المناخ الصحرواي متقلب ما تقدر تتنبأ بيهو ممكن اليوم برد أو تاني يوم اكون حر ثالث يوم مطر رابع يوم غبار يعني ما زي المناخ الاستوائي بتاعنا البرد ادخل ليك بالتدريج وكذلك باقي الفصول ...في منطقة الخليج لازم تخلي معاك جكت في فترة الشتاء في السياره لزوم تقلب الجو كمان كمامه لو فتح ليك غبار والمكيف لو ما شغال واطاتك اصبحت .
الصباح أنا ماشي علي الشغل في السودان كنا موظفين بنوك بعد ما دخلته البنك جاء المراسله زي ما بنسميهوا في السودان هنا بقولوا ليهو Office Boy قال لي في جماعه عايزنك في الاستقبال مشيت لقيتم ناس الامن بدون اي مقدمات قالوا لي تمشي معانا ركبت او مشيت معاهم لي مكاتب الامن طبعا ما من حقك تسأل مع ناس جهاز الامن بتاعنا وصلنا مكاتب الامن علي طول دخلت الحبس (( 114)) كانت المفاجأة لقيت واحد زميلنا جوه استغربت الراجل ده الجابو جوه شنو سلمت عليهوا لقيتوا ليك منطط عيونوا متكرفس قاعد في الواطه الوقت كان شتاء استغربت الراجل ده مالوا مسكوهوا ناس الامن طبعا هو صديق عمل ودفعه اتعينا سواء في البنك من مدينتنا ما اتقابلنا في مراحل دراسيه الظروف هي الجمعتنا لاكن الراجل ما عندوا علاقه بالسياسه بتاع شمارات اجتماعيه في البنك اقول ليك فلانه طلقوها فلانه بتحب فلان ونستوا كلها مع البنات فكرته قلته معقوله الزول ده جاب ليهوا اشاعه في زوجة الرئيس او مسكوهوا...... قبل ما أسالوا قال لي عباس والله أنا اسف كنت مضطر لي كده.... انا ما فاهم الموضوع قلت ليهوا ولا اهمك الناس ديل بكونوا غلطانين بعد شويه بفكوك... بعدين انا الاسف يا ابو الشباب امكن مسكوك عشان بتمشي معاي صاحبنا مدد رجليهوا او قال لي الحكايه ما كده اصلوا انا مشيت جامعه الجزيره كان عندي مواعيد مع خطيبتي لقيت ليك هناك الجامعه مشاكل كثيره في طلبه تم اعتقالم حسي معانا في الزنزانه الثانيه... طلع بيان من التجمع الديمقراطي لقيت لي نسخه شيلتها معاي البيان كلاموا قوي شديد عجبني لاكن الخلاني اشيلوا شنو والله ماعارف..... بعدين البيان عجبني كنت بديهوا للناس اشوفوهوا كان في ناس اقولوا لي ادينا ليهوا قلت خلاص اصور كم نسخه البكون عايزوا مني اديهوا نسخه والله صورة بس عشره نسخ او وزعت منهم سبعه لي جماعه في الحي وشايل الباقي في جيبي انا ماشي علي البيت ما اشوف ليك عربيه تقيف قالوا لي اركب شفته الجماعه شايلين اسلحه (( كلاشنكوف)) كرعي قعدن اضربن من الخلعه بركت في الواطه نزلوا شالوني فوق قالوا لي وقت انت ما راجل البوديك توزع بيانات شنو.... الله امرقنا من المصيبه دي...... قلت ليهوا والله تشوف مصيبه غيرك اهون مصيبتك انا والله مسكوني سااااااااكت...... قال لي معاك سجاره اديتوا سجاره ولعتها ليهوا تعرف يا عباس انت مسكوك ليه ... قلت والله شمشره ده امكن عارف ولا بقي خبير في الشئون السياسيه قلت ليهوا ليه يا ابو الشباب..... قال لي انا في التحقيق طبعا سألوني البيانات دي جبتها من وين طبعا انت اول من جيت انا قلت ليك اسف صاح قلته ليهوا ايوه........ قال لي انا قلته ليهم البيانات دي اداني ليها عباس ؟؟؟؟؟؟؟؟؟؟؟
