طبعا معظمكم او كلكم تعرفون هذا المثل "مين عارف بشير في الخرطوم"
ولي معه قصة، بس نشرحو اولا للذين لا يعرفونه
بشير دا .... أي بشير... قام دخل الخرطوم لأول مرة ... شاف الناس نضاااف قام حسب قروشو اشترى ليهو "فنيلة داخلية" جديدة ولازم يغير القديمة ، بدا يبحث عن مكان ليس فيه مارة فيغير ، لم يجد مكانا فاضيا، كلما يمش بعيد يلقى المكان برضو مليانة ناس.....
في الاخر وقف في الشارع وقال مين يعرف بشير في الخرطوم ، خلع وغير...
وجرى قوله هذا مثلا ...يضرب عندما تريد ان تفعل شيئا ولا تبالي بمن حولك إذا كانوا لا يعرفونك
قصتي مع المثل:
في مرة من المرات والدنيا ليل كنت اقود السيارة في مكان مقطوع بالرياض لا يسكنه السودانيون ناهيك عن ناس منطقتنا ولا واحد من معارفنا، واثناء سيري قابلتني اشارة مرور ، والله مولعة خضراااااء ،
يتسلط علي واحد بتاع شاحنة طويلة جاء قدامي وحاول يلف،
غايتو قبضت فرملة وانتظرته عشان يلف وانا وراهو، أتاريها في المدة دي الاشارة طفت وبقت حمراء، ومع اني حسيت باحمرار الاشارة لكن في نفسي قلت مين عارف بشير في الخرطوم ..دست بنزين وواصلت السير
العسكري التقول ما عندو اهل،
المقعدو في الليل دا هنا شنو؟؟؟
قاعد متخبي بالجانب الاخر ولا واحد شايفو مافي،
نحن ثلاث سيارات القطعنا الاشارة،
الاول هرب
والثاني كمان هرب،
طبعا العسكري متخيلني انا ح أهرب برضو....
قام اتسادى ليا في نص الطريق،
وجرَّيت ليك فرملة ......
وقفت على الرصيف،
مكان مقطوعة،
الدنيا ليل،
اولادي في البيت براهم،
وقطع الاشارة معناهو سجن،
اليوم اربعاء،
باكر وبعد باكر مافيش دوام،
المرور مش ح يفتح الا يوم السبت
يعني اقعد في السجن إلى يوم السبت!!!!،
والله عيب،
الواحد بعد المدة دي كلها
في المملكة يقوم كمان يدخل السجن...
بس الحمد لله ولا واحد شايفني مافي،
لا سوداني ولا واحد من المنطقة،،
الحمد لله، اقضي اليومين
وبعد داك أكان سألني أي واحد ح اقول ليهو أي حاجة،
بس سجن ما ح أقول...
يقوم يطربق علينا البلد بيهناك...
يلا...مين عارف بشير في الخرطوم...
استسلمت ...
لكن ساحاول انق شوية مع العسكري يمكن يحن شوية....
بس باستحياء
وكمان اخوكم يتقاصر عشان كمان ما يشوفني واحد من معارفنا.....
بالله في اثناء الحجة ديك اسمع ليك واحد ...النور ...النور ....صوت بعيييييد ......بعيد جدا ...
دا منو دا البعرفني دا ....
القاهو ليك (....) ....
دا الجابو هنا بالليل شنو؟؟؟؟
ودي محل بجيها زول عاقل بالليل دا؟؟؟؟
ايوة مااااالك عاوز شنو؟؟؟؟
اولادك وين؟؟؟؟ وهل محتاجين حاجة ؟؟؟؟
لا حول ولا قوة الا بالله....
يا اخي اتفاءل خير .....
انا الحكاية بسيطة وراجع ليهم....
يعني ما قطعت الاشارة؟؟؟؟
قطعت مين و اشارة مين ؟؟؟؟ يلا امش ما في حاجة
ما قطعتها ...يلا سلام
فوووو دور سيارتو وفات ....
الزول دا بيشبهك........فات خلاك لشنو؟؟؟؟يسالني العسكري..مافهم اخونا داك قال شنو
لا دا راجل شغال مع الامير (....) مشى يجيب باسطة..
وفي نفسي اقول سواها فيني بشير في الخرطوم
أمير ؟؟؟ واااسطة من الأمير ....امش امش بس تاني ما تقطع الاشارة ...آخر مرة
سلام ....ونمت بالبيت
