليوم السعيد شارك بعض اخواننا السودانيين بتغيير حرف الثاء بحرف التاء فاصبحت اللتنين وعلي ما اعتقد سبب هذا التغيير (الماتشنية) الماتشنية هي المطابقة او الملائمة ولكي تتطابق كلمات اغنية ( اللتنين الليله وين ما كنا متحابين زي العنب والتين ...... ألخ فمثلا إذا تابعت كلمات هذه الاغنية اتحداك كان تجد فيها حرف ( الثاء)
الثلاثاء
هذا اليوم له فرحتين الاولي البعد عن السبت المتعب والثانية القرب من الخميس المريح وطبعاً ( جاته الجات لي يوم اللتنين ) حيث قلبت الثاء تاءً كما جاء في الماتشات وترجمتها المباريات امات تلاتات الجابوها لينا ناس هيثمات والله لو ما خايف تقولوا علي الجن كان قلبت ليكم الثاء تاء عشان تبقي هيتمات ، وإذا تمعنت في اغنية تلاتا سنة عام وري عام بي صبر شديد منتظرك انا ، كلمة (منتظرك) ذي الجلابية الانصارية تلبس بي جاي وبي غادك بالجانبين يعني شنو إذا تخيلت الاعنية دي لي (بوي يعني ولد ) وبمناسبة كلمة بوي هذه اوصيكم ونفسي بإستخدام صابون الحمام لايف بوي لاني سمعت بقولوا عنه صحي ومطهر لكن ما عارف بكتل الجرثومه البتسبب مرض حمي الوادي المتصدع ولا لا لكن هو كان بكتل كان كتل الحرمه الجننتنا وهدت حيل ميزانيتنا الحرمه البقولوا عليها انثي الانوفليس البتنتج لينا الملاريا ( اكبر دوله مصدره للملاريا ) .. المهم ما علينا نرجع لموضوعنا قلنا اذا تخيلت الاغنية لي ولد ما عليك إلا تعمل اوبننق أي تفتح حرف الراء وإذا تخليتها لي (جكس ) ما عليك الا تكسر الراء لزوم الانوثه بالمناسبة تكسر دي زكرتني ( الكسره ) اخت اللقمة أي العصيدة طبعا اسمها عن اولاد وبنات المغتربين ( فطائر سودانية ) حنكشه ....... راجل المــــر ........... ؟
..ما علينا .نرجع لاغنية تلاته سنة هذه الاغنية لها معنيين قريب وبعيد اما البعيد الذي قصده شاعر الاغنية (التحية لشاعر ومغني هذه الاغنية بلال موسي ) كما قلنا المعني البعيد هو واحد بحب ليها واحده تلاته سنة او واحده بتحب ليها واحد تلاته سنة و قام واحد فيهم (جلي) الموضوع أي (نفسه) اما المعني البعيد هو شعب مغلوب علي امره منتظر تلاتين سنةإجيبو ليه الكاسات قاموا جابو ليه تلاته تلاتات في تلاته مباريات يوم التلات حيث اننا جهزنا السيارات هدية لي ناس هيثمات عددن تلاتين وتلات ماركتن مازدات (مـــــــــــــازده ) نمرت سيارت الكوتش رقم مميز غ ب ن (غبن) 333
الاربعاء
هذا اليوم بالرغم من قربه الشديد ليوم الخميس الفرايحي إلا إننا بتسمع الناس بدعو بيه الدعاء هنا ليس للنفع بل المقصود به الضرر ( إنشاء الله إبقي ليك اربحاء وعقاب شهر ) واظن العين في الاربعاء اصيبت بداء الموية الزرقاء مما دعي بعض اخواننا السودانيين بزرع (الحاء) بدلا عن العين البايظة فاصبحت اللربحا .
الخميس
هذا اليوم فرايحي ( الخميس حفله ورقيص ) في هذا اليوم تقوم السيرة ويختو الحنة ويكبو الضريرة وايضا فيه يعود المجكس لجكساويته والاب لابنائه وشلت السنه (بكسر السين) اكرمكم الله وحماكم من هذه الشله
عمر ابوحسام