اول حاجه عملتها كان شايل سجارتي باقي فيها نص علي طول بسرعه ختفت السجاره من شفايفوا.. قال لي ده شنو يا زول قلتليهوا اولا اديني سجارتي او بعدين كمل الموضوع الظاهر القعده حا طول يا النعجه قلت والله الزول ده ودانا في الف داهيه .... طيب يا ابو الشباب ليه قلت حقتي انا او متين انا قابلتك عشان اديك بيانات ليه تكذب دي اخر صداقتي معاك... قال لي عشان انت صاحبي وأنا قلت للناس ديل الحقيقه ما صدقوني قعدوا اقولوا لي في التحقيق انت بتمشي مع عباس احنا مراقبنك قلت احسن حاجه انا اتفكه منهم اقول البيانات دي بتاعتك انت وانت اصلوا امورك معاهم مطينه او زفت والموضوع بلف او بجيك تاني او قبل كده انت مسكوك كم مره بتطلع منها والله انا نوم ما جاني من امس في البرد ده وجاني مقص وإسهال الكلام ده ما بقدر عليهوا او كمان عندي ملاريا ... بعدين الواحد كبير كده اقعدوا املطشوا فيهو كمان معاها تكفت..... والله قلت الاطرش ده ودانا فيها نشوف اخرا شنوا...... او احنا بنتكلم سواء كان معانا جماعه في الغرفه زبيديه هم قبائل بدويه هاجرت من السعوديه تعمل في التهريب بس بعرفوا التهريب والخيم بتاعتم المصنوعه من الشعر في السعوديه هنا بقولوا ليها بيت الشعر... واحد فيهم سألني يازول انت الجماعه ديل قبضوكم لي شنو قلت ليهوا سياسه عاين لي واسكت اتكلم مع اخوانوا بهمس تاني بعد فتره يازول انتوا مالكم اقول ليهوا سياسه.... كان السؤال مكرر كل مره مع توتر الاعتقال زهجت من الراجل لما سألني تاني قلت ليهوا بي نهره او معاها صوت عالي ما قلنا ليك مسكوناااااااااااااااااااااااا في السيااااااااااااااااااااااااااااااسه سألني تاني بدوكم فيها كم السياسه دي قلت ليهوا مافيها قروش قال لي يعني بتشتغلوا ساكت بلاش كده انت قايلنا احنا ما بنعرف ولا انتو ما عايزنا نشتغل معاكم عشان ما نخم القروش منكم ..........
الصدف احيانا غريبه انا و صاحبي اتلمينا تاني هنا في السعوديه هو متزوج حديثا اتصلت عليهوا قلت ليهوا تعال اشرب معاي شاي مغرب انت وزوجتك نتونس شويه الذكريات الجميله بتاعت السودان الراجل مشكور لبي الدعوه بنشرب في الشاي ونضحك نعيد في الزكريات كانت جلسه جميله قال لي بالله ما تشغل المكيف قلت ليهوا الجو شـتاء قال لي ما حاسي بي السخانه دي .......... اها اجيكم للمناخ الصحراوي القلناهو اول الحكايه فوق........
قلت ليهوا يا ابو الشباب والله البلد دي في حاجات من جيت هنا ما قدرته افهما خالص انا من جيت السعوديه ثلاثه ما قدرته افهمم (( الطقس – البورصه – المدام)) الراجل بالله زي القرصوا ثعبان قال لي وين زوجتي امال قلت ليهوا قاعده مع المدام عايزين نسرقا منك رفع صوتوا عالي – امال –امال –امال يلا نمشي خلاص شربنا الشاي قلت ليهوا اقعدوا اتونسوا شويه شنو بي سرعه كده قال لي يا عباس تاني سياسه؟؟؟؟؟؟؟؟؟؟
