هو: مش معقول مفاجاه غير متوقعة معقولة . ساره بعد الزمن دا كله الاقيك هنا ..
هي: خالد بشحمه ولحمه .. عفوا بلحمه وعضمه لانه عمرك ما كان عندك شحم ..
هو: اسف يا ساره انت زاكرتك جلت ولا شنو انا ما خالد انا حسام خلاص كمان نسيتينا ..
هي: وانا ماساره ياحسام يعني انت الزاكرتك قوية انا سوسن خلاص نسيتني كمان ..
هو: معقولة انتي ساره ذاتها بتاعة الدفعة ثنمتاشر زراعة جامعة الجزيرة ؟؟
هي: يا اخوي انا سوسن خريجة جامعة السودان هندسة الكترونيات وانت عاوز تستهبل علي يا خالد وفاكر زاكرتي خارج الشبكة .. وانت ما خالد السنير قدامنا وكم مرة عملت فينا مقلب لمن كنا برالمة ..
هو : يا شيخة انا عمري مادخلت جامعة السودان ولا حتى زياره ولا عارف حتى يدخلوها بوين وانا من الدفعة خمستاشر جامعة الجزيرة كلية الاقتصاد ..
هي: وانا بقول ليك حاجة انا خلي جامعة الجزيرة مدني ذاتها ما شفتها الا عابرة ترانسيت لناس خالتي في القضارف وعمي في كسلا .. وآسفة كان دخلت فيك شمال وشحم ولحم وعضم وكلام من بيت الكلاوي ..
هو :انا عارف تقول ابوكي جزار
هي: دمك تقيل اتقل من زبادي ريري ذاتها ..
هو : وانت دمك اتقل من اب دمام ذاته ..
هي: ها ها ها هاي ..
هو : بمناسبة عدم تعارفنا دا ما تجي نعزمك على حاجة بارده
هي: ما عندي مانع بس ما تتعود وتحاول تتعرف علي اكثر من كدا من هنا وكله واحد يروح لحاله ..
هو: وانت تبطلي اللبط واوعك تتصلي علي في الرقم 128999955 وتقولي الرقم جاك بالصدفه..
هي: قول رقمك تاني عشان اسجله واعمل عليه بلوك وتاني ما اتصل عليه ولو بالخطأ.
هو: وانت اعملي لي مس كول عشان اسجل رقمك واعمل عليه بلوك كمان وما تتلبطي تقولي ضربت رقم عشوائي جاني رقمك ..
هي : وانت تبطل لبط اوعى اشوفك حايم بامدرمان شارع الاربعين محطة الدايات وتقيف جمب بقالة الفوراوي وتقول جابتك الصدفة بهناك ..
هو : وانت اوعى تتاوقي يوم الخميس الساعة خمسة مساء بباب بيتكم كل مره وتعملي فيها عاوزة تدخلي اخوانك الصغار لشاي المغرب .
هي: ما تقلدني وتطلب عصير مانقا مخلوط وتقول هو عصيرك المفضل
هو:هو فعلا عصيري المفضل لكن اطلب الاحتياطي عصير جوافة ..اكيد حتقولي هو عصيرك الثاني ..
هي : اوعى تقول عاوز تاخذني في طريقك معاك وانت رايح امدرمان لاني انا ما بركب مع راجل غريب لسع ما عارفه اسمه بالكامل ..
هو: اوعى تقولي اسم حسام الحاج عثمان مره بيك قبل كدا لانه انا خريج الجزيرة ما جامعة السودان .. وكمان تقولي ساكن في بحري الاملاك لانه الصدفة لو طابقت في الاسم ما ممكن تتطابق في الاسماء ..
هي : وانت كمان ما تقول انك سمعت عند اخواتك اسم سوسن سيد احمد خضر لانه انا ما عندي اي واحدة من صاحباتي ابوها اسمه الحاج عثمان ..
هو: خلاص قومي اوصلك عشان ما تقولي الولد ما عنده مروه ونخوة ما بيوصل بنت في الليل لاهلها ..
هي : وانا ما حا اركب معاك عشان ما تفتكر انه انا ممكن اركب مع واحد لسع متعرفه عليه قبل نص ساعة .
هو: خلاص انا ما حا صر عليك خلينا نتفارق عشان ما تفتكري انه انا انسان ملحاح وعنيد لكن خليني اوصلك الموقف على الاقل ..
هي : ما في مانع عشان ما تفتكر انه انا ما عندي ثقة في نفسي ..
والموضوع جاري عشان ما تفتكروا انه القصة مبتوره وما عندها باقي
