سفيرة بلدي @ وأنت كمان ؟ وإنتي كمان ؟
اولا بسم الله الرحمن الرحيم
والصلاة والسلام على أشرف الأنبياء والمرسلين
ثانيا السلام عليكم ورحمة الله
ثالثا ندخل في الموضوع
مع إن فكرت كثير في المدخل دا لأني ما عرفت أبدأ موضوعي من ياتو حتة بالظبط
أها ...
لاحظت يا جماعة أن نحن السودانين في بلاد الغربة لسانا على وشك الاعوجاج
يعني نكاد نتكلم بي لهجة البلد القاعدين فيها
حتى اذا ما كل الكلام بس ابسط الكلمات بقينا نقولها ولا شعوريا كدا
مع ان الزول بحاول قدر الامكان يحافظ على لهجته وما يخلي اي غزو لهجاتي يدخل عليها
بس دا الواقع ...
والمؤلم اكثر ان ناس تلقاهم يادوووب جو البلد
يعني ما تمو ليهم كم شهر تلقاهم اتقنو اللهجة وبقا كلامهم ثابت على كدا
حتى مع السودانيين ودا شيء مؤسف جدا والله
موضوعي ...
طبعا وزي ما عارفين ان كل زول هو عبارة عن سفير لي بلده
ما بالضرورة الزول يدخل سلك بدلوماسي ويخش سفارة عشان ابقا بي شكل رسمي
بس دي الحقيقة المفروض نتعامل بيها
( الايام دي بقيت اهلوس بالسلك دا لان في النفاج كمان عندي موضوع عن السلك بس مختلف
دي ما دعاية لي موضوع ولا شي ما تفهموني غلط )
يعني لي ما نتكلم بي لهجتنا وين الغلط
لي ما نحاول نأثر في الغير زي ما هم بأثروا فينا حتى واذا نحن الضيوف وهم اسياد البلد
يعني ما بالضرورة نأثر فيهم ونخليهم يتكلمو زينا
بس على الاقل نأثر فيهم بأنهم يفهمو كلامنا واسلوبنا وطريقتنا في الكلام
وما نضطر نعيد كلامنا اكثر من مرة عشان يفهمونا
ايوا صح انا عانيت من الحتة دي كثير جدا
مع العلم انا ما عشت في السودان وبمشي اجازات فقط
والاجازة لا تتعدى 45 يوم واحيانا اقل
بس ما اتخليت عن لهجتي ابدا ولا حا اتخل
لان مافي احلا من لهجتنا ولان اهلنا علمونا نحافظ على تقاليدنا موروثاتنا
واللهجة من ضمن الحاجات دي
قصة صغيرة : في بداية عملي بالشركة دي حاولت جاهدة ما ادخل ولا كلمة غير سودانية في كلامي
والحصل ان زميلاتي كانو بكررو اي كلمة اقولها ومصحوبة بي ضحكة
يعني طريقة استهزاء وانتي بتقولي كلام بضحك
وخاصة كلمة ( آآآآآي ) بكرروها في الدقيقة 500 مرة
واشوف الابتسامات الجانبية الغياظة واتجاهلها
بس جد حاولت اكون عادية وما اظهر ليهم استيائي من الشي دا
وكان مجهود جبار مني كوني استحملت
بس حا تندهشو اذا قلت ليكم
بعد فترة من الزمن زميلاتي بقو يتكلمو معاي بي لهجتي انا
وحتى في بيوتهم ومع اهلهم بقو ادخلو بعض الكلمات الاخذوها مني
والمرة دي ما بطريقة استهزاء بالعكس تماما
وحتى البت عاملة النظافة مسكينة ربنا يعينها بقت تتكلم زينا ...غااايتو ...
دا من ناحية اللهجة .... يتبع ....
